- Börn
- Líkamsárás
- Skaðabætur
- Skilorð
D Ó M U R
Héraðsdóms Austurlands þriðjudaginn
20. nóvember 2018 í máli nr. S-35/2018:
Ákæruvaldið
(Helgi Jensson aðstoðarsaksóknari)
gegn
A
(Auðun Helgason lögfræðingur)
Mál þetta, sem
dómtekið var 5. nóvember sl., er höfðað með ákæru lögreglustjórans á
Austurlandi, útgefinni 18. september sl., á hendur A, kennitala […], […], […].
Í endanlegri gerð ákæru, sbr. 1.
mgr. 180. gr. laga nr. 88/2008, er ákærði saksóttur;
„fyrir líkamsárás og brot á barnaverndarlögum
í […] með því að hafa, að morgni dags, þriðjudaginn 22. maí 2018, í … […],
slegið B, þá 6 ára gamlan, með handabaki hægri handar í andlitið, en þetta var
til þess fallið að vera ógnandi og vanvirðandi gagnvart B bæði andlega og
líkamlega.
Einkaréttarkrafa: Af hálfu C, f.h. ólögráða sonar síns B, er þess
krafist að ákærði verði dæmdur til greiðslu miskabóta að fjárhæð kr. 500.000, auk vaxta skv. 8. gr. laga um vexti- og verðtryggingu
nr. 38/2001, frá 22. maí 2018 til þess dags þegar mánuður var liðinn frá því að
bótakrafa þessi var birt fyrir kærða og dráttarvaxta skv. 9. gr. sömu laga frá
þeim degi til greiðsludags, sbr. 6. gr. sömu laga. Þá er þess krafist að kærða
verið gert að greiða réttargæslumanni brotaþola hæfilegan málskostnað vegna
réttargæslu, skv. tímaskýrslu, auk virðisaukaskatts á málskostnað.
Telst þetta varða við 1. mgr. 217
gr. almennra hegningarlaga nr. 19/1940, sbr. breytingarlög og 1. mgr. 99. gr.
barnaverndarlaga nr. 80/2002, sbr. breytingarlög.
Þess er krafist að ákærði verði
dæmdur til refsingar og til greiðslu alls sakarkostnaðar.“
Skipaður verjandi ákærða, Auðun
Helgason lögmaður, krefst þess fyrir hönd ákærða á refsing hans verði felld
niður, en til vara að honum verði gerð vægasta refsing sem lög leyfa. Þá krefst
verjandinn þess að allur sakarkostnaður falli á ríkissjóð, þ.m.t. hæfileg
málflutningsþóknun hans og ferðakostnaður.
I.
Fyrir dómi hefur ákærði skýlaust
viðurkennt sakargiftir, líkt og þeim er lýst í ákæru og þá í ljósi
áverkavottorðs læknis og yfirlýsingar sækjanda, að um kinnhest hafi verið að
ræða og að drengurinn hafi í tvígang átt í útstöðum við skólasystkin skömmu
eftir greindan atburð.
Lýst játning ákærða er í samræmi við
rannsóknarskýrslur lögreglu, þ. á m. ljósmyndir og framburðarskýrslur og
læknisvottorð, en í síðastgreinda skjalinu segir m.a. um skoðun drengsins þann
23. maí sl.: „Við skoðun í dag er
drengurinn áberandi útitekinn í andliti og sællegur. Maður getur ekki með vissu
sagt að það séu undirliggjandi áverkamerki á hægri kinninni. Hann er þó kannski
ívið rjóðari á hægri kinn, en þeirri vinstri, og á einum stað er lítill
blámablettur. Augnhreyfingar í lagi. Tennur heilar og fastar. Hálshreyfing í
lagi. Skoðun leiddi í ljós að hann að mestum líkindum hefði minniháttar
áverkamerki á hægri kinninni, sem gætu samrýmst því að hann hefði fengið
kinnhest deginum áður.“
Með játningu ákærða og með vísan til
ofangreinds er eigi ástæða til að efa að játning ákærða sé sannleikanum
samkvæm. Er því nægjanlega sannað að ákærði hafi gerst sekur um þá háttsemi,
sem í ákæru er lýst. Brot ákærða eru réttilega heimfærð til laga í ákæruskjali.
Verður lagður dómur á málið án
frekari sönnunarfærslu, sbr. heimildarákvæði 164. gr. laga nr. 88/2008.
Að ofangreindu virtu verður ákærði
sakfelldur fyrir þá háttsemi sem honum er gefin að sök í ákæruskjali.
II.
Ákærði, sem er […] ára, hefur ekki
sætt refsingum svo kunnugt sé.
Þegar litið er
til þess að umræddur verknaður beindist gegn ungu barni í skólastarfi verður 1.
tl. 1. mgr. 70. gr. hegningarlaga nr. 19/1940 ákærða til
refsiþyngingar.
Fyrir dómi játaði
ákærði brot sitt skýlaust, líkt og hann hafði áður gert fyrir lögreglu. Að auki
liggur fyrir að ákærði skýrði umsjónarkennara frá atvikum máls nær strax eftir
verknaðinn. Við meðferð málsins fyrir dómi lýsti ákærði yfir eindreginni iðran
og féllst á bótaskyldu.
Að öllu ofangreindu virtu telst refsing ákærða hæfilega ákveðin tveggja mánaða fangelsi, en með hliðsjón af því sem hér að ofan hefur verið rakið og þá m.a. til mildunar, sbr. 8. tl. 1. mgr. 70. gr. hegningarlaganna, þykir fært að fresta fullnustu refsingarinnar skilorðsbundið og skal hún niður falla að liðnum þremur árum frá uppkvaðningu dómsins að telja haldi hann almennt skilorð 57. gr. laganna, sbr. 4. gr. laga nr. 22/1955.
III.
Guðbjörg Anna Bergsdóttir, lögmaður
og skipaður réttargæslumaður, lagði fram einkaréttarkröfu við lögreglurannsókn
málsins og er henni lýst hér að framan. Krafan var birt ákærða 22. júní sl.
Lögmaðurinn rökstuddi kröfuna fyrir dómi og vísaði m.a. til 26. gr.
skaðabótalaganna nr. 50/1993, en einnig vísað hún til og rökstuddi útlagðan
kostnað, sem til hefði fallið vegna ferðalags drengsins og móður hans vegna
skýrslutöku í Barnahúsi í Reykjavík við lögreglurannsókn málsins.
Fyrir dómi hefur ákærði, eins og
fyrr sagði, fallist á bótaskyldu, en hann krafðist aftur á móti lækkunar
einkaréttarkröfunnar.
Ekki liggja fyrir gögn um
afleiðingar brots ákærða, en að mati dómsins er ótvírætt að lýstur verknaður er
til þess fallinn að hafa áhrif á andlega heilsu nefnds drengs. Á drengurinn því
rétt á miskabótum úr hendi ákærða vegna háttseminnar, sbr. ákvæði 26. gr.
skaðabótalaga nr. 50/1993. Að þessu virtu og atvikum máls að öðru leyti þykja
miskabæturnar hæfilega ákveðnar 200.000 krónur, ásamt vöxtum eins og í dómsorði
greinir. Að auki er fallist á kröfu vegna útlagðs ferðakostnaðar að fjárhæð
48.200 krónur.
Að kröfu ákæruvalds og með vísan til
1. mgr. 235. gr. laga nr. 88/2008 og framlagðra gagna ber að dæma ákærða til að
greiða allan sakarkostnað, þ.e. þóknun skipaðs verjanda og skipaðs
réttargæslumanns, en einnig útlagðan ferðakostnað þeirra, eins og nánar segir í
dómsorði og þá með hliðsjón af tíma- og verkskýrslum.
Af hálfu lögreglustjóra fór með
málið Helgi Jensson aðstoðarsaksóknari.
Ólafur Ólafsson héraðsdómari kveður
upp dóm þennan.
Dómsorð:
Ákærði, A, sæti fangelsi í tvo
mánuði, en fresta skal fullnustu refsingarinnar og falli hún niður að þremur
árum liðnum frá dómsuppsögu að telja, haldi hann almennt skilorð 57. gr.
almennra hegningarlaga nr. 19/1940, sbr. 4. gr. laga nr. 22/1955.
Ákærði greiði C, f.h. ólögráða sonar
síns, B, 200.000 krónur í miskabætur, ásamt vöxtum skv. 8. gr. laga um vexti-
og verðtryggingu nr. 38/2001, frá 22. maí 2018 til 22. júlí sama ár, en með
dráttarvöxtum skv. 9. gr. sömu laga frá þeim degi til greiðsludags, sbr. 6. gr.
sömu laga. Að auki greiði ákærði útlagðan ferðakostnað að fjárhæð 48.200
krónur.
Ákærði greiði sakarkostnað, þ.e.
þóknun skipaðs réttargæslumanns brotaþola, Guðbjargar Önnu Bergsdóttur
lögmanns, 168.640 krónur, að meðtöldum virðisaukaskatti, en einnig ferðakostnað
hennar, sem þykir hæfilega ákveðinn 90.920 krónur, svo og þóknun skipaðs
verjanda síns, Auðuns Helgasonar lögmanns, 184.450 krónur, að meðtöldum
virðisaukaskatti, en einnig ferðakostnað hans að fjárhæð 40.750 krónur.