- Skuldamál
Ár 2019,
fimmtudaginn 2. maí, er á dómþingi Héraðsdóms Reykjaness, sem háð er að
Fjarðargötu 9, Hafnarfirði, kveðinn upp í máli nr. E-950/2018:
Atlantic Seafood ehf.
(Ingólfur
K. Magnússon lögmaður)
gegn
KEF seafood ehf.
(Karl
Jónsson lögmaður)
svofelldur
d ó m u r :
Mál þetta, sem
þingfest var 3. október 2018 og dómtekið 26. apríl sl., var höfðað með stefnu,
birtri 20. september 2018.
Stefnandi
er Atlantic Seafood ehf., kt. 000000-0000,
Reynigrund 9, 200 Kópavogi. Stefndi
er KEF seafood ehf., kt. 000000-0000, Bakkastíg 16, 260 Reykjanesbæ.
Stefnandi gerir þá dómkröfu að
stefndi greiði stefnanda skuld að fjárhæð 4.769.703 krónur ásamt dráttarvöxtum
samkvæmt 1. mgr. 6. gr. laga nr. 38/2001 um vexti og verðtryggingu frá 21. mars
2018 til greiðsludags. Þá krefst stefnandi málskostnaðar úr hendi stefnda.
Stefndi krefst sýknu af kröfum stefnanda auk málskostnaðar.
Fór aðalmeðferð málsins fram þann 26. apríl sl. og var málið dómtekið að henni
lokinni.
Málsatvik.
Samkvæmt gögnum
málsins voru stefnandi og stefndi í viðskiptasambandi á árunum 2017 og 2018 með
fiskkaup á markaði. Vann stefndi og keypti fisk á fiskmarkaði fyrir stefnanda
og verkaði síðan til útflutnings. Samkvæmt gögnum málsins gerði stefndi
stefnanda reikninga fyrir vinnu og þjónustu sína. Í viðskiptum aðila myndaðist
ofgreiðsla frá stefnanda til stefnda. Samkvæmt viðskiptayfirliti stefnanda var
þann 28. febrúar 2018 ofgreitt til stefnda 4.769.704 krónur. Stefnandi sendi
stefnda innheimtubréf og ítrekanir þann 4. apríl, 16. apríl., 8. maí og 18. maí
2018 sem stefndi varð ekki við. Í málinu liggur fyrir reikningur frá stefnda á
hendur stefnanda frá 1. maí 2018 að fjárhæð 7.481.247 krónur vegna
leiðréttingar afreikninga, íblöndunarefna og launa á uppsagnarfresti. Endalok
samstarfs aðila var að sögn stefnda vegna þess að hann hafi fengið of smáan
fisk frá stefnanda til að verka sem hafi verið kostnaðarsamara en að verka
stóran fisk. Þá hafi stefndi fengi minni lifur úr smærri fiski en hann hafði
haft væntingar um. Hafi stefndi því farið fram á hækkun á verði þjónustu sinnar
við stefnanda. Hafi þetta verið um miðjan desember 2017. Samvinnu þeirra hafi
þó ekki lokið fyrr en í lok febrúar 2018. Samkvæmt stefnanda var krafa stefnda
um hækkun á þjónustu hans meiri en svo að endanlegur kaupandi vildi greiða það
hátt verð fyrir vöruna. Því hafi hann sagt upp samningi við stefnda.
Skýrslur
fyrir dómi.
Fyrirsvarsmaður
stefnanda, Gunnar Valur Sigurðsson, gaf skýrslur fyrir dóminum ásamt
fyrirsvarsmanni stefnda, Einari Þ. Magnússyni.
Málsástæður
og lagarök stefnanda.
Stefnandi byggir
kröfur sínar á því að skuld þessi sé tilkomin vegna viðskipta aðila á árunum
2017 til 2018 vegna fiskkaupa á markaði. Ofgreiðsla hafi myndast frá stefnanda
til stefnda en samkomulag hafi verið milli aðila um að stefndi myndi gera upp
þessa kröfu og hafi verið gerður reikningur þann 21. mars 2018 fyrir
ofgreiðslunni. Ekki hafi orðið af því að stefndi greiddi skuldina en stefndi
hafi ekki mótmælt kröfunni. Stefnandi hafi gert ítrekaðar tilraunir til
innheimtu skuldarinnar eins og framlögð skjöl beri með sér. Stefndi hafi ekki
mótmælt kröfunni fyrr en í maí 2018.
Stefnandi vísar til meginreglu
kröfuréttarins um efndir fjárskuldbindinga en regla þessi fái m.a. stoð í lögum
nr. 50/2000 um lausafjárkaup. Kröfur um dráttarvexti styður stefnandi við
reglur III. kafla vaxtalaga nr. 38/2001 með síðari breytingum. Kröfuna um
málskostnað styður stefnandi við 1. mgr. 130. gr. laga nr. 91/1991.
Málsástæður og lagarök stefnda.
Stefndi byggir sýknukröfu sína á því að í viðskiptum aðila hafi skuld
skapast hjá stefnanda við stefnda að fjárhæð 8.000.000 króna. Stefndi kveðst
hafa gefið út reikning á stefnanda að fjárhæð 6.673.425 krónur án
virðisaukaskatts þann 1. maí 2018. Stefnandi hafi ekki greitt framangreindan
reikning þrátt fyrir að reikningurinn sé búinn að vera í innheimtu frá 1. maí
2018. Samkvæmt þessu eigi stefndi gagnkröfu á hendur stefnanda sem sé
umtalsvert hærri fjárhæð en sú krafa sem komi fram í stefnu. Gagnkrafa stefnda
á hendur stefnanda nemi samtals um 8.000.000 króna og komi sú fjárhæð til
skuldajafnaðar á móti fjárkröfu stefnanda samkvæmt heimild í 1. mgr. 28. gr.
laga nr. 91/1991. Séu sýknukröfur af hálfu stefnda m.a. rökstuddar með vísan
til þess að stefndi eigi á móti kröfum stefnanda gagnkröfur sem séu hærri en
krafa stefnanda og með skuldajöfnuninni teljist reikningur stefnanda vera
greiddur. Telur stefndi útgefinn reikning stefnanda vera tilhæfulausan og gefi
hann ekki rétta mynd af uppgjöri aðila.
Stefndi byggir kröfur
sínar á meginreglum kröfu- og samningaréttar og vísar til laga um meðferð
einkamála, m.a. vegna málskostnaðar.
Forsendur
og niðurstaða.
Mál þetta snýst um
reikning sem stefnandi gaf út þann 23. mars 2018 á hendur stefnda að fjárhæð
4.769.703 krónur svo og reikning sem stefndi gaf út þann 1. maí 2018 á hendur
stefnanda að fjárhæð 7.481.247 krónur. Er reikningur stefnanda vegna ofgreiðslu
á fiski og vegna markaðskaupa 2017/2018. Til stuðnings reikningnum lagði
stefnandi fram viðskiptayfirlit þar sem fram koma reikningar og innborganir frá
stefnanda til stefnda. Stefndi mótmælti umræddu yfirliti og kvað niðurstöðuna
eiga að vera um núll því að stefndi skuldi stefnanda ekkert. Á
viðskiptayfirliti sem stefnandi byggir reikning sinn á koma fram númer
reikninga sem stafa frá stefnda, dagsetningar og fjárhæðir ásamt dagsetningum
innborgana frá stefnanda til stefnda. Stefndi mótmælti skjali þessu og kvað það
ekki rétt. Stefndi hefur hins vegar ekki sýnt fram á með neinum hætti hvað í
skjalinu er rangt eða hvort vanti einhverja reikninga í það og þá hvaða. Telur
dómurinn það hafa staðið stefnda nær að sýna fram á það ef greiðslur vanti inn
í viðskiptayfirlitið og beri stefndi hallann af því. Verður krafa stefnanda um
greiðslu á reikningi útgefnum 21. mars 2018 því tekin til greina.
Stefndi krefst sýknu en til vara að
dómkröfur stefnanda verði lækkaðar verulega. Byggir hann á því að stefnandi
skuldi stefnda reikning að fjárhæð 7.481.247 krónur og krefst stefndi þess að
sá reikningur verði skuldajafnaður á móti kröfu stefnanda. Stefnandi mótmælir
kröfu stefnda um skuldajöfnun.
Í
1. mgr. 28. gr. laga um meðferð einkamála nr. 91/1991segir að varnaraðila sé
rétt að hafa uppi gagnkröfu til skuldajafnaðar í máli án þess að gagnstefna ef
skilyrði fyrir skuldajöfnuði séu fyrir hendi. Gagnkrafan skal þá höfð uppi í
greinargerð en sjálfstæður dómur geti ekki gengið um hana. Hefur stefndi
ofangreinda kröfu uppi í greinargerð sinni. Skilyrði skuldajöfnunar eru að
kröfurnar séu samkynja eða eigi rætur að rekja til sama atviks, aðstöðu eða
löggernings.
Á
reikningi stefnda kemur fram að hann sé leiðrétting afreikninga að fjárhæð
3.307.502 krónur, íblöndunarefni TOR, 331.210 krónur, og laun í uppsagnarfresti
að fjárhæð 3.034.713 krónur. Í skýrslutöku við aðalmeðferð málsins kvað
fyrirsvarsmaður stefnda reikninginn hafa verið gerðan eftir að stefnandi krafði
stefnda um ofgreiðsluna. Kvað hann leiðréttingu afreikninga koma þannig til að
stefndi taldi að hann hefði átt að fá hærra verð fyrir þjónustu sína en greitt
hafði verið fyrir. Nái þessir útreikningar aftur til upphafs viðskipta aðila.
Fyrirsvarsmaður stefnanda mótmælti reikningnum og kvað enga samninga hafa verið
gerða um að stefndi mætti hækka afturvirkt þegar greidda reikninga. Þá kvað
fyrirsvarsmaður stefnda stefnanda hafa lokið viðskiptasambandi þeirra
fyrirvaralaust og stefndi því setið uppi með átta til níu starfsmenn sem hann
hafi þurft að greiða laun á uppsagnartíma. Því væri á reikningnum krafa um laun
að fjárhæð 3.3034.713 krónur. Mótmælti stefnandi því að honum bæri að greiða
laun í uppsagnarfresti starfsmanna stefnda. Þá er virðisaukaskattur lagður á
launagreiðslur á reikningnum.
Ósannað
er að stefndi hafi samið um það við stefnanda að stefnanda bæri að greiða hærra
verð fyrir þá þjónustu sem stefndi hafði þegar fengið greidda afturvirkt til
upphafs viðskipa aðila. Þá er ósannað að stefnandi hafi farið sérstaklega fram
á íblöndunarefni og óljóst er hvort það hafi þegar verið greitt með fyrri
reikningum stefnda. Þá er launakrafan óútskýrð, ekkert er í gögnum málsins
fyrir hvaða tímabil eða hvaða starfsmenn launakrafan er. Þá er sú krafa ekki
samkynja kröfu stefnanda um endurgreiðslu né á hún rætur að rekja til sama
atviks og endurkrafan snýr að, aðstöðu eða löggernings. Er sá þáttur reiknings
stefnda svo vanreifaður að á kröfuna verður ekki lagður efnisdómur gegn
mótmælum stefnanda. Hefur stefndi því ekki sýnt fram á að krafa hans uppfylli
skilyrði skuldajöfnunar og er þeirri málsástæðu stefnda hafnað.
Að öllu ofangreindu virtu verða dómkröfur
stefnanda teknar til greina eins og segir í dómsorði. Með vísan til 130. gr.
laga um meðferð einkamála nr. 91/1991 verður stefndi dæmdur til að greiða
stefnanda málskostnað eins og segir í dómsorði.
Ástríður
Grímsdóttir héraðsdómari kveður upp dóm þennan.
Dómsorð.
Stefndi, KEF
seafood ehf., greiði stefnanda, Atlantic Seafood ehf., 4.769.703 krónur ásamt
dráttarvöxtum samkvæmt 1. mgr. 6. gr.
laga nr. 38/2001 frá 21. mars 2018 til greiðsludags.
Stefndi greiði stefnanda 577.893
krónur í málskostnað.
Ástríður
Grímsdóttir.