• Lykilorð:
  • Játningarmál
  • Umferðarlagabrot
  • Ökuréttarsvipting
  • Ölvunarakstur

 

D Ó M U R

Héraðsdóms Reykjaness föstudaginn 14. september 2018 í máli nr. S-142/2018:

 

Ákæruvaldið

(Halldór Rósmundur Guðjónsson aðstoðarsaksóknari)

gegn

Rolands Kalnins

 

            Mál þetta, sem var tekið til dóms 5. september 2018, höfðaði lögreglustjórinn á Suðurnesjum með ákæru 19. mars 2018, á hendur Rolands Kalnins, kt. 000000-0000, óstaðsettur í hús:

          ,,fyrir umferðarlagabrot, með því að hafa sunnudaginn 22. janúar 2017, ekið bifreiðinni [...], sviptur ökurétti og undir áhrifum áfengis  (í blóði mældist vínandi 1,97 ) norður Ásbraut, Hafnarfirði, skammt norðan við Hamranes þar sem bifreiðinni var ekið út af Ásbraut. Telst háttsemi þessi varða við 1. mgr., sbr. 3. mgr. 45. gr. og 1. mgr. 48. gr., sbr. 3. gr. laga nr. 24/2007, allt sbr. 1. mgr. 100. gr. umferðarlaga nr. 50/1987.

          Þess er krafist að ákærð[i] verði dæmd[ur] til refsingar og til greiðslu alls sakarkostnaðar og til að sæta sviptingu ökuréttar, sbr. 1. mgr. 101. gr. og 102. gr.  umferðarlaga nr. 50/1987, sbr. lög nr. 44/1993, lög nr. 57/1997 og lög nr. 69/2007.“ 

Þann 5. september 2018 var mál nr. S-383/2018 sameinað máli þessu þessu, sbr. heimild í 1. mgr. 169. gr. laga nr. 88/2008 um meðferð sakamála. Málið höfðaði lögreglustjórinn á Suðurnesjum með ákæru, útgefinni 13. ágúst 2018:

,,fyrir umferðarlagabrot, með því að hafa laugardaginn 31. mars 2018, ekið bifreiðinni [...], á Vogavegi í Vatnsleysustrandarhreppi, sviptur ökuréttindum og undir áhrifum áfengis (vínandi í blóði mældist 2.38 ). Telst háttsemi þessi varða við 1. mgr., sbr. 2. mgr. 45. gr. og 1. mgr. 48. gr., sbr. 1. mgr. 100. gr. umferðarlaga nr. 50/1987.

Þess er krafist að ákærði verði dæmdur til refsingar og til greiðslu alls sakarkostnaðar. Þá er þess krafist að ákærði verði dæmdur til sviptingar ökuréttar, skv. 101. og 102. gr. umferðarlaga nr. 50/1987, sbr. 25. gr. laga nr. 44/1993 og 18. gr. laga nr. 66/2006.“

Ákærði hefur fyrir dómi skýlaust játað að hafa framið þau brot sem honum eru gefin að sök og var farið með mál þetta samkvæmt 164. gr. laga nr. 88/2008 um meðferð sakamála og var það tekið til dóms án frekari sönnunarfærslu eftir að sækjanda og ákærða hafði verið gefinn kostur á að tjá sig í stuttu máli um lagaatriði og ákvörðun viðurlaga.

Sannað er með skýlausri játningu ákærða, sem er í samræmi við framlögð sakargögn, að hann hafi gerst sekur um þau brot sem honum eru gefin að sök og eru þau réttilega heimfærð til refsiákvæða í ákærum. Ákærði hefur því unnið sér til refsingar.

Ákærði er fæddur árið 1967 og á samkvæmt framlögðu sakavottorði að baki sakaferil sem nær aftur til ársins 2012. Með sektargerð lögreglustjóra 4. júní 2012 samþykkti ákærði greiðslu sektar og sæta tímabundinni sviptingu ökuréttar vegna ölvunaraksturs og brots gegn 1. mgr. 48. gr. umferðarlaga (án þess að hafa öðlast ökuréttindi). Með sektargerð lögreglustjóra 5. september 2013 samþykkti ákærði að greiða sekt og sæta tímabundinni sviptingu ökuréttar fyrir að aka bifreið sviptur ökurétti og undir áhrifum áfengis. Með dómi Héraðsdóms Reykjaness 29. apríl 2015 var ákærði dæmdur í þrjátíu daga fangelsi og var sviptur ökurétti ævilangt fyrir að aka bifreið sviptur ökurétti og undir áhrifum áfengis. Þá var ákærði dæmdur í þriggja mánaða fangelsi með dómi Héraðsdóms Reykjaness 24. febrúar 2017 og ævilöng ökuréttarsvipting hans áréttuð, fyrir hraðakstur og akstur sviptur ökurétti og undir áhrifum áfengis.

Brot ákærða samkvæmt ákæru dagsettri 19. mars 2018 voru framin 22. janúar 2017, eða fyrir uppkvaðningu áðurnefnds dóms Héraðsdóms Reykjaness frá 24. febrúar 2017. Við ákvörðun refsingar ákærða verður því eftir því sem við á litið til 78. gr. almennra hegningarlaga nr. 19/1940, sbr. einnig 77. gr. sömu laga.

Að framangreindum sakaferli og brotum ákærða virtum þykir refsing hans samkvæmt dómvenju réttilega ákveðin fimm mánaða fangelsi.

Með vísan til 3. mgr. 101. gr. umferðarlaga, er ævilöng ökuréttarsvipting ákærða áréttuð.

Á grundvelli sakfellingar ákærða, sbr. 1. mgr. 235. gr. laga nr. 88/2008 um meðferð sakamála, er ákærði dæmdur til að greiða sakarkostnað málsins, samkvæmt yfirlitum sækjanda og með stoð í öðrum gögnum málsins, samtals 159.369 krónur.

Margrét Halldóra Hallgrímsdóttir, aðstoðarmaður dómara, kveður upp dóm þennan.

 

DÓMSORÐ:

Ákærði, Rolands Kalnins, sæti fangelsi í fimm mánuði.

Ákærði er sviptur ökurétti ævilangt.

Ákærði greiði 159.369 krónur í sakarkostnað.

 

Margrét Halldóra Hallgrímsdóttir