- Ávana- og fíkniefni
- Játningarmál
- Upptaka
D Ó M U R
Héraðsdóms Reykjaness miðvikudaginn 5.
september 2018 í máli nr. S-138/2018:
Ákæruvaldið
(Súsanna Björg Fróðadóttir aðstoðarsaksóknari)
gegn
Stefáni R. Kristjánssyni
Mál
þetta, sem var dómtekið 22. ágúst 2018, höfðaði lögreglustjórinn á Suðurnesjum
með ákæru 19. mars 2018, á hendur Stefáni R. Kristjánssyni, kt. 000000-0000, [...],
Reykjavík:
,,fyrir fíkniefnalagabrot með því að hafa
fimmtudaginn [17.] desember 2015, haft í vörslum sínum [...] 136 stk
kannabisplöntur sem voru í svefnherbergjum og forstofu og hafa um skeið fram
til þess dags ræktað greindar plöntur, í húsi sínu að [...].
Telst
þessi háttsemi ákærða varða við 2., sbr. 4., sbr. 4. gr. a., sbr. 5. og 6. gr.
laga nr. 65/1974, sbr. lög nr. 60/1980, sbr. lög nr. 13/1985 og lög nr. 10/1997
og lög nr. 68/2001 og reglugerð nr.
233/2001, um ávana- og fíkniefni og önnur eftirlitsskyld efni, sbr. reglugerð
nr. 490/2001, reglugerð nr. 248/2002 og reglugerð nr. 848/2002.
Þess er
krafist að ákærði verði dæmdur til refsingar og til greiðslu alls sakarkostnaðar.
Þá er jafnframt
krafist að gerðar verði upptækar framangreindar 136 stk af kannabisplöntum [...]
samkvæmt heimild í 6. mgr. 5. gr. laga nr. 65/1974, sbr. lög nr. 10/1997 og
68/2001, sbr. 2. mgr. 14. gr. reglugerð nr. 233/2001. Þá er einnig krafist
upptöku á eftirfarandi búnaði, fimm tímarofum, hitamæli, þremur loftsíum, tólf
ljósaperum, tveimur lömpum, tveimur viftum, tveimur rakatækum og tveimur
loftdælum sbr. 7. mgr. 5. gr. sömu laga.“
Við fyrirtöku málsins 22. ágúst 2018 kom ákærði fyrir dóm
og játaði sök. Í ljósi játningar ákærða var farið með málið samkvæmt 164. gr.
laga nr. 88/2008 um meðferð sakamála. Var málið því tekið til dóms án frekari
sönnunarfærslu eftir að sækjanda og ákærða hafði verið gefinn kostur á að tjá
sig um lagaatriði máls og ákvörðun viðurlaga.
Ákærði hefur skýlaust játað sök í málinu. Að mati dómsins
samrýmist játning hans framkomnum gögnum. Brot ákærða telst því sannað og er
réttilega heimfært til refsiákvæða í ákæru.
Ákærði er fæddur árið 1962. Samkvæmt framlögðu sakavottorði
hefur ákærða einu sinni áður verið gerð refsing, en ákærði hlaut dóm vegna
umferðarlagabrots 15. mars 2005. Sakaferill ákærða hefur ekki áhrif við
ákvörðun refsingar í máli þessu.
Samkvæmt framlögðum gögnum var húsleit að [...] heimiluð
með úrskurði Héraðsdóms Reykjaness 17. desember 2015. Húsleitin fór fram
samdægurs en við leitina lagði lögregla meðal annars hald á 136 kannabisplöntur
og búnað þann sem krafist er upptöku á í ákæru. Við skýrslutöku lögreglu sama
dag gekkst ákærði við því að eiga það sem haldlagt var á heimilli hans og
afsalaði sér öllum búnaði til eyðingar. Ákæra var gefin út 19. mars 2018, eða rúmum
tveimur árum eftir að ætlað verður að brotið hafi verið fullrannsakað, en
matsgerð rannsóknarstofu Háskóla Íslands í lyfja- og eiturefnafræði er dagsett
11. janúar 2016.
Með vísan til framangreinds sem og greiðrar játningar
ákærða þykir refsing hans hæfilega ákveðin fangelsi í sjö mánuði. Eftir atvikum
og með vísan til þess dráttar sem varð á málsmeðferðinni skal fresta fullnustu
refsingarinnar, og falli hún niður að liðnum tveimur árum frá birtingu dóms
þessa, haldi ákærði almennt skilorð 57.
gr. almennra hegningarlaga nr. 19/1940.
Með vísan til kröfugerðar ákæruvaldsins, gagna málsins og
tilgreindra lagaákvæða í ákæru verða gerðar upptækar 136 kannabisplöntur, fimm
tímarofar, hitamælir, þrjár loftsíur, tólf ljósaperur, tveir lampar, tvær
viftur, tvö rakatæki, og tvær loftdælur.
Með
vísan til sakfellingar ákærða, sbr. 1. mgr. 235. gr. laga nr. 88/2008 um
meðferð sakamála, verður ákærða gert að greiða sakarkostnað málsins sem
samkvæmt framlögðu yfirliti sækjanda og með stoð í öðrum gögnum málsins nemur
samtals 313.108 krónum.
Margrét
Halldóra Hallgrímsdóttir, aðstoðarmaður dómara, kveður upp dóm þennan.
DÓMSORÐ:
Ákærði, Stefán R. Kristjánsson, sæti
fangelsi í sjö mánuði, en fresta skal fullnustu refsingarinnar og falli hún
niður að liðnum tveimur árum frá birtingu dóms þessa, haldi ákærði almennt
skilorð 57. gr. almennra hegningarlaga nr. 19/1940.
Ákærði sæti upptöku á 136
kannabisplöntum, fimm tímarofum, hitamæli, þremur loftsíum, tólf ljósaperum,
tveimur lömpum, tveimur viftum, tveimur rakatækjum, og tveimur loftdælum.
Ákærði greiði 313.108 krónur í
sakarkostnað.
Margrét Halldóra Hallgrímsdóttir