- Aðild
- Verksamningur
- Skuldamál
D Ó M U R
Héraðsdóms Reykjaness
7. janúar 2019 í máli nr. E-212/2018:
Arnar Arinbjarnar
(Hilmar Magnússon lögmaður)
gegn
Munck Íslandi ehf. og til vara
(Sveinbjörn Claessen lögmaður)
Stjörnumálun ehf.
(Skarphéðinn Pétursson lögmaður)
Mál þetta var höfðað 1. mars 2018 og dómtekið
12. desember 2018. Stefnandi er Arnar Arinbjarnar, Smárarima 68, Reykjavík.
Aðalstefndi er Munck Íslandi ehf.,
Hlíðasmára 4, Kópavogi. Varastefndi er Stjörnumálun ehf., Ármúla 4-6,
Reykjavík.
Dómkröfur stefnanda
eru þær að aðalstefndi verði dæmdur til að greiða skuld að fjárhæð 9.361.110 krónur ásamt
dráttarvöxtum samkvæmt 1. mgr. 6. gr. laga nr. 38/2001 frá 28. október 2017 til
greiðsludags. Til vara er þess krafist að varastefndi verði dæmdur til að
greiða skuld að fjárhæð 9.361.110 krónur ásamt dráttarvöxtum samkvæmt 1. mgr.
6. gr. laga nr. 38/2001 frá 28. október 2017 til greiðsludags. Þá er í báðum tilfellum krafist
málskostnaðar.
Aðalstefndi gerir þær
kröfur að hann verði sýknaður af kröfum stefnanda og að stefnandi verði dæmdur
til að greiða honum málskostnað.
Varastefndi gerir
aðallega kröfu um sýknu af kröfum stefnanda en til vara að kröfur stefnanda
verði stórlega lækkaðar. Þá er gerð krafa um málskostnað.
I.
Málsatvik eru þau að á
árinu 2016 gerðu aðalstefndi, sem þá hét LNS Saga ehf., og varastefndi með sér
verksamning um málun innan- og utanhúss nýbyggingar að Hrólfsskálamel 1-5,
Seltjarnarnesi. LNS Saga ehf. var tilgreindur sem aðalverktaki en Stjörnumálun
ehf. sem undirverktaki. Undirverktaka bar að leggja til allt efni, mannafla og
annað til að framkvæma verkið. Samkvæmt samningnum skuldbatt undirverktaki sig
til að leysa af hendi allar skyldur og taka á sig ábyrgð á þeim verkþáttum sem
hann tæki að sér gagnvart aðalverktaka með sama hætti og ábyrgð aðalverktaka
væri gagnvart LL11 ehf., sem var aðalverkkaupi.
Samningurinn var byggður á föstum
einingaverðum og var samningsfjárhæðin 42.794.000 krónur. Reikningar skyldu
gerðir í samræmi við framvindu og mælt magn og samkvæmt kafla 3.6 í ÍST 30:2012
um breytingar á verki. Þá sagði í 5. gr. samningsins að undirverktaki ætti rétt
á sérstakri greiðslu vegna aukins kostnaðar sem af breytingu leiddi þá og því
aðeins ef aðalverktaki fengi kröfu undirverktaka samþykkta hjá LL11 ehf. Í 7.
gr. samningsins sagði að undirverktaka væri óheimilt að vinna fyrir LL11 ehf. á
meðan samningurinn væri í gildi, nema með skriflegu samkomulagi við aðalverktaka.
Að öðru leyti giltu ákvæði og skilmálar útboðsgagna. Í 8. gr. kom fram að
yfirumsjón með framkvæmdum væri í höndum aðalverktaka. Undirverktaki stýrði
verki sínu en skyldi í einu og öllu framkvæma verkið í samráði við
verkstjórnendur aðalverktaka. Þrátt fyrir eftirlit aðalverktaka bæri
undirverktaki í einu og öllu ábyrgð á framkvæmdum og gæðum á sínum verkþáttum.
Stefnandi kveður að varastefndi hafi óskað
eftir því við sig að hann tæki að sér tiltekin verkefni við málun húsanna, en
stefnandi er málarameistari. Stefnandi og varastefndi gerðu ekki skriflegan
samning þar að lútandi en stefnandi segir að samkomulagið hafi snúið að
svokallaðri framvindu verkefnisins, þ.e. spörstlun og málun gifs- og
steinveggja og lofta samkvæmt uppmælingu. Stefnandi hafi gert varastefnda
reikninga fyrir þetta vinnuframlag sitt. Þá segir stefnandi að aðalstefnda hafi
verið kunnugt um það að stefnandi hafi unnið sem sjálfstæður undirverktaki
varastefnda að þessum verkefnum.
Einnig segir stefnandi að á byggingartímanum
hafi komið fram óskir frá aðalstefnda til stefnanda um að vinna að nánar
sérgreindum aukaverkum, ýmist munnlega eða með tölvupósti til stefnanda.
Stefnandi kveðst ekki vita hvort varastefnda hafi verið gert viðvart um
aukaverkin né að beiðnir hafi borist frá aðalstefnda til varastefnda varðandi
þessi tilteknu aukaverk. Að minnsta kosti hafi varastefndi ekki haft neina
aðkomu að þessum aukaverkum sem reikningur stefnanda taki til.
Stefnandi hélt dagbókarskýrslur yfir
aukaverkin þar sem skráður var verkdagur ásamt verktíma, efni og við hvað var
unnið hverju sinni. Stefnandi vann sjálfur að mestu við verkin en hann hafði
einnig starfsmenn á sínum snærum, sem komu einnig að verkinu.
Stefnandi kveðst hafa verið í sambandi við
verkstjóra aðalstefnda, Guðmund Arnarson, um aukaverkin en hann hafi verið sá
aðili sem hafi séð um samskiptin og komið verkbeiðnum áleiðis til stefnanda, án
atbeina varastefnda. Guðmundur hafi áritað allar verkskýrslur stefnanda er
snéru að umræddum aukaverkum, utan verkskýrslna varðandi aukaverk nr. 7. Þá
hafi Guðmundur staðfest sérstaklega framkvæmd nokkurra af þeim aukaverkum sem
stefnandi vann að og fylgja verkskýrslum.
Lögmaður stefnanda sendi aðalstefnda bréf 28.
september 2017 ásamt yfirliti yfir aukaverk með tilmælum um uppgjör þeirra.
Aðalstefndi varð ekki við greiðslutilmælum og sendi stefnandi innheimtubréf 13.
nóvember 2017, en fjárhæð þeirrar kröfu var aðeins lægri en stefnukrafan þar
sem efniskostnaður við aukaverk 8,7 og 4 féll út. Samtals hafi vantalinn
efniskostnaður verið 173.212 krónur og hækki dómkrafan sem því nemur frá því
sem greinir í áður sendum innheimtubréfum og yfirlitum.
Kröfu stefnanda var hafnað með bréfi
aðalstefnda, dags. 15. nóvember 2017, á þeim grunni að stefnandi hefði verið
undirverktaki varastefnda og ekkert samningssamband væri á milli aðalstefnda og
stefnanda. Stefnandi hefur því höfðað mál þetta.
II.
Stefnandi byggir kröfu
sína á reikningi útgefnum 28. september 2017, samkvæmt framlögðum
dagbókarskýrslum stefnanda er sýni sundurgreint efniskostnað og vinnuframlag
stefnanda að Hrólfsskálamel 1-3, Seltjarnarnesi, á tímabilinu ágúst 2016 fram
til febrúar 2017, en aðalstefndi hafi verið byggingaraðili hússins. Aukaverkin
hafi verið greind í átta mismunandi verkþætti.
Stefnandi kveður fjárhæð kröfu sinnar byggða
á framlögðum verkskýrslum er sýni glögglega umfang vinnu stefnanda og
efniskostnað. Aðalstefndi, sem hafi verið byggingaraðili hússins, hafi haft með
höndum alla verkstjórn á byggingarstað, en verkstjórinn hafi verið Guðmundur
Arnarson, starfsmaður aðalstefnda.
Stefnandi telur fjárhæð aukaverka vera
sanngjarna og í fullu samræmi við vinnuframlag hans, sem sé auk þess staðfest
af verkstjóra aðalstefnda, sem sé verkkaupinn. Þá sé fjárhæð tímagjalds
eðlilegt og sanngjarnt og í samræmi við það sem gengur og gerist á þessum
markaði. Sama sé að segja um efniskostnað, en stefnandi hafi lagt fram efni það
sem á verkskýrslum greinir og sem verkstjóri aðalstefnda hafi staðfest með
áritun sinni.
Verkefni stefnanda hafi falist í aukaverkum
sem hafi sannanlega verið umbeðin af aðalstefnda og staðfest af verkstjóra
aðalstefnda. Telur stefnandi að aðalstefndi beri ábyrgð á því að greiða fyrir
umbeðin verk, sem ekki hafi staðið í sambandi við önnur verkefni sem stefnandi
vann fyrir varastefnda sem undirverktaki. Þau verkefni hafi verið allt annars
eðlis.
Telji aðalstefndi að ekkert samningssamband
hafi verið milli hans og stefnanda, heldur einungis varastefnda, hafi
aðalstefnda borið að beina verkbeiðnum til varastefnda en ekki stefnanda. Með
því að gera það ekki hafi aðalstefndi verið bundinn við að greiða stefnanda
fyrir umbeðin verk, enda hafi verið um einstök og afmörkuð verkefni að ræða og
sem stefnandi viti ekki til að varastefndi hafi skuldbundið sig til að inna af
hendi á grunni þess verksamnings sem hann hafi gert við aðalstefnda. Að minnsta
kosti hafi varastefndi upplýst stefnanda um að hann hafi ekki fengið greitt frá
aðalstefnda fyrir þessi verk og vísi á hann um greiðsluskyldu.
Stefnandi byggir á því að sá sem óskar eftir
verki, þ.e. aðalstefndi sem verkkaupi, sé ábyrgur fyrir greiðslu þess, enda
ekki á forræði og ábyrgð stefnanda þótt aðalstefndi kunni að hafa gert
verksamning við annan aðila um sömu verk, sem þó sé ekkert upplýst um.
Stefnandi sem verktaki verði ekki gerður ábyrgur fyrir því, en hann eigi rétt á
því að fá greitt fyrir umbeðið vinnuframlag sem hann hafi innt af hendi.
Þá verði ekki séð hverju það skipti fyrir
aðalstefnda hvort hann greiði stefnanda beint eða varastefnda, nema hann telji
sig hafa gert samning er fríi hann greiðslu aukaverka eða að hann eigi að
greiða lægra gjald en stefnandi byggi á. Að minnsta kosti hafi stefnandi ekki
verið upplýstur um slíkt þegar aðalstefndi óskaði eftir vinnuframlagi hans og
ljóst að hann hefði ekki ráðist í framkvæmdir ef fyrir hefði legið að hann ætti
ekki að fá greitt fyrir vinnu sína með því tímagjaldi sem eðlilegt má telja og
framlögðu efni.
Aðalstefndi hafi ekki gert neinar
athugasemdir við verk stefnanda, en það sé vel unnið og því sé lokið. Öll
aukaverk hafi verið unnin að beiðni verkstjóra aðalstefnda og honum ljóst hvað
unnið var við hverju sinni, enda hafi hann verið á verkstað allan tímann og
ekki gert neinar athugasemdir við framlögð verkskýrsluyfirlit sem hafi verið
afhent meðan á verki stóð og sem hann hafi staðfest með áritun sinni, en þar
hafi verið sundurgreind þau verkefni sem unnið var við hverju sinni, fjöldi
vinnutíma og efniskostnaður.
Stefnandi telur að fjárhæð tímagjalds sé
eðlilegt og sanngjarnt og að vinnuframlag hans sé í fullu samræmi við þau verk
sem unnin voru, sbr. inntak reglu 28. gr. laga nr. 42/2000 um
þjónustukaup.
Dráttarvaxta er krafist frá þeim degi er
mánuður var liðinn frá því að fjárkrafan var sett fram með bréfi lögmanns
stefnanda, dags. 28. september 2017.
Verði aðalstefndi sýknaður af kröfum stefnanda
byggir stefnandi kröfur sínar á hendur varastefnda á framlögðum dagskýrslum og
því að varastefndi sem aðalverktaki beri ábyrgð á því að greiða undirverktaka
sínum fyrir þau verk sem verkkaupi hafi óskað eftir og unnin hafi verið í þágu
varastefnda og með hans vitneskju.
Varastefndi hafi ekki gert sérstakar
athugasemdir við dagskýrslur stefnanda eða hrakið þær að öðru leyti. Verði
talið að aðal- og varastefndi hafi gert með sér verksamning, sem hafi tekið á
greiðslum fyrir aukaverk líkt og aðalstefndi heldur fram, sé ljóst að
varastefndi sé ábyrgur fyrir uppgjöri við stefnanda. Hafi varastefndi ekki gert
neinar athugasemdir við það að stefnandi hafi unnið umrædd aukaverk og sem
honum hafi mátt vera fullkunnugt um og komi honum vissulega til tekna í uppgjöri
við aðalstefnda.
Eðli málsins samkvæmt hljóti að liggja
samningur milli aðal- og varastefnda um framkvæmd aukaverka, ella hefðu þau
ekki verið umbeðin af hálfu aðalstefnda eða þá að aðalstefndi sé
greiðsluskyldur gagnvart stefnanda, sbr. aðalkrafa. Stefnandi sé ekki aðili að
þeim samningi stefndu um aukaverkin, heldur eigi hann beina kröfu á varastefnda
sem aðalverktaka, líkt og aðalstefndi hafi haldið fram. Um uppgjör milli
stefndu fari samkvæmt samningi þeirra og hafi aðalstefndi af þeim sökum vísað á
varastefnda um skyldu hans til að greiða fyrir aukaverk stefnanda þar sem þau
hafi verið umbeðin innan þeirrar heimildar sem aðalstefndi taldi sig hafa vegna
samnings síns við varastefnda. Stefnanda sé líka kunnugt um að varastefndi hafi
unnið önnur aukaverk fyrir aðalstefnda, en þau sem nú er stefnt fyrir.
Stefnandi telur að það liggi í hlutarins eðli
að annar hvor aðilinn, aðal- eða varastefndi eigi að greiða fyrir vinnuframlag
stefnanda, enda hafi stefnandi ekki unnið að þessum verkum að eigin frumkvæði,
heldur samkvæmt beiðni aðalstefnda og með fullri vitund og vilja varastefnda.
Varastefndi hafi heldur engar hömlur lagt á stefnanda við framkvæmd
aukaverkanna og samþykkt þau þar með í verki.
Hvernig svo sem samningssambandi stefndu sé
háttað geti það aldrei leitt til þess að stefnandi eigi ekki að fá greitt fyrir
vinnu sína, enda sé hann ekki aðili að þeim samningi og bindi hann ekki.
Aukaverkin séu í þágu varastefnda í uppgjöri hans við aðalstefnda, líkt og
lögmaður aðalstefnda hafi staðfest við stefnanda með bréfi 15. nóvember 2017.
Að öðru leyti er vísað til málsástæðna
varðandi aðalstefnda, að breyttu breytanda, um greiðsluskyldu varastefnda og
sönnur fyrir fjárhæð kröfu stefnanda.
Um lagarök vísar stefnandi til meginreglu
samninga- og kröfuréttarins um loforð og efndir skuldbindinga og að gerða
samninga skuli efna og meginreglna verktakaréttarins um ábyrgð verkkaupa til
greiðslu verkkaups, hvort sem það telst hafa verið aðal- eða varastefndi. Vísað
er til laga nr. 42/2000 um þjónustukaup og laga nr. 91/1991, einkum 19. gr.
varðandi kröfugerðina.
Kröfu um dráttarvexti styður stefnandi við
reglur 1. mgr. 6. gr. laga nr. 38/2001.
Krafan um málskostnað styðst við 1. mgr. 130.
gr. laga 91/1991 um meðferð einkamála.
III.
Aðalstefndi byggir
sýknukröfu sína aðallega á því að stefnandi eigi ekki kröfu á hendur honum vegna
þeirra verka sem um ræðir, aukaverka 1-8, enda sé ekkert samningssamband milli
þeirra tveggja. Það beri því að sýkna aðalstefnda af kröfum stefnanda á
grundvelli aðildarskorts, sbr. 2. mgr. 16. gr. laga nr. 91/1991 um meðferð
einkamála.
Óumdeilt sé
að aðalstefndi og varastefndi hafi gert með sér samning um framkvæmd samnings-
og aukaverka að Hrólfsskálamel 1-5. Með samningnum hafi verklaun varastefnda
verið ákveðin vegna hvors tveggja. Undir framkvæmd verksins hafi varastefndi
síðan ráðið stefnanda sem undirverktaka sinn og að það virðist óumdeilt að
stefnandi hafi unnið þau aukaverk sem mál þetta snýst um, sem aðalstefndi hafi
falið varastefnda að leysa af hendi.
Það verklag
varastefnda að ráða stefnanda sem undirverktaka sinn hafi verið gert með
samþykki aðalstefnda, sbr. gr. 3.2.1 í ÍST 30:2012. Í því felist bersýnilega að
varastefndi beri ábyrgð gagnvart stefnanda á greiðslu verklauna vegna þeirra
þátta sem sá fyrrnefndi óski eftir að sá síðarnefndi vinni. Aðalstefndi komi
hvergi þar nærri. Stefnandi hafi því verið á verkstað sem fulltrúi
varastefnda.
Aðalstefndi
vísar til þess að í stefnu sé því haldið fram að ekkert „sérstakt samkomulag“
hafi legið fyrir milli stefnanda og varastefnda um að sá fyrrnefndi tæki að sér
aukaverk heldur hafi munnlegt samkomulag þeirra einungis náð til
framvinduverka. Í framhaldinu byggi stefnandi á því að aðalstefndi hafi óskað
beint eftir því við stefnanda að hann ynni aukaverkin sem um ræðir. Á þetta
geti aðalstefndi ekki fallist.
Í fyrsta lagi
sé það svo að stefnandi hafi sent varastefnda dagskýrslur sínar vegna
aukaverkanna sem síðan hafi útbúið reikning á grundvelli skýrslnanna og sent
aðalstefnda. Að mati aðalstefnda staðreynir þetta fyrirkomulag að verksamningur
stefnanda og varastefnda hafi tekið bæði til samnings- og aukaverka sem féllu
til á Hrólfsskálamel enda hefði stefnandi annars sjálfur reikningsgert verkin
og sent aðalstefnda. Það blasi í reynd við. Engin leið hafi verið fyrir varastefnda
að útbúa reikningana nema með aðkomu og þátttöku stefnanda sem hafi sent honum
dagskýrslur sínar. Þetta fyrirkomulag staðfesti aðkomu hvers aðila að verkinu,
nánar tiltekið að aðalstefndi hafi verið verkkaupi varastefnda og stefnandi
undirverktaki hans, þ.e. varastefnda. Ekkert samningssamband hafi stofnast
milli aðalstefnda og stefnanda.
Í annan stað
sé til þess að líta að stefnandi hafi beint beiðnum um aukaverk til
varastefnda, ekki stefnanda líkt og fullyrt sé í stefnu. Því til staðfestingar
bendir aðalstefndi á framlagðan tölvupóst, dags. 23. nóvember 2016. Með
póstinum, sem sendur hafi verið til fyrirsvarsmanns varastefnda og afrit á
stefnanda, hafi aðalstefndi farið þess á leit við varastefnda að unnin yrðu
nánar tilgreind aukaverk. Beiðnin hafi beinst sannanlega að varastefnda, enda
samningssambandið þar á milli. Sama eigi við um tölvupóst frá 8. desember 2016
vegna aukaverks 2.
Varðandi
þennan þátt málsins hafnar aðalstefndi þeim málatilbúnaði stefnanda að
undirritanir verkstjóra aðalstefnda, Guðmundar Arnarsonar, á dagskýrslur
jafngildi beiðnum aðalstefnda um að verk yrðu unnin. Með undirritunum sínum
hafi Guðmundur staðfest að framkvæmd verkanna væri lokið af stefnanda.
Stefnandi hafi sjálfur staðfest þennan skilning og verklag með tölvupósti sínum
30. janúar 2017, þar sem hann biðji Guðmund um að staðfesta að eftirfarandi
aukaverk hafi verið unnin af honum. Þessi aðferðafræði sé alvanaleg og sé
eðlileg við framkvæmd verka á borð við það sem hér um ræðir. Í undirritunum
verkstjórans felist sannanlega ekki formleg beiðni til stefnanda um vinnu
tiltekinna verka enda hafi verkstjórinn ekki slíkt stjórnunarvald á verkstað.
Jafnvel þótt
litið verði svo á að aðalstefndi hafi óskað eftir því við stefnanda að hann
ynni tiltekin verk lítur aðalstefndi svo á að samskiptin hafi skýrlega verið
hluti af samtali milli aðila um framkvæmd og aukaverk samkvæmt verksamningi
aðal- og varastefnda. Undir engum kringumstæðum geti það hafa átt að
misskiljast og alls ekki með þeim hætti að með beiðni um framkvæmd á aukaverki
hafi aðalstefndi rift verksamningnum við varastefnda og gert nýjan samning við
stefnanda.
Loks bendir
aðalstefndi á að enginn samningur, hvorki munnlegur né skriflegur, hafi verið
gerður milli hans og stefnanda um neina þætti framkvæmdarinnar sem um ræðir
enda væri slík samningsgerð í beinni andstöðu við gr. 3.2.3 í ÍST 30:2012. Í
þeirri grein staðalsins sé kveðið á um að undirverktaki, stefnandi hér, geti
ekki gert neins konar samning um verkið við verkkaupa, aðalstefnda hér.
Aðalstefndi hafi að sjálfsögðu verið fullmeðvitaður um þetta, hafandi gert
skriflegan verksamning við varastefnda. Aukinheldur komi fram í fyrrnefndri
grein staðalsins að öll fyrirmæli eða óskir frá verkkaupa um breytingar á
verkinu skuli fara um hendur aðalverktakans, varastefnda hér. Í þessu felist að
aðalstefnda hafi borið að beina öllum fyrirmælum um aukaverk að varastefnda,
sem og hann gerði.
Þá bendir
aðalstefndi á að stefnandi hafi ekki lagt fram nein gögn um ætlað samkomulag
þeirra um framkvæmd þeirra aukaverka sem um ræðir. Sönnunarbyrði um slíkan
samning og efni hans hvíli á stefnanda. Þvert á móti hafi aðalstefndi nú
staðreynt með framlögðum gögnum að beiðnum um framkvæmd aukaverka hafi verið
beint að varastefnda sem í framhaldinu hafi falið stefnanda að vinna verkin.
Varastefnda beri eðli máls samkvæmt að gera upp við undirverktaka sinn vegna
þessa. Stefnanda sé ekki tækt að beina kröfu um uppgjör að aðalstefnda vegna
vanefnda varastefnda.
Með vísan til
alls framangreinds krefst aðalstefndi þess að hann verði sýknaður af kröfu
stefnanda á grundvelli aðildarskorts.
Verði ekki
fallist á framangreint og komist dómurinn að þeirri niðurstöðu að beint
samningssamband sé milli aðalstefnda og stefnanda, þannig að aðalstefndi beri
ábyrgð á greiðslu kostnaðar vegna vinnu stefnanda við aukaverk 1-8, byggir
aðalstefndi málatilbúnað sinn á því að kröfur stefnanda á hendur sér eigi ekki
við rök að styðjast. Um það vísast til eftirfarandi:
Aukaverk 1: Samkvæmt
tímaskráningu stefnanda sé um að ræða 77 klukkustunda vinnu á tímagjaldinu
6.500 krónur, samtals að fjárhæð 620.620 krónur, auk útlagðs kostnaðar að
fjárhæð 95.913 krónur. Krafan telji í heildina 716.533 krónur. Aðalstefndi
byggir á því að hann hafi þegar greitt kostnað vegna aukaverksins sem um ræðir.
Það hafi hann gert með greiðslu útgefins reiknings varastefnda nr. 296 að
fjárhæð 578.460 krónur þann 4. nóvember 2016. Sá reikningur byggist á sömu
dagskýrslum og stefnandi leggi fram í máli þessu til grundvallar kröfunni sem
hann beini nú að aðalstefnda. Mismunurinn liggi í ólíku tímagjaldi en
tímagjaldið í reikningi varastefnda byggist á verksamningi aðila, 5.500 krónur
á klukkustund auk virðisaukaskatts. Stefnandi byggi reikningsgerð sína á röngu
tímagjaldi og sé því mótmælt. Það sama eigi við um aðrar kröfur í málinu.
Aðalstefndi
bendir á að reikningur varastefnda byggist á tímaskýrslum frá stefnanda
sjálfum. Engin leið hafi verið fyrir varastefnda að krefja aðalstefnda um
greiðslu kostnaðarins nema að fengnum gögnum frá stefnanda sjálfum um þá vinnu
sem hann innti af hendi. Aðalstefndi hafi sannanlega greitt reikninginn. Með
hliðsjón af því innheimtufyrirkomulagi sem stefnandi hafi sjálfur lagt upp með
hafi hann mátt treysta því og trúa að greiðslustaður væri reikningur
varastefnda. Krafan vegna aukaverks 1 sé uppgerð.
Aðalstefndi
telur að dagskýrslur stefnanda vegna aukaverks 1, sem eru að baki kröfu vegna
aukaverks 1, virðist hafa verið endurskrifaðar fyrir birtingu stefnu málsins.
Það megi sjá með samanburði við dagskýrslur sem fylgdu reikningi varastefnda í
ágúst 2016, sbr. reikning dags. 26. ágúst 2016 að fjárhæð 578.460 krónur.
Aðalstefndi þekki ekki hvað búi að baki en telur ljóst að þessi framkvæmd
stefnanda ýti undir málatilbúnað aðalstefnda í greinargerð þessari að
varastefndi beri ábyrgð á greiðslu verklauna til handa stefnanda.
Aukaverk 2-6: Í málinu hafi verið lagðar fram
dagskýrslur og útreikningur stefnanda á kostnaði vegna vinnu hans á aukaverkum
2-6. Rétt eins og með reikning 296, vegna aukaverks 1, sé varastefndi útgefandi
reikninga nr. 391, 403, 404, 405 og 406 vegna aukaverka 2-6. Að baki öllum
reikningunum liggi sömu dagskýrslur stefnanda og stefnandi leggi nú fram til
stuðnings kröfu sinni vegna aukaverka 2-6. Með vísan til fyrri umfjöllunar
bendir aðalstefndi á að engin leið hafi verið fyrir varastefnda að útbúa
reikningana nema með aðkomu og þátttöku stefnanda sem hafi sent honum
dagskýrslur sínar.
Um afdrif
framannefndra reikninga bendir aðalstefndi á að hann hafi gert athugasemdir við
reikningana eins og þeir hafi verið settir fram. Ástæðan hafi m.a. verið sú að
reikningarnir innihéldu verkliði sem tilheyrðu samningsverkinu, ýmsum
aukaverkum hafi beinlínis verið hafnað auk þess sem athugasemdir hafi verið
gerðar við tímaskráningu einstakra verkliða. Úr hafi orðið að sátt náðist milli
aðal- og varastefnda um eftirstöðvar krafna samkvæmt aukaverkunum. Varastefndi
hafi kreditfært alla reikningana og gefið út nýjan reikning, nr. 444, samtals
að fjárhæð 2.511.960 krónur. Reikningurinn hafi verið greiddur á reikning
varastefnda með tveimur greiðslum; annars vegar 31. mars 2017 að fjárhæð
1.089.000 krónur og hins vegar 12. maí 2017 að fjárhæð 1.422.960 krónur. Allar
kröfur stefnanda vegna aukaverka 2-6 séu því uppgerðar.
Með vísan til
fyrri umfjöllunar byggir aðalstefndi á því að stefnandi hafi sjálfur falið
varastefnda að krefja aðalstefnda um greiðslu kostnaðar vegna aukaverka 2-6.
Varastefndi hafi samið við aðalstefnda um uppgjör. Telji stefnandi sig eiga
óuppgerðar kröfur vegna aukaverkanna beri honum að beina spjótum sínum að
varastefnda.
Aukaverk 7: Aðalstefndi segir að honum hafi á engum
tímapunkti borist krafa vegna þessa þáttar málsins, hvorki frá stefnanda né
varastefnda. Aðalstefndi mótmælir kröfunni eins og hún er sett fram. Í fyrsta
lagi séu framlagðar dagskýrslur óundirritaðar af fyrirsvarsmanni aðalstefnda og
verkliðir því ósamþykktir sem slíkir. Í annan stað sé tímaskriftum mótmælt sem
ónákvæmum og umfram það sem geti talist eðlilegt miðað við umfang verksins.
Sönnunarbyrðin um það hvíli á stefnanda. Þá sé tímagjald of hátt og órökstutt.
Í því sambandi sé bent á að tímagjald samkvæmt verksamningi aðal- og
varastefnda sé 5.500 krónur auk virðisaukaskatts.
Aukaverk 8: Aðalstefnda hafi borist reikningar
varastefnda nr. 402 og 407 í febrúar 2017 vegna þessa aukaverks. Varastefndi
hafi kreditfært reikningana 1. apríl s.á. þar sem aðalverkkaupi, LL11 ehf.,
hafi ekki samþykkt aukaverkið sem slíkt. Aðalstefndi vísar til þess að samkvæmt
5. gr. verksamnings aðalstefnda og varastefnda eigi undirverktaki ekki rétt á
greiðslu vegna aukins kostnaðar nema að fengnu samþykki LL11 ehf. Þar sem
stefnandi hafi ekki sýnt fram á inntak ætlaðs samnings hans og aðalstefnda
byggir aðalstefndi á því að sama ákvæði gildi um stefnanda. Greiðsluskylda
aðalstefnda sé því háð samþykki LL11 ehf. Slíkt samþykki liggi ekki fyrir og
geti stefnandi því ekki átt réttmæta kröfu um greiðslu kostnaðarins. Þá
mótmælir aðalstefndi kröfunni sem of hárri, tímaskriftir séu ónákvæmar og
umfram það sem eðlilegt geti talist miðað við umfang verksins auk þess sem
tímagjald sé of hátt.
Um lagarök
vísast til laga nr. 91/1991, almennra reglna verktaka-, samninga- og
kröfuréttar um efndir samninga og staðals ÍST 30:2012.
Málskostnaðarkrafa
aðalstefnda er byggð á 130. gr. laga nr. 91/1991 um meðferð einkamála.
IV.
Varastefndi
mótmælir þeirri lýsingu
aðalstefnda að þar sem ekki sé að finna nema munnlegan samning milli hans og
stefnanda um aukaverkin, þá hljóti þau að falla undir aukaverk samkvæmt
verksamningi varastefnda. Varastefndi hafi engan einkarétt átt á að vinna
aukaverk, kæmu þau til. Varastefndi hafi vissulega unnið aukaverk, enda til
hans sérstaklega leitað í þau skipti. Hvernig aðalstefndi hafi kosið að semja
við aðra undirverktaka um aukaverk sé varastefnda algerlega óviðkomandi.
Gögn málsins og lýsing stefnanda sé mjög skýr
um að verkbeiðnir vegna aukaverka hafi ýmist verið sendar til varastefnda eða
beint til annarra undirverktaka, þ. á m. stefnanda.
Það sé líka rökrétt hjá stefnanda að þar sem
ekkert fast samningssamband hafi verið á milli varastefnda og aðalstefnda
varðandi aukaverk almennt, heldur einungis um þau sértæku aukaverk sem
sérstaklega hafi verið beint til varastefnda, þá hafi hann mátt ganga út frá
því að þegar aðalstefndi leitaði beint til hans, væru þær verkbeiðnir um
aukaverk varastefnda óviðkomandi. Hins vegar hafi reikningsfyrirkomulag farið
úr skorðum varðandi aukaverk í upphafi, þar sem bæði stefnandi og varastefndi
hafi haldið að þeir væru að verða við fyrirmælum aðalstefnda sem svo hafi ekki
verið raunin. Því hafi varastefndi kreditfært þá reikninga sem aðalstefndi
vildi. Síðan hafi aðalstefndi samið beint við varastefnda vegna hans aukaverka.
Varastefndi kveður að aukaverk komi til jafnt
og þétt á verktíma og séu oft unnin samhliða, en ekki einungis í lok verktíma.
Ekkert óeðlilegt sé því að aukaverk séu unnin á sömu dögum og stefnandi sé
einnig með menn á verkstað sem vinni annars vegar í samningsverkum og hins
vegar í aukaverkum.
Reyndar sé það augljóst að eina ástæða þess
að varastefndi þurfti að ráða stefnanda og menn hans til vinnu hafi verið að
varastefndi hafi ekki haft sjálfur mannskap í öll þessi aukaverk.
Stefnandi og aðrir á hans vegum hafi því
verið mikið á verkstað og ekkert eðlilegra en að aðalstefndi leitaði til
stefnanda, sem hafi verið á staðnum, og samið við hann um frekari aukaverk, þar
sem varastefndi hafi ekki getað tekið þau að sér. Helsta skýringin á því hafi
reyndar verið sú að verkið tafðist í marga mánuði vegna aðalstefnda og vegna
annarra samninga og verka hafi varastefndi þurft að takmarka fjölda manna í
þessu verki við samningsverkin að langmestu leyti.
Varastefndi útilokar ekki að í vissum
tilvikum virðist sem misskilningur hafi orðið á milli hans og stefnanda. Þannig
kunni stefnandi að hafa að hluta til lagt fram í máli þessu vinnuskýrslur sem
hann áður hafi sent varastefnda vegna aukaverka sem varastefndi tók að sér en
stefnandi vann og hafi fengið greitt. Varastefndi hafi þó þurft að fara dýpra í
sínar eigin vinnuskýrslur en unnt var áður en greinargerð varastefnda var lögð
fram, til þess að ganga úr skugga um hvort svo sé 100%. Verði það staðfest
síðar muni varastefndi eðlilega koma leiðréttingu til dómsins og aðila máls.
Varastefndi kveðst að vissu leyti taka undir
gagnrýni aðalstefnda varðandi vinnuskýrslur stefnanda. Nánar tiltekið að
verklýsingar séu heldur knappar og t.d. sé ekki hægt að sjá nákvæmlega hvaða
málarar hafi verið að vinnu hvar og á hvaða tíma. Geri þessi framsetning
varastefnda erfiðara fyrir og kalli á miklu meiri vinnu við samanburð á
vinnuskýrslum stefnanda og svo varastefnda hins vegar.
Nánar um aukaverk stefnanda byggir
varastefndi á eftirfarandi málsástæðum:
Aukaverk 1. Hér telur varastefndi líklegt að
misskilningur hafi orðið. Reyndar passi fjárhæðir ekki nákvæmlega saman á milli
reiknings stefnanda og varastefnda og því sé varastefndi ekki 100% viss, en telur
þó miðað við mjög svipaða greiðslu á sama tíma, eða 1. september 2016, til
stefnanda að hér sé um sömu vinnu að ræða sem hafi verið gerð upp. En
varastefndi vekur athygli á að hér sé um að ræða rétt ríflega 550 þúsund krónur
af níu milljóna króna kröfu stefnanda.
Aukaverk 2-6. Varastefndi segir að það sé rétt sem
aðalstefndi greinir frá, að varastefndi hafi kreditfært þessa reikninga alla.
Ástæðan hafi verið að aðalstefndi og varastefndi hafi ekki verið sáttir við
þann hátt sem myndast hafði á fyrirkomulagi reikninga, vinnuskýrslna og
uppgjörs fyrir aukaverk. Um 900 tímar hafi verið unnir í aukaverk í þeim þætti
verksins sem aðilar þessa máls komu saman að. Þegar óánægjan hafi komið upp
hafi mikil vinna verið lögð í það af hálfu aðalstefnda og varastefnda saman að
greina nákvæmlega hvaða verk varastefndi hafi unnið sjálfur og í hverju verkið
fólst og í samvinnu hafi orðið til mjög greinargóð samantekt. Hún hafi verið
sett upp í excel-skjali sem starfsmaður aðalstefnda hafi haldið utan um. Í því
skjali megi skýrlega sjá að stefndu hafi verið sammála um að varastefndi hefði
unnið um 200 tíma í þessum aukaverkum sem um er deilt í þessu máli.
Útistandandi séu
því um 700 tímar sem ekki tengdust varastefnda og hafi ekki verið sérstaklega
ræddir frekar í þessum viðræðum, eðlilega.
Stefnandi sé
væntanlega að krefjast greiðslu á þeim tímum, en það geti varastefndi ekki lagt
mat á, heldur einungis aðalstefndi.
Í ljósi þessa hafi reikningar verið
kreditfærðir, en alls ekki til þess að gefa út einn nýjan reikning, nr. 444,
sem hafi átt að ljúka greiðslu allra aukaverka, hver sem vann þau, heldur hafi
aukaverk varastefnda verið í þessum hluta, gerð upp með greiðslu á 198 tímum.
Þannig hafi aðalstefndi jafnframt líka greitt aðra reikninga samkvæmt
samkomulaginu, vegna beinnar vinnu varastefnda sjálfs utan verksamnings. Í
lokin hafi verið gert upp með reikningi 444, en útskýringar á þeirri fjárhæð
séu til í tölvupósti frá aðalstefnda. En það uppgjör sé samkomulag vegna óvissu
aðila um endanlega tölu unninna tíma varastefnda í verkinu, sem sannanlega hafi
verið viðbót frá verksamningi, alls 139,5*5500+vsk., sem geri 2.511.960 krónur.
Varastefndi
telur að það standist heldur enga skoðun að halda því fram að 700 tímar, sem
eftir séu ógreiddir og komi ekki varastefnda við, en séu samþykktir, bæði að
umfangi og vinnu, séu gerðir upp með 2,5 milljónum króna til hans, enda hafi
það ekki verið svo. Þær varnir aðalstefnda að mótmæla umfangi og vinnu
stefnanda geti af sömu ástæðu, þ.e. þessir liðir séu þegar samþykktir af aðalstefnda
með áritun verkstjóra og úttektaraðila, ekki haldið heldur.
Mergur málsins
sé að þessi aukaverk séu ekki unnin af varastefnda, hann hafi ekki verið beðinn
um þessa vinnu og tengist hann þar að leiðandi þessu uppgjöri aukaverka á milli
stefnanda og aðalstefnda ekki neitt. Um það hafi aðalstefndi og varstefndi
reyndar verið orðnir sammála, að því er forsvarsmaður varastefnda hélt, og að
minnsta kosti hafi verið komið á og staðfest fullnaðaruppgjör þeirra á milli
fyrir verkið. Komi það varastefnda því mjög á óvart hversu langt aðalstefndi
gangi í að gefa í skyn, þótt það sé varla sagt berum orðum, að það gæti
hugsanlega kannski verið að varastefndi hefði þegið greiðslur frá aðalstefnda
sem stefnandi ætti rétt á. Eða þá hinn möguleikinn sem aðalstefndi opnar á, að
varastefndi hafi samið um að níu milljóna króna krafa stefnanda félli niður,
gegn örsmárri hlutagreiðslu, 2,5 milljónum króna, til varastefnda. Varastefndi
fullyrðir að hvorug leiðin hafi verið farin og að varastefndi hafi engar
greiðslur fengið né haldið sem stefnandi átti rétt til.
Varastefndi
telur aðila í raun vita að lítill hluti kröfu stefnanda sé misskilningur, en
rest eigi að beinast að og greiðast af aðalstefnda, þótt tímagjald kunni
reyndar að vera of hátt eða aðalstefndi hafi aðrar lækkunarástæður, en það sé í
raun varastefnda algerlega óviðkomandi.
Aukaverk 7. Varastefndi
segir að hann átti sig engan veginn á því um hvað þessi krafan snúist, en viti
það eitt að hún virðist byggjast á skriflegu samkomulagi milli stefnanda og
aðalstefnda.
Varakrafa um stórkostlega lækkun stefnukrafna er byggð á sömu
sjónarmiðum og liggja til grundvallar kröfu um sýknu að breyttu breytanda.
Verði varastefndi talinn eiga að greiða stefnanda einhverja kröfufjárhæð, þá
telur varastefndi að lækka verði kröfur stefnanda að teknu tilliti til þess sem
þegar hefur verið rakið og að stærsti hluti stefnukrafna falli undir beint
samningssamband á milli aðalstefnda og stefnanda.
Um lagarök vísar varastefndi til almennra reglna samninga- og
kröfuréttar, einkum til sjónarmiða um skuldbindingargildi verksamninga og
efndir og lok kröfuréttinda. Þá vísast til ákvæða laga nr. 38/2001 um vexti og
verðtryggingu, einkum III. kafla þeirra.
Krafa um málskostnað styðst við XXI. kafla laga nr. 91/1991 um meðferð
einkamála, aðallega 129. og 130. gr.
V.
Eins og rakið hefur
verið gerðu aðalstefndi og varastefndi á árinu 2016 með sér verksamning um
málun innan- og utanhúss að Hrólfsskálamel 1-5, Seltjarnarnesi. Samkvæmt
verksamningnum var aðalstefndi aðalverktaki en varastefndi undirverktaki og var
sérstaklega tiltekið að nýjasta útgáfa ÍST 30 væri hluti af verksamningnum.
Varastefndi fékk síðan stefnanda í máli þessu til að vinna við verkið og var
það með fullri vitund aðalstefnda og hreyfði hann aldrei athugasemdum við því.
Ekki var gerður skriflegur samningur milli stefnanda og varastefnda.
Stefnandi vann tiltekin aukaverk, ýmist
þannig að aðalstefndi beindi beiðni um verk til stefnanda sjálfs eða til
varastefnda, eða þeirra beggja. Er óumdeilt að stefnandi vann þessi aukaverk og
hefur hvorki aðalstefndi né varastefndi hnekkt dagskýrslum stefnanda og var
tímagjald stefnanda sanngjarnt og eðlilegt, en tímagjaldið sem tiltekið er í
verksamningi aðalstefnda og varastefnda bindur ekki stefnanda. Hins vegar er
ágreiningur um það hvort aðalstefnda eða varastefnda beri að greiða stefnanda
fyrir þau aukaverk sem hann vann.
Þar sem stefnandi var undirverktaki
varastefnda stofnaðist ekki beint réttarsamband á milli stefnanda og
aðalstefnda. Fyrir liggur að varastefndi gaf út reikninga á hendur aðalstefnda
fyrir aukaverkum sem stefnandi vann, sem styður það að ekki var réttarsamband á
milli stefnanda og aðalstefnda um þau aukaverk sem stefnandi sannanlega vann.
Ekkert liggur fyrir í gögnum málsins um að þessir reikningar varastefnda vegna
aukaverka sem stefnandi vann hafi verið kreditfærðir, eins og varastefndi
heldur fram. Þá liggur enn fremur fyrir að stefnandi hafði enga aðkomu að
viðræðum sem áttu sér stað milli aðalstefnda og varastefnda um uppgjör á
umræddum aukaverkum. Auk þess væri samningur milli aðalstefnda og stefnanda um
aukaverk í andstöðu við grein 3.2.3 í ÍST30, sem var hluti verksamningsins
milli aðalstefnda og varastefnda. Að
öllu þessu virtu verður að líta svo á að varastefndi sé ábyrgur gagnvart
stefnanda um greiðslu fyrir þá vinnu sem ágreiningslaust er að stefnandi innti
af hendi, en varastefndi kann síðan að eiga kröfu á hendur aðalstefnda.
Með vísan til alls framangreinds er
aðalstefndi sýkn af kröfum stefnanda en varastefndi verður dæmdur til að greiða
reikning stefnanda, dags. 28. september 2017, að fjárhæð 9.351.110 krónur.
Dráttarvextir skulu reiknast frá 28. október 2017.
Eftir þessum úrslitum og með vísan til 1.
mgr. 130. gr. laga nr. 91/1991 um meðferð einkamála ber að dæma varastefnda til
að greiða stefnanda málskostnað sem er hæfilega ákveðinn 800.000 krónur. Rétt
þykir að málskostnaður milli stefnanda og aðalstefnda falli niður, enda var
stefnanda í ljósi afstöðu aðalstefnda og varastefnda vandi á höndum við
ákvörðun þess á hvorn aðila höfða átti málið.
Dóm þennan kveður upp Sandra Baldvinsdóttir ásamt meðdómendunum Hjalta Sigmundssyni, húsasmíðameistara og byggingartæknifræðingi, og Jóni Höskuldssyni héraðsdómara.
D ó m s o r ð:
Aðalstefndi, Munck Íslandi ehf., er sýkn af kröfum stefnanda, Arnars Arinbjarnar.
Varastefndi,
Stjörnumálun ehf., greiði stefnanda 9.361.110
krónur ásamt dráttarvöxtum samkvæmt 1. mgr. 6. gr. laga nr. 38/2001 frá 28.
október 2017 til greiðsludags.
Málskostnaður milli aðalstefnda og stefnanda
fellur niður.
Varastefndi greiði stefnanda 800.000 krónur í
málskostnað.
Sandra Baldvinsdóttir
Hjalti Sigmundsson
Jón Höskuldsson