- Játningarmál
- Hluti refsingar skilorðsbundinn og hluti óskilorðsbundinn
- Skilorð
D Ó M U R
Héraðsdóms Reykjaness miðvikudaginn 12.
september 2018 í máli nr. S-205/2018:
Ákæruvaldið
(Jóhann Svanur Hauksson aðstoðarsaksóknari)
gegn
Ragnari Haraldssyni
(Stefán Karl Kristjánsson lögmaður)
Mál
þetta, sem var tekið til dóms 15. ágúst 2018, höfðaði lögreglustjórinn á
höfuðborgarsvæðinu með ákæru 30. apríl 2018, á hendur Ragnari Haraldssyni, kt. 000000-0000,
[...]: ,,fyrir umferðarlagabrot í Reykjavík með því að hafa að kvöldi
laugardagsins 3. febrúar 2018 ekið bifreiðinni [...] sviptur ökurétti um
Víkurveg við Fjallkonuveg uns aksturinn var stöðvaður skömmu síðar. Telst þetta
varða við 1. mgr. 48. gr., sbr. 1. mgr. 100. gr. umferðarlaga nr. 50/1987. Þess
er krafist að ákærði verði dæmdur til refsingar og til greiðslu alls
sakarkostnaðar.“
Af hálfu ákærða er krafist vægustu refsingar sem lög
leyfa. Þá gerir verjandi ákærða kröfu um hæfilega þóknun sér til handa.
Ákærði hefur fyrir dómi skýlaust játað að hafa framið það
brot sem honum er gefið að sök og var farið með mál þetta samkvæmt 164. gr.
laga nr. 88/2008 um meðferð sakamála og var það tekið til dóms án frekari
sönnunarfærslu eftir að sækjanda og verjanda ákærða hafði verið gefinn kostur á
að tjá sig í stuttu máli um lagaatriði og ákvörðun viðurlaga.
Sannað er með skýlausri játningu ákærða, sem er í samræmi
við framlögð sakargögn, að hann hafi gerst sekur um það brot sem honum er gefið
að sök og er það réttilega heimfært til refsiákvæða í ákærum. Ákærði hefur því
unnið sér til refsingar.
Ákærði er fæddur árið 1981 og á samkvæmt framlögðu
sakavottorði að baki sakaferil sem nær aftur til ársins 2010. Við úrlausn þessa
máls hefur áhrif að með sektargerð lögreglustjóra 19. september 2016 samþykkti
ákærði greiðslu sektar og að sæta tveggja ára sviptingu ökuréttar vegna
umferðar- og fíkniefnalagabrota. Með dómi Héraðsdóms Reykjaness 28. september
2017 var ákærði dæmdur í fjögurra mánaða fangelsi, skilorðsbundið til tveggja
ára, fyrir brot gegn lögum um ávana- og fíkniefni og 1. mgr. 48. gr.
umferðarlaga (sviptur ökurétti), en með sama dómi var ákærða jafnframt gert að
greiða sekt að fjárhæð 100.000 krónur. Með dómi Héraðsdóms Suðurlands 1.
febrúar 2018 var ákærði sakfelldur fyrir brot gegn 1. mgr. 48. gr. umferðarlaga
(sviptur ökurétti), en með dómnum var skilorðsdómurinn frá 28. september 2017
dæmdur upp og ákærða gerð refsing í einu lagi. Ákærði var dæmdur í fimm mánaða
fangelsi, en fjórum mánuðum refsingarinnar var frestað skilorðsbundið til
tveggja ára.
Með vísan til 60. gr. almennra hegningarlaga nr. 19/1940,
verður skilorðshluti áðurnefnds dóms frá 1. febrúar 2018 tekinn upp og dæmdur
með í máli þessu. Að því gættu og með vísan til þess sem áður segir um
sakaferil ákærða þykir refsing hans samkvæmt fyrirmælum 77. gr. sömu laga
hæfilega ákveðin sex mánaða fangelsi. Eftir atvikum þykir mega fresta fullnustu
fjögurra mánaða af refsingunni og skal sá hluti hennar falla niður að liðnum
tveimur árum frá uppkvaðningu dóms þessa að telja, haldi ákærði almennt skilorð
57. gr. almennra hegningarlaga.
Samkvæmt
1. mgr. 235. gr. laga nr. 88/2008 um meðferð sakamála verður ákærða gert að
greiða sakarkostnað málsins, sem er þóknun skipaðs verjanda hans, Stefáns Karls
Kristjánssonar lögmanns, sem þykir hæfilega ákveðin 84.320 krónur að meðtöldum
virðisaukaskatti.
Margrét
Halldóra Hallgrímsdóttir, aðstoðarmaður dómara, kveður upp dóminn.
DÓMSORÐ:
Ákærði, Ragnar Haraldsson, sæti fangelsi í sex mánuði, en
fresta skal fullnustu fjögurra mánaða refsingarinnar og skal sá hluti hennar
falla niður að liðnum tveimur árum frá dómsuppsögu haldi ákærði almennt skilorð
57. gr. almennra hegningarlaga nr. 19/1940.
Ákærði
greiði 84.320 krónur í sakarkostnað, sem er þóknun skipaðs verjanda hans,
Stefáns Karls Kristjánssonar lögmanns.
Margrét Halldóra Hallgrímsdóttir