- Lykilorð:
D Ó M U R
Héraðsdóms Reykjavíkur þriðjudaginn 19. mars 2019 í máli nr. E-125/2018:
Guðmundur L Kristjánsson
(Lárus Sigurður Lárusson lögmaður)
gegn
Ægi Kára Bjarnasyni og
Lord ehf. til réttargæslu
(Sveinbjörn Claessen lögmaður)
I.
Mál þetta sem var höfðað af Guðmundi L. Kristjánssyni, Skriðustekk 14,
Reykjavík með stefnum birtum 21. desember 2017 á hendur Lord ehf., Lynghálsi
11, Reykjavík og 28. desember 2017 á hendur Ægi Kára Bjarnasyni, Dvergholti 6,
Mosfellsbæ, var dómtekið 19. febrúar sl.
Dómkröfur stefnanda eru þær að viðurkennt
verði með dómi að stefnandi sé réttur og löglegur eigandi að helmingshlut í
einkahlutafélaginu Lord ehf., kt. 000000-0000, Lynghálsi 11, Reykjavík, samtals
að nafnverði 250.000 krónum sem jafngildir 50 hlutum í félaginu. Þá krefst
stefnandi greiðslu málskostnaðar.
Stefndi
krefst sýknu, auk greiðslu málskostnaðar.
II.
i)
Stefnandi og stefndi Ægir stofnuðu
félagið Lord ehf. í febrúar 2004 og var eignarhlutur hvors um sig 50%. Samkvæmt
samþykktum félagsins, dags. 18. febrúar 2004, var tilgangur félagsins rekstur
fasteigna, eign og rekstur tækja, ráðgjöf, inn- og útflutningur og þátttaka í
öðrum atvinnurekstri samkvæmt ákvörðun stjórnar hverju sinni. Samkvæmt
stofnfundargerð félagsins, dags. 18. febrúar 2004, voru kjörin í stjórn
félagsins Sólveig Einarsdóttir, eiginkona stefnanda, en stefnandi og stefndi
Ægir voru meðstjórnendur. Herdís Eyjólfsdóttir, eiginkona stefnda, var ráðin
framkvæmdastjóri félagsins og með prókúru þess. Í tilkynningu til fyrirtækjaskrár sem einnig
er dagsett sama dag kemur m.a. fram að stefnandi sé annar stofnenda félagsins,
að hann sé meðstjórnandi og hafi prókúru fyrir félagið. Þar kemur einnig fram
að hlutafé hafi verið greitt að fullu.
Í fyrsta
ársreikningi Lord ehf. fyrir rekstrarárið 2004, voru málsaðilar tilgreindir
stjórnarmenn félagsins og stefndi Ægir einnig skráður framkvæmdastjóri þess.
Málsaðilar voru einnig tilgreindir hluthafar félagsins, með 50% eignarhlut hvor
um sig. Eina eign félagsins var fasteignin að Lynghálsi 11, Reykjavík, sem
félagið keypti 27. apríl 2004 af Þeir ehf.
Samkvæmt
kaupsamningi um fasteignina rituðu málsaðilar undir kaupsamninginn f.h. Lord
ehf. og undirgengust þeir báðir sjálfskuldarábyrgð gagnvart seljanda
fasteignarinnar eins og nánar greindi í tölulið 23 í kaupsamningnum. Er þar átt
við greiðslu að fjárhæð 6.600.000 krónur sem greiðast átti í tengslum við sölu
á tilgreindum íbúðum að Andrésbrunni 17, Reykjavík, eigi síðar en 1. júní 2004,
en íbúðirnar voru í eigu Trailer og tækja ehf. Væru íbúðirnar ekki seldar miðað
við það tímamark lofaði kaupandi að greiða 1.100.000 krónur mánaðarlega, fyrst
5. júní 2004 þar til fullnaðargreiðsla hefði farið fram.
Þann 4.
janúar 2005, gaf seljandi fasteignarinnar út afsal til Lord ehf. fyrir
fasteigninni að Lynghálsi 11.
Báðir
stjórnarmenn voru hluthafar í fyrrgreindu félagi, Trailer og tækjum ehf., á
þessum tíma, sbr. ársreikning þess félags fyrir reikningsárið 2004.
Þann 5.
apríl 2004 gaf Lord ehf. út veðskuldabréf að fjárhæð 9.900.000 krónur með veði
í Lynghálsi 11. Undir skuldabréfið rita málsaðilar sem skuldarar f.h. Lord
ehf., og einnig sem sjálfskuldarábyrgðaraðilar.
Þann 15.
október 2007 gaf Lord ehf. út annað veðskuldabréf að fjárhæð 13.600.000 krónur
með veði í Lynghálsi 11. Undir skuldabréfið rita báðir málsaðilar sem skuldarar
f.h. Lord ehf., en sjálfskuldarábyrgðaraðilar eru þar stefndi og eiginkona
hans. Var lán þetta notað til endurfjármögnunar á eldra láninu frá árinu 2004
sem málsaðilar voru báðir í sjálfskuldarábyrgð fyrir eins og áður segir.
Þann 25.
október 2007 var fyrirtækjaskrá ríkisskattstjóra tilkynnt um breytingu á stjórn
Lord ehf., þar sem stefndi er tilkynntur sem formaður stjórnar og eiginkona og
sonur meðstjórnendur og var tilkynningin til ríkisskattstjóra undirrituð af
þeim. Samkvæmt gögnum málsins hafði stefnandi eftir þetta enga aðkomu að Lord
ehf.
ii)
Með bréfi, dags. 4. maí 2017 til
stefnda, óskaði stefnandi eftir viðræðum við stefnda um kaup á hlutabréfum
stefnanda í Lord ehf. Með bréfi stefnda, dags. 23. maí s.á., var þessari beiðni
stefnanda hafnað með þeim rökum að stefnandi ætti engan hlut í Lord ehf., og að
félagið væri þegar í 100% eigu stefnda.
Með bréfi
stefnanda, dags. 30. maí 2017 til stefnda, fór hann fram á að stefndi legði
fram gögn því til staðfestingar að hann væri eigandi að öllum eignarhlutum
félagsins, svo sem kvittanir eða önnur gögn fyrir greiðslu innborgaðs hlutfjár.
Þá óskað stefnandi eftir því að stefndi legði fram staðfestingu fyrir því að
umrædd sala á eignarhlutum stefnanda til stefnda hefði farið fram, svo sem
kaupsamning og afsal eða annars konar staðfestingu á eigendaskiptum félagsins.
Bréfi þessu var svarað með bréfi stefnda, dags. 20. júní 2017, og vísað m.a.
til bréfs Bókhaldsstofunnar Stemmu ehf., dags. 9. júní sama mánaðar sem fylgdi
með bréfinu. Í bréfinu staðfestir starfsmaður bókhaldsstofunnar að stofan hafi
skrifað upp á og fengið sannanir fyrir því á sínum tíma að innborgað hlutafé í
Lord ehf. á árinu 2004, að upphæð 500.000 krónur hafi verið til staðar við
stofnun félagsins og að stefndi Ægir hafi framvísað ávísun frá Renniverkstæði
Ægis ehf., til staðfestingar á innborguðu hlutafé, þar sem Lord ehf. hafi ekki
verið komið með bankareikning við stofnun félagsins. Þá segir í bréfinu að
stefndi og eiginkona hans hafi frá upphafi stofnunar Lord ehf. verið í
samskiptum við Bókhaldsstofuna Stemmu ehf. varðandi stofnpappíra, bókhaldsgögn,
uppgjör, ársreikninga og framtöl fyrir félagið. Einnig hafi allar greiðslur
vegna vinnu stofunnar fyrir Lord ehf. komið ýmist frá félaginu sjálfu eða
Renniverkstæði Ægis ehf. Þá er einnig staðfest að stefnandi hafi aldrei verið í
samskiptum við Bókhaldsstofuna Stemmu ehf. varðandi Lord ehf. og ekki lagt
nokkra fjármuni til þess sem stofan viti.
Í
skattframtali stefnda 2006 gerir stefndi grein fyrir eignarhlut sínum í Lord
ehf. að nafnverði 250.000 krónur. Í skattframtölum hans á árunum þar á eftir,
þ.e. 2007 til 2017, er einnig gerð grein fyrir eignarhlut stefnda í félaginu og
nafnverðið þá hærra eða 500.000 krónur. Þá er eignarhlutur stefnda tilgreindur
100% í félaginu í ársreikningum Lord ehf. 2006-2016.
Í
skattframtölum stefnanda 2006-2018 er eignarhlutur í Lord ehf. ekki á meðal
framtalinna eigna stefnanda.
Samkvæmt
ódagsettu eyðublaði, sótti stefnandi um greiðsluaðlögun hjá umboðsmanni
skuldara. Samkvæmt lögum nr. 101/2010, um greiðsluaðlögun einstaklinga, skulu í
umsókn skuldara um greiðsluaðlögum koma fram upplýsingar um eignir skuldara. Í
umsókn stefnanda er ekki getið um eignarhlut hans í Lord ehf.
iii)
Stefnandi gaf skýrslu fyrir dóminum.
Einnig gáfu skýrslur vitnin Sólveig Einarsdóttir, eiginkona stefnanda, Herdís
Eyjólfsdóttir, eiginkona stefnda, Unnur Rán Halldórsdóttir, starfsmaður
Bókhaldsstofunnar Stemmu ehf., og Eyjólfur Unnar Eyjólfsson, mágur stefnda.
Stefnandi
kvað m.a. fyrir dóminum að hann hefði greitt sinn hluta stofnfjár Lord ehf. með
peningum en kvaðst ekki eiga kvittun því til staðfestingar. Varðandi fjármögnun
fasteignarinnar að Lynghálsi 11, þá hafi um 6.500.000 krónur komið úr sölu á
íbúðum í Andrésbrunni sem hafi runnið inn í kaupverð á Lynghálsi 11. Auk þess
hafi verið tekið lán hjá Íslandsbanka, sem hann hafi verið í sjálfskuldarábyrgð
fyrir. Um endurfjármögnun á því láni geti hann ekki svarað. Þá staðfesti hann
að aðkoma hans að Lord ehf. hefði verið lítil. Hann hafi verið verktaki hjá Renniverkstæði
Ægis ehf. og hafi hætt þar haustið 2004.
Sólveig
Einarsdóttir kvaðst ekki hafa komið fram fyrir hönd félagsins. Lord ehf. hafi
verið stofnað sem eignarfélag til að kaupa fasteign og Renniverkstæði Ægis ehf.
leigði hana. Engin önnur starfsemi hafi verið í félaginu og engir starfsmenn.
Bókhaldsstofan Stemma ehf. hafi séð um skattskil félagsins.
Herdís
Eyjólfsdóttir tók m.a. fram að félagið hefði verið stofnað í tengslum við kaup
Lord ehf. á Lynghálsi 11. Greiðslum vegna sölu á íbúðum í Andrésbrunni hafi átt
að ráðstafa upp í kaupverðið. Það hafi ekki gengið eftir og þá hafi Lord ehf.
verið stofnað og Renniverkstæði Ægis ehf. greitt fyrir fasteignina. Þegar afsal
fyrir Lynghálsi 11, hafi verið undirritað þá hafi á sama tíma verið gengið frá
afsali stefnanda vegna Lord ehf. til stefnda. Viðstaddir afsalið voru Ægir og
Guðmundur, Unnar bróðir hennar og einnig sonur hennar. Hún telur að afsalið
hafi verið geymt með bókhaldi félagsins og hafi glatast þegar bókhaldinu var
hent.
Unnur
Rán Halldórsdóttir hjá Bókhaldsstofnunni Stemmu ehf., staðfesti það sem fram
kom í bréfi hennar. Hún hafi séð um að bóka fyrir Lord ehf. frá stofnun þess.
Hún staðfesti að Renniverkstæði Ægis ehf. hefði greitt allt stofnfé Lord ehf.
Eyjólfur
Unnar Eyjófsson tók fram að hann hafi verið vottur á afsali þegar Guðmundur
afsalaði Lord ehf. til Ægis og að Guðmundur hafi verið hættur að vinna á
renniverkstæðinu þegar þetta gerðist.
III.
1. Helstu málsástæður og lagarök stefnanda
Stefnandi telur sig eiga beinan eignarrétt að helmingshlut í
einkahlutafélaginu Lord ehf. Vísar stefnandi til stofnsamnings félagsins frá
18. febrúar 2004. Stefnandi byggir á því að hann hafi greitt sinn eignarhlut
við stofnun félagsins eins og samið hafi verið um á milli aðila. Engar
greiðslukvittanir eða haldbær gögn hafi verið lögð fram af stefnda sem sýni
fram á hið gagnstæða. Telur stefnandi að greitt hafi verið fyrir hluti á
stofnfundi og í samræmi við 1. mgr. 11. gr. laga nr. 138/1994 um
einkahlutafélög og helmingur þeirra hafi verið í eigu stefnanda. Hafi aðkoma
stefnanda að rekstri og fjárfestingum félagsins verið talsverð alveg frá
upphafi. Hafi heimild fyrir eignarrétti stefnanda verið staðfest í ársreikningi
félagsins fyrir reikningsárið 2004, sem lagður var fram á aðalfundi félagsins
31. maí 2005. Því eigi stefnandi rétt á grundvelli stofnsamningsins til að
teljast hluthafi í félaginu með því hlutafé sem þar greinir og með vísan til
19. gr. laga nr. 138/1994. Þá telur stefnandi að ef komist verði að þeirri
niðurstöðu að stefnandi hafi ekki greitt sinn hluta stofnfjár, þá breyti það
engu um eignarhald stefnanda. Hvorki verði leitt af lögum né almennum reglum
fjármunaréttar, að Renniverkstæði Ægis ehf. eða stefndi sjálfur, hafi með þessu
öðlast rétt til að ganga inn í réttindi stefnanda sem hluthafa í félaginu.
Hvernig staðið hafi verið að greiðslu hlutafjár skipti í raun engu máli um
eignarhald stefnanda. Hann skuldi Renniverkstæði Ægis í mesta lagi 250.000
krónur, sé staðhæfing hans dregin í efa. Telur stefnandi að hann hafi sýnt
nægjanlega fram á að hann sé réttur og löglegur eigandi að helmingshlut í Lord
ehf.
Stefnandi mótmælir því
að gengið hafi verið frá eigendaskiptum á Lord ehf. á árinu 2005 eins og
stefndi haldi fram. Engin gögn liggi fram sem staðfesti það, svo sem
kaupsamningur eða afsal fyrir hlutafé stefnanda. Þá hafi stjórn félagsins ekki
verið tilkynnt skriflega hin meintu eigendaskipti á árinu 2005, svo sem skylt
var að gera, sbr. 1. mgr. 7. gr. samþykkta félagsins. Á þeim tíma voru
stefnandi og eiginkona hans enn í stjórn félagsins og allt þar til henni var
breytt á ætluðum fundi 17. október 2007.
Stefnandi vísar til 4.
mgr. 19. gr. laga nr. 138/1994, og telur að stefndi hafi sönnunarbyrði fyrir
því að bindandi samningur um hlutafé stefnanda hafi stofnast með aðilum.
Þá hafnar stefnandi að
hann hafi sýnt af sér tómlæti í málinu eða að krafa hans sé niður fallin af
þeim sökum. Jafnvel þó að litið verði svo á að stefndi hafi hagnýtt sér hlutafé
stefnanda í nokkur ár án athugasemda frá stefnanda hafi það afskiptleysi ekki
áhrif á eignarréttindi hans sem séu varin af 72. gr. stjórnarskrárinnar.
2. Helstu málsástæður
og lagarök stefnda.
Stefndi telur að sönnunarbyrði um meinta eignarrétt hvíli á stefnanda.
Það hafi honum ekki tekist.
Í fyrsta lagi sé stefnandi samkvæmt
opinberum gögnum frá CreditInfo ekki eigandi hluta í neinu einkahlutafélagi,
hvorki Lord né öðrum.
Í öðru lagi bendir stefndi á að ef
stefnandi er eigandi 50% hluta í Lord ehf. þá hafi honum borið að upplýsa um þá
eign sína í skattframtölum. Það hafi hann ekki gert.
Í þriðja lagi megi ráða af framlögðum
skattframtölum stefnda að hann sé sannanlega eigandi allra hluta Lord ehf.
Í fjórða lagi vísar stefndi til þess að stefnandi leitaði eftir greiðsluaðlögun
hjá umboðsmanni skuldara fyrir nokkrum árum síðan og mun umsókn hans hafa verið
samþykkt. Í umsókn um greiðsluaðlögun þurfi m.a. að gefa upp tæmandi lista af
eignum umsækjanda. Samkvæmt umsókn sem stefnandi hefur lagt fram sé Lord ehf.
ekki tilgreint á meðal eigna hans.
Í fimmta lagi vísar stefndi til
upplýsinga með ársreikningi Lord ehf. reikningsárin 2004-2015. Í fyrsta
ársreikningnum, vegna rekstrarársins 2004, ársins sem félagið var stofnað, komi
fram að innlendir hluthafar séu aðilar máls þessa með jafnan eignarhlut og að
þeir séu báðir í stjórn félagsins. Ársreikningurinn hafi verið samþykktur á
aðalfundi 31. maí 2006. Í öðrum ársreikningum sem liggi fyrir í gögnum málsins,
þ.e. vegna rekstraráranna 2005-2015, sé stefndi einn tilgreindur sem eigandi
félagsins og fyrir öllum hlutum þess.
Í sjötta lagi bendir stefndi á að
stjórn og framkvæmdastjóri beri ábyrgð á gerð, skilum og birtingu ársreiknings
einkahlutafélags sem þeir séu í fyrirsvari fyrir hvert reikningsár. Jafnframt
skuli þeir undirrita ársreikninginn, sbr. 2. og 3. mgr. 3. gr. laga nr. 3/2006
um ársreikninga. Stefnandi hafi setið í stjórn Lord ehf. eftir eigendaskiptin
árið 2005 til 17. október 2007 þegar tilkynning um skipti á stjórnarmönnum var
send Fyrirtækjaskrá. Það þýði að stefnandi, sem sitjandi stjórnarmaður, hafi
samþykkt reikningana athugasemdalaust og inntak þeirra, þ. á m. upplýsingar um
eigendur félagsins. Með þessu hafi stefnandi viðurkennt að allir hlutir
félagsins séu í eigu stefnda.
Þá liggi fyrir í gögnum málsins
staðfesting Bókhaldsstofunnar Stemmu ehf., en stofan hafi verið skráð fyrir
endurskoðun Lord ehf. frá upphafi. Í yfirlýsingunni sé staðfest að stofan hafi
skrifað upp á og fengið sannanir fyrir því á sínum tíma að innborgað hlutafé í
Lord ehf. árið 2004 að fjárhæð 500.000 krónur hafi verið til staðar við stofnun
félagsins og hafi verið greitt með ávísun frá Renniverkstæði Ægis ehf. sem
stefndi framvísaði. Stefnandi greiddi með öðrum orðum ekki fyrir sinn hluta í
félaginu við stofnun þess.
Að lokum bendir
stefndi á að sinnuleysi stefnanda í garð félagsins hafi verið algjört, hann
lagði enga fjármuni í félagið ásamt því að stefndi greiddi allan kostnað og
hlutafé við stofnun félagsins. Kristallis eignaleysi stefnanda í Lord ehf. í
því að hann var ekki lengur meðal sjálfskuldarábyrgðarmanna félagsins þegar lán
þess voru endurfjármögnuð 15. október 2007, heldur kom eiginkona stefnda í hans
stað. Samkomulag um sölu eignarhlutans hafi sannanlega verið ritað eins og
staðfest hafi verið fyrir dómi. Samningurinn hafi verið efndur að fullu við
undirritun enda hafði stefnandi ekki innt af hendi neina fjármuni í formi
innborgaðs hlutafjár sem allt kom frá stefnda. Sú staðreynd að skriflegt eintak
samningsins finnist ekki breyti ekki framangreindu. Stefnandi hafi sýnt af sér
algjört tómlæti í meira en áratug og í engu aðhafst vegna hins ætlaða
eignarhluta síns í Lord ehf. Hefði hann stigið fyrr fram með kröfu sína hefði
stefnda verið kleift að hafa uppi á samkomulagi aðila frá árinu 2005. Allt
bendi til þess að samkomulagið sé ekki til lengur af augljósum ástæðum.
Samkvæmt 1. tölul. 1. mgr. 1. gr. laga nr. 145/1994 um bókhald sé Lord ehf.
bókhaldsskylt. Sem slíkt beri félaginu að varðveita bókhald sitt og fylgiskjöl
í sjö ár frá lokum viðkomandi reikningsárs. Sá tími sé löngu liðinn og bókhaldi
félagsins vegna rekstrarársins 2005 verið fargað, þ. á m. samkomulagi aðila, að
öllum líkindum. Ekki er unnt að fallast á að stefnandi geti notið ávinnings af
því að hafa haldið að sér höndum í allan þennan tíma.
IV.
Niðurstaða
Í máli þessu krefst stefnandi að viðurkennt verði að hann sé eigandi að
helmingshlut í einkahlutafélaginu Lord. Vísar stefnandi m.a. til stofnsamnings
félagsins 18. febrúar 2004 og þess að hann hafi greitt sinn eignarhlut við
stofnun félagsins og sé því eigandi að helmingshlut þess. Þá hafnar hann því að
hafa afsalað eignarhluta sínum til stefnda á árinu 2005 eða að hafa sýnt af sér
tómlæti vegna málsins.
Stefndi hafnar kröfu stefnanda. Stefndi
reisir sýknukröfu sína m.a. á því að stefnandi hafi ekki greitt fyrir 50%
eignarhlut sinn í félaginu og að stefnandi hafi á árinu 2005 afsalað eignarhlut
sínum til sín. Afsalið sé glatað, en hann bendi á því til staðfestingar að
stefnandi hafi í kjölfar undirritunar afsals ekki lengur verið í
sjálfskuldarábyrgð vegna félagsins þegar lán þess voru endurfjármögnuð á árinu
2007. Þá hafi hann ekki getið um eignarhaldið í skattframtölum sínum, hann sé ekki tilgreindur eigandi í
ársreikningum félagsins eftir að afsalið fór fram og hafi hvorki lagt fjármuni
inn í félagið né aðhafst nokkuð í tengslum við rekstur þess.
Stefnandi var annar
stofnandi þess einkahlutafélags sem hér um ræðir, Lord ehf. Samkvæmt
stofnsamningi 18. febrúar 2004 var hlutafé ákveðið 500.000 krónur og ritaði
stefnandi sig fyrir hlutafé að fjárhæð 250.000 krónum en stefndi Ægir fyrir
sömu fjárhæð. Samkvæmt stofnfundargerð dagsettri sama dag var stefnandi ásamt
tveimur öðrum mönnum kjörinn í stjórn félagsins og var einnig samþykkt að hann
hefði prókúru fyrir félagið ásamt Herdísi Eyjólfsdóttur. Í tilkynningu til
fyrirtækjaskrár sem einnig er dagsett sama dag kemur m.a. fram að stefnandi sé
annar stofnenda félagsins, að hann sé meðstjórnandi og hafi prókúru fyrir
félagið. Þar kemur einnig fram að hlutafé hafi verið greitt að fullu. Þá er
þess getið í upplýsingum með ársreikningi fyrir reikningsárið 2004 að hluthafar
séu tveir, þ.e. stefnandi og stefndi Ægir að 50% hlutum hvor. Loks skiptir máli
að málsaðilar undirrituðu veðskuldarbréf 5. apríl 2004 f.h. félagsins með veði
í Lynghálsi 11 og tókust á hendur sjálfskuldarábyrgð í tengslum við kaup Lord
ehf. á þeirri fasteign. Af þessum sökum verður að leggja til grundvallar í
málinu að stefnandi hafi orðið eigandi að 50% hlut við stofnun félagsins.
Skiptir ekki máli í því sambandi þótt hann hafi hvorki getið eignarhlutarins í
skattframtölum sínum né í umsókn sinni um greiðsluaðlögun hjá umboðsmanni
skuldara.
Stefndi heldur því fram að stefnandi hafi
selt stefnda Ægi hluta sinn með samningi 2005 en að sá samningur sé nú
glataður. Ljóst er samkvæmt málsgögnum að stefnandi sat í stjórn félagsins til
17. október 2007 en þá var send tilkynning til fyrirtækjaskrár sem skilja má
svo að stefnandi hafi gengið úr stjórn félagsins. Samkvæmt gögnum málsins hefur
stefndi Ægir getið þess í skattskilum sínum fyrir árið 2005 að hann sé eigandi
hluta í Lord ehf. fyrir 250.000 krónur. Í skattskilum árið eftir og síðar er
þessi hlutur hans hins vegar talinn 500.000 krónur. Í ársreikningi Lord ehf.
fyrir árið 2004 er hlutur stefnanda talinn 50% og hlutur stefnda Ægis einnig
50%. Í ársreikningi 2005 og einnig síðar er hlutur stefnda Ægis talinn 100% í félaginu.
Eins og fyrr greinir var stefnandi þá enn í stjórn félagsins og bar þar með
ábyrgð á réttum upplýsingum í ársreikningi.
Samkvæmt ársreikningi félagsins fyrir árið
2004 var staða eigin fjár neikvæð um 954.423 krónur og fyrir árið 2005 var
staða eigin fjár neikvæð um 2.109.294 krónur. Eins og fyrr greinir gaf Lord ehf. út nýtt veðskuldabréf, þann 15. október 2007,
að fjárhæð 13.600.000 krónur í tengslum við endurfjármögnun á fyrri skuldum
félagsins. Undir skuldabréfið rita málsaðilar báðir sem skuldarar f.h. Lord
ehf., en stefndi og eiginkona hans tókust á hendur sjálfskuldarábyrgð vegna
lánsins. Samkvæmt gögnum málsins var stefnandi þannig leystur undan öllum
skuldbindingum vegna sjálfskuldarábyrgðar þeirrar frá 5. apríl 2004 sem fyrr
greinir.
Með hliðsjón af framanrituðu
verður að telja fram komnar vísbendingar sem nægja til að vefengja það að
stefnandi sé nú réttur og löglegur eigandi að helmingshlut í einkahlutafélaginu
Lord ehf. Ber því að sýkna stefnda af kröfum stefnanda í máli þessu.
Eftir úrslitum málsins, og með vísan til 1.
mgr. 130. gr. laga nr. 91/1991 um meðferð einkamála, ber stefnanda að greiða
stefnda 900.000 krónur málskostnað.
Ragnheiður Snorradóttir héraðsdómari kveður
upp dóm þennan.
DÓMSORÐ:
Stefnandi
greiði stefnda 900.000 krónur í málskostnað.
Ragnheiður
Snorradóttir (sign.)