- Gáleysi
- Gjafsókn
- Húsbóndaábyrgð
- Líkamstjón
- Málskostnaður
- Orsakatengsl
- Skaðabætur
- Sönnun
- Sönnunarbyrði
- Sönnunargögn
- Vinnuslys
- Vinnuvélar
- Örorka
- Sýkna
D Ó M U R
Héraðsdóms Reykjavíkur
föstudaginn 9. nóvember 2018 í máli nr. E-2422/2017:
Guðmundur Ólafs Kristjánsson
(Höskuldur Þór Þórhallsson lögmaður)
gegn
Samskipum hf.
(Lilja Jónasdóttir lögmaður)
I.
Dómkröfur o.fl.:
Mál þetta var höfðað 21. ágúst 2017 og dómtekið 26. október 2018. Stefnandi er Guðmundur Ólafs Kristjánsson, [...], Reykjavík. Stefndi er Samskip hf., Kjalarvogi 7–15, Reykjavík.
Stefnandi krefst þess að stefndi verði dæmdur til að greiða honum 6.502.589 krónur, auk 4,5% vaxta af 558.550 krónum frá 21. maí 2012 til 30. júní 2012, en 4,5% vaxta af 6.502.589 krónum frá 30. júní 2012 til 23. apríl 2016, en með dráttarvöxtum samkvæmt 9. gr., sbr. 1. mgr. 6. gr., laga nr. 38/2001 um vexti og verðtryggingu, af 6.502.589 krónum frá 23. apríl 2016 til greiðsludags. Þá er þess krafist að stefndi verði dæmdur til að greiða stefnanda málskostnað að skaðlausu samkvæmt síðar framlögðu málskostnaðaryfirliti eða að mati réttarins, auk virðisaukaskatts á málflutningsþóknun eins og mál þetta væri eigi gjafsóknarmál.
Stefndi krefst þess aðallega að hann verði sýknaður af öllum kröfum stefnanda og að stefnanda verði gert að greiða stefnda málskostnað að skaðlausu. Til vara krefst stefndi þess að dómkrafa stefnanda verði lækkuð verulega og að málskostnaður verði felldur niður.
Með bréfi innanríkisráðuneytisins, dagsettu 15. júní 2015, var stefnanda veitt gjafsókn fyrir héraðsdómi með vísan til 1. mgr. 126. gr. laga nr. 91/1991 um meðferð einkamála. Gjafsóknin er takmörkuð við réttargjöld, lögmannsþóknun og undirmatsgerð. Dómara var úthlutað málinu 10. janúar 2018 en fram að þeim tíma hafði hann ekki komið að meðferð þess.
II.
Málsatvik:
Stefnandi var ráðinn til starfa í vöruhúsi hjá stefnda við Kjalarvog í Reykjavík. Um var að ræða sumarstarf með fullu starfshlutfalli og var ráðningartími frá 15. maí 2012 til 31. ágúst sama ár. Stefnandi slasaðist við vinnu síðdegis 21. maí 2012. Slysið varð með þeim hætti að stefnandi var við störf á vinnuvél, nánar tiltekið brettatjakki af gerðinni Jungheinrich ERD 220, sem notuð var til að færa vörubretti á milli svæða í vöruhúsinu. Stefnandi bakkaði brettatjakkinum svo hann lenti á brettastæðu fyrir aftan tækið með þeim afleiðingum að hægri fótur hans klemmdist á milli tjakksins og stæðunnar.
Stefnandi leitaði á slysa- og bráðadeild Landspítalans sama dag en samkvæmt læknisvottorði Yngva Ólafssonar, sérfræðings í bæklunarskurðlækningum, dagsettu 28. júní 2013, reyndist stefnandi á slysdegi hafa hlotið klemmuáverka á hægri fót með ótilfærðum brotum í ytri ökklahnyðju sem og nærendum framleistabeina II–V og innanvert á hælbeininu. Þá var stefnandi óvinnufær eftir slysið og var með fótinn í gipsi og með takmörkun ástigs í sex vikur.
Stefndi tilkynnti um slysið til Vinnueftirlits ríkisins 23. maí 2012. Slysið var ekki tilkynnt til lögreglu. Myndupptaka reyndist vera til af slysinu úr eftirlitsmyndavélakerfi í vöruhúsi stefnda og óskaði stefnandi ítrekað eftir aðgangi að þeirri upptöku áður en til málshöfðunar kom. Þeirri beiðni var hins vegar synjað af stefnda og til skýringar var vísað til þágildandi laga um persónuvernd nr. 77/2000 og reglna nr. 837/2006 um rafræna vöktun.
Stefndi var með launþegatryggingu hjá Sjóvá-Almennum tryggingum hf. en ábyrgðartryggingu hjá erlendu tryggingafélagi. Í byrjun árs 2016 komu stefnandi og Sjóvá-Almennar tryggingar hf. sér saman um öflun mats á læknisfræðilegri örorku samkvæmt skilmálum launþegatryggingarinnar. Samkomulag náðist hins vegar ekki við stefnda um aðkomu að fyrrgreindri gagnaöflun þar sem hann taldi að bótaskylda væri ekki til staðar. Sjóvá-Almennar tryggingar hf. gerði upp bætur við stefnanda 8. apríl 2016 vegna fyrrgreindrar tryggingar með greiðslu á 866.373 krónum.
Stefnandi aflaði mats dómkvaddra matsmanna með matsbeiðni, dagsettri 11. september 2015, varðandi tímabil þjáningabóta, tímabundna örorku, varanlegan miska og varanlega örorku samkvæmt skaðabótalögum. Dómkvaddir matsmenn, Sveinbjörn Brandsson bæklunarskurðlæknir og Birgir G. Magnússon lögmaður, skiluðu matsgerð, dagsettri 14. mars 2016, með niðurstöðum um framangreinda þætti. Stefnandi sendi kröfubréf 23. mars sama ár þar sem hann óskaði eftir greiðslu frá stefnda á skaðabótum til hans til samræmis við fyrrgreint mat. Með svarbréfi stefnda, dagsettu 10. nóvember 2016, var kröfunni hafnað. Ágreiningur er milli aðila um bótaskyldu sem nánar greinir í málsástæðum.
Stefnandi gaf aðilaskýrslu við aðalmeðferð. Þá gáfu skýrslu vitnis Gunnar Gaukur Guðmundsson, fyrrverandi starfsmaður hjá stefnda, Bergvin Magnús Þórðarson. öryggisstjóri hjá stefnda, og Hans Þorsteinsson, lestunarstjóri hjá stefnda.
III.
Helstu málsástæður og
lagarök stefnanda:
Varðandi bótaskyldu stefnda þá byggir stefnandi á því
að stefndi beri sakarábyrgð á því tjóni sem hann varð fyrir við vinnu sína.
Byggir stefnandi á því að verulega hafi skort á að farið væri eftir ákvæðum
laga og reglna um öryggi og aðbúnað á vinnustöðum við framkvæmd verksins og
að á því beri stefndi ábyrgð. Að því virtu telur stefnandi að tjónið verði
rakið til saknæmrar og ólögmætrar háttsemi sem stefndi beri ábyrgð á samkvæmt
meginreglum íslensks skaðabótaréttar um sakarábyrgð og eftir atvikum
vinnuveitendaábyrgð.
Stefnandi byggir á því að vinnuaðstaða sem honum hafi
verið búin umrætt sinn hafi í raun verið ófullnægjandi og stórhættuleg.
Stefnandi vísar til þess að vörubretti sem hann bakkaði á hefði ekki átt að
vera liggjandi á gólfinu á þeim stað þar sem það var þar sem umferð
brettatjakka hafi verið almenn, tíð og hún hafi átt að vera örugg. Brettið hafi
legið á stað fyrir innan augsýnilega merkta línu á svæði þar sem öllum hafi
verið ljóst að keyrt var um og ekki mátti setja niður bretti. Að mati stefnanda
sé ljóst að hætta hafi verið á því að starfsmenn yrðu fyrir tjóni af brettinu, til
dæmis með því að falla eða klemmast á því og öðrum hlutum, eins og gerst hafi í
tilviki stefnanda. Stefnandi telur að stefndi hefði því átt að sjá til þess
að brettið væri á öðrum stað en þar sem stefnandi var á ferð, nánar tiltekið
innan merktrar línu, þar sem ekki mátti vænta umferðar vélknúinna ökutækja
svo fylgt væri ströngum öryggisreglum í hvívetna.
Stefnandi byggir einnig á því að brettatjakkurinn hafi
verið verið bilaður og því stórhættulegur í notkun, sérstaklega fyrir mann
sem hafði einungis notað tækið í örfáa daga. Stefnandi vísar til þess að hann
hafi í aðdraganda málshöfðunar ekki fengið afrit af myndupptöku af slysinu og
því verði að líta svo á að brettatjakkurinn hafi verið bilaður og vanbúinn og
í öllu falli í andstöðu við nánar tilgreind ákvæði laga og reglugerðar á sviði
vinnuverndar, sem háttsemi stefnda brjóti í bága við hvort sem hún teljist
sönnuð eða ekki.
Stefnandi vísar til 37. gr. laga nr. 46/1980 um
aðbúnað, hollustuhætti og öryggi á vinnustöðum þar sem kveðið sé á um að
framkvæma skuli og haga vinnu þannig að gætt sé fyllsta öryggis og góðs
aðbúnaðar og hollustuhátta. Í þeim efnum skuli fylgja viðurkenndum stöðlum,
ákvæðum laga og reglugerða, svo og fyrirmælum Vinnueftirlits ríkisins að því
er varðar aðbúnað, hollustuhætti og öryggi. Þá beri að gæta að sömu atriðum
varðandi sjálfan vinnustaðinn, sbr. 42. gr. sömu laga. Hvíli það á herðum
atvinnurekanda, það er í þessu tilviki stefnda, að tryggja að gætt sé fyllsta
öryggis og góðs aðbúnaðar og hollustuhátta á vinnustað, sbr. 13. gr. laganna,
en atvinnurekandi sé hver sá sem annist skipulega aðgerð eða framkvæmd,
sbr. 12. og 90. gr. sömu laga. Af hinum almennu ákvæðum laga nr. 46/1980 megi sjá að ríkar
skyldur hafi hvílt á herðum stefnda til að sjá til þess að fyllsta öryggis væri
gætt varðandi þær vinnuaðstæður sem stefnanda voru búnar, auk tilhögunar á
þeirri vinnu sem honum var gert að inna af hendi umrætt sinn.
Stefnandi vísar til þess að hann hafi ekki fengið
neina sérstaka kennslu á umræddan brettatjakk og hann hafi sjálfur þurft að
læra á hann með því að nota tjakkinn. Á þeim degi sem slysið varð hafi
stefnandi einungis verið búinn að starfa hjá stefnda í fimm daga. Hann hafi því
verið óvanur tækinu á þeim tíma. Að því virtu byggir stefnandi á því að
eðlilegra hefði verið hjá stefnda, sem vinnuveitanda, að sjá til þess að verkstjóri
hefði verið til staðar til að leiðbeina stefnanda við störf hans fyrstu dagana.
Af tildrögum slyssins og afleiðingum þess sé hins vegar ljóst að stefndi hafi
brugðist með öllu skyldum sínum samkvæmt fyrrgreindum ákvæðum laga nr. 46/1980.
Þá hafi stefndi jafnframt með háttsemi sinni farið gegn almennum
stjórnvaldsfyrirmælum settum með stoð í lögum nr. 46/1980, auk þess sem farið
hafi verið gegn almennum ríkjandi hátternisviðmiðum á þessu sviði.
Til frekari skýringa varðandi fyrrgreind almenn
stjórnvaldsfyrirmæli vísar stefnandi til þess að atvinnurekandi skuli samkvæmt
1. mgr. 5. gr. reglugerðar nr. 367/2006 um notkun tækja gera nauðsynlegar
ráðstafanir til að tryggja að tæki sem starfsmönnum sé ætlað að nota innan
fyrirtækis hæfi því verki sem eigi að vinna eða sé hæfilega lagað að því
þannig að starfsmenn geti notað tækið án þess að öryggi þeirra eða heilsu sé
hætta búin. Þessu hafi hins vegar ekki verið fyrir að fara í tilviki stefnanda.
Tæki í þessu
sambandi merki vél eða vélbúnað, áhöld, verkfæri eða þess háttar búnað sem
notaður sé á vinnustöðum. Við val á tæki skuli stefndi enn fremur hafa til
hliðsjónar sérstök vinnuskilyrði, aðstæður og áhættu innan vinnustaðarins,
þar á meðal áhættu á vinnusvæði og þá áhættu sem notkun viðkomandi tækis hefur
í för með sér, sbr. 2. mgr. 5. gr. sömu reglna. Stefnandi vísar einnig til
7. gr. fyrrgreindrar reglugerðar en samkvæmt því ákvæði hafi stefnda borið að
upplýsa starfsmenn sína um notkunarskilyrði tækja, óvenjulegar fyrirsjáanlegar
aðstæður og þá reynslu sem fengist hefði við notkun hlutaðeigandi tækja.
Jafnframt hafi stefnda borið að sjá til þess að skriflegar leiðbeiningar um
framangreind atriði lægju frammi á vinnustaðnum. Stefnandi byggir á því að
hann hafi engar slíkar upplýsingar fengið um notkun brettatjakksins og engar
upplýsingar um tækið hafi legið fyrir á vinnustaðnum sem hafi verið aðgengilegar
fyrir hann. Enn fremur vísar stefnandi til 9. gr. sömu reglugerðar og tekur
fram að samkvæmt því ákvæði hafi stefndi átt að taka fullt tillit til vinnuaðstæðna
og líkamsstöðu starfsmanna við notkun tækja þegar ákvæðum um aðbúnað,
hollustuhætti og öryggismál var framfylgt. Að auki hafi stefnda borið að líta
til meginreglna vinnuvistfræðinnar, en þær reglur fjalli meðal annars í
mörgum atriðum um líkamsstöðu við framkvæmd vinnu. Þessu til viðbótar vísar
stefnandi til gr. 1.1 í II. viðauka með reglugerðinni þar sem sú skylda sé
lögð á vinnuveitanda að tryggja að tæki skuli notað þannig að sem minnst hætta
stafi af fyrir þá sem noti það og fyrir aðra starfsmenn. Þá vísar stefnandi
auk þess til gr. 3.2.5 í sama viðauka þar sem kveðið sé á um að allar lyftingar
skuli skipuleggja og framkvæma rétt svo að öryggis starfsmanna sé gætt og að
þeim sé stjórnað með viðeigandi hætti. Stefndi hafi hins vegar ekki uppfyllt
framangreindar skyldur.
Stefnandi vísar til þess að við mat á sök stefnda
verði að hafa í huga að ekki var tilkynnt um slysið til Vinnueftirlits
ríkisins fyrr en tveimur dögum eftir að það varð. Stefnandi tekur fram að þar
sem vinnuslysið var ekki tilkynnt þegar það varð hafi Vinnueftirlitið ekki
rannsakað tildrög og orsakir slyssins. Að því virtu verði stefndi að bera allan
halla af sönnunarskorti um þá þætti sem taki til slyssins enda hafi honum borið
samkvæmt 1. mgr. 79. gr. laga nr. 46/1980 að tilkynna um það án tafar og í öllu
falli innan sólarhrings. Vísar stefnandi til áralangrar dómaframkvæmdar Hæstaréttar
Íslands um þetta atriði. Stefnandi telur að af þessu leiði að leggja verði
framburð hans um orsakir slyssins til grundvallar nema stefnda takist sönnun
um annað, til dæmis með myndupptökum úr eftirlitsmyndavélakerfi í vöruhúsi
stefnda.
Stefnandi telur að við mat á saknæmi eigi að líta á
aðra þætti en þá hlutlægu sem að framan greinir. Í því sambandi vísar
stefnandi til almennra viðurkenndra leiðbeiningarsjónarmiða við sakarmat
í skaðabótarétti, nánar tiltekið til þess hversu mikil hætta hafi verið á því
að tjón yrði af þeirri háttsemi sem um ræðir, hversu mikið tjón var líklegt að
leiddi af henni, hversu auðvelt eða erfitt var fyrir tjónvald að gera sér grein
fyrir hættu á tjóni og hvaða ráðstafanir var unnt að gera til að koma í veg
fyrir tjón. Stefnandi byggir á því að ljóst sé að mikil tjónshætta hafi verið
fólgin í því að skilja vörubretti eftir á miðju gólfi þar sem reiknað var með
umferð starfsmanna. Að mati stefnanda sé einnig ljóst að töluvert tjón geti
leitt af framangreindu enda geti starfsmenn hæglega beinbrotnað við árekstur
á vörubrettið, eins og gerðist hjá honum. Jafnframt bendir stefnandi á að mjög
auðvelt hafi verið fyrir stefnda að gera sér grein fyrir þessari hættu og
auðvelt hafi verið fyrir hann að gera viðeigandi ráðstafanir til þess að koma í
veg fyrir tjón. Að þessu virtu styrki framangreind leiðbeiningarsjónarmið enn
frekar sök stefnda á tjóni stefnanda.
Stefnandi reisir mál sitt einnig á því að skilyrði 1.
mgr. 23. gr. a í skaðabótalögum nr. 50/1993, sbr. 1. gr. laga nr. 124/2009, um
meðábyrgð starfsmanns séu ekki uppfyllt hvað hann varði. Stefnandi rökstyður
fjárkröfu sína um bætur fyrir þjáningar, varanlegan miska og varanlega örorku
með vísan til matsgerðar dómkvaddra matsmanna og annarra framlagðra gagna, þar
á meðal skattframtala vegna áranna 2009–2011. Um kröfu um almenna vexti vísar
stefnandi til 16. gr. laga nr. 50/1993 og eru í stefnu færð fram rök fyrir
slíkum vöxtum og vaxtatímabili. Hið sama á við um kröfu um dráttarvexti en til
stuðnings þeirri kröfu vísar stefnandi til 9. gr., sbr. 1. mgr. 6. gr., laga
nr. 38/2001. Með hliðsjón af úrlausn málsins þykja ekki efni til að
greina nánar frá málsástæðum og lagarökum stefnanda að þessu leyti, sbr. e-lið 1. mgr. 114. gr. laga
nr. 91/1991 um meðferð einkamála, sbr. 10. gr. laga nr. 78/2015.
Um lagarök að öðru leyti vísar stefnandi til almennra
reglna skaðabótaréttarins. Stefnandi vísar einnig til 1.–9. gr. og 15.–16.
gr. laga nr. 50/1993. Þá vísar stefnandi jafnframt til laga nr. 91/1991, þar
með talið XXI. kafla þeirra laga vegna málskostnaðar og 1. mgr. 33. gr.
laganna varðandi varnarþing. Að lokum er krafa um virðisaukaskatt studd við
ákvæði laga nr. 50/1988 um virðisaukaskatt.
Helstu málsástæður og
lagarök stefnda:
Stefndi byggir aðalkröfu sína um sýknu á því að hann beri ekki skaðabótaábyrgð á meintu tjóni stefnanda enda hafi aðgæsluleysi stefnanda valdið hinu meinta tjóni. Þá byggir stefndi á því að aðstæður á vinnustað hafi verið í samræmi við lög og reglur þar að lútandi og þeim hafi á engan hátt verið ábótavant.
Stefndi hafnar fullyrðingum stefnanda um að aðstæður á vinnustað hafi verið ófullnægjandi þegar slysið átti sér stað. Stefndi vísar til þess að umrætt vörubretti, sem stefnandi bakkaði á, hafi verið staðsett á lestunarreit þar sem sérstaklega var ætlast til þess að vörubretti væru lögð niður. Lestunarreitir séu með fram akstursbrautum í vöruhúsinu og ekki sé ætlast til þess að ekið sé á lestunarreitum. Þar sem vörubrettið var á stað sem sérstaklega var ætlaður vörubrettum sé ljóst, að mati stefnda, að engin hætta hafi stafað af því og að starfsmenn hafi getað ekið brettatjökkum eftir akbrautinni án vandkvæða. Stefndi byggir á því að hann hafi verið búinn að gera viðeigandi ráðstafanir til þess að tryggja að slys, eins og stefnandi lenti í, myndi ekki eiga sér stað. Stefndi vísar í þessu sambandi til þess að hann hafi skipulagt vöruhúsið með þeim hætti að lestunarreitir fyrir vörubretti væru skýrlega aðskildir frá akstursbrautum. Stefndi tekur fram að hann geti ekki borið ábyrgð á meintu tjóni starfsmanna sem keyri þvert á akstursbrautir án þess að horfa í þá átt sem þeir aki.
Stefndi tekur fram að lestunarreitur sem um ræðir hafi verið fullhlaðinn vörubrettum með fram endilangri akbrautinni og því hafi brettastaðan ekki getað farið fram hjá stefnanda. Stefnandi hafi komið akandi með fram henni, eins og fram komi á myndbandi. Stefnandi hafi hins vegar ekki farið eftir umferðarreglum vöruhússins heldur hafi hann ekið inn á lestunarreit til vinstri, yfir heila línu og bakkað því næst þvert á akstursstefnu án þess að horfa í þá átt sem hann bakkaði með þeim afleiðingum að hann hafnaði á brettastæðunni.
Stefndi hafnar einnig fullyrðingu stefnanda um að brettatjakkurinn hafi verið bilaður. Stefndi tekur fram að fullyrðingar stefnanda um vanbúnað brettatjakksins hafi fyrst komið til vitundar stefnda þegar honum var birt stefna í þessu máli. Stefndi fullyrðir að óundirritað bréf, dags. 10. júlí 2013, um meintan vanbúnað tækisins, lagt fram af stefnanda í máli þessu, hafi aldrei borist til stefnda.
Stefndi byggir á því að stefnandi beri sönnunarbyrðina fyrir fullyrðingum sínum um ástand brettatjakksins. Í því sambandi bendir stefndi á að stefnandi hafi ekki gert reka að því að upplýsa í hverju meint bilun eða vanbúnaður hafi falist. Stefndi mótmælir harðlega fullyrðingu í stefnu um að háttsemi stefnda [brjóti] í bága við tilvitnuð laga- og reglugerðarákvæði hvort sem háttsemin [teljist] sönnuð eða ekki. Fyrir það fyrsta telur stefndi ekki með öllu ljóst hvaða háttsemi þarna sé verið að vísa til. Í öðru lagi fái það ekki staðist að óskilgreind háttsemi, sem sé að auki ósönnuð, geti talist brjóta í bága við lög eða reglugerðir.
Stefndi tekur fram að á þeim tíma þegar umrætt slys átti sér stað hafi þrír brettatjakkar af gerðinni Jungheinrich ERD 220 verið í notkun hjá honum. Ekki liggi fyrir hvaða brettatjakkur það hafi verið sem stefnandi ók í umrætt skipti þegar hann bakkaði á brettastæðuna. Umrædd tæki séu skoðunarskyld og árlega skoðuð af Vinnueftirliti ríkisins. Tækin hafi ávallt staðist reglubundnar skoðanir, sem taki að mati stefnda af allan vafa um ástand tækjanna og sé til sönnunar um að það tæki sem stefnandi notaði þegar slysið átti sér stað hafi verið í góðu ástandi. Fullyrðingar stefnanda um meintan vanbúnað tækisins eigi því ekki við rök að styðjast. Auk þess bendir stefndi á að áðurnefnd myndupptaka af atvikinu sýni að tækið hafi verið í góðu lagi og virkað sem skyldi, bæði fyrir og eftir slysið.
Stefndi byggir á því að hann hafi gætt fyllsta öryggis í starfsemi sinni og ávallt hugað að góðum aðbúnaði starfsfólks og hollustuháttum á vinnustaðnum. Nýliðaþjálfun sé mikilvægur þáttur í því að gæta að framangreindum atriðum og af þeim ástæðum sé tilsjónarmaður útnefndur fyrir hvern nýjan starfsmann. Það sé hlutverk tilsjónarmanns að þjálfa nýjan starfsmann til þeirra verkefna sem honum sé ætlað að vinna, auk þess að upplýsa viðkomandi um atriði er lúti að starfsmannamálum, öryggis- og heilbrigðismálum o.fl. Þá sé sérstaklega farið yfir starfsemi viðkomandi deildar, þar með talið kennslu á tæki, varnir við álagi, verklag og umgengni um tæki. Í því skyni að tryggja að nýliðum sé veitt fullnægjandi kennsla í öllum atriðum sem varða starf þeirra hjá stefnda þá sé notaður gátlisti, þar sem merkt sé við þau atriði sem kynnt hafi verið fyrir nýliðanum og bæði tilsjónarmaður og nýliði skrifi undir til að staðfesta að kennsla og þjálfun hafi farið fram. Stefndi vísar til þess að fyrir liggi útfylltur gátlisti til staðfestingar á þjálfun stefnanda. Fullyrðingum stefnanda um skort á kennslu á brettatjakkinn og leiðbeiningum við störf sé því hafnað sem röngum. Þá bendir stefndi á það að þegar slysið varð hafði stefnandi verið með gild vinnuvélaréttindi í flokkum I og J í tæp sex ár og auk þess unnið daglega á samskonar tæki í tæpa viku án vandræða. Brettatjakkurinn sem stefnandi stýrði þegar slysið átti sér stað hafi verið í svokölluðum SM-flokki en ekki sé gerð krafa um vinnuvélaréttindi til þess að mega stýra slíku tæki. Af því megi draga þá ályktun að notkun tækisins sé svo einföld að ekki sé talið nauðsynlegt að gera kröfur um að stjórnendur þeirra hafi sérstök réttindi til að nota það. Megi því ætla að einstaklingur með vinnuvélaréttindi í gildi í tæp sex ár eigi að geta notað tækið án vandkvæða.
Stefndi hafnar fullyrðingum stefnanda um að ákvæði reglugerðar nr. 367/2006 hafi verið brotin í starfsemi stefnda. Stefndi byggir á því að umrætt tæki hafi vel hæft því verki sem stefnandi vann við og verið hæfilega lagað að því, þannig að starfsmenn gætu notað tækið án þess að öryggi þeirra eða heilsu væri hætta búin, sbr. 1. mgr. 5. gr. reglugerðarinnar. Stefndi ítrekar í þessu sambandi að slys stefnanda hafi ekki stafað af ástandi umrædds tækis heldur orðið vegna aðgæsluleysis stefnanda. Þá telur stefndi einnig sannað, samkvæmt útfylltum gátlista um móttöku nýliða á vinnusvæði stefnda, sem lagður hafi verið fram, að stefnandi hafi fengið upplýsingar um notkunarskilyrði tækisins og kennslu á það þegar hann hóf störf hjá stefnda. Þá ítrekar stefndi það að stefnandi var með gild vinnuvélaréttindi í flokkum I og J og hafi því mátt vera kunnugt um þær reglur sem giltu um notkun lítilla vinnuvéla á borð við umræddan tjakk.
Stefndi tekur fram að hann fái ekki séð að 9. gr. reglugerðar nr. 367/2006 eigi við í málinu, enda sé ekkert sem bendi til þess að uppi séu álitaefni er lúti að líkamsstöðu stefnanda við framkvæmd starfs hans, og stefnandi hafi ekki byggt á því. Loks telur stefndi sannað að hann hafi í starfsemi sinni tryggt með fullnægjandi hætti allar þær skyldur sem á honum hvíli samkvæmt framangreindri reglugerð og eftir atvikum viðauka við hana.
Stefndi tekur fram að hann hafi tilkynnt slysið skriflega til Vinnueftirlits ríkisins 23. maí 2012. Þá hafi mjög skammur tími verið liðinn frá slysinu en það hafi átt sér stað seinnipart dags 21. sama mánaðar, eftir lokun skrifstofu Vinnueftirlitsins. Stefndi bendir á að hefði Vinnueftirlitinu þótt tilefni til þess að rannsaka slysið nánar, þá hefði því verið í lófa lagið gera það, svo sem með því að mæta á slysstað, þar sem aðstæður eru enn óbreyttar, skoða myndupptöku af atvikinu og eða eftir atvikum gera úttekt á tækjabúnaði stefnda. Það hafi Vinnueftirlitið hins vegar ekki gert. Stefndi tekur fram að hann hafi ekki forræði yfir rannsóknarúrræðum Vinnueftirlitsins og því sé ekki unnt að láta hann bera hallann af skorti á rannsókn af þess hálfu. Stefndi tekur þó fram að hann telji að skortur á rannsókn komi ekki að sök, varðandi mat á aðstæðum og orsökum slyssins, þar sem fyrirliggjandi myndupptaka af slysinu sýni að allur aðbúnaður á vinnustaðnum hafi verið fullnægjandi og í samræmi við viðeigandi lög og reglugerðir. Þá hafi umræddur brettatjakkur auk þess verið í góðu ástandi. Jafnframt telur stefndi að myndupptakan sýni að slysið hafi einungis orsakast af aðgæsluleysi stefnanda sem stefndi beri ekki skaðabótaábyrgð á. Að þessu virtu sé að mati stefnda ekki unnt að leggja framburð stefnanda um atvik og orsakir slyssins til grundvallar í málinu.
Stefndi byggir á því að hann hafi gert allt það sem í hans valdi stóð til þess að tryggja öryggi og góðan aðbúnað starfsmanna og koma í veg fyrir að stefnandi og aðrir starfsmenn stefnda myndu lenda í slysi sem þessu. Í fyrsta lagi vísar stefndi til þess að hann hafi tryggt að stefnandi fengi viðeigandi þjálfun og leiðbeiningar áður en hann hóf störf. Í öðru lagi hafi hann skipulagt akstursbrautir og lestunarreiti og þar að auki séu umferðarreglur í vöruhúsi stefnda með þeim hætti að starfsmenn eigi ekki á hættu að lenda í árekstrum ef þeir fara eftir þeim reglum sem settar hafi verið. Með vísan til alls þess sem að framan hafi verið rakið, þá telji stefndi að aðgæsluleysi stefnanda hafi eitt verið valdur að slysinu og meintum afleiðingum þess. Að þessu virtu byggir stefndi á því að skaðabótaskylda sé ekki fyrir hendi.
Varnir stefnda varðandi aðalkröfu
taka einnig til þess að 1. mgr. 23. gr. a laga nr. 50/1993 komi ekki til álita
í málinu þar sem slysið hafi einungis orsakast af aðgæsluleysi stefnanda. Þá
taka varnir stefnda vegna aðalkröfu jafnframt til þess að orsakasamband milli
slyssins og afleiðinga þess hjá stefnanda sé ekki sannað. Varðandi varakröfu
þá taka varnir stefnda til þess að meint tjón sé ofmetið og andstætt meginreglum
skaðabótaréttar um að tjónþoli eigi ekki að hafa ávinning af tjóni sínu. Í
þessu sambandi vísar stefndi til þess að matsgerð sé ófullnægjandi og hún sé
reist á röngum forsendum. Þá taka varnir stefnda varðandi varakröfu einnig
til þess að viðmið stefnanda um meðalatvinnutekjur tjónþola samkvæmt 1. mgr.
7. gr. laga nr. 50/1993 sé ofmetið þar sem hluti teknanna byggi á
örorkulífeyrisgreiðslum frá Tryggingastofnun ríkisins. Til viðbótar taka
varnir stefnda varðandi varakröfu til þess að samkvæmt 4. mgr. 5. gr. laga nr.
50/1993 eigi að draga frá skaðabótum þær bætur sem stefnandi hafi áður fengið
úr slysatryggingu launþega hjá Sjóvá-Almennum tryggingum hf. Enn fremur byggir
stefndi á því að vaxtakrafa stefnanda sé fyrnd að hluta samkvæmt 3. gr. laga
nr. 150/2007 um fyrningu kröfuréttinda. Með hliðsjón af úrlausn málsins þykja
ekki efni til að greina nánar frá málsástæðum og lagarökum stefnda að þessu
leyti, sbr. e-lið 1.
mgr. 114. gr. laga nr. 91/1991, sbr. 10. gr. laga nr. 78/2015.
Um kröfu um málskostnað vísar stefndi til 1. mgr. 130. gr. laga nr. 91/1991.
IV.
Niðurstöður:
Stefnandi reisir málatilbúnað sinn á því að vinnuaðstæður hafi verið ófullnægjandi og í raun stórhættulegar, annars vegar vegna staðsetningar á vörubretti sem bakkað var á og hins vegar vegna bilunar í brettatjakkinum og vanbúnaðar hans.
Myndupptaka úr eftirlitsmyndavélakerfi hefur verið lögð fram og sýnir hún greinilega hvernig slysið átti sér stað. Myndupptakan er tæp mínúta að lengd, myndgæði eru ágæt. Upptakan er í lit en án hljóðs. Sjónsvið myndavélar er ofan frá og yfir vinnusvæði í vöruhúsi stefnda. Á myndupptökunni sést þegar starfsmaður með grænan hjálm, tilsjónarmaður stefnanda, er við störf á brettatjakki. Stuttu síðar sést þegar annar starfsmaður, með hvítan hjálm, stefnandi, stýrir brettatjakki þvert yfir aksturssvæði í átt að tilsjónarmanninum, inn á svæði fyrir lestunarreiti og yfir aðgreiningarlínu milli lestunarreita. Á sama tíma vísar hægri handleggur stefnanda í átt að nálægum hlöðnum vörubrettum á lestunarreit hægra megin ofan frá og verður ráðið af upptökunni að stefnandi sé að benda á brettin og tala við tilsjónarmanninn á sama tíma. Tilsjónarmaðurinn nemur staðar á þessum tíma og lítur til hliðar og vísar andlit hans í átt að brettunum sem stefnandi bendir á. Stefnandi nemur staðar á sama tíma í stutta stund og sést þá þegar tilsjónarmaðurinn horfir á lítið tæki sem hann heldur á fyrir framan sig og gengur síðan yfir framstæða gaffla á brettatjakki stefnanda. Á sama tíma byrjar stefnandi að bakka. Tilsjónarmaðurinn gengur rakleiðis að umræddum brettum sem stefnandi var að benda á og nemur þar staðar og vísar þá vinstri framhandleggur tilsjónarmannsins í átt að einu þessara bretta. Af upptökunni verður ráðið að tilsjónarmaðurinn sé að segja stefnanda til og að hann eigi að færa brettatjakkinn að vörubrettinu. Á sama tíma sést þegar stefnandi bakkar brettatjakkinum og vísar andlit hans allan tímann til hægri í átt að tilsjónarmanninum uns hann skellur með brettatjakkinn á hlöðnu vörubretti fyrir aftan sig. Þá sést á upptökunni að umrætt bretti sem stefnandi bakkaði á var hluti af röð af hlöðnum vörubrettum til beggja hliða á lestunarreitum sem mynduðu samliggjandi vegg hlaðinna vörubretta með fram aksturssvæðinu.
Þegar litið er til framangreindrar myndupptöku þá liggur fyrir að vörubrettið sem stefnandi bakkaði á var hluti af stæðu hlaðinna vörubretta sem mynduðu samfellda röð, eins og áður greinir, til hliðar við svæði sem ætlað var til aksturs á milli raða á lestunarreitum. Samkvæmt myndupptökunni var vörubrettið sem stefnandi bakkaði á ekki meira inni á aksturssvæðinu en önnur vörubretti sem voru í fyrrgreindri röð. Þá verður ekki ráðið af upptökunni að vörubrettin hafi verið mjög mikið inni á aksturssvæðinu þannig að sérstök hætta hafi stafað af staðsetningunni. Að þessu virtu verður ekki fallist á með stefnanda að staðsetning vörubrettisins sem hann bakkaði á hafi verið óörugg.
Hvað varðar hið síðargreinda atriði, nánar tiltekið meinta bilun í brettatjakki og vanbúnað, þá liggur fyrir að því er ekki lýst í stefnu með hvaða hætti tjakkurinn var bilaður eða vanbúinn og er þessi málsástæða stefnanda því óskýr. Af málatilbúnaði stefnanda verður hins vegar ráðið að þetta stafi af því að stefndi hafi ekki orðið við beiðnum stefnanda um aðgang að framangreindri myndupptöku. Að mati dómsins þykir rétt að taka tillit til þessa að því marki sem unnt er, enda verður ekki séð að vörnum stefnda hafi verið áfátt að þessu leyti.
Að mati dómsins styður myndupptakan það ekki sérstaklega að brettatjakkurinn hafi verið í ólagi. Á upptökunni sést tækið færast greiðlega á milli tveggja lestunarreita og stöðvast án vandkvæða uns því er bakkað aftur og það lendir á fyrrgreindu vörubretti með fyrrgreindum afleiðingum fyrir stefnanda. Stefnandi bar um það fyrir dómi að brettatjakkurinn sem hann notaði í umrætt skipti hefði virkað en hann hefði hins vegar ekki verið í fullkomnu lagi. Hlaup hefði verið í stýri brettatjakksins og hann ekki stöðvast sem skyldi. Ekki var hins vegar fullt samræmi í framburði stefnanda um akstur tækisins þar sem stefnandi bar einnig um að atvikið hefði gerst svo fljótt að hann hefði í raun ekki áttað sig á því að hann var að bakka á stæðuna fyrr en hann hefði lent á henni. Við sönnunarmatið verður stefnandi látinn bera hallann af framangreindu misræmi. Að því virtu verður lagt til grundvallar að meint bilun í stjórnbúnaði tækisins, nánar tiltekið í stýris- og stöðvunarbúnaði, hafi í raun ekki verið þess valdandi að tækið lenti á brettastæðunni. Samrýmist það einnig myndupptökunni þar sem sést greinilega að tækinu var ekið rakleiðis aftur á bak uns það lenti á stæðunni. Þá verður ekki annað ráðið af myndupptökunni en að stefnandi hafi fyrst og fremst verið að horfa á tilsjónarmanninn á sama tíma og brettatjakkinum var bakkað í stað þess að hann gætti að umhverfi sínu fyrir aftan tjakkinn. Að framangreindu virtu verður ekki fallist á með stefnanda að meint bilun eða vanbúnaður á brettatjakkinum hafi í raun þýðingu fyrir úrlausn málsins með tilliti til þess hvort aðstæður á vinnustað stefnanda hafi verið ófullnægjandi.
Stefnandi reisir málatilbúnað sinn til viðbótar á því að stefndi hafi ekki fylgt almennum ákvæðum laga nr. 46/1980, nánar tiltekið að framkvæmd og tilhögun vinnu hafi ekki verið með þeim hætti að gætt væri fyllsta öryggis og góðs aðbúnaðar og hollustuhátta svo samrýmst hafi 37. gr. laganna. Þá hafi hið sama verið uppi varðandi vinnustaðinn, sbr. 42. gr. sömu laga. Með þessu hafi stefndi brotið gegn skyldum sínum samkvæmt 13. gr., sbr. 12. og 90. gr., laga nr. 46/1980. Máli sínu til frekari stuðnings vísar stefnandi til þess að hann hafi ekki fengið sérstaka kennslu á brettatjakkinn og verkstjóri hafi ekki leiðbeint honum við störf fyrstu dagana.
Við úrlausn á þessum atriðum er til þess að líta að samkvæmt yfirlitsteikningu og fyrrgreindri myndupptöku þá liggur fyrir að stefndi var búinn að skipuleggja vöruhús sitt með skýrum hætti á þeim tíma þegar slysið átti sér stað og hefur ekki orðið breyting á því. Nánar tiltekið er gert ráð fyrir röðum aðgreindra lestunarhólfa sem hvert og eitt er almennt myndað af átta lestunarreitum, fjórum á hvorri hlið og með aksturssvæði á milli. Þá eru lestunarhólf og lestunarreitir aðgreindir með yfirborðsmerkingum á gólfi. Beggja megin við lestunarhólfin eru langar akstursbrautir eftir endilöngu vöruhúsinu, annars vegar þeim megin sem vörubifreiðir eru lestaðar og hins vegar þar sem varningur er geymdur í vöruhúsi. Stefnandi hefur vinnuvélaréttindi í flokkum I og J sem taka meðal annars til lyftara. Þá hefur hann starfsreynslu af stjórnun slíkra tækja á fyrri vinnustað. Ágreiningslaust er að ekki er þörf á vinnuvélaréttindum til að mega stjórna brettatjakki. Almennar umferðarreglur gilda á svæðinu, eins og almennt á við um akstur vinnuvéla, sbr. umferðarlög nr. 50/1987, og bar stefnandi meðal annars um að honum hefði verið kunnugt um að svo væri.
Þá ber einnig að líta til þess að
gögn málsins styðja það að stefnandi hafi hlotið svokallaða nýliðaþjálfun
hjá stefnda. Hið sama kom fram í framburði vitnisins Bergvins Magnúsar
Þórðarsonar öryggisstjóra. Í framburði Bergvins kom einnig fram
að tilsjónarmaður fylgdi almennt nýjum starfsmanni fyrstu dagana í starfi
og svo hefði verið um stefnanda. Samrýmist það fyrirliggjandi myndupptöku en
bæði Bergvin og stefnandi báru um að starfsmaður með grænan hjálm á höfði,
sem sæist á upptöku, hefði verið umræddur tilsjónarmaður. Af framburði
stefnanda verður hins vegar ráðið að nýliðaþjálfunin hafi verið fremur
takmörkuð og miðast við fyrsta vinnudag hans hjá stefnda. Framburður stefnanda
um þetta samrýmist framburði vitnisins Gunnars Gauks Guðmundssonar. Stefnandi
bar um það fyrir dómi að hann hefði fengið nýliðahandbók stefnda við upphaf
ráðningar í tengslum við nýliðaþjálfunina og að hann hefði kynnt sér efni
handbókarinnar. Í bókinni er meðal annars fjallað um öryggismál, þar
með taldar eru grunnvinnureglur um öryggi og heilbrigði. Þar greinir
meðal annars að starfsmaður skuli vera vakandi fyrir umhverfinu og gæta
varúðar. Stefnandi bar um það fyrir dómi að hann hefði á fyrsta vinnudeginum
hjá stefnda fengið tilsögn um það hvernig hann ætti að nota brettatjakkinn.
Samrýmist það fyrirliggjandi gátlista stefnda sem er undirritaður af
stefnanda og tilsjónarmanni hans. Þá kemur einnig fram á gátlistanum að
stefnanda hafi verið kynnt verklag í vöruhúsi o.fl. Á gátlistanum er hins
vegar ekki merkt við reit um að stefnanda hafi verið kynnt verklag við losun
og lestun eða frágang á farmi. Í framburði vitnisins Hans Þorsteinssonar
lestunarstjóra, sem annast þjálfun nýrra starfsmanna hjá stefnda, kom hins
vegar fram að sá reitur taki fyrst og fremst til verklags við að lesta gáma en
ekki stjórnunar brettatjakks, og að því virtu hefur vöntun á fyrrgreindum
þjálfunarþætti ekki sérstaka þýðingu við sakarmatið.
Að öllu framangreindu virtu er það mat dómsins að stefndi hafi skipulagt vinnuna og vinnustaðinn með þeim hætti að þeir þættir væru almennt öruggir, einkum með tilliti til skipulags vöruhússins. Þar með talin eru skilgreind lestunarhólf og lestunarreitir, sbr. yfirborðsmerkingar á gólfi vöruhússins, auk nýliðahandbókarinnar og nýliðaþjálfunarinnar. Stefnandi hefur ekki fært fram haldbær rök fyrir því að framangreindar ráðstafanir hafi verið ófullnægjandi með tilliti til öryggis, vinnuverndar og hollustuhátta á vinnustaðnum og framkvæmdar vinnunnar svo það hafi sérstaka þýðingu við sakarmat vegna umrædds vinnuslyss, eins og atvikum var háttað. Í nýliðahandbókinni var meðal annars kveðið á um mikilvægi þess að starfsmaður væri vakandi fyrir umhverfinu og gætti varúðar. Þá liggur auk þess fyrir, samkvæmt því sem fram kom hjá stefnanda og vitninu Bergvini, og fær stoð í framburði vitnisins Hans, að stefnandi fékk við upphaf starfsins tilsögn um hvernig ætti að nota brettatjakkinn. Einnig liggur fyrir að tilsjónarmaður stefnanda var með honum á vinnusvæðinu á slysdegi og ber myndupptakan með sér að hann hafi farið með verkstjórn á staðnum. Enn fremur ber að hafa í huga í þessu sambandi að stefnandi var með fyrrgreind vinnuvélaréttindi til nokkurra ára og hafði starfsreynslu af stjórnun lyftara frá fyrri vinnustað, auk þess sem honum var ljóst að almennar umferðarreglur giltu á svæðinu. Verður þannig ekki fallist á með stefnanda að kennslu á brettatjakkinn hafi verið áfátt né heldur að honum hafi ekki verið leiðbeint fyrstu dagana í starfi hjá stefnda.
Stefnandi reisir málatilbúnað sinn enn fremur á því, til viðbótar við hin almennu ákvæði laga nr. 46/1980, sem áður greinir, að stefndi hafi vanrækt að grípa til nánar tilgreindra ráðstafana samkvæmt reglugerð nr. 367/2006 til að tryggja góðan aðbúnað, hollustuhætti og öryggi á vinnustaðnum. Í fyrsta lagi byggir stefnandi á því að stefndi hafi ekki gert nauðsynlegar ráðstafanir samkvæmt 1. mgr., sbr. 2. mgr., 5. gr. reglugerðarinnar til að tryggja að tæki sem starfsmönnum var ætlað að nota innan fyrirtækisins hæfði því verki sem ætti að vinna eða væri hæfilega lagað að því þannig að starfsmenn gætu notað tækið án þess að öryggi þeirra væri hætta búin. Við úrlausn á þessu atriði er til þess að líta að fyrir liggja ljósmyndir af brettatjakki í eigu stefnda, hinum sama og notaður var í umrætt skipti af stefnanda eða sambærilegu tæki. Þá liggur einnig fyrir fyrrgreind myndupptaka sem sýnir notkun brettatjakksins hjá stefnanda í umrætt skipti. Við aðalmeðferð var upplýst að um væri að ræða rafknúið tæki. Myndefnið sýnir að þetta er tæki á hjólum sem er búið gaffli að framan og lyftibúnaði til að lyfta upp vörubretti. Þá verður ráðið að tækið henti vel til aksturs á sléttu og hörðu undirlagi, eins og háttar til í vöruhúsi stefnda. Stjórnbúnaður er aftanvert á tækinu fyrir stjórnanda til að stýra því og er miðað við að hann standi á sérstökum palli úr málmi með rifflaðri gúmmímottu áfastri ofan á. Þá eru hlífar beggja megin við stjórnanda rétt neðan við mjaðmir og verður ráðið að þeim sé ætlað að styðja við jafnvægi stjórnanda og varna falli af tækinu. Auk þess er neyðarhemill, svokölluð bumbubremsa, fyrir miðju í stjórnbúnaðinum samkvæmt því sem fram kom hjá vitninu Hans Þorsteinssyni við aðalmeðferð. Vitnið Hans bar einnig um að brettatjakkar væru almennt notaðir í vöruhúsum og að þeir væru fremur algeng tæki. Þá eru brettatjakkar skoðunarskyldir árlega hjá Vinnueftirliti ríkisins en fyrir dóminn hafa verið lögð fram gögn sem stafa frá Vinnueftirlitinu og benda þau fremur til þess að tæki í eigu stefnda af fyrrgreindri tegund, sem kemur til greina að hafi verið í notkun í umrætt skipti, hafi verið í lagi á umræddum tíma. Að mati dómsins verður því ekki annað ráðið en að tækið hafi hæft vel þeirri vinnu sem um ræðir, nánar tiltekið að færa til hlaðin vörubretti í vöruhúsi stefnda o.fl. Hið sama á við um öryggisbúnað tækisins. Þá ber auk þess að taka mið af því sem áður hefur verið lagt til grundvallar, að umrætt slys verði ekki rakið til ástands tækisins.
Í annan stað byggir stefnandi á því að stefndi hafi ekki veitt stefnanda upplýsingar í skilningi 7. gr. fyrrgreindrar reglugerðar, og hafi þannig ekki upplýst starfsmenn um notkunarskilyrði tækisins, óvenjulegar og fyrirsjáanlegar aðstæður og reynslu sem hafi fengist við notkun hlutaðeigandi tækja. Þá hafi stefndi til viðbótar átt að sjá til þess að skriflegar leiðbeiningar lægju fyrir á vinnustaðnum með framangreindum upplýsingum. Við úrlausn á þessu atriði er til þess að líta sem áður hefur verið lagt til grundvallar að stefnandi fékk tilsögn um það hvernig ætti að nota brettatjakkinn og samrýmist það fyrrgreindri skráningu á áðurnefndan gátlista. Þá liggur auk þess fyrir að stefnandi fékk almenna kynningu á vinnustaðnum með nýliðaþjálfuninni, sbr. meðal annars framburð hans sjálfs um það fyrir dómi. Að öðru leyti hefur stefndi ekki sýnt fram á það að hann hafi fullnægt framangreindri upplýsingaskyldu. Að mati dómsins þykir þessi vöntun á upplýsingum hins vegar ekki hafa sérstaka þýðingu fyrir úrlausn málsins þar sem slysið verður ekki rakið til virkni eða eiginleika tækisins, eins og áður greinir. Þá var notkun tækisins og aðstæður, eins og háttaði til í umrætt skipti, ekki óvenjulegar í almennu tilliti hefði stefnandi gætt meiri varúðar.
Í þriðja og fjórða lagi byggir stefnandi á því að stefndi hafi átt að taka fullt tillit til líkamsstöðu starfsmanna við notkun tækja þegar vinnuverndarreglum var framfylgt og í því sambandi hafi átt að líta til meginreglna vinnuvistfræði, auk þess sem stefndi hafi átt að tryggja notkun tækis svo hætta stafaði ekki af því, skipuleggja réttar lyftingar o.fl., svo samrýmist 9. gr. og gr. 1.1 og gr. 3.2.5 í II. viðauka fyrrgreindrar reglugerðar. Að mati dómsins hefur stefnandi ekki fært fram haldbær rök fyrir því að þessi atriði hafi sérstaka þýðingu fyrir úrlausn málsins, eins og atvikum er háttað. Eins og áður greinir leggur dómurinn til grundvallar að meginorsök slyssins hafi verið sú að stefnandi bakkaði tækinu án þess að líta nægjanlega aftur fyrir sig og gæta betur að umhverfi sínu.
Stefnandi byggir á því að við sakarmat verði að hafa í huga að stefndi tilkynnti ekki um vinnuslysið til Vinnueftirlitsins fyrr en 25. maí 2012, eða tveimur dögum eftir að það átti sér stað. Þá verði að taka tillit til þess við sönnunarmatið. Fallast má á það með stefnanda að stefndi hafi ekki gætt þess nægjanlega að tilkynna vinnuslysið án tafar svo betur samrýmdist 2. málsl. 1. mgr. 79. gr. laga nr. 46/1980. Stefnda var eða mátti vera ljóst þegar í upphafi að stefnandi hafði fótbrotnað og því væri líklegt að um væri að ræða langvinnt og varanlegt heilsutjón. Vitnið Bergvin öryggisstjóri bar um það að honum hefði verið tilkynnt um slysið daginn eftir að það varð og hann hefði næsta dag þar á eftir sent tilkynningu til Vinnueftirlitsins. Þá hefði hann ekki talið þörf á að fylgja þeirri tilkynningu eftir. Að mati dómsins hafa haldbærar skýringar ekki fengist frá stefnda á því hvers vegna það tók svo langan tíma að tilkynna um slysið og hvers vegna tilkynningunni var ekki fylgt eftir. Í máli þessu þykir hins vegar skortur á rannsókn Vinnueftirlitsins ekki koma að sök, eins og hér stendur á, við mat á aðstæðum og orsökum slyssins, þar sem fyrir liggur skýr myndupptaka af því. Að því virtu er nægjanlega upplýst um aðstæður á slysstað, notkun tækisins og orsakir slyssins, eins og áður greinir.
Þessu til viðbótar þá er það mat dómsins að almenn leiðbeiningarsjónarmið við sakarmat, sem viðurkennd hafa verið í skaðabótarétti, og stefnandi vísar til í tengslum við sakarmat stefnda, til viðbótar við framangreinda hlutlæga þætti, eigi ekki nægjanlega við fyrir úrlausn málsins, eins og atvikum var háttað sem urðu þess valdandi að umrætt slys varð. Almennar umferðarreglur giltu í vöruhúsinu, sbr. 3. mgr. 1. gr. laga nr. 50/1987. Þá var umræddur brettatjakkur vélknúið ökutæki í skilningi 2. gr. sömu laga. Rík aðgæsluskylda hvíldi á stefnanda, sem ökumanni tækisins, þegar hann ók því aftur á bak og bar honum að gæta að því að það væri gert án þess að valda hættu, sbr. 1. mgr. 17. gr. fyrrgreindra laga. Þá ber einnig að líta til þess að þó að stefnandi væri nýr í starfi hjá stefnda þá hafði hann vinnuvélaréttindi á lyftara o.fl. og nokkra starfsreynslu af stjórnun slíks tækis úr fyrra starfi, sem hefði átt að nýtast honum í starfi hjá stefnda. Að þessu virtu er það mat dómsins að aðgæsluleysi stefnanda hafi valdið slysinu. Stefndi verður ekki látinn bera ábyrgð á því. Að öllu framangreindu virtu verður stefndi því sýknaður af öllum kröfum stefnanda.
Í máli þessu liggur fyrir að stefndi synjaði stefnanda um aðgang að fyrrgreindri myndupptöku áður en til málshöfðunar kom. Myndupptakan var fyrst lögð fram með greinargerð stefnda, sbr. 2. mgr. 99. gr. laga nr. 91/1991. Stefndi hefur til skýringar á synjuninni vísað til almennra vinnureglna hjá fyrirtækinu, sbr. framburð vitnisins Bergvins þess efnis fyrir dómi, auk þess sem stefndi hefur vísað til þágildandi laga nr. 77/2000 og reglna nr. 837/2006. Notkun eftirlitsmyndavélar á vinnusvæði stefnda þar sem stefnandi var við störf var rafræn vöktun í skilningi framangreindra laga. Að mati dómsins þykir framangreind afstaða stefnda ekki samrýmast nægjanlega meginreglu einkalífsréttar um upplýsingarétt stefnanda, sem hins skráða, sbr. 2. mgr. 17. gr. laga nr. 90/2018 um persónuvernd og vinnslu persónuupplýsinga, sbr. áður 18. gr. laga nr. 77/2000. Framangreind afstaða stefnda var því reist á hæpnum lagagrundvelli og var hún til þess fallin að torvelda málatilbúnað stefnanda og að hann gæti lagt fullnægjandi mat á réttarstöðu sína. Þá hefði mögulega mátt komast hjá málshöfðuninni hefði upptakan verið látin af hendi þegar eftir því var leitað af stefnanda. Að þessu virtu og með vísan til 3. mgr. 130. gr. laga nr. 91/1991 þykir rétt að fella niður málskostnað milli aðila.
Allur
gjafsóknarkostnaður stefnanda greiðist úr ríkissjóði, þar með talin málflutningsþóknun
lögmanns hans, Höskuldar Þórs Þórhallssonar, sem þykir með hliðsjón af eðli og
umfangi málsins hæfilega ákveðin 1.800.000 krónur að meðtöldum virðisaukaskatti.
Af hálfu stefnanda flutti málið Höskuldur Þór Þórhallsson lögmaður. Af hálfu stefnda flutti málið Guðrún Lilja Sigurðardóttir lögmaður fyrir hönd Lilju Jónasdóttur lögmanns.
Daði
Kristjánsson héraðsdómari kveður upp dóm þennan.
D Ó M S O R Ð:
Stefndi, Samskip hf., skal vera sýkn af kröfum stefnanda, Guðmundar Ólafs Kristjánssonar, í máli þessu.
Málskostnaður milli aðila fellur niður. Allur gjafsóknarkostnaður stefnanda fyrir héraðsdómi greiðist úr ríkissjóði, þar með talin þóknun lögmanns hans, Höskuldar Þórs Þórhallssonar, 1.800.000 krónur.
Daði Kristjánsson