- Fasteign
- Lax- og silungsveiði
- Sameign
- Veiðiréttur
Árið 2019, föstudaginn 11. janúar, er á dómþingi Héraðsdóms Suðurlands, sem
háð er að Austurvegi 4, Selfossi, af Ragnheiði Thorlacius, héraðsdómara,
kveðinn upp í málinu nr. E-72/2018:
Ragnhildur Lárusdóttir,
Brynjar Ágúst Sigurðsson,
Guðrún Þórarinsdóttir
og
Bryndís Guðmundsdóttir
(Vilhjálmur Þ. Á. Vilhjálmsson lögmaður.)
gegn
Ingibjörgu Jóhannesdóttur,
Margréti Guðjónsdóttur,
Katrínu Jónínu Óskarsdóttur,
Eysteini Fjölni Arasyni,
Árna Valdimarssyni,
Útgerðarfélaginu Hvoli ehf.
(Guðjón Ármannsson lögmaður.)
og
Einhyrningi ehf.
(Áslaug Árnadóttir lögmaður)
svofelldur
d ó m u
r :
Mál þetta, sem dómtekið var þann 3. desember sl., er
upphaflega höfðað af Ragnhildi Lárusdóttur,
Brynjari Ágústi Sigurðssyni,
Guðrúnu Þórarinsdóttur, og Ragnheiði F. Lárusdóttur, gegn Ingibjörgu
Jóhannesdóttur, Margréti Guðjónsdóttur, Katrínu Jónínu Óskarsdóttur, Eysteini
Fjölni Arasyni, Árna Valdimarssyni, Útgerðarfélaginu Sveitarfélaginu Árborg, og
Einhyrningi ehf.,
Hinn
18. maí 2018 framseldi Ragnheiður F. Lárusdóttir eignarhlut sinn í jörðinni
Miðhúsum til dóttur sinnar Bryndísar Guðmundsdóttur, sem tekið hefur við aðild
máls þessa.
Stefnendur
krefjast þess að viðurkennt verði með dómi að veiðiréttur í ánni Eystri-Rangá
sem stefndu telja sér til eignar og tilheyri jörðum þeirra tilheyri stefnendum
sem eigendum jarðarinnar Miðhúsa. Þá krefjast stefnendur þess að viðurkennt
verði með dómi að framsal veiðiréttinda í ánni Eystri-Rangá sem seld voru frá
jörðinni Miðhúsum samkvæmt afsali dags. 14. maí 1948 og stefndu leiða veiðirétt
sinn frá, hafi verið óheimilt og séu veiðiréttindi þau sem upphaflega tilheyrðu
Miðhúsum fyrir afsalið dags. 15. maí 1948, því eign stefnenda sem eigenda
jarðarinnar Miðhúsa. Stefnendur krefjast málskostnaðar að skaðlausu úr hendi
stefndu in solidum.
Stefndu
krefjast sýknu af kröfum stefnenda. Þá krefjast stefndu málskostnaðar að
skaðlausu úr hendi stefnenda in solidum.
Málavextir
Samkvæmt gögnum málsins er elsta
heimild um jörðina Miðhús, í þáverandi Hvolhreppi, í jarðatali J. Johnsen frá
1847. Óumdeilt er að þegar Lárus Ágúst Gíslason keypti jörðina 1947 réð
Eystri-Rangá landamerkjum að norðan, sbr. og landamerkjabók Rangárvallasýslu
frá 17. maí 1892. Með afsali, dags. 14. maí 1948, afsalaði Lárus nánar
tilgreindum hluta jarðarinnar Miðhúsa til nýbýlastjórnar, f.h. ríkissjóðs.
Núverandi eigendur Miðhúsa,
stefnendur þessa máls, leiða allir eignarétt sinn að jörðinni til hjónanna
Lárusar Ágústs Gíslason og Bryndísar Nikulásdóttur sem bæði eru látin.
Af gögnum málsins má ætla að til
hafi staðið að stofnuð yrðu fimm nýbýli á hinu selda landi Miðhúsa. Raunin varð
hins vegar sú að stofnuð voru fjögur nýbýli, þ.e. Miðtún, Lynghagi, Akur og
Hjarðartún.
Eins og áður greinir eignaðist ríkissjóður hluta
jarðarinnar Miðhúsa árið 1948. Með byggingarbréfum, dags. 8. september 1949, 3.
október 1951, 12. september 1952 og 20. október 1953, ráðstafaði nýbýlastjórn,
í umboði ríkissjóðs, hinu afsalaða landi Miðhúsa til búrekstrar og stofnun
nýbýla samkvæmt lögum nr. 35/1946 um landnám, nýbyggðir og endurbyggingar í
sveitum. Í áðurnefndum byggingarbréfum var hinu leigða landi og legu þess lýst,
en landið var leigt í erfðaábúð. Í öllum byggingarbréfunum voru samhljóða
ákvæði í 2. mgr. 3. gr. um beitarrétt að landi meðfram Eystri-Rangá og um
veiðirétt jarðanna í ánni að 1/5 á móti hinum býlunum. Stærð býlanna var á
bilinu 30,5–37,1 hektarar. Með viðbótarbyggingarbréfum, dags. 4. desember 1965,
var hverri jörð lagt til viðbótarland, nánar tiltekið á bilinu 6,93–7,97
hektarar. Jafnframt var gerð sú breyting að beitar- og veiðiréttur hverrar jarðar
varð 1/4 að tiltölu. Áðurnefnd nýbýli fengu nöfnin Miðtún, Lynghagi, Akur og
Hjarðartún.
Samkvæmt gögnum málsins seldi ríkissjóður jarðirnar
Miðtún, Lynghaga, Akur og Hjarðartún á árunum 1986-2013. Í afsölum fyrir
jörðunum er með mismunandi hætti fjallað um hvaða verðmæti fylgja með í sölu
jarðanna. Verður eingöngu gerð grein fyrir ákvæðum afsalanna hvað varðar
fylgifé/hlunnindi og/eða veiðirétt. Í afsali ríkissjóðs fyrir jörðinni
Hjarðartúni, dags. 6. janúar 1986, segir að jörðinni fylgi veiðiréttur í Rangá
að 1/4 hluta. Í afsali ríkissjóðs fyrir jörðinni Miðtúni, dags. 23. nóvember
1991, er ekki vikið sérstaklega að veiðirétti en þar segir að jörðin sé seld
ásamt öllum þeim gögnum og gæðum sem henni fylgja og fylgja ber samkvæmt
jarðalögum nr. 65/1976 og nánar greini í afsalinu. Í afsali ríkissjóðs fyrir
jörðinni Akri, dags. 30. mars 2000, er sambærilegt ákvæði og í afsali
ríkissjóðs fyrir Miðtúni. Í afsali ríkissjóðs fyrir jörðinni Lynghaga, dags. 1.
febrúar 2013, er sambærilegt ákvæði og í afsölum fyrir Miðtúni og Akri. Hins
vegar er í afsalinu fyrirvari ríkissjóðs er varðar veiðirétt jarðarinnar. Er
hann svohljóðandi: „Eigendur
nágrannajarðarinnar Miðhúsa, landnr. 164180, hafa gert tilkall til veiðiréttar
í ánni Eystri-Rangá. Ef dómstólar myndu samþykkja það tilkall myndi veiðiréttur
jarðarinnar Lynghaga minnka hlutfallslega eða að öllu leyti. Yrði það raunin
samþykkir seljandi að endurgreiða kaupanda þá skerðingu á veiðiréttinum
samkvæmt kaupverði veiðiréttarins til baka. [Matsverð veiðihlunninda er
tilgreint í afsalinu, innskot dómara] Sú
fjárhæð yrði jafnframt uppreiknuð miðað við hækkun byggingarvísitölu frá
söludegi. Leiðréttingarheimild þessi gildir eingöngu í 10 ár frá kaupdegi.
Verði skerðing á veiðiréttinum eftir þann tíma skapast eigi krafa til
leiðréttingar á söluverði. Krafa til leiðréttingar skapast hvort heldur sem
dómur fellur í héraði eða Hæstarétti, kjósi málsaðilar að áfrýja ekki
niðurstöðu héraðsdóms.“
Í stefnu er gerð grein fyrir eignarhaldi stefndu á
umræddum nýbýlum úr landi Miðhúsa. Samkvæmt stefnu og gögnum málsins er
eignarhald nýbýlanna sem hér segir: Lynghagi er í eigu stefndu Ingibjargar
Jóhannesdóttur. Þá munu tiltekin mannvirki og ræktun á jörðinni vera í eigu
stefnda Útgerðarfélagsins Hvols hf. Áðurgreint félag mun einnig vera eigandi
spildu úr landi Hjarðartúns. Að öðru leyti er Hjarðartún í eigu Einhyrnings
ehf. Þá er jörðin Akur sögð vera í eigu stefnda Árna Valdimarssonar. Samkvæmt
stefnu hefur jörðinni Miðtúni nokkrum sinnum verið skipt og hefur jörðin og
einstakar spildur úr henni gengið kaupum og sölum allt frá árinu 2000. Sem
handhöfum veiðiréttar jarðarinnar Miðtúns er Margréti Guðjónsdóttur stefnt sem
eiganda Miðtúns og Katrínu Jónínu Óskarsdóttur og Eysteini Fjölni Arasyni sem
eiganda Miðtúns 2.
Í greinargerð stefndu annarra en Einhyrnings ehf.,
kemur fram að veiðifélag Eystri-Rangár hafi verið stofnað árið 1991. Óumdeilt
er að stefnendur, eigendur Miðhúsa, hafa ekki fengið arðgreiðslur samkvæmt
arðskrá veiðifélags Eystri-Rangá, en nýbýlin Miðtún, Lynghagi, Akur og
Hjarðartún fara samtals með 360 einingar af 10.000 heildareiningum árinnar. Það
mun hafa verið á árunum 2009 og 2016 sem stefnendur beindu kröfu um arðgreiðslu
vegna veiði í Eystri-Rangá til stjórnar veiðifélagsins en var hafnað.
Málsástæður stefnenda
Stefnendur byggja á því að frá örófi
hafi jörðin Miðhús legið að Eystri-Rangá og í samræmi við reglu sem rekja megi
allt til Grágásar og 56. kapítula Landsleigubálks Jónsbókar um að landeigandi
eigi vatn og veiði fyrir landi sínu hafi Miðhús notið veiðiréttar í
Eystri-Rangá. Byggja stefnendur á því að ákvæði afsalsins frá 14. maí 1948
milli Lárusar Ágústs Gíslasonar og nýbýlastjórnar, f. h. ríkissjóðs, þar sem
segi að „fasteign þessari fylgi
veiðiréttur jarðarinnar í Rangá“ hafi ekki öðlast gildi þar sem þágildandi
löggjöf, nánar tiltekið lax- og silungsveiðilög nr. 112/1941, hafi bannað að
aðskilja veiðiréttinn frá jörðinni enda hafi Miðhús verið jörð í byggð. Því
tilheyri veiðirétturinn jörðinni. Vísa stefnendur til dóms Hæstaréttar í málinu
nr. 530/2014 varðandi túlkun vatnalaga nr. 15/1923, lax- og silungsveiðilaga
nr. 61/1932 og skilgreiningu hugtaksins landareign. Vísa stefnendur til þess að
með framangreindum dómi hafi því verið slegið föstu að það hafi verið vilji
löggjafans að sett yrðu tiltekin takmörk fyrir aðskilnaði veiðiréttar frá
landareign í þeim tilgangi að sporna við því að landkostir jarða sem væru í
landbúnaðarnotkun skertust, þ.m.t. verðmæt hlunnindi eins og réttur til veiði í
ám og vötnum. Þá hafi með lögum nr. 61/1932 enn verið ítrekuð þýðing
veiðiréttar fyrir jarðir í búrekstri og að eðlilegast og heppilegast sé að
veiðin fylgi öðrum landnytjum. Einnig vísa stefnendur til þess að takmarkalaus
uppskipting veiðiréttar einstakra jarða á fleiri hendur gæti stefnt í hættu því
markmiði sem lögum nr. 61/2006 hafi verið ætlað, þ.e. að tryggja skynsamlega,
hagkvæma og sjálfbæra nýtingu þeirrar auðlindar sem fiskistofnar ferskvatna
séu.
Samkvæmt þessu byggja stefnendur á
því að þar sem bannað hafi verið samkvæmt 4. mgr. 2. gr. laga nr. 112/1941 að
skilja að veiðirétt frá jörð í byggð, hafi ekki stofnast sá veiðiréttur sem
afsalið frá 14. maí 1948 hafi kveðið á um. Þá verði hvorki séð af afsalinu né
öðrum gögnum að um hafi verið að ræða tímabundin afnot til allt að tíu ára,
sbr. undantekningarreglu 2. mgr. 4. gr. laga nr. 112/1941. Vísa stefnendur til
þess að jörðin Miðhús hafi verið í fullri byggð á umræddum tíma og því hafi
verið um að ræða jörð sem hafi notið réttarverndar framangreinds lagaákvæðis.
Byggt sé á því að Miðhús hafi á árinu 1948 verið lögbýli og landareign í
skilningi laga þess tíma, en skilgreiningu hafi m.a. verið að finna í 1. gr.
laga nr. 15/1923
Þar sem afsalshafi, íslenska ríkið
(nýbýlastjórn) hafi ekki öðlast með gildum hætti veiðirétt jarðarinnar Miðhúsa,
leiði að síðari afsalshafar ríkisins á landspildunni úr Miðhúsalandi, hafi ekki
öðlast slíkan rétt, enda geti kaupandi ekki eignast ríkari rétt en seljandi og
síðari afsalshafar ekki öðlast eignarrétt að veiðirétti sem upphaflegur
framsalshafi hafi ekki notið með gildum hætti.
Vísa stefnendur til þess að ríkið
hafi verið eigandi allra ofangreindra jarða í töluverðan tíma eftir að
landskikinn hafi verið seldur frá Miðhúsum, sbr. að fyrsta afsalið hafi verið
gefið út vegna Hjarðartúns árið 1986, árið 1999 vegna Miðtúns, árið 2000 vegna
Akurs og síðasta afsalið hafi verið gefið út vegna Lynghaga árið 2013. Fram að
þeim tíma hafi ríkið verið eigandi landssvæðanna og ábúendur greitt leigu
samkvæmt fyrirmælum í byggingarbréfum.
Þá hafna stefnendur því að skráning
stefndu hjá veiðifélagi Eystri-Rangár sem handhafa hluta í félaginu geti leitt
til stofnunar eignarréttar eða hefð skapast við slíkar aðstæður. Sama gildi um
heimildarlausa útgreiðslu arðs til stefndu sem og ef stefndu hafi talið slíkt
fram til eignar um árabil. Stefnendur hafna því að til staðar séu lagaskilyrði
til stofnunar veiðiréttar á grundvelli hefðar og vísa í því sambandi til dóms
Hæstaréttar í málinu nr. 530/2015.
Um aðild vísa stefnendur til 1. mgr.
18. gr. laga nr. 91/1991 um meðferð einkamála, og þess að þeir séu allir
eigendur jarðarinnar Miðhúsa. Aðild stefndu sé aðallega byggð á 1. mgr. 18. gr.
laga nr. 91/1991 með vísan til þess að stefndu leiði öll rétt sinn frá ríkinu
sem hafi fengið veiðirétt þann er mál þetta fjallar um samkvæmt afsali dags. 14.
maí 1948. Viðurkenningarkrafa stefnenda lúti að öllum veiðirétti sem seldur
hafi verið og því sé öllum þeim sem telja til heimilda fyrir þeim veiðirétti
stefnt, þ.e. um sé að ræða óskipta skyldu í skilningi 1. mgr. 18. gr.
áðurnefndra laga. Til vara er aðild stefndu byggð á 1. mgr. 19. gr. laga nr.
91/1991, en um sé að ræða sama atvik, aðstöðu og löggerning. Hver stefndi reki
rétt sinn til veiðiréttar til eignarhalds síns á umræddum jörðum, hvers réttur
sé sóttur til afsalsins frá 14. maí 1948. Einnig séu stefndu skráðir fyrir arði
úr Eystri-Rangá samkvæmt arðskrá árinnar.
Um lagarök vísa stefnendur auk
framangreinds til meginreglna eignaréttar, samningaréttar og kröfuréttar,
Grágásar, 56. kapitula Landleigubálks Jónsbókar, vatnalaga nr. 15/1923, lax- og
silungsveiðilaga nr. 61/1932 og laga um sama efni nr. 112/1941, 53/1957,
76/1970 og 61/2006. Viðurkenningarkrafa stefnanda hafi stoð í 2. mgr. 25. gr.
laga nr. 91/1991. Um varnarþing er vísað til 34. gr. áðurnefndra laga, sbr.
einnig 32., sbr. 42. gr. laganna. Varðandi málskostnaðarkröfu vísa stefndu til
1. mgr. 130. gr., sbr. 129. gr. laga nr. 91/1991 og laga nr. 50/1988.
Málsástæður stefndu annarra
en Einhyrnings ehf.
Stefndu fjalla um tvíþátta kröfugerð
stefnenda í máli þessu, þ.e. annars vegar kröfu þeirra um viðurkenningu á því
að veiðiréttur í Eystri-Rangá tilheyri stefnendum og hins vegar kröfu þeirra um
viðurkenningu á því að framsal fyrrgreindra veiðiréttinda hafi verið óheimilt
og veiðiréttindi því eign stefnenda. Telja stefndu að seinni krafan sé aðeins
málsástæða fyrir fyrri kröfunni og hafi stefnendur því ekki lögvarða hagmuni af
úrlausn seinni kröfunnar, sbr. 2. mgr. 25. gr. laga nr. 91/1991 um meðferð
einkamála. Hljóti því að koma til álita að vísa seinni hluta dómkröfunnar frá
dómi án kröfu.
Stefndu mótmæla öllum dómkröfum
stefnenda og þeim málsástæðum sem kröfurnar eru reistar á. Þá hafna stefndu
fordæmisgildi dóms Hæstaréttar frá 3. mars 2016 í máli nr. 530/2015 enda séu
aðstæður allt aðrar í máli þessu.
Stefndu byggja sýknukröfu sína í fyrsta
lagi á því að fyrir liggi að stefndu eru eigendur að öllu landi
Miðhúsatorfunnar sem liggur að Eystri-Rangá. Vísa stefndu til fornrar og
rótgróinnar reglu íslensks réttar um að veiðiréttur fylgi bakkajörð. Komi
reglan fram í Landbrigðisþætti Grágásar. Einnig vísa stefndu til 56. kapítula
Landleigubálks Jónsbókar, en framangreindum reglum um veiði í ám og vötnum hafi
verið fylgt við setningu vatnalaga nr. 15/1923, sbr. 1. mgr. 121. gr. laganna.
Þá vísa stefndu til ákvæða laga um að óheimilt sé að skilja veiðirétt að nokkru
eða öllu leyti frá landareign nema um tiltekið árabil, ekki lengra en tíu ár í
senn auk annarra skilyrða, sbr. upphaflega 2. mgr. 121. gr. laga nr. 15/1923 og
síðar 1. og 4. mgr. 2. gr. laga nr. 61/1932 um lax- og silungsveiði, 1. og 4.
mgr. laga nr. 112/1941, 1. og 4 mgr. 2. gr. laga nr. 76/1970, nú 5. gr. og 9.
gr. laga 61/2006 um lax- og silungsveiði. Í máli þessu sé óumdeilt að
stefnendur eigi ekkert land að Eystri-Rangá. Það eigi hins vegar jarðir stefndu
og með vísan til hinnar fornu meginreglu fylgi veiðiréttur því landi stefndu.
Þegar af þeirri ástæðu beri að sýkna stefndu af dómkröfu stefnenda.
Í öðru lagi byggja stefndu á því að
fyrir liggi að við uppskiptingu Miðhúsa árið 1948 hafi sérstaklega verið samið
um að veiðiréttur Miðhúsa skyldi fylgja því landi sem afsalað var nýbýlasjóði
með afsali dags. 14. maí 1948. Byggist veiðiréttur stefndu á skýru ákvæði
afsalsins og vilja afsalsgjafa, Lárusar Ágústs Gíslasonar. Stefndu byggja á því
að stefnendur, sem leiða rétt sinn frá áðurnefndum Lárusi, séu bundnir við hið
þinglýsta afsal frá 1948. Hafi Lárus haft fullt samningsfrelsi til að ákveða að
hinum afsalaða landi skyldi fylgja allur veiðiréttur fyrir því landi. Hafi
engir landbúnaðarhagsmunir sett samningsfrelsinu skorður að þessu leyti enda
hafi legið ljóst fyrir að stofnað yrði til búrekstrar á hinu útskipta landi. Þá
sé til þess að líta að Lárus hafi eingöngu haldið eftir minnihluta alls
jarðnæðis Miðhúsatorfunnar með framangreindri ráðstöfun, en ríflega 260
hekturum lands hafi verið afsalað til nýbýlastjórnar. Í þeim gerningi hafi
jafnframt falist landskipti þar sem meirihluti jarðarinnar hafi verið lagður
til nýrra bújarða. Við slíkar aðstæður hafi jarðeiganda verið fyllilega heimilt
að ákveða að landi sem lá að Eystri-Rangá skyldi fylgja veiðiréttur
jarðarinnar. Vísa stefndu að þessu leyti til 3. gr. landskiptalaga nr. 46/1941.
Telja stefndu að Lárusi, sem eina eiganda Miðhúsa, hafi verið heimilt að ákveða
að framkvæma staðbundin skipti, sbr. áðurtilvitnað ákvæði landskiptalaga, á
veiðirétti Miðhúsa. Aðstæður í máli þessu séu því allt aðrar en í dómi
Hæstaréttar nr. 530/2015 þar sem skipt hafi verið út úr jörð 30 hektara spildu
til frístundanota. Í máli þessu hafi landi Miðhúsa verið skipt í tvo stóra
jarðarhluta sem báðir hafi verið ætlaðir til landbúnaðarnota.
Í þriðja lagi byggja stefndu á því
að stofnað hafi verið til lögbýla á hinu afsalaða landi og þar stundaður
landbúnaður. Hafna stefndu tilvísun stefnenda til dóms Hæstaréttar í málinu nr.
530/2015 þar sem þar hafi verið um að ræða spildu sem hvorki hafi verið stofnað
til sem lögbýlis eða hún á nokkurn hátt hagnýtt í þágu landbúnaðar. Í því máli
hafi hagsmunir sem bjuggu að baki hinu takmarkaða banni við aðskilnaði
veiðiréttar frá landi í 2. mgr. 121. gr. laga nr. 15/1923 verið svokallaðir
landbúnaðarhagsmunir, þ.e. löggjafinn hafi með því ætlað að sporna við því að
landkostir jarða í landbúnaðarnotum skertust og veiðiréttindi kæmust í hendur
annarra. Í framangreindu máli hafi bakkareglan, en umrædd spilda í framangreindu
máli Hæstaréttar hafi náð að bökkum Eystri-Rangár, vikið fyrir
landbúnaðarreglunni, þ.e. þeim sjónarmiðum sem rakin hafa verið hér að framan.
Því byggi stefndu á því að bakkareglan sé hin forna meginregla og þurfi mikið
til að koma svo að vikið verði frá henni. Þá sé til þess að líta að starfsemi
nýbýlastjórnar, sem keypti hluta Miðhúsa 1948, hafi byggst á lögum nr. 58/1941
um landnám ríkisins, en samkvæmt 6. gr. þeirra laga hafi þau verið sett í því
skyni að efla landbúnað og treysta búsetu í sveitum landsins. Vísa stefndu
einnig til 2. og 8. gr. laganna, en í síðarnefndu greininni sé gert ráð fyrir
að áður en landnámssvæði væri ákveðið skyldi nýbýlastjórn leita umsagnar og
tillagna sveitarstjórnar þar sem landnám væri fyrirhugað og bæri hreppsnefnd að
gera rökstudda grein fyrir hver áhrif hins fyrirhugað landnáms myndi vera á
afkomuöryggi bújarða sem fyrir væru í sveitinni. Segir í greinargerð stefndu að
í máli þessu liggi ekkert annað fyrir en að jákvæð umsögn hafi borist frá
hreppsnefnd Hvolshrepps að þessu leyti. Samkvæmt þessu sé útilokað að halda því
fram að ráðstöfun veiðiréttar til nýbýlanna hafi á einhvern hátt farið gegn
landbúnaðarhagsmunum, enda hafi í umrætt sinn verið stofnaðar bújarðir til að
efla íslenskan landbúnað í samræmi við skýran vilja löggjafans. Hafi því
framsal veiðiréttar Miðhúsa með afsalinu frá 1948 verið lögmætt.
Í fjórða lagi vísa stefndu til
verðmæta veiðiréttarins. Í dómi Hæstaréttar í máli nr. 530/2015 hafi verið
vísað til vilja löggjafans til að sporna við því að landkostir jarða sem væru í
landbúnaðarnotum skertust og þá segir í dómnum að þar hafi m.a. verið átt við „verðmæt hlunnindi eins og réttur til veiði í
ám og vötnum.“ Í máli þessu hagi þannig til að á þeim tíma sem salan til
nýbýlasjóðs hafi farið fram hafi engin veiði verið í Eystri-Rangá, en hún hafi
fallið í kjölfar Heklugossins 1947. Með framsali veiðiréttarins hafi því í raun
ekki verið látið af hendi nein veiðiréttindi. Það hafi verið vegna
umfangsmikilla seiðasleppinga sem veiði í ánni hafi hafist að nýju, eða löngu
eftir hina umræddu sölu.
Loks vísa stefndu til þess að
stefnendur hafi samþykkt í verki að Miðhús hafi árið 1948 verið skipt upp með
þeim hætti að nýbýli stefndu ættu allan veiðirétt fyrir landi sínu. Það hafi
ekki verið fyrr en 60 árum síðar sem stefnendur hafi fyrst hreyft við því að
líta ætti framhjá ákvæði afsalsins um framsal veiðiréttar. Réttarreglur um hefð
styðji því jafnframt sýknukröfu stefndu en þeir og forverar þeirra hafi í
fullan hefðartíma haldið á veiðiréttinum.
Til vara gera stefndu þá kröfu að
veiðirétturinn sé hvað sem öðru líður í óskiptri sameign Miðhúsa og nýbýla
stefndu. Vísa stefndu til framangreindra röksemda og telja kröfuna rúmast innan
sýknukröfu sinnar.
Um lagarök vísa stefndu auk
framangreinds til 72. gr. stjórnarskrárinnar um friðhelgi eignaréttar, sbr.
einnig 1. gr. 1 samningsviðauka Mannréttindasáttmála Evrópu, meginreglna
eignaréttar, samningaréttar og kröfuréttar, Landsbrigðisþáttar Grágásar, 56.
kapitula Landleigubálks Jónsbókar, núgildandi lax- og silungsveiðilaga nr.
61/2006 og þágildandi lax- og silungsveiðilaga nr. 61/1932, laga nr. 112/1941,
laga nr. 76/1970, vatnalaga nr. 15/1923 og laga nr. 58/1941 um landnám
ríkisins. Varðandi málskostnaðarkröfu vísa stefndu til 1. mgr. 130. gr. laga
nr. 91/1991.
Málsástæður stefndu
Einhyrnings ehf.
Stefndi Einhyrningur ehf., mótmælir
kröfugerð og málsástæðum stefnenda. Svo virðist sem kröfur stefnenda séu settar
fram sem tvær aðalkröfur en erfitt sé að sjá með hvað hætti þær geti staðið
saman, enda verði að telja ljóst að ef fallist verði á fyrri kröfuna þá sé
síðari krafan með öllu óþörf og öfugt. Þannig sé kröfugerð stefnenda í raun
valkvæð.
Stefndi byggir í fyrsta lagi á því
að framsal veiðiréttar með afsalinu frá 14. maí 1948 hafi verið, þrátt fyrir
þágildandi lax- og silungsveiðilög nr. 112/1941 um bann við að aðskilja
veiðirétt frá jörðum, heimilt með því að landi Miðhúsa hafi verið afsalað til
nýbýlastjórnar.
Í öðru lagi vísar stefndi til hinnar fornu reglu um að
hver maður eigi vatn og veiði fyrir sínu landi, sbr. 1. mgr. 2. gr. laga nr.
112/1941. Í samræmi við þessa reglu hafi framkvæmdin almennt verið sú að þegar
bújörð er skipt upp í tvær eða fleiri bújarðir fylgi veiðirétturinn þeim hluta
lands sem liggur að á eða vatni. Því verði bann 4. mgr. 2. gr. laga nr.
112/1941 ekki skilið svo að það leggi bann við að veiðiréttur fylgi þeim hluta
jarða sem liggi að vatni þegar bújörð sé skipt upp í fleiri bújarðir, enda væri
slíkt í andstöðu við meginreglu þá sem í upphafi er vísað til.
Í þriðja lagi vísar stefndi til þess að óumdeilt sé að
hin framselda landareign liggi að Eystri-Rangá, enda komi það skýrt fram í
afsalinu frá 14. maí 1948 í lýsingu á hinu selda landi. Þá liggi einnig fyrir í
máli þessu að nýbýlin fjögur hafi öll fengið land meðfram ánni og hafi landið
og veiðirétturinn verið í sameign býlanna, og því öllum býlunum jafnheimil
veiði, sbr. 4. gr. laga nr. 112/1941.
Í fjórða lagi byggir stefndi á því að vilji samningsaðila
hafi skýrlega komið fram í afsalinu frá 14. maí 1948, þ.e. að veiðiréttur
fylgdi hinu selda landi. Þá vísar stefndi til þess að í lögskýringagögnum með
lax- og silungsveiðilögum hafi mátt ráða að tilgangur löggjafans með því að
takmarka aðskilnað veiðiréttar frá landareign, sbr. 2. gr. laga nr. 112/1941,
hafi verið að sporna við því að landkostir jarða sem væru í landbúnaðarnotum
skertust og að tryggja það að jarðir í sveitum héldust í byggð. Í því ljósi sé
nauðsynlegt, við mat á gildi framsalsins, að hafa í huga hver hafi verið
tilgangur með framsalinu og hvernig hið framselda land hafi verið nýtt, en eins
og áður greinir hafi landinu verið afsalað til nýbýlastjórnar á grundvelli laga
nr. 108/1941. Hafi tilgangur sjóðsins verið að ákveða styrki til nýbýla og
stýra öðrum framkvæmdum í nýbýlamálum. Hafi tilgangur laganna verið að stuðla að
endurbyggingu íveruhúsa í sveitum og stofnun nýrra býla. Með lögunum hafi verið
brugðist við fólksfjölgun og sköpuð skilyrði til þess að sem flestir ættu þess
kost að fá býli í sveitum til ábúðar, sbr. 14. gr. laganna. Stefndi vísar
einnig til 15. gr. og 24. gr. laganna og þess að þegar jörð sé skipt í nýbýli
skyldi þess gætt að hvert býli fengi nægjanlega mikið landrými að mati
nýbýlastjórnar að það nægði meðalfjölskyldu til framfærslu. Allar hafi
jarðirnar Akur, Miðtún, Hjarðartún og Lynghagi verið bújarðir og ætlaðar til
landbúnaðarnota. Byggir stefndi á því að lög nr. 108/1941 séu sérlög sem gangi
framar ákvæðum um takmörkun á aðskilnaði veiðiréttar frá landareign og því hafi
framsalið verið heimilt. Einnig verði að líta til þess að framsal veiðiréttar
hafi ekki haft veruleg áhrif á landkosti Miðhúsa, enda hafi sú jörð haldist í
byggð síðan og hafi framsalið stuðlað að fjölgun bújarða.
Loks vísar stefndi til þess að
jörðin Hjarðartún hafi réttilega átt veiðirétt í Rangá frá stofnun jarðarinnar
og ekki hafi mátt skilja þann rétt frá jörðinni með afsali dags. 2. mars 1999,
en þá hafi stefndi Útgerðarfélagið Hvoll ehf. (þá Hvoll hf.) selt Sigþóri
Jónssyni og Gerði Óskarsdóttur jörðina að undanskilinni 7,67 hektara spildu og
rétti til beitar í óskiptu landi meðfram Rangá að 1/4 til móts við jarðarinnar
Akur, Lynghaga og Miðtún og veiði að sömu tiltölu. Á þeim tíma sem
veiðirétturinn hafi verið skilinn frá Hjarðartúni hafi jörðin verið bújörð i
skilningi laga og sé það enn í dag. Þá hafi gilt lög nr. 76/1970 en samkvæmt
þeim hafi verið óheimilt að skilja veiðirétt frá landareign. Því sé stefndi
Einhyrningur eiginlegur handhafi veiðiréttarins og sé málinu réttilega beint
gegn félaginu.
Forsendur og niðurstaða
Í munnlegum málflutningi kom fram hjá lögmönnum stefndu
að ranglega hafi verið vísað til laga í greinargerðum. Hið rétta sé að þegar
sala á hluta Miðhúsa hafi farið fram á árinu 1948 hafi lög nr. 35/1946 um
landnám, nýbyggðir og endurbyggingar í sveitum verið í gildi en ekki lög nr.
58/1941 um landnám ríkisins, og byggðu lögmennirnir á fyrrnefndu lögunum í
málflutningi sínum. Af framlögðum gögnum málsins má sjá að hlutar úr jörðum
stefndu hafa gengið kaupum og sölum undanfarin ár. Af þeim sökum skal tekið
fram að í máli þessu verður ekki tekin afstaða til ágreinings sem kann að vera
milli stefndu um viðkomandi gerninga.
Ágreiningur málsaðila, sem hér er til úrlausnar, lýtur
að því hvort veiðiréttur í Eystri-Rangá hafi fylgt með þegar Lárus Ágúst
Gíslason afsalaði hluta jarðarinnar Miðhúsa í fyrrum Hvolhreppi til
nýbýlastjórnar, f.h. ríkissjóðs, með afsali dagsettu 14. maí 1948. Óumdeilt er
að úr hinum afsalaða hluta jarðarinnar voru stofnuð fjögur nýbýli, þ.e. Akur,
Miðtún, Lynghagi og Hjarðartún. Merkjum hins afsalaða lands var lýst í afsalinu
og kemur fram í þeirri lýsingu og landamerkjabréfi Miðhúsa frá 17. maí 1892, að
selt hafi verið allt land jarðarinnar Miðhúsa sem lá að Eystri-Rangá, en áin
réð merkjum jarðarinnar að norðan.
Stefnendur byggja á því að ákvæði afsalsins frá 14.
maí 1948 milli þáverandi eiganda Miðhúsa og nýbýlastjórnar, f.h. ríkissjóðs,
þar sem segir „Fasteign þessari fylgir
veiðiréttur jarðarinnar í Rangá […].“ hafi ekki öðlast gildi þar sem 4.
mgr. 2. gr. þágildandi lax- og silungsveiðilaga nr. 112/1941, hafi lagt bann
við að skilja veiðirétt við landareign að hluta eða öllu leyti. Á umræddum tíma
hafi búrekstur verið stundaður á jörðinni Miðhúsum og því hafi ekki stofnast sá
veiðiréttur sem afsalið hafi kveðið á um. Þá vísa stefnendur til dóms
Hæstaréttar 3. mars 2016 í máli nr. 530/2015 máli sínu til stuðnings.
Þegar sala á hluta lands úr jörðinni Miðhúsum fór fram
á árinu 1948 voru í gildi lax- og silungsveiðilög nr. 112/1941, en eins og áður
greinir var í 1. málslið 4. mgr. 2. gr. þeirra laga kveðið á um bann við að
skilja veiðirétt að nokkru eða öllu leyti við landareign, hvorki fyrir fullt og
allt né um tiltekinn tíma, sbr. þó 2. mgr. 54. gr. laganna. Frá þessu var gerð
undantekning í 2. málslið 4. mgr. 2. gr. laganna, en þar var kveðið á um að
heimilt væri að skilja rétt til stangarveiði við landareign um tiltekið
tímabil, er eigi má vera lengra en 10 ár, nema leyfi ráðherra komi til og mæli
veiðimálastjóri og veiðimálanefnd með því að leyfið sé veitt, eins og þar
segir.
Rétt þykir að fjalla um forvera framangreindrar reglu
laga nr. 112/1941 enda byggja stefnendur á því að landbúnaðarsjónarmið þau sem
lágu að baki lögfestingu þeirrar reglu eigi við í máli þessu.
Með XIII. kafla vatnalaga nr. 15/1923 voru lögfest
ýmis almenn ákvæði sem snertu veiði og veiðirétt, þ.e. fiskveiðar. Þar var í
fyrsta sinn tekið upp hliðstætt bann og var í 4. gr. veiðitilskipunar frá 1849,
þ.e. bann við að skilja rétt til fiskveiði í ám og vötnum frá landareign, en á
þeim tíma sem vatnalögunum var breytt var talið vafasamt að bannið í 4. gr. veiðitilskipunar
næði til fiskveiða í ám og vötnum vegna ákvæðis 21. gr. tilskipunarinnar, eins
og segir í athugasemdum með 121. gr. í greinargerð með frumvarpinu því sem
síðar varð að lögum nr. 15/1923. Með ákvæðinu var lagt bann við að skilja
veiðirétt að nokkru leyti eða öllu við landareign. Í framangreindum
athugasemdum kemur fram að líklega myndi þykja fullhart að leggja algert bann
við slíkri ráðstöfun. Niðurstaðan varð sú að bann 2. mgr. 121. gr. laga nr.
15/1923 gekk skemmra en bann 4. gr. veiðitilskipunnar 1849, þ.e. heimilt var að
láta veiðirétt af hendi um allt að tíu ára bil og ekki lengur, nema leyfi
ráðherra kæmi til eða að önnur hlunnindi komi á móti, er þeirri landareign sé
ekki metin minna verð en veiðirétturinn. Í áðurnefndri greinargerð með frumvarpi
til vatnalaga segir í athugasemdum um 121. gr., að menn hafi umvörpum selt frá
jörðum eða leigt veiðirétt í vötnum og ám síðan 1849, aðallega laxveiðina sem
sé dýrmætasti veiðirétturinn sem þeir ráði yfir. Því muni síst minni ástæða
vera til að banna að skilja veiðirétt í vötnum og ám frá landareign en veiði á
landi. Í athugasemd við 2. gr. frumvarps til lax- og silungsveiðilaga nr.
61/1932, er enn ítrekuð þýðing veiðiréttar fyrir jarðir í búrekstri, í
umfjöllun um stöðu leiguliða en þar segir að eðlilegast sé og heppilegast að
veiðin fylgi öðrum landsnytjum og að ábúandi jarðar, sem hafi önnur landsnot
hennar njóti einnig veiðinnar. Því skuli meginregla vera sú að ábúð á leigujörð
fylgi veiði. Til þessara sjónamiða er einnig vísað til stuðnings því að
takmarka enn frekar rétt til að skilja veiði frá landareign en verið hafði í 2.
mgr. 121. gr. vatnalaga nr. 15/1923.
Hugtakið landareign var skilgreint í 1. gr.
vatnalaganna sem land lögbýlis og lóð og lönd innan takmarka kaupstaða og
löggiltra verslunarstaða. Hins vegar var hugtakið lögbýli ekki skilgreint í
vatnalögum né í fyrstu heildstæðu lögunum um ábúð hér á landi, lögum nr.
1/1884. Í áðurnefndri greinargerð vatnalaga er jöfnum höndum rætt um landareign
og jörð og segir þar í umfjöllun um hina takmörkuð heimild til að skilja að
veiði og landareign, að svo kunni að vera að landareign sé hagur að því að láta
af hendi veiðirétt, með því að hún fái önnur gæði, sem hana vanhagar um, t.d.
slægjur, beit o.s.frv. Við túlkun löggerninga sem gerðir hafa verið eftir
gildistöku vatnalaga nr. 15/1923, hefur í dómsmálum einnig reynt á það hvort
jarðir teljist landareign í skilningi 2. mgr. 121. gr. vatnalaga nr. 15/1923 og
efnislega samhljóða ákvæði 4. mgr. 2. gr. lax – og silungsveiðilaga nr. 61/1932
og laga með sama nafni nr. 112/1941, nr. 53/1957 og nr. 76/1970. Með vísan til framangreindrar umfjöllunar um nauðsyn þess að
setja hömlur við sölu veiðiréttar frá jörðum má ráða að það hafi verið vilji
löggjafans að sett yrðu takmörk fyrir aðskilnaði veiðiréttar frá landareign í
þeim tilgangi að sporna við því að landkostir jarða sem væru í landbúnaðarnotum
skertust ekki, þ.m.t. verðmæt hlunnindi eins og réttur til veiði í ám og
vötnum.
Samkvæmt framansögðu hefur frá setningu vatnalaga nr.
15/1923 og síðar laga nr. 61/1932 um lax- og silungsveiði verið óheimilt að
skilja veiðirétt að nokkru eða öllu leyti við landareign, hvorki fyrir fullt og
allt né um tiltekinn tíma. Fram til ársins 1940 var lögum nr. 61/1932 breytt
sjö sinnum, en þó ekki reglu laganna um bann við aðskilnaði veiðiréttar við
landareign. Árið 1941 voru breytingar þær sem gerðar höfðu verið á lax- og
silungsveiðilögum frá setningu laganna árið 1932 felldar inn í meginmál laganna
og lögin gefin út svo breytt í heild sem lög nr. 112/1941, þ.e. þau lax- og
silungsveiðilög sem í gildi voru þegar sala á hluta jarðarinnar Miðhúsa fór
fram, en umrædd bannregla var í 4. mgr. 2. gr. þeirra laga eins og áður
greinir. Reglan var einnig óbreytt í lögum með sama nafni nr. 52/1957 og nr.
76/1970. Núgildandi bann við aðskilnaði veiðiréttar er í 9. gr. lax- og
silungsveiðilaga nr. 61/2006.
Í máli þessu er óumdeilt að stundaður var búrekstur á
jörðinni Miðhúsum þegar afsalið frá 14. maí 1948 var gefið út og því um að ræða
jörð í byggð. Samkvæmt dómaframkvæmd verður því að fara fram mat á því hvort í
máli þessu eigi við þeir landbúnaðarhagsmunir sem reglu 4. mgr. 2. gr. laga nr.
112/1941 og forvera hennar, þ.e. 2. mgr. 121. gr. vatnalaga nr. 112/1923 og 4.
mgr. 2. gr. lax- og silungsveiðilaga nr. 61/1932, var ætlað að tryggja og
fjallað hefur verið um hér að framan.
Stefndu hafna því að bannregla 4. mgr. 2. gr. laga nr.
112/1941 eigi við í máli þessu. Vísa stefndu til skýrs ákvæðis afsalsins um að
veiðiréttur í Eystri-Rangá hafi fylgt hinu selda landi, þ.m.t. öllu landi
Miðhúsa sem legið hafi að ánni. Þá vísa stefndu til hinnar fornu meginreglu um
að eignarhaldi á landi fylgi veiðiréttur í vatni á eða fyrir því landi og laga
nr. 35/1946 um landnám, nýbyggðir og endurbyggingar í sveitum, þ.e. markmiðs og
tilgangs laganna, m.a. að kaupa land fyrir nýbýli í þeim tilgangi að þar væri
stundaður landbúnaður, en þannig hafi háttað til í máli þessu. Nýbýlastjórn
hafi keypt meirihluta jarðarinnar Miðhúsa í þeim tilgangi að stofna umrædd
nýbýli í eigu stefndu sem öll hafa verið ætluð og nýtt til búrekstrar. Þá vísa
stefndu, aðrir en stefndi Einhyrningur ehf., til þess að veiðiréttur í Rangá
hafi verið verðlaus árið 1948 þegar salan hafi farið fram.
Í afsali þáverandi eiganda Miðhúsa til nýbýlastjórnar
ríkisins, f.h. ríkissjóðs, dags. 14. maí 1948, segir: „Ég undirritaður, Lárus Ágúst Gíslason, Miðhúsum í Hvolhreppi sel hér
með og afsala Nýbýlastjórn ríkisins f.h. ríkissjóðs allt land það úr jörðinni Miðhúsum í Hvolhreppi, er felst innan
eftirgreindra landamerkja. Að austan ráða merkjum frá öldunni vestan
Hvolsfjalls, þinglesin landamerki jarðanna Miðhúsa og Efra-Hvols að Rangá. Að
norðan ræður Rangá mörkum, en að vestan þinglesin landamerki Miðhúsa og
Stórólfshvols að fyrrgreindri öldu vestan við Hvolfjall. Að sunnan ræður
farvegurinn sá sunnan öldunnar er liggur inn með Hvolsfjalli.“ Þá segir: „Fasteign þessari fylgir veiðiréttur
jarðarinnar í Rangá, svo og öll þau réttindi
önnur og mannvirki sem landi þessu fylgja.“
Meðal gagna málsins er uppdráttur, merktur „Miðhús og Nýbýlahverf [sic]“, dags. 4.
september 2018, sem stefndu aðrir en stefndi Einhyrningur ehf., lögðu fram. Er
uppdrættinum ætlað að sýna hinn selda hluta Miðhúsa samkvæmt áðurnefndu afsali.
Kemur fram á uppdrættinum að jörðin Miðhús sé í dag um 98-100 hektarar að stærð,
en hinn seldi hluti jarðarinnar um 260 hektarar að stærð. Hafa stefnendur ekki
mótmælt uppdrætti þessum. Með samanburði á lýsingu hins selda hluta jarðarinnar
í afsalinu frá árinu 1948 til nýbýlastjórnar, landmerkjabréfi Miðhúsa frá 17.
maí 1892 og framangreindum uppdrætti má sjá að upphaflegt land jarðarinnar
Miðhúsa, sem er rétt austan við Hvolsvöll, lá í geil frá suðri á móts við
Hvolsvöll til norðurs að bökkum Eystri-Rangár. Samkvæmt afsalinu og
uppdrættinum keypti nýbýlastjórn allt land jarðarinnar er lá að Eystri-Rangá
allt suður að farvegi sunnan öldu er lá inn með Hvolsfjalli, samtals um 260
hektarar að stærð. Samkvæmt byggingarbréfum og viðbót við þau mun eignaland
nýbýlanna Miðtúns, Akurs, Hjarðartúns og Lynghaga hafa verið samtals 161,40
hektarar að stærð árið 1965, þ.e. eftir útgáfu viðbótarbyggingarbréfa. Samkvæmt
þessu má ætla að landið meðfram Eystri-Rangá sé um 98 hektarar af stærð.
Ágreiningslaust er að það land er nú í óskiptri sameign nýbýlanna fjögurra sem
stofnuð voru í kjölfar kaupanna. Samkvæmt framansögðu áttu Miðhús eftir söluna
til nýbýlastjórnar því ekkert land að
Eystri-Rangá.
Eins og áður greinir eignaðist nýbýlastjórn með
afsalinu 14. maí 1948 um 260 hektara lands, eða tæplega 2/3 jarðarinnar
Miðhúsa, þ.m.t. allt land jarðarinnar að Eystri-Rangá. Þó það komi ekki fram í
afsalinu má ráða af gögnum málsins að tilgangur kaupanna hafi verið stofnun
nýbýla á hinu afsalaða landi á grundvelli nýsamþykktra laga nr. 35/1946 um
landnám, nýbyggðir og endurbyggingar í sveitum, en tilgangur þeirra laga var að
auka ræktað land til sveita og efla byggð í landinu í svokölluðum
byggðahverfum. Rekja má aðgerðir hins opinbera til að auka byggð í landinu allt
til ársins 1776. Með tilskipun 15. apríl það ár, „Forordn. um fríheit fyrir þá, sem vilja upp taka eyðijarðir eða óbygð
pláz á Íslandi“,
voru sett fyrirmæli í lög um fjárstyrk til þeirra sem stofnuðu til nýbýla auk
fríðinda með það fyrir augum að auka byggð í landinu. Arftaki tilskipunarinnar
voru lög um nýbýli frá 6. nóvember 1897. Kváðu þau lög á um að stofna mætti
nýbýli á eyðijörðum eða óbyggðu landi, s.s. í almenningum og afréttarlöndum. Í
kjölfar kreppunnar milli 1930 og 1940 voru sett lög nr. 25/1936 um nýbýli og
samvinnubyggðir í þeim tilgangi að skapa aðstöðu fyrir almenning til að stunda
landbúnað og tryggja þar með afkomu sína. Í kjölfar breytinga á atvinnuástandi
í landinu í kringum seinna stríð voru lögin frá 1936 endurskoðuð og í þeirra
stað komu lög nr. 58/1941 um Landnám ríkisins. Það mun síðan hafa verið eftir
setningu arftaka þeirra laga, þ.e. laga nr. 35/1946, sem aðgerðir stjórnvalda
til íbúafjölgunar í sveitum landsins fóru að bera nokkurn árangur. Með lögunum
nr. 35/1946 voru tryggð fjárframlög fyrir landnám ríkisins til að útvega land
til undirbúnings þurrkunar og ræktunar í þeim tilgangi að efla byggðaþróun í
sveitum. Segir í 6. gr. laganna að kaupa skuli land í því skyni að koma upp
byggðahverfum en í hverju byggðahverfi skuli vera minnst fimm býli. Mun hafa
verið stofnað til byggðahverfa víða um land á grundvelli framangreindra laga.
Yfirstjórn landnáms ríkisins var í höndum nýbýlastjórnar en framkvæmd í höndum
framkvæmdastjóra, landnámsstjóra, sem nýbýlastjórn réði, sbr. 2. og 3. gr.
laganna. Hlutverk landnámsstjóra var samkvæmt því sem fram kemur í greinargerð
þeirri sem fylgdi frumvarpi því sem varð að lögum nr. 35/1946, að sjá að öllu
leyti um framræslu lands og allan undirbúning ræktunar á því landi er taka
skyldi undir byggðarhverfi.
Eins og rakið er í málavaxtalýsingu hér að framan voru
stofnuð fjögur nýbýli á landi því sem nýbýlastjórn keypt úr landi Miðhúsa og
þau leigð til búrekstrar á árunum 1949 til 1953 með vísan til laga nr. 35/1946
um landnám, nýbyggðir og endurbyggingar í sveitum. Stærð býlanna var á bilinu
30,5–37,1 hektarar. Með viðbótarbyggingarbréfum, dags. 4. desember 1965, var
hverri jörð lagt til viðbótarland, nánar tiltekið á bilinu 6,93–7,97 hektarar.
Jafnframt var gerð sú breyting að beitar- og veiðiréttur hverrar jarðar varð
1/4 að tiltölu í stað 1/5 eins og var fyrir útgáfu viðbótarbyggingarbréfa.
Jarðirnar voru allar leigðar í erfðaábúð og var í byggingarbréfum jarðanna
samhljóða ákvæði í 2. mgr. 3. gr. um beitarrétt jarðanna á landi meðfram
Eystri-Rangá og veiðirétt jarðanna í ánni að 1/5 á móti hinum býlunum.
Við mat á banni lax- og silungsveiðilaga nr. 112/1941
um aðskilnað veiðiréttar frá landi verður til þess að líta að með kaupum á
meirihluta lands Miðhúsa árið 1948 var tilgangurinn að auka byggð í sveitum
landsins. Í áðurnefndri greinargerð með frumvarpi því sem varð að lögum nr. 35/1946
kemur fram að með auknum byggingum í sveitum færist þangað aukið fjármagn og
aukið atvinnulíf. Segir að þess sé vænst að það geri sveitunum léttara fyrir
bæði um það að koma upp enn meiru af nauðsynlegum húsakosti fyrir fólk og fé og
var í þeim efnum vísað til byggingarsjóðs samkvæmt III. kafla frumvarpsins er veitti lán til
bygginga og endurbygginga íbúðar- og peningshúsa. Þá kemur fram í
greinargerðinni að í kjölfar landnámsins, framræsingar lands og ræktun verði bú
í hinum fyrirhuguðu byggðahverfum um þriðjungi stærri en meðalbú var þá. Hins
vegar megi búast við að miklu minni vinnukraft þyrfti til að reka búin og megi
því búast við arðvænni búrekstri en tíðkast hafi.
Að framansögðu virtu er ekki óvarlegt að fullyrða að
hagsmunir þeirra sem stunduðu landbúnað á Íslandi hafi verið settir í forgrunn
með lögum þeim sem heimiluðu og lágu að baki kaupum nýbýlastjórnar, f.h.
ríkissjóðs, á meirihluta lands Miðhúsa. Af gögnum málsins má ráða að skipulag
hins nýja byggðahverfis úr landi Miðhúsa hafi miðað að því að hverri jörð
fylgdi gott ræktunarland og aðgengi að beitarlandi meðfram Eystri-Rangá,
upphaflega að 1/4 hluta móti hinum jörðunum, eins og segir í 2. gr.
byggingarbréfa nýbýlanna.
Í Landabrigðisþætti Grágásar var kveðið á um að þar,
sem menn ættu merkivötn saman, ætti hver að veiða fyrir sínu landi. Í 56.
kapítula Landleigubálks Jónsbókar sagði að hver maður ætti vatn og veiðistöð
fyrir sinni jörðu sem að fornu hafi verið nema með lögum væri frá komið. Þessum
grunnreglum íslensks réttar til veiða í straumvörnum og stöðuvötnum var fylgt
við setningu vatnalaga nr. 15/1923, þar sem mælt var svo fyrir í 1. mgr. 121.
gr. að landeiganda og þeim, sem hann veitti heimild til, væri einum heimil
veiði í vatni á landi sínu. Eftir afnám 121. gr. vatnalaga hafa efnislega sömu
reglur gilt áfram eins og rakið hefur verið að framan, sbr. 1. mgr. 2. gr. laga
nr. 71/1932 um lax- og silungsveiði, 1. mgr. 2. gr. laga nr. 112/1941, 1. mgr.
2. gr. laga nr. 76/190, og nú 5. gr. laga nr. 61/2009
Samkvæmt framangreindu er það forn meginregla íslensks
réttar að hver maður eigi einn veiði fyrir sínu landi, þ.e. að saman fari
eignarhald á landi og veiðiréttur í vatni eða á fyrir því landi. Þá hefur að
meginreglu ekki verið unnt frá gildistöku vatnalaga nr. 15/1923 að eignast veiðirétt
í straumvatni eða stöðuvatni hér á landi nema með því að eignast land sem
liggur að slíku vatni og vísast í þessu sambandi til dóms Hæstaréttar Íslands
3. nóvember 2011 í málinu nr. 453/2009. Í þessu sambandi vísast til athugasemda
með 5. gr. frumvarps sem varð að núgildandi lax- og silungsveiðilögum nr.
61/2006, en þar segir að augljóst sé að annað fyrirkomulag en það að saman fari
eignarhald á landi og veiðiréttur á eða fyrir því landi, geti leitt til mikils
glundroða. Þá kemur fram í 4. mgr. 5. gr. áður nefndra laga, að mönnum sé
heimil för í annarra landi til þess að koma í veg fyrir missi afla eða koma í
veg fyrir tjón á veiðibúnaði. Þá má fallast á það með stefndu, þó svo
landskiptalög nr. 41/1946 hafi ekki átt við um uppskiptingu Miðhúsa með afsalinu
frá 15. maí 1948, að í ljósi þeirrar ákvörðunar eiganda jarðarinnar að afsala
öllu landi jarðarinnar sem lá að Eystri-Rangá hafi afsal veiðiréttar talist
vera hagkvæm og eðlileg ráðstöfun, sbr. til hliðsjónar fyrirmæli 1. mgr. 3. gr.
áðurnefndrar landskiptalaga.
Andstætt við dóm Hæstaréttar frá 3. mars 2016 í málinu
nr. 530/2015, sem stefnendur vísa til kröfum sínum til stuðnings, hagar þannig
til í máli þessu að ríkið keypti meirihluta lands jarðarinnar Miðhúsa, þ.m.t.
allt land jarðarinnar sem lá að Eystri-Rangá, í þeim tilgangi að stofna þar
nýbýli til búrekstrar. Við stofnun nýbýlanna var á því byggt að beitarréttur í
óskiptu landi við og suður frá Eystri-Rangá og veiðiréttur í Eystri-Rangá fyrir
því landi fylgdi hverju nýbýli að tiltölu, sbr. 2. gr. þágildandi laga um
ættaróðal og erfðaábúð nr. 116/1943. Óumdeilt er að þeim tilgangi laga nr.
35/1946, að búrekstur skyldi stundaður á umræddum nýbýlum úr landi Miðhúsa var
náð. Samkvæmt 1. mgr. 8. gr. laganna skyldi áður en landnám var hafið gefa sveitarstjórn/hreppsnefnd
þar sem landnám átti að fara fram, kost á að gera grein fyrir, hver áhrif hið
fyrirhugaða landnám myndi hafa á afkomuöryggi bújarða þeirra, sem fyrir væru í
viðkomandi sveitarfélagi/hreppi. Þá sagði í 2. mgr. 8. gr. að verði ágreiningur
um fyrirætlanir nýbýlastjórnar við hlutaðeigandi bæjar- eða sveitarstjórn,
skeri landbúnaðarráðherra úr. Engin gögn liggja frammi í málinu er varða
framangreint ferli, þ.e. umsögn hreppsnefndar fyrrum Hvolhrepps vegna landnáms
í landi Miðhúsa. Verður því við það að miða að áður en ríkið keypti meirihluta
jarðarinnar Miðhúsa hafi framangreindri reglu laganna nr. 35/1946 verið fylgt
og hreppsnefnd fyrrum Hvolshrepps gefinn kostur á því að gera grein fyrir hver
áhrif hið fyrirhugaða landnám myndi hafa á afkomuöryggi þeirra bújarða sem
fyrir voru í hreppnum. Einnig verður við það að miða að hvorki hreppsnefnd
Hvolshrepps né landbúnaðarráðherra hafi gert athugasemdir við hið fyrirhugað
landnám og áhrif þess á afkomuöryggi jarða í hreppnum, þ.m.t. Miðhúsa, en ágreiningslaust
er að þegar salan fór fram og lengi eftir það var stundaður búskapur á
jörðinni. Ákvæði 8. gr. laga nr. 35/1946 var ætlað að tryggja að gætt væri að
hagsmunum þeirra bænda sem fyrir voru í viðkomandi sveitarfélagi og kæmi upp
ágreiningur um fyrirætlanir nýbýlastjórnar við sveitarstjórn skæri
landbúnaðarráðherra úr. Nokkur líkindi eru með þessu ákvæði og 3. og 4. málslið
1. mgr. 9. gr. núgildandi lax- og silungsveiðilaga nr. 61/2006, en þar kemur
fram að á lögbýlum, þar sem stundaður er landbúnaður, skuli þess gætt við
veitingu undanþágu að aðskilnaður veiðiréttar frá fasteign, valdi því ekki að
torvelt verði eftirleiðis að stunda þar landbúnað. Þá má slíkur aðskilnaður
ekki valda hættu á því að fiskstofnar viðkomandi veiðivatns verði ofnýttir.
Ákvæði þetta var sett inn í frumvarp það er varð að lögum nr. 61/2006 þar sem í
gildistíð forvera þeirra laga höfðu gengið dómar sem af ýmsum voru túlkaðir
þannig að bann 4. mgr. 2. gr. laga nr. 76/1970 hafi ekki tekið til annarra
fasteigna en þeirra þar sem stundaður var búskapur. Í þeim tilgangi að taka af
öll tvímæli var lagt til í frumvarpinu að sú meginregla skyldi gilda frá
gildistöku laga nr. 61/2006, að veiðiréttur verði ekki skilin frá fasteignum,
hvorki með hefðbundnu afsali veiðiréttar né heldur við uppskiptingu fasteignar
eða ráðstöfun einstakra spildna úr henni og skyldi því slíkt í öllum tilvikum
vera leyfisskylt. Þá var gert ráð fyrir því að við mat á heimild til undanþágu
bæri sérstaklega að líta til þess hvort kostir fasteignar til landbúnaðarnota
skerðist, og jafnframt að fiskistofnar vatns verði ekki ofnýttir.
Að öllu framansögðu virtu er það mat dómsins að þeir
landbúnaðarhagsmunir sem lágu að baki bannreglu 4. mgr. 2. gr. lax- og
silungsveiðilaga nr. 112/1941, hafi ekki átt við þegar útskipting á jörðinni
Miðhúsum fór fram með sölu meirihluta hennar til nýbýlastjórnar, f.h
ríkissjóðs, árið 1948. Einnig er til hinnar fornu meginreglu um að veiði fylgi
bakkajörð að líta í ljósi legu þess hluta jarðarinnar Miðhúsa sem seldur var,
en orðalag afsalsins frá 14. maí 1948 var skýrt hvað þetta varðar sem og um
afsal veiðiréttar jarðarinnar í Eystri-Rangá. Eins og atvikum er háttað í máli
þessu er það mat dómsins að framsal veiðiréttar í Eystri-Rangá til
nýbýlastjórnar, f.h. ríkissjóðs, með afsali dags. 14. maí 1948, hafi verið
heimilt og því tilheyri veiðiréttur í Eystri-Rangá þeim jörðum sem eiga land að
ánni í óskiptri sameign.
Samkvæmt öllu framansögðu verða stefndu því sýknuð af
öllum kröfum stefnenda í máli þessu.
Með
vísan til meginreglu 1. mgr. 130. gr. laga nr. 91/1991 um meðferð einkamála ber
að dæma stefnendur til að greiða stefndu málskostnað in solidum, sem þykir
hæfilega ákveðinn 2.500.000 krónur.
Vilhjálmur Þ. Á. Vilhjálmsson lögmaður flutti mál þetta af hálfu stefnenda. Af hálfu stefndu, annarra en Einhyrnings ehf., flutti Guðjón Ármannsson lögmaður málið. Áslaug Árnadóttir lögmaður flutti málið af hálfu stefnda Einhyrnings ehf. Dómsuppsaga hefur dregist fram yfir lögbundinn frest vegna embættisanna dómara, en fyrir uppkvaðningu dóms var gætt fyrirmæla 1. mgr. 115. gr. laga nr. 91/1991.
Ragnheiður
Thorlacius héraðsdómari kveður upp þennan dóm.
D ó m s o r ð :
Stefndu,
Ingibjörg Jóhannesdóttir, Margrét Guðjónsdóttir, Katrín Jónína Óskarsdóttir,
Eysteinn Fjölnir Arason, Árni Valdimarsson, Útgerðarfélagið Hvoll ehf. og
Einhyrningur ehf., eru sýkn af öllum kröfum stefnenda í máli þessu
Stefnendur, Ragnhildur Lárusdóttir, Brynjar Ágúst
Sigurðsson, Guðrún Þórarinsdóttir og Bryndís Guðmundsdóttur greiði stefndu in
solidum 2.500.000 krónur í málskostnað.
Ragnheiður Thorlacius