- Frávísunarkröfu hafnað
- Hraðakstur
- Sönnun
- Umferðarlagabrot
Árið 2018, fimmtudaginn 8. nóvember er á dómþingi Héraðsdóms Suðurlands, sem háð er í dómsal embættisins að Austurvegi 4, Selfossi af Ragnheiði Thorlacius héraðsdómara, í málinu nr. S-161/2018:
Ákæruvaldið
(Margrét Harpa Garðarsdóttir
fulltrúi lögreglustjórans á Suðurlandi)
gegn
A
(Snorri
Snorrason lögmaður)
kveðinn upp svohljóðandi
dómur:
Mál þetta, sem þingfest
var 27. september 2018, var dómtekið að lokinni aðalmeðferð 16. október sl.
Málið er höfðað með ákæru lögreglustjórans á Suðurlandi, dagsettri 9. ágúst
2018, á hendur ákærða, A
„fyrir umferðarlagabrot
með því að
hafa, að kvöldi sunnudagsins 22. júlí 2018 ekið bifreiðinni […] vestur
Suðurlandsveg við Skeiðavegamót í Flóahreppi með 124 km hraða á klukkustund þar
sem leyfður hámarkshraði var 90 km á klukkustund.
Telst brot ákærða varða við 2. mgr. 37.
gr., sbr. 1. mgr. 100. gr. umferðarlaga nr. 50, 1987.
Þess er krafist að ákærði verði dæmdur til refsingar og til greiðslu alls sakarkostnaðar.“
Af hálfu ákæruvalds eru þær kröfur gerðar sem að ofan
greinir.
Af hálfu ákærða er þess
aðallega krafist að málinu verði vísað frá dómi. Til vara að ákærði verði
sýknaður. Til þrautavara að ákvörðun refsingar verði frestað en til
þrautaþrautavara að ákærða verði dæmd vægasta refsing sem lög leyfa. Þá krefst
ákærði þess að hafnað verði framlagningu á dskj. nr. 4, vettvangsskýrslu, dags.
22. júlí 2018, verði ekki fallist á aðalkröfu hans. Loks gerir verjandi ákærða
kröfu um hæfileg málsvarnarlaun sem greidd verði úr ríkissjóði.
Málavextir.
Samkvæmt gögnum málsins og
því sem fram kom við aðalmeðferð málsins voru lögreglumennirnir B og
héraðslögreglumaðurinn C umrætt kvöld við umferðareftirlit og ók B
lögreglubifreið austur Suðurlandsveg í Árnessýslu skammt vestan við
Skeiðavegamót. Segir í frumskýrslu að þau hafi veitt bifreiðinni […] athygli
þar sem henni hafi sýnlega verið ekið greitt vestur Suðurlandsveg og hafi hraði
bifreiðarinnar verið mældur á 128 km/klst. Ökumanni, ákærða í máli þessu, hafi
verið gefið merki um að stöðva, sem hann hafi gert skömmu síðar. Ákærða, sem komið
hafi yfir í lögreglubifreiðina, hafi verið kynnt réttarstaða sakbornings og
hafi ákærði játað brot sitt.
Fram kemur í handritaðri
vettvangsskýrslu lögreglu (skýrslu um umferðarmál) að ákærði hafi ekið
bifreiðinni […] vestur Suðurlandsveg á vegarkafla móts við Skeiðavegamót. Í
frumskýrslu lögreglu og vettvangsskýrslu kemur fram að stund brots hafi verið
22. júlí 2018 klukkan 21:58. Í vettvangsskýrslu segir að mældur hraði hafi
verið 128, vikmörk 4, niðurstaða 124 og hámarkshraði á vegi 90 km/klst. Þá kemur
fram að ratsjá lögreglubifreiðarinnar hafi verið prófuð fyrir mælingu klukkan
21:22 og eftir mælingu klukkan 22:01. Rætt hafi verið við ákærða í
lögreglubifreiðinni og honum sýndur mældur hraði á skjá ratsjárinnar. Ákærði
hafi gengist við broti og undirritað umrædda skýrslu. Í skýrslunni kemur fram
að dagsbirta hafi verið, þurrt, mikil umferð, skýjað og yfirborð vegar fast og
malbikað. Í gögnum málsins liggur fyrir myndbandsupptaka af umræddri
hraðamælingu. Ákærði hafnaði að ljúka máli þessu með greiðslu sektar sem honum
stóð til boða samkvæmt sektargerð lögreglustjóra, dags. 26. júlí 2018.
Ákærði gaf skýrslu við
aðalmeðferð málsins, sem og vitnin og lögreglumennirnir B og C. Framburður
ákærða og vitna fyrir dómi verður ekki rakinn, en vikið að honum í
niðurstöðukafla að því leyti sem þörf krefur til úrlausnar málsins.
Forsendur og niðurstaða.
Um aðalkröfu, þ.e. um
frávísun málsins frá dómi, vísar ákærði til fjölmargra atriða er varða afskipti
lögreglu af ákærða á vettvangi, framkvæmd umræddrar hraðamælingar og gerð
vettvangsskýrslu. Samkvæmt 53. gr. laga nr. 88/2008 um meðferð sakamála er
markmið rannsóknar lögreglu að afla allra nauðsynlegra gagna til þess að
ákæranda sé fært að ákveða að henni lokinni hvort sækja skuli mann til sakar,
svo og að afla gagna til undirbúnings málsmeðferðar fyrir dómi. Þeir sem
rannsaka sakamál skulu vinna að því að hið sanna og rétta komi í ljós og gæta
jafnt að þeim atriðum sem horfa til sýknu og sektar. Þeim ber jafnframt að
hraða meðferð mála eftir því sem kostur er. Samkvæmt 145. gr. sömu laga skal
ákærandi, þegar hann hefur fengið gögn máls í hendur, ganga úr skugga um að
rannsókn sé lokið. Að þeirri athugun lokinni ber honum annað hvort að láta
rannsaka málið betur, telji hann þess þörf, eða taka eftir atvikum ákvörðun um
hvort sækja skuli mann til sakar samkvæmt 152. gr. laganna. Samkvæmt 2. og 3.
mgr. 111. gr. laganna verður sakfelling ákærða ekki reist á því sem skráð er
eftir honum í lögregluskýrslu nema önnur gögn styðji nægilega þann framburð.
Ákæruvaldið hefur metið
það svo að það hafi haft næg gögn um kæruefni til að geta tekið afstöðu til
ákvörðunar um ákæru í máli þessu, sbr. 145. gr. laga nr. 88/2008. Sú ákvörðun
um meðferð valdheimilda ákæruvalds getur eðli sínu samkvæmt ekki sætt
endurskoðun dómstóla við úrlausn máls. Eru því ekki skilyrði til að fallast á
kröfu ákærða um að máli þessu verði vísað frá dómi. Þá þykja ekki skilyrði til
að fallast á kröfu ákærða um að hafnað verði framlagningu á dskj. nr. 4,
vettvangsskýrslu, dags. 22. júlí 2018.
Í máli þessu er ákærða
gefið að sök að hafa ekið bifreiðinni […] á 124 kílómetra hraða vestur
Suðurlandsveg þar sem leyfður hámarkshraði var 90 kílómetrar á klukkustund.
Ákærði, sem neitar sök,
kannast við afskipti lögreglu af akstri hans umræddan dag, að lögregla hafi
sýnt honum 128 km/klst mældan hraða, að hafa játað brotið og að hafa skrifað
undir vettvangsskýrslu í lögreglubifreiðinni. Hann kvaðst í umrætt sinn hafa
ekið fram úr bifreið á beinum vegarkafla á Suðurlandsvegi, en umræddri bifreið
hafi verið ekið á 60-70 km hraða. Kvaðst ákærði hafa veitt ljósum
lögreglubifreiðarinnar eftirtekt þegar hann hafi verið að hægja ferðina eftir
framúraksturinn en ekki hafa fylgst með ökuhraða bifreiðarinnar umrætt
sinn.
Vitnið og lögreglumaðurinn
B kvaðst hafa stjórnað hraðamælingunni. Fram kom hjá vitninu að engin bifreið
hafi ekið á vegarhelmingi lögreglubifreiðarinnar, þ.e. fyrir framan
lögreglubifreiðina, þegar hraðamælingin hafi verið gerð, en bifreið hafi verið
ekið fyrir aftan bifreið ákærða. Vitnið og lögreglumaðurinn C kvað bifreið
ákærða hafa verið fremsta í fjögurra til fimm bíla lest þegar hraðamælingin
hafi verið gerð. Hafi bifreið ákærða verið ekið áberandi hraðar en bifreiðum
sem á eftir komu. Þá hafi bifreið verið ekið fyrir framan lögreglubifreiðina,
þ.e. á sama vegarhelmingi, en nokkuð verið í hana. Eins og vitnið B kvað vitnið
C útilokað að aðrar bifreiðar eða aðstæður á vettvangi hafi getað truflað
hraðamælinguna. Bæði vitnin báru um að radar hafi verið prófaður fyrir og eftir
hina umræddu hraðamælingu. Kvað vitnið C vera venja að prófa tækið strax að
lokinni vinnu við vettvangsskýrslu.
Meðal gagna málsins er
myndbandsupptaka nr. 20180722220336-01-KSI-20180722-22-03-38-00-6 af umræddri
radarmælingu. Hins vegar er skýrslunnar ekki getið í þar tilgerðum reit á
vettvangsskýrslu eins og kveðið er á um í lok 11. gr. verklagsreglna
Ríkislögreglustjóra um hraðamælingar með ratsjá frá 2002. Dómari hefur kynnt
sér umrætt myndband. Þar kemur eftirfarandi fram: Myndbandið hefst klukkan
22:03.08. Lögreglubifreiðinni er ekið austur Suðlandsveg skammt fyrir vestan
Skeiðavegamót. Á tímabilinu klukkan 22:03:14 til 22:03:18 mætir
lögreglubifreiðin fjórum bifreiðum sem ekið er í lest. Á tímabilinu klukkan
22:03:25 til 22:03.28 mætir lögreglubifreiðin öðrum fjórum bifreiðum sem ekið
er í lest. Klukkan 22:03:31 má sjá þrjár bifreiðar aka í vesturátt í aflíðandi
beygju með jöfnu millibili, en umrædd beygja er skammt fyrir austan
Skeiðavegamót. Þegar fyrsta bifreið er enn í beygjunni birtist talan 128 á
skjánum og klukkan 22:03:33 er henni læst á skjánum. Myndskeiðinu lýkur klukkan
22:04:16 þegar lögreglubifreiðin er stöðvuð fyrir aftan dökkleita bifreið sem
lagt er út í vegarkant norðan Suðurlandsvegar. Er skráningarnúmer
bifreiðarinnar ekki sýnilegt á myndbandinu.
Ósamræmi er milli
rannsóknargagna um stund hraðamælingar þeirrar sem liggur til grundvallar ákæru
í máli þessu. Eins og rakið er í málavaxtalýsingu hér að framan er stund brots
tilgreind í frumskýrslu lögreglu og vettvangsskýrslu klukkan 21:58 umræddan dag.
Samkvæmt því sem fram kemur í myndbandsupptökunni, sem einnig er gerð grein
fyrir hér að framan, var stund brots samkvæmt klukku myndbandsins 22:03, en þá
birtist talan 128 á skjánum við stafina „sT“,
og var læst. Vitnið B kvað framangreinda skammstöfun þýða sterkasta merki. Þá
verður ekki séð að farið hafi verið eftir fyrirmælum 6. gr. áðurnefndra reglna
Ríkislögreglustjóra um að ratsjá skuli ávallt prófuð við upphaf og lok
hraðamælingar. Samkvæmt vettvangsskýrslu, sem vitnið B kvaðst hafa gert og
staðfesti fyrir dómi, fór prófun ratsjár eftir hraðamælingu fram klukkan 22:01,
þ.e. áður en mæling á hraða bifreiðar ákærða fór fram samkvæmt
myndbandsupptökunni, líkt og áður greinir. Einnig er ósamræmi milli framburðar
vitnanna og lögreglumannanna B og C og framlagðra gagna málsins um aðstæður og
staðsetningu bifreiðar ákærða á vegi þegar hraðamælingin fór fram. Vitnið B
kvað það ekki mögulegt að önnur bifreið en bifreið ákærða hafi verið mæld
umrætt sinn, það hafi verið bifreið ákærða sem gefið hafi sterkasta merkið,
þ.e. „sT“ á myndbandinu. Sérstaklega
aðspurt kvað vitnið C öruggt að hraðamælingin hafi verið gerð á beinum
vegarkafla en ekki í hinni aflíðandi beygju á Suðurlandsvegi austan við
Skeiðavegamót eins og fram kemur í framlögðu myndbandi.
Með vísan til þess sem að framan er rakið og 108. og 109. gr. laga nr. 80/2008 um meðferð sakamála er það mat dómsins að ákæruvaldinu hafi ekki tekist að axla sönnunarbyrði í máli þessu og að skýra verði ákærða í hag þann vafa sem uppi er um framkvæmd hraðamælingar lögreglu sem lögð er til grundvallar ákæru í máli þessu. Ákærði verður því sýknaður af öllum kröfum ákæruvaldsins í máli þessu.
Enginn kostnaður var af rannsókn málsins en með vísan til 2. mgr. 218. gr. laga um meðferð sakamála nr. 88/2008 skal allur sakarkostnaður greiddur úr ríkissjóði, þ.e. málsvarnarlaun skipaðs verjanda ákærða, Snorra Snorrasonar lögmanns, sem þykja hæfilega ákveðin 359.000 krónur að meðtöldum virðisaukaskatti.
Ragnheiður Thorlacius héraðsdómari kveður upp dóm
þennan.
D Ó M S O R Ð:
Ákærði, A, er sýkn af öllum kröfum ákæruvaldsins í máli þessu.
Allur sakarkostnaður greiðist úr ríkissjóði, þ.e. málsvarnarlaun skipaðs verjanda ákærða, Snorra Snorrasonar lögmanns, 359.000 krónur að meðtöldum virðisaukaskatti.
Ragnheiður Thorlacius