- Ávana- og fíkniefni
- Fangelsi
- Skilorðsrof
- Upptaka
D Ó M U R
Héraðsdóms Suðurlands fimmtudaginn 31. maí 2018 í máli
nr. S-337/2016:
Ákæruvaldið
(Margrét Harpa Garðarsdóttir fulltrúi)
gegn
Baldri Sigurðarsyni
(Snorri Sturluson lögmaður)
Mál þetta, sem dómtekið var fimmtudaginn 4. apríl sl., er höfðað með ákæru lögreglustjórans á Suðurlandi, þann 7. desember 2016, á hendur Baldri Sigurðarsyni, til heimilis að Austurbergi 36, Reykjavík,
fyrir
fíkniefnalagabrot
með því að hafa, föstudaginn 29. apríl
2016 í sprautuklefa í húsnæði að […], Þorlákshöfn, sem ákærði var með á leigu,
haft í vörslu sinni 6839,37 g af kannabisstönglum og fyrir að hafa um nokkurt
skeið fram til þessa dags ræktað þar framangreind fíkniefni sem fundust við
húsleit lögreglu í húsnæðinu umrætt sinn.
Telst brot ákærða varða við 2. gr., sbr.
4., 5. og 6. gr. laga um ávana- og fíkniefni nr. 65/1974 með síðari breytingum
og 2. gr., sbr. 1. mgr. 14. gr. reglugerðar um ávana- og fíkniefni og önnur
eftirlitsskyld efni nr. 233/2001 með síðari breytingum.
Þess er krafist, að ákærði verði dæmdur
til refsingar og til að sæta upptöku á framangreindum fíkniefnum (efnaskrá
lögreglu nr. 32407) og búnaði til ólögmætrar ræktunar og meðferðar fíkniefna
sbr. munaskrá lögreglu nr. 115838 samkvæmt 6. og 7. mgr. 5. gr. laga nr. 65,
1974 og 2. mgr. 14. gr. reglugerðar nr. 233/2001 og til greiðslu alls
sakarkostnaðar.
Ákærði hefur neitað sök í málinu og krefst þess aðallega að
hann verði sýknaður af kröfum ákæruvaldsins. Til vara er þess krafist að ákærða
verði dæmd vægasta refsing er lög leyfa. Þá mótmælir ákærði upptökukröfu en
hann telur hana vanreifaða.
Málavextir
Samkvæmt
frumskýrslu lögreglu má rekja mál þetta til þess er lögregla hafði afskipti af
vegfaranda, A, við eftirlit á Eyrarbakkavegi þann 29. apríl 2016. Hafi A verið
handtekinn grunaður um vörslu ólöglegra ávana- og fíkniefna, en við leit í
bifreið hans fundust kannabisefni. Hafi A sagst vera að koma úr ræktun í
Þorlákshöfn þar sem hann hafi verið að klippa niður ræktun, ásamt ákærða í máli
þessu. Hafi A jafnframt vísað lögreglu á umrædda ræktun að […] í Þorlákshöfn.
Þegar að var komið hafi húsið verið mannlaust. Lögregla hafi þá haft samband
við eiganda húsnæðisins, B, er kveðið hafi ákærða vera með hluta hússins á
leigu, nánar tiltekið íbúð í norðurendanum og sprautuklefa í miðju þess. Loks
hafi við leit lögreglu í húsnæðinu fundist búnaður til ræktunar, efnisleifar og
kannabisefni, samtals 6.839,37 grömm, allt í framangreindum sprautuklefa.
Við rannsókn málsins voru allir
ofangreindir aðilar, A, B og ákærði Baldur yfirheyrðir sem sakborningar.
Framburður
ákærða og vitna fyrir dómi
Fyrir dómi gáfu skýrslu ákærði Baldur og vitnin A, B, C lögreglumaður,
D lögreglumaður, E lögreglumaður og F, verkefnastjóri við rannsóknarstofu í
lyfja- og eiturefnafræðum við Háskóla Íslands.
Fyrir dómi bar ákærði að hann hefði
haft á leigu húsnæði í Þorlákshöfn, íbúð og sprautuklefa, af B. Þar hafi ákærði
ætlað að geyma búslóð og vera með tómatarækt og hafi í því skyni byrjað að
setja upp ræktunaraðstöðu. Hafi vitnið A, vinur ákærða, aðstoðað hann við að
henda drasli, en ákærði einn sett upp hina fyrirhuguðu tómataræktun. Hafi þetta
verið um tveimur mánuðum áður en lögregla hafði afskipti af húsnæðinu, en
ákærði hefði í millitíðinni ekki sinnt húsnæðinu. Ákærði kvaðst þó ekki hafa
lokið verkinu áður en lögregla leitaði í húsnæðinu. Búnaðinn, sem ákærði kvaðst
hafa ætlað að nota til tómataræktunarinnar og lögregla lagði hald á við
rannsókn málsins, sagði hann að hluta áður hafa verið notaðan við kannabisrækt
annars staðar, sem ákærði hlaut dóm fyrir á sínum tíma og hafi hann átt eftir
að þrífa og sópa upp lauf og jurtaafganga. Kvaðst ákærði ósammála lýsingu í
ákæru á magni fíkniefna sem verið hafi í húsnæðinu, eingöngu hafi verið um að
ræða uppsóp og rusl úr eldri ræktun, eftir að henni hafi verið pakkað saman í
flýti. Síðar hafi fyrrgreindur A hringt í ákærða og sagst hafa verið tekinn með
„eitthvað“ og hafa bent á ákærða. Hefði samtalið verið stutt og ákærði ekki náð
aftur í A eftir það. Þá bar ákærði að hann einn hefði haft aðgang að húsnæðinu
og sprautuklefanum sem hafi að jafnaði verið læstur, en leigusalinn hafi þó
verið með lykil að útidyrum húsnæðisins.
Vitnið A gaf skýrslu fyrir dómi í
gegnum síma. Kvaðst vitnið hafa lent í samkrulli við menn, „raunverulega
krimma“ sem vitnið vildi ekki nefna. Þeir hafi verið að rækta kannabis og beðið
vitnið um að henda fyrir sig dálitlu af kannabisrusli. Hafi hann í fyrstu
neitað bóninni en þá verið hótað öllu illu og hann því orðið við henni. Neitaði
vitnið að ræða það frekar hvernig það kom til að mennirnir, sem vitnið nefndi
„vondu mennina“ komu fíkniefnum fyrir í bifreið hans. Lögregla hafi síðan
stöðvað vitnið og hann ekki þorað að benda á hinu réttu aðila, „vondu mennina“
enda hræddur við þá. Hafi þá vitnið bent á ákærða Baldur Sigurðarson, til að
koma sjálfum sér undan sök. Kvaðst vitnið sirka mánuði áður hafa farið með
ákærða austur í Þorlákshöfn þar sem hann hafi aðstoðað ákærða við að henda
einhverju drasli úr húsnæði, nánar tiltekið sprautuklefa á trésmíðaverkstæði,
sem ákærði hafi haft á sínum snærum. Vitnið kvaðst ekki hafa orðið var við nein
fíkniefni í húsnæðinu umrætt sinn. Vitnið kvaðst hafa verið í einhverju
sambandi við ákærða á síðustu árum, en ekki hafi það verið mikið. Aðspurður um
framburð sinn hjá lögreglu að vitnið hefði ásamt ákærða verið að borða brauð í
umræddum sprautuklefa kvöldið áður en vitnið var handtekið við akstur, kvaðst
vitnið ekki muna til þess. Þá kannaðist vitnið ekki við framburð sinn hjá
lögreglu um að vitnið hefði séð kannabisplöntur inni í sprautuklefanum umrætt
kvöld. Þá neitaði vitnið að svara því hvernig það hefði komið til að lögregla
hefði fundið fíkniefni í húsnæðinu, eftir ábendingu vitnisins umrætt sinn.
Vitnið B, eigandi húsnæðisins að […], Þorlákshöfn bar fyrir
dómi að vitnið og ákærði hefðu lengi þekkst og væru félagar. Hann hafi leigt
ákærða húsnæði til að hjálpa honum þegar hann hafði misst húsnæði sitt. Kvað
vitnið marga hafa lykil að verkstæðinu, sem í húsnæðinu er og því hafi hann
leigt ákærða sprautuklefann, sem hann gæti haft fyrir sig og læst. Eingöngu
hafi verið einn lykill til að sprautuklefanum og þann hafi ákærði fengið.
Vitnið C lögreglumaður bar fyrir
dómi að lögregla hefði stöðvað ökumann, A, á Eyrarbakkavegi og fundið hjá honum
kannabisleifar og „skúnk“. Hefði A borið að hann væri að koma úr ræktun í
Þorlákshöfn, þar sem hann hefði verið með ákærða. Í framhaldinu hefði lögregla
farið á staðinn. Hefðu lögreglumenn vegna fyrirliggjandi upplýsinga og þar sem
þeir fundu kannabislykt, ákveðið að brjóta upp hurðina á sprautuklefanum til að
koma í veg fyrir að sönnunargögnum yrði spillt. Þar fyrir innan hafi verið
ræktunarbúnaður. Tvö tjöld hafi verið í klefanum, annað samanbrotið en hitt
uppistandandi, einnig hafi verið þar lampar og viftur. Engin ræktun hafi verið
í gangi og engar plöntur, en plöntuleifar, bæði í tjaldinu og fyrir utan
tjaldið. Aðspurð um ástandið á plöntuleifunum kvað vitnið þær hafa virst
misgamlar, en greinarnar hafi ekki hrokkið í sundur er lögregla var að pakka
saman sönnunargögnum, heldur hafi verið seigla í þeim. Ekkert hafi bent til að
stönglarnir hafi verið margra mánaða gamlir. Þá kvað vitnið mat hafa verið inni
í sprautuklefanum, brauð og smjör. Þá staðfesti vitnið skýrslur sínar sem
liggja frammi í málinu.
Vitnið D lögreglumaður bar fyrir
dómi að varðstjóri hefði óskað aðstoðar eftir að hafa stöðvað ökumann, A, á
Eyrarbakkavegi, en hann hafi haft töluvert að fíkniefnum í vörslum sínum.
Vitnið hafi farið með A heim til hans, þar sem vitnið kom ekki auga á neitt
saknæmt. Síðar hafi vitnið farið með varðstjóra í Þorlákshöfn að húsnæði þar sem
grunur lék á að fyrrgreindur A og ákærði í máli þessu hefði staðið að
kannabisræktun. Legið hafi fyrir að B væri eigandi umrædds húsnæðis og hafi
hann afhent lögreglu lykla að því, sem og veitt þeim leyfi til að fara inn í
húsnæðið. Þangað hafi vitnið farið og lögreglumenn svipast um en ekkert séð
athyglivert. Hafi lögreglumenn á vettvangi þá hringt á stöð og beðið
lögreglumenn þar um að fá nánari lýsingar hjá A, sem þá var í haldi lögreglu.
Hafi lögreglumenn í kjölfarið, eftir ábendingu A, brotið upp hurð að
sprautuklefanum, en kannabisþef hafi legið frá honum. Þar hafi ræktunarbúnaður
komið í ljós, uppsettur og tilbúinn, og töluvert af plöntuleifum. Hefði einnig
verið búnaður sem annað hvort var búið að taka niður, eða átti eftir að setja
upp. Þá hafi lögreglumenn tekið ræktunina niður og tekið saman þá plöntuafganga
sem fundust. Aðspurður um aldur
plöntuafganga kvað vitnið bæði hafa verið um að ræða fersk lauf og þurrari
lauf. Þá hafi stiklarnir hugsanlega verið nokkurra daga gamlir. Hluti
plöntuleifanna hafi að mati vitnisins verið ferskar og mögulega nokkurra daga
gamlar, en einhver laufblaðanna hafi verið skraufþurr. Þá bar vitnið að inni í
klefanum hafi verið brauð, smjör og álegg. Greinilegt hefði verið að einhver
hefði nýlega verið þarna. Þá staðfesti vitnið skýrslu sína sem liggur frammi í
málinu.
Vitnið E lögreglumaður gaf skýrslu
fyrir dómi í gegnum síma. Kvað vitnið misræmi í málsnúmerum lögreglu tilkomna
af því að efnaskrá hefði verið færð á milli mála, er vörðuðu annan aðila. Bar
vitnið að eingöngu væri ein efnaskrá á hverju númeri. Þannig hefði orðið til
misræmi í málsnúmerum, er þáttur annars aðila yfir í eldra mál hans við
sameiningu þeirra.
Vitnið F verkefnastjóri gaf skýrslu fyrir dómi í gegnum síma.
Kvaðst vitnið hafa fengið átta sýni til rannsóknar. Mest plöntumulningur og
stönglar, sem allt innihélt tetrahýdrókannabínól. Aðspurður kvaðst vitnið ekki
geta aldursgreint efnið, en kvað það hafa „eitthvað verið orðið lúið“, en gat
ekki áætlað frekar um aldur þess. Þá staðfesti vitnið matsgerð sína fyrir dómi.
Niðurstaða
Ákærða í máli þessu er gefið að sök
fíkniefnalagabrot, annars vegar fyrir vörslur kannabisefna og hins vegar fyrir
ræktun þeirra. Ákærði hefur neitað sök í málinu og kveðst hafa ætlað að rækta
tómata í umræddu húsnæði, en búnaðurinn sem hann hugðist nota til þess hafi
áður verið notaður til ræktunar kannabisplantna og ákærði þegar hlotið dóm
vegna þess. Ákærði hefur frá upphafi neitað því að hafa verið að rækta
fíkniefni í umræddu húsnæði, en kannast við að hafa haft það til umráða og
geymt þar búslóð sína. Þá hefur ákærði frá upphafi kannast við að eiga búnað
þann er lögregla lagði hald á. Hjá lögreglu bar ákærði að hann hefði kvöldið
áður en lögregla gerði húsleit í húsnæðinu verið þar ásamt vitninu A að þrífa
og taka til. Þá hefðu þeir fengið sér að éta, eins og ákærði orðaði það. Fyrir
dómi var framburður ákærða hvað þetta varðar á annan veg og kvað hann
áðurnefnda tiltekt þeirra félaga hafa farið fram um tveimur mánuðum áður en
lögregla fann hina ætluðu ræktun.
Líkt og áður greinir eru tildrög
máls þessa þau að A, vitni í máli þessu, var stöðvaður á Eyrarbakkavegi og
handtekinn grunaður um vörslur fíkniefna. Hafi A þá kveðist vera að koma úr
Þorlákshöfn, þar sem hann hafi ásamt ákærða í máli þessu, verið að taka niður kannabisræktun.
Framburður vitnisins, hjá lögreglu, sem þá var yfirheyrður sem sakborningur er
verulega frábrugðinn framburði vitnisins fyrir dómi. Hjá lögreglu bar vitnið að
ákærði hefði hringt og beðið vitnið um að hjálpa sér. Þegar hann hafi komið á staðinn
hafi ákærði verið að taka niður starfsemina í húsinu. Eftir hafi staðið þrír
pottar með plöntum, sem vitnið hafi klippt niður eftir leiðbeiningum ákærða, á
meðan ákærði tók niður tjald. Síðar hafi þeir farið með fulla bifreið af mold
og sturtað af Óseyrarbrú. Síðan hafi vitnið ekið ákærða til baka á verkstæðið,
en vitnið farið áleiðis heim. Þá kom og fram í framburði vitnisins hjá lögreglu
að þeir félagar hafi neytt matar í húsnæðinu umrætt sinn en ákærði hefði boðið
upp á brauð og salöt. Við skýrslutöku hjá lögreglu gaf vitnið jafnframt
greinargóða lýsingu á húsnæði því sem ákærði hafði til umráða að […] í
Þorlákshöfn, sem og þeirri aðstöðu sem inni var. Fyrir dómi bar vitnið aftur á
móti að það hefði ekki greint rétt frá hjá lögreglu og einungis bent á ákærða
til þess að fría sjálfan sig. Kvað vitnið þá efnin sem hann var handtekinn með
hafa verið í eigu „vondra manna“ og ákærða alls óviðkomandi. Þó kannaðist
vitnið við að hafa aðstoðað ákærða við að henda rusli og drasli úr húsnæðinu
við […] en það hefði verið um mánuði áður en hann var handtekinn með fíkniefni
í bílnum.
Líkt og að framan greinir lagði lögregla þann 29. apríl 2016
hald á 6.839,37 g af kannabisefnum, sem og búnað til ræktunar í húsnæði er
ákærði hafði til umráða og samkvæmt honum sjálfum sem og vitnum í málinu, einn
lyklavöld að. Dómari hefur kynnt sér framburð ákærða og vitna hjá lögreglu, sem
og myndband sem liggur frammi í málinu, er tekið var á búkmyndavél er lögregla
hafði meðferðis við húsleit í […] umrætt sinn. Styðja umrædd gögn málsins
framburð vitnisins A hjá lögreglu, þar sem lýsingar hans á húsnæðinu og þeim
búnaði sem þar var að finna, koma heim og saman við myndskeið er tekið var á
vettvangi. Við rannsókn málsins, báru bæði ákærði sjálfur sem og vitnið A að
þeir hafi kvöldið áður en lögregla kom að hinni ætluðu ræktun, verið að taka
til í húsnæðinu, þó þeim hafi ekki borið saman um hvort tiltektin sneri að því
að taka niður hina ætluðu ræktun. Þá báru ákærði og vitnið A báðir um það hjá
lögreglu að þeir hefðu umrædda nótt neytt matar í húsnæðinu, og talaði vitnið
um að það hefði verið brauð og salöt. Fær þetta stoð í framburði þeirra
lögreglumanna sem komu á vettvang, en þeim var það báðum minnisstætt að brauð
hefði verið á borðum. Í ljósi framlagðra gagna sem og framburði annarra vitna,
er það mat dómara að hinn breytti framburður vitnisins A fyrir dómi sé
ótrúverðugur, sem og skýringar hans á hinum breytta framburði. Aftur á móti
þykir framburður vitnisins hjá lögreglu við rannsókn málsins eiga sér stoð í
gögnum málsins, sem og framburði ákærða eins langt og hann nær.
Að öllu framangreindu virtu þykir hafið yfir skynsamlegan
vafa að ákærði hafi gerst sekur um þá háttsemi sem lýst er í ákæru og þar þykir
rétt færð til refsiákvæða. Ákærði hefur samkvæmt framansögðu unnið sér til
refsingar.
Samkvæmt framlögðu sakavottorði hefur ákærði átta sinnum áður
sætt refsingu, þar af einu sinni vegna fíkniefnalagabrots. Þann 24. janúar 1996
var ákærði dæmdur til að sæta 30 daga varðhaldi vegna umferðarlagabrots. Þann
8. október sama ár var ákærði dæmdur til að sæta 60 daga varðhaldi vegna
umferðarlagabrots. Þann 28. maí 1998 var ákærði dæmdur til að sæta fangelsi í
átta mánuði, vegna kynferðisbrots. Þann 19. desember 2008 var ákærða gerð sekt
vegna skjalabrots og umferðarlagabrots. Þann 7. apríl 2011 var ákærði dæmdur
til greiðslu sektar, sem og í skilorðsbundið fangelsi vegna skattsvika. Þann
10. október 2012 var ákærða gerð sekt vegna skjalabrots og umferðarlagabrots.
Þann 11. júní 2014 var ákærða gerð sekt fegna áfengislagabrots. Loks var ákærði
þann 17. mars 2015 fundinn sekur um fíkniefnalagabrot og gert að sæta fangelsi
í 60 daga, en fullnustu refsingarinnar var frestað skilorðsbundið til tveggja
ára. Ljóst er að ákærði hefur með broti sínu rofið skilorð
síðastgreinds dóms. Með vísan til 60. gr.
almennra hegningarlaga nr. 19/1940, ber að taka framangreindan dóm upp og dæma
með hinu nýja broti, og ákveða refsingu ákærða í einu lagi með vísan til 77.
sömu laga.
Refsing ákærða er hæfilega ákveðin fangelsi í fimm mánuði. Að
virtum atvikum máls, sem og að teknu tilliti til sakaferils ákærða þykja ekki
efni til að skilorðsbinda refsinguna.
Ekki verður á það fallist að
upptökukrafa ákæruvaldsins sé vanreifuð. Með vísan til 6. mgr. 5. gr. laga nr. 65/1974 og 2. mgr. 14. gr.
reglugerðar nr. 233/2001, eru gerð upptæk framangreind fíkniefni líkt og
greinir í dómsorði. Með vísan til 7. mgr. sömu greinar er og gerður upptækur
búnaður til ólögmætrar ræktunar og meðferðar fíkniefna líkt og greinir í
dómsorði.
Með vísan til 235. gr. laga nr. 88/2008 um
meðferð sakamála, með síðari breytingum, ber að dæma ákærða til greiðslu alls
sakarkostnaðar. Samkvæmt yfirliti lögreglu nemur kostnaður af rannsókn málsins
168.655 krónur. Er þar meðal annars tilgreindur kostnaður vegna þóknunar
verjanda, en samkvæmt gögnum málsins er um að ræða reikning vegna kærða A.
Ákærða í máli þessu verður ekki gert að greiða þóknun annarra þeirra er töldust
sakborningar málsins. Að þessu virtu verður ákærða gert að greiða útlagðan sakarkostnað,
samtals 701.647 krónur, auk þóknunar skipaðs verjanda síns, Snorra Sturlusonar
lögmanns, sem telst hæfilega ákveðin 550.000 krónur að teknu tilliti til
virðisaukaskatts auk ferðakostnaðar lögmannsins, 55.500 krónur.
Hjörtur O. Aðalsteinsson, kveður upp dóminn. Dómsuppkvaðning hefur dregist fram
yfir lögbundinn frest en dómari og málflytjendur töldu ekki þörf
endurflutnings.
DÓMSORÐ
Ákærði,
Baldur Sigurðarson, sæti fangelsi í fimm mánuði.
Gerð eru upptæk 6.839,37 g af kannabisstönglum, sbr. efnaskrá
lögreglu nr. 32407.
Gerður er upptækur búnaður til ólögmætrar ræktunar og
meðferðar fíkniefna, sbr. munaskrá lögreglu nr. 115838.
Ákærði greiði útlagðan sakarkostnað er hann
varðar, 701.647 krónur, auk þóknunar skipaðs verjanda síns, Snorra Sturlusonar
lögmanns, 550.000 krónur að teknu tilliti til virðisaukaskatts auk
ferðakostnaðar lögmannsins, 55.500 krónur.
Hjörtur O. Aðalsteinsson.