- Börn
Ú R S K U R
Ð U R
Héraðsdóms Austurlands
þriðjudaginn 12. mars 2019 í máli nr. U-1/2019:
A
(Eva Dóra Kolbrúnardóttir lögmaður)
gegn
Barnaverndarnefnd B
(Eva Dís Pálmadóttir lögmaður)
Mál þetta barst dóminum 4. febrúar sl. og var þingfest 8. sama mánaðar, en tekið til úrskurðar eftir gagnaöflun og munnlegan málflutning þann 5. mars sl.
Sóknaraðili er A, […].
Varnaraðili er barnaverndarnefnd B.
Sóknaraðili krefst þess í endanlegri kröfugerði sinni, að ógiltur verði úrskurður varnaraðila, sem kveðinn var upp 14. janúar 2019, um að sonur hennar, C, kt. […], skuli vistaður utan heimils og á heimili á vegum varnaraðila í allt að tvo mánuði, með skírskotun til 2. mgr. 27. gr. barnaverndarlaga nr. 80/2002. Við flutning málsins krafðist sóknaraðili þess jafnframt að kröfu varnaraðila í greinargerð um að drengurinn yrði vistaður á heimili á vegum varnaraðila í tólf mánuði allt frá 14. janúar 2019 að telja, sbr. 1. mgr. 28. gr. barnaverndarlaga nr. 80, 2002, yrði hrundið.
Þá krefst sóknaraðili málskostnaðar samkvæmt framlögðum málskostnaðarreikningi eða að mati dómsins, að viðbættum virðisaukaskatti, eins og málið sé eigi gjafsóknarmál.
Varnaraðili krefst þess í endanlegri kröfugerð sinni að staðfestur verði úrskurður hans frá 14. janúar 2019 og jafnframt, og þá samkvæmt kröfum í greinargerð hans, að nefndur drengur, sem lýtur forsjá sóknaraðila, verði vistaður utan heimilis og á heimili á vegum varnaraðila í allt að tólf mánuði frá uppkvaðningu úrskurðarins.
Varnaraðili krefst þess að málskostnaður verði felldur
niður.
I.
Sóknaraðili og sonur hennar, […], […] ára, eiga ættir sínar að rekja til […].
Samkvæmt gögnum og því sem fram hefur komið í máli
þessu, m.a. við flutning, er sóknaraðili fædd í […], en fluttist til […].
Samkvæmt málatilbúnaði flutti sóknaraðili son sinn til […] við tveggja ára
aldurinn, þar sem hann hafði aðsetur hjá ættmennum hennar næstu árin, en hún
hélt áfram búsetu sinni […]. Samkvæmt gögnum sætti drengurinn harðræði á þessum
fyrstu árum sínum í […] og bjó þar jafnframt við mikla vanrækslu.
Sóknaraðili eignaðist yngri drenginn sinn, D , á árinu
[…], en ráðið verður af gögnum að hún hafi tekið drenginn til sín til […] og
hefur hann frá þeim tíma verið í umsjá hennar.
Samkvæmt gögnum hefur sóknaraðili takmarkaða
skólagöngu að baki, en hefur að auki ekki unnið launaða vinnu um árabil, en hún
hefur glímt við líkamleg veikindi.
Sóknaraðili kom til […] með syni sína, D og C, […].
Fyrir liggur að sóknaraðili fluttist ásamt sonum sínum
tveimur til […] og hefur fjölskyldan hin síðustu misserin haft aðsetur í íbúð
[…]. […].
Af gögnum verður helst ráðið að hin síðust misserin
hafi sóknaraðili verið í nánu sambandi við […], sem nú mun vera búsettur […].
Hefur hann dvalið tímabundið á heimili sóknaraðila á […], en þá helst í fríum,
um hátíðisdaga.
Samkvæmt gögnum hófust þau afskipti
barnaverndarnefndar varnaraðila af sóknaraðila og sonum hennar, fjölskyldu sem
mál þetta varðar, í marsmánuði 2018, og liggur fyrir að þau leiddu að lokum til
þess að varnaraðili kvað upp fyrrnefndan úrskurð um málefni drengsins C, þann
14. janúar sl., og þá um vistun hans utan heimilis. Til grundvallar þessum
aðgerðum lágu m.a. greinargerðir starfsmanna barnaverndarnefndar og fjölmörg
önnur gögn, sem öll lýsa aðgerðum og afskiptum barnaverndarnefndar, lögreglu, skólayfirvalda
o.fl.
Í nefndum úrskurði varnaraðila greinir frá því að
fyrsta tilkynningin um greint málfefni hafi borist barnaverndarnefnd B í
marsmánuði 2018 og þá frá […] vegna nefnds drengs, C, sem þá var […] ára. Í
þessari tilkynningu er lýst yfir áhyggjum um líðan drengsins og þá þannig að
hann hafi verið tilfinningalega vanræktur á heimili sínu, en jafnframt að
sóknaraðili gerði of miklar kröfur til hans og þá þannig að hann bæri m.a.
ábyrgð á því að koma yngri bróður sínum, D , til og frá skóla. Þessu til
frekari skýringar hafi komið fram að þegar C hafi verið veikur heima hefði hann
haft miklar áhyggjur af skólasókn yngri bróður síns og þá um að hann gæti þá
ekki fylgt honum. Þá er greint frá því í tilkynningunni að aðstaðan væri í raun
þannig að yngri drengurinn hefði alls ekki sótt skólastarfið þá daga sem eldri
bróðir hans, C, hefði verið veikur heima.
Í nefndri skólatilkynningu er það jafnframt tiltekið
að drengurinn C hafi ekki fengið að taka þátt í tómstundastarfi, en sem dæmi er
nefnt að hann hafi ekki fengið leyfi sóknaraðila til þess að fara í
félagsmiðstöð eða taka þátt í viðburðum á vegum skólans.
Í nefndum úrskurði varnaraðila segir frá því að
nokkrum dögum eftir þessa fyrstu tilkynningu frá grunnskólanum hafi
barnaverndarnefnd borist frekari upplýsingar frá skóla sem vörðuðu hagi
drengsins C og bróður hans, og þá um að sóknaraðili vaknaði ekki með þeim á
morgnana, að þeir borðuðu ekki morgunmat og kæmu ekki með nesti með sér í
skólann. Einnig segir frá því að C hafi haft innsýn í fjármál fjölskyldunnar og
hefði m.a. haft orð á því að sóknaraðili hefði ekki efni á því að kaupa nesti
handa sér og yngri bróður sínum.
Í úrskurðinum segir frá því að vegna ofangreindrar
atburðarásar hafi starfsmaður barnaverndar rætt við drenginn C, sem staðfest
hefði efnisatriði skólatilkynninganna, en jafnframt er haft eftir honum að
sóknaraðili öskraði mikið og væri alltaf í símanum og þá í þeim tilgangi að
leita að húsnæði annars staðar […]. Fram kemur að drengurinn hefði jafnframt
greint frá því að sóknaraðili hefði stundum lamið hann með plaststykki úr
bílabraut, þ.e. þegar hann var yngri og hefði verið óþægur.
Í úrskurðinum segir frá því að starfsmaður
barnaverndar hefði rætt við sóknaraðila um efni ofangreindra tilkynninga og orð
sonar hennar, C. Er staðhæft að hún hafi að nokkru staðfest efnisatriði þeirra
og þar á meðal að hún hefði lamið drenginn með plaststykki þegar hann hefði
ekki hlýtt henni. Af þessu tilefni er haft eftir sóknaraðila að henni hafi
reynst erfitt að ala nefnda drengi upp þrátt fyrir að hún hefði reynt sitt
besta. Greint er frá því að starfsmaður varnaraðila hefði við greint tækifæri
og tilefni kynnti sóknaraðila hlutverk barnaverndar, barnaverndarlög og
alvarleika þess að beita börn ofbeldi, en að auki um þá ábyrgð sem drengurinn bæri.
Af þessu tilefni hefði sóknaraðila verið boðin aðstoð inn á heimilið, en
staðhæft er að hún hafi í raun gefið lítið út á það.
Í úrskurðinum er greint frá því að barnaverndarnefnd
varnaraðila hafi í […] 2018 borist tilkynning frá […] þess efnis að sóknaraðili
hefði komið í […] að morgni dags með syni sína tvo. Hafi starfsmenn […] illa
skilið sóknaraðila að öðru leyti en því að hún hefði verið með orð um að hún
þyrfti að fara til læknis, en í framhaldi af því hefði hún skilið drengina
eftir í umsjón starfsmanna í […]. Vísað er til þess að í nefndri tilkynningu
hafi m.a. verið tiltekið að drengurinn C hefði haft orð á því við starfsmenn
[…], að hann væri hræddur við sóknaraðila og enn fremur að hún hefði ekki í
nein hús að venda […], að hann hefði miklar áhyggjur af henni og óttaðist að
hún myndi deyja. Fram kemur í úrskurðinum og framlögðum gögnum, að þegar
sóknaraðili hafi komið að sækja drengina í […] eftir um 8 klukkustunda fjarveru
hefði hún verið í miklu ójafnvægi og af þeim sökum hefðu starfsmenn athvarfsins
ekki treyst henni til að fara með drengina. Vegna þessa hefðu starfsmenn
barnaverndar verið kallaðir til, fyrst í […], en síðar starfsmenn varnaraðila.
Í úrskurði varnaraðila og framlögðum gögnum er greint
nánar frá síðastgreindum atburði. Er tekið fram að málið hefði að lokum leyst
farsællega og þá með þeim hætti að sóknaraðili hefði skipulagt stutta dvöl
drengjanna […], þar sem þeir hefðu þekkt til aðstæðna vegna hinnar fyrri dvalar
þar í bæ, en þar um segir nánar: Var það mat starfsmanns barnaverndar að úr
því sem komið var væru drengirnir öruggir. Starfsmaður barnaverndar lagði ríka
áherslu á góð samskipti við sóknaraðila á meðan fjölskyldan dveldi […] sem gekk
eftir. Sóknaraðili lét vita þegar fjölskyldan kom heim aftur og hitti
starfsmaður barnaverndar hana í viðtali og hefur frá því hitt sóknaraðila með
reglubundnum hætti.
Í úrskurði varnaraðila segir frá því að í […]mánuði
2018 hefði lögreglan verið kölluð að heimili sóknaraðila vegna öskurláta og
hávaða, og þá vegna grunsemda að um ofbeldi gegn barni væri að ræða. Fram kemur
að þegar lögreglumenn komu á vetttvang hafi C og yngri bróðir hans verið í góðu
jafnvægi og sóknaraðili róleg. Hafi sóknaraðli verið með þær útskýringar að
henni lægi hátt rómur, en hefði ekki verið að beita ofbeldi. Greint er frá því
að lögreglumennirnir hefðu leitað frekari skýringar hjá nágrönnunum, sem hefðu
áréttað að mikil læti hefðu borist frá íbúð sóknaraðila og hefði bæði verið um
öskur og grát barna að ræða.
Í úrskurði varnaraðila segir frá því að í sama mánuði,
[…] 2018, hefði borist tilkynning frá [...] þess efnis að áhyggjur væru af
aðstæðum sona sóknaraðila vegna þeirra uppeldisaðferða sem hún virtist viðhafa.
Er staðhæft að sóknaraðili hefði beitt C líkamlegu ofbeldi og hann hræddist
hana af þeim sökum. Þá er greint frá því í tilkynningunni að sóknaraðili
bannaði drengjunum að sækja tómstundir utan skólans og enn fremur er sagt að
hún hafi meinað þeim að sækja danstíma á skólatíma þrátt fyrir að þeir hefðu
báðir lýst yfir vilja til þess að taka þátt í slíkri kennslu.
Í úrskurðinum segir frá því að þann […] 2018, um
kvöldmatarleytið, hefði [...] greint starfsmanni barnaverndar frá því að
drengurinn C hefði komið á heimili hans og neitað að fara heim til sín sökum
þess að sóknaraðili hefði hótað að lemja hann. Um greint atvik og þær
ráðstafanir sem gripið var til af hálfu barnaverndarnefndar af þessu tilefni
segir nánar í úrskurðinum: „Starfsmenn barnaverndar fóru á heimili […] og
hittu þar og ræddu við drenginn. Fram kom að hann hefði ekki mátt hafa símann
sinn og orðið reiður við sóknaraðila og yngri drenginn sem hann sagði að hefði
hlegið að sér. Hefði hann misst stjórn á sér og eyðilagt leikföng. Sóknaraðili
hafi þá hótað að ná í spýtu og slá hann með henni. Í kjölfarið hafi drengurinn
hlaupið út, leitað að […]. Sagði drengurinn í samtali við starfsmann að hann
væri hræddur við sóknaraðila og vildi ekki fara heim. Jafnframt sagði hann að
þó að starfsmaður barnaverndar færi með honum inn á heimilið myndi sóknaraðili
lemja hann um leið og starfsmaðurinn færi. Starfsmenn barnaverndar fóru í fylgd
lögreglu inn á heimili sóknaraðila. Heimilislífið var með rólegra móti, yngri
drengurinn lék sér í síma og sóknaraðili var róleg. Annar starfsmanna
barnaverndar ræddi við yngri drenginn á meðan hinn starfsmaðurinn ræddi við
sóknaraðila. Hún vildi ekki viðurkenna ofbeldi og sagði drenginn vera óhlýðinn.
Hann væri latur við heimilisstörf og hann ætti að aðstoða eins og önnur börn.
Sagðist sóknaraðili ráða illa við drenginn sem væri skapstór. Þá sagðist
sóknaraðili biðja til Guðs um að drengurinn myndi hlýða sér en hann héldi áfram
að brjóta reglur sem hún setti.
Að mati starfsmanna barnaverndar var öryggi drengsins
ekki tryggt á heimili hans og því tekin ákvörðun um að vista hann utan
heimilis. Sóknaraðili var samþykk því að drengurinn yrði vistaður utan heimilis
um tíma.
Drengurinn var fyrst neyðarvistaður á grundvelli 31.
gr. barnaverndarlaga nr. 80/2002 þann […] 2018, að höfðu samráði við formann
varnaraðila. Starfsmenn barnaverndar ræddu við sóknaraðila á heimili hennar
degi síðar. Sóknaraðili var samþykk vistun utan heimilis en vildi ekki skrifa
undir eyðublað þess efnis, en samþykkti síðan vistun utan heimilis á grundvelli
25. gr. barnaverndarlaga þann […]. Starfsmenn barnaverndar ræddu við
sóknaraðila um að mikilvægt væri að finna leið til þess að drengurinn gæti
snúið aftur inn á heimilið og ljóst væri að bæði sóknaraðili og drengurinn
þyrftu umtalsverðan stuðning og leiðsögn.
Drengurinn var vistaður utan heimilis í fimm vikur. Á
þeim tíma heimsótti hann sóknaraðila á heimili hennar reglulega, fyrst um sinn
undir eftirliti starfsmanns barnaverndar og síðar einn síns liðs.
Í úrskurði varnaraðila greinir frá því að
fjölskylduráðgjafar á vegum barnaverndar hafi hitt sóknaraðila á heimili hennar
þann 17. september 2018 og er tekið fram að annar þeirra hafi verið
sálfræðingur […]. Greint er frá því að sóknaraðili hafi skýrt frá því að sonur
hennar, C, hefði mátt þola verulegt harðræði á þeim árum sem hann hafðist við á
yngri árum sínum í […], þ.e. þegar þau voru aðskilin. Vísað er til þess að
þessi frásögn sóknaraðila hefði að þessu leyti verið í samræmi við orðræðu
drengsins við starfsmann barnaverndar, og segir um þetta nánar í úrskurðinum: Fjölskylduráðgjafar
töldu líklegt að tengslarof hafi orðið milli drengsins og sóknaraðila. Vísuðu
þeir til þess að að sögn sóknaraðila bæri drengurinn ekki virðingu fyrir henni
og þyrfti að læra að hlýða. Tók sóknaraðili leiðsögn fjölskylduráðgjafa ekki
illa og sagðist gjarnan vilja hitta þá aftur. Sóknaraðila var einnig útvegaður lögmaður
á meðan á vistun drengsins utan heimilis stóð.
Í úrskurði varnaraðila er greint frá þeim ráðstöfunum,
sem gripið var til í kjölfar ofangreindra atburða, en um það segir m.a.:
Starfsmenn barnaverndar hafa síðan drengurinn snéri
aftur á heimili sitt sinnt stífu eftirliti með fjölskyldunni. Auk þess hefur
starfsmaður barnaverndar hitt drenginn reglulega í skóla. Þá hefur fjölskyldan
verið í fjölskylduráðgjöf til þess að bæta tengsl sín á milli og efla
foreldrahæfni sóknaraðila. Þá hafa verið gerðar áætlanir í málinu samkvæmt 23.
gr. barnaverndarlaga. Jafnframt var drengnum skipaður talsmaður samkvæmt 3.
mgr. 46. gr. barnaverndarlaga. Starfsmaður barnaverndar reyndi að útvega
drengnum stuðningsfjölskyldu og tilsjón inn á heimili en það gekk ekki sem skyldi.
Sóknaraðili var í fyrstu samþykk því að drengurinn fengi stuðningsfjölskyldu en
dró það samþykki svo til baka. […] var þó tilbúin til að taka hann hvern
föstudag í desember í stuðning og gekk það vel þangað til að sóknaraðili
samþykkti ekki þá tilhögun.
Þrátt
fyrir framangreint hafa starfsmenn barnaverndar ítrekað farið í útköll á
heimili fjölskyldunnar eftir að drengurinn kom úr vistun, þá vegna hávaða eða
vegna þess að drengurinn hafi hlaupið út til fyrrum vistforeldra og upplýst um
að sóknaraðili hafi hótað að beita hann ofbeldi. Ennfremur hafa starfsmenn
barnaverndar haft afskipti af heimilinu þegar drengurinn hefur ekki farið eftir
þeim reglum sem sóknaraðili hefur sett.
Samkvæmt gögnum var drengnum C skipaður talsmaður,
sbr. ákvæði 3. mgr. 46. gr. barnaverndarlaga, og liggja fyrir í málinu skýrslur
talsmannsins um aðstæður og vilja drengsins.
Í úrskurði varnaraðila er greint frá því að starfsmenn
barnaverndar hafi farið í útkall á heimili sóknaraðila þann […]. desember 2018,
en einnig þremur dögum síðar. Tekið er fram að tilefni þess hafi verið
tilkynningar frá fyrrverandi vistforeldri drengsins C um að hann hefði hlaupist
að heiman og þá m.a. sökum þess að sambýlismaður sóknaraðila hefði slegið hann.
Greint er frá því að starfsmaður barnaverndar hefði af þessu tilefni rætt bæði
við drenginn og sóknaraðila og er þeim samskiptum þannig lýst:
Þar kom að mati starfsmannsins skýrt fram að
drengurinn vildi ekki búa á heimili fjölskyldunnar en sagði ennfremur að
sóknaraðili hefði sagt að ef hann færi aftur af heimilinu þá myndi hann ekki
koma aftur. Starfsmaður barnaverndar fór svo í annað útkall […]. desember kl.
17:30 en þá varð drengurinn ósáttur við sóknaraðila og hljóp út af heimilinu.
Starfsmaður barnaverndar fór á staðinn og var þar í klukkustund, eða þar til ró
komst á mannskapinn.
Fram kemur í úrskurði varnaraðila að á meðferðarfundi
starfsmanna barnaverndarteymis varnaraðila, þann 3. janúar 2019, hafi verið
staðfest sú ákvörðun að óska eftir forsjárhæfnismati á sóknaraðila, en því til
viðbótar hafi verið ritað undir áætlun um meðferð máls.
Greint er frá því í úrskurðinum að nefndan dag, þann
3. janúar sl., hafi lögreglan kallað til starfsmenn barnaverndar á heimili
sóknaraðila og þá sökum þess að drengurinn C hefði enn hlaupist á brott og þá
farið til fyrrverandi vistforeldra sinna. Segir nánar um tilefni þessa, að
drengurinn hefði læst eigin herbergishurð og ekki sinnt óskum sóknaraðila um að
opna, en að sambýlismaður sóknaraðila hefði þá gripið það til bragðs að losa um
læsinguna með hnífi. Um nánari viðbrögð vegna þessa atburðar segir í
úrskurðinum: Í kjölfar framangreinds sóttu starfsmenn barnaverndar drenginn
og upplýstu hann um að hann myndi dvelja á öðru heimili í einhverja daga. Hann
var að mati starfsmanna hræddur við viðbrögð sóknaraðila en létt að heyra að
hann færi á annað heimili. Aðspurður um hvað hefði gerst á heimilinu sagði
drengurinn að hann og yngri drengurinn hefðu rifist. Sóknaraðili hefði tekið
upp hanskann fyrir yngri drenginn og drengnum fundist það ósanngjarnt. Hann hefði
því viljað fá frið. Hann hefði beðið sóknaraðila um að láta sig í friði en hún
haldið áfram að öskra. Hann hefði því læst sig inni í herbergi. Sambýlismaður
sóknaraðila hafi því næst reynt að komast inn í herbergið og brotið læsinguna á
hurðinni. Hann hafi svo notað hníf til að skera læsinguna úr. Drengurinn
sagðist hafa orðið hræddur, hlaupið út úr húsinu og hringt í 112.
Samkvæmt gögnum var drengurinn C neyðarvistaður utan
heimilis sóknaraðila strax í kjölfar ofangreinds atburðar og þá á grundvelli
31. gr. barnaverndarlaga.
Samkvæmt gögnum var þann 14. janúar sl. haldinn fundur
hjá barnaverndarnefnd varnaraðila um málefni drengsins C. Fyrir fundinum lá
greinargerð barnaverndarstarfsmanna um atvik máls og aðstæður drengsins, en
einnig fjöldi annarra gagna. Fram kemur að tilefni fundarins hafi nánar verið
að taka ákvörðun um áframhaldandi vistun drengsins og þá í kjölfar ofangreinds
atburðar. Á fundi þessum var af hálfu sóknaraðila lögð fram greinargerð
lögmanns hennar þar sem hinum fyrirhuguðu ráðstöfunum var andmælt.
Í lokaorðum fyrrnefndrar skýrslu starfsmanna
barnaverndar varnaraðila, sem dagsett er 11. janúar sl., segir m.a:
Að mati starfsmanna barnaverndar þykir ljóst að
drengurinn býr við bágar heimilisaðstæður þar sem ekki er hlúð fyllilega að
grunnþörfum hans né félags- og tilfinningaþroska. Mikil vinna hefur átt sér
stað með fjölskyldunni sem hefur að mati stm.bvn ekki skilað tilætluðum
árangri. Þá er ljóst að drengurinn upplifir mikla vanlíðan á heimilinu og hefur
hann ítrekað tjáð stm.bvn að hann vilji ekki búa á heimili móður. Eftir
umtalsverða veru á heimili fjölskyldunnar er það upplifun stm.bvn að lítil
tengsl eru á milli móður og drengsins og hefur upplifun drengsins verið oft að
móður þyki ekki vænt um hann. Stm.bvn hafa haft ítrekuð afskipti af
fjölskyldunni vegna slæmra samskipta móður og drengsins, ennfremur er það
upplifun stm.bvn að móðir hafi ekki færni í að leiðbeina drengnum og setja
honum mörk. Þá hefur móðir oft gert lítið úr tilfinningum drengsins, hans
upplifunum og hótað því að skilja hann eftir á […] fari hann útaf heimilinu.
Móðir hefur ekki tekið afskiptum barnaverndar illa en upplifun stm.bvn er sú að
móðir hafi ekki forsendur til að fylgja eftir þeim áætlunum sem hafa verið
gerðar í samvinnu við hana. Þrátt fyrir umtalsverða íhlutun barnaverndar hefur
ástandið á heimilinu verið óbreytt og versnað eftir því sem liðið hefur á. Með
ofangreint í huga er það mat stm.bvn að drengurinn getur ekki búið á heimilinu
á meðan aðstæður eru óbreyttar. Ennfremur þarf móðir að gangast undir
forsjárhæfnimat sem stm.bvn telja nauðsynlegt í ljósi þess að upplifun þeirra
er að móðir hafi ekki færni til að sinna forsjárskyldum sínum. Stm.bvn leggja
til að drengurinn verði vistaður utan heimilis í allt að tvo mánuði skv. 27.
gr. barnaverndarlaga nr 80/2002.
Í úrskurði barnaverndarnefndar varnaraðila, B, sem hér
að framan hefur að nokkru verið rakinn, eru atvik máls nánar rakin.
Úrskurðurinn er ítarlegur, en í lokaorðum segir þar að það hafi verið
niðurstaða nefndarinnar, að uppfyllt væru skilyrði b-liðar 27. gr.
barnaverndarlaganna um að brýnir hagsmunir drengsins C stæðu til þess að hann
yrði vistaður utan hemilis sóknaraðila í tvo mánuði.
Fyrir liggur að sóknaraðili gekkst nýverið og að
fyrirlagi varnaraðila undir forsjárhæfnismat. Matið annaðist E sálfræðingur.
Vann sálfræðingurinn m.a. starf sitt á heimili sóknaraðila þann 17. janúar sl.,
en skýrsla hans er dagsett 1. febrúar sl. Fram kemur að það hafi verið ákvörðun
sóknaraðila að taka til varna og var það gert með málskoti, sem barst héraðsdómi
4. febrúar sl.
Samkvæmt gögnum kynntu starfsmenn varnaraðila
sóknaraðila fyrrnefnt forsjárhæfnimat á fundi þann 11. febrúar sl., sem haldinn
var á heimili hennar, en viðstaddur var lögmaður hennar.
Af gögnum verður ráðið að varnaraðili hafi brugðist
frekar við og þá eftir að forsjármatið lá fyrir og þá með því að krefjast
vistunar drengsins utan heimilis í allt að 12 mánuði, sbr. heimildarákvæði 28.
gr. barnaverndarlaga.
Samkvæmt gögnum fór starfsmaður barnaverndar þann 14.
febrúar sl. á heimili sóknaraðila með drenginn C í áður skipulagða umgengni.
Sóknaraðili var ekki á heimili sínu og var upplýst að hún hefði kvöldið áður
farið til […] með yngri drenginn. Við meðferð málsins fyrir dómi var upplýst að
sóknaraðili hefði farið af landi brott þann […] febrúar sl.
II.
Sóknaraðili andmælir málavaxtalýsingu í úrskurði
varnaraðila hér að framan að nokkru leyti. Hún vísar m.a. til þess, að þrátt
fyrir að hún hafi ekki alltaf haft skilning á afskiptum barnaverndarnefndar
varnaraðila hafi hún samþykkt að sonur hennar, C, yrði vistaður utan heimilis í
fimm vikur síðastliðið haust. Hún hafi hins vegar talið að sú ráðstöfun hafi
ekki verið nauðsynleg. Sóknaraðili vísar jafnframt til þess að hún hafi í raun
samþykkt alla þá aðstoð sem henni og drengnum hafi boðist og þá m.a. frá
starfsmönnum varnaraðila, en að auki hafi hún lagt sig alla fram um að sýna
samvinnu og breyta háttsemi sinni til samræmis við þær kröfur sem beint hafi
verið að henni. Sóknaraðili getur þess að í stað nefndra vistunaraðgerða hefði vilji
hennar fremur staðið til þess að þiggja enn frekari stuðning og þá t.d. með því
að fá tilsjónarkonu inn á heimili sitt og þá til þess að aðstoða hana við
uppeldið, og þá í því skyni að bæta hag drengsins C og auka vellíðan hans.
Sóknaraðili bendir á að hún hafi orðið þreytt á tíðum
afskiptum barnaverndaryfirvalda. Vísar hún til þess að hún hafi litið svo á að
nefnd afskipti hafi ekki ætíð verið á rökum reist. Þar um segir sóknaraðili að
starfsmenn varnaraðila hafi á stundum hlustað um of á sjónarmið drengsins C, en
hundsað sjónarmið hennar, þ. á m. varðandi símanotkun hans. Hafi það einmitt
verið tilfellið þegar áðurgreind atvik gerðust í byrjun janúar sl., en þá hefði
drengurinn ekki farið að tilmælum hennar, en í þess stað læst að sér. Þá hefði
drengurinn heldur ekki farið að tilmælum um að opna lásinn, en af þeim sökum
hefði sambýlismaður sóknaraðila notað hníf til þess að snúa upp á hurðarlásinn.
Hafi hnífurinn þannig eingöngu verið notaður til þess að opna hurðarlásinn og
því hafi drengnum aldrei verið ógnað eða hótað með honum, og þá ekki þannig að
hann yrði beittur öðru ofbeldi.
III.
Eins og áður er komið fram óskaði Fjölskyldusvið
varnaraðila eftir sálfræðilegu mati á forsjárhæfni sóknaraðila. Nánar tiltekið
var það gert þann 28. desember 2018. Var D, sérfræðingi í kínískri sálfræði og
réttarsálfræði, falið verkið. Matsskýrsla sálfræðingsins er dagsett 1. febrúar
sl., en þar er í rökstuddri niðurstöðu m.a. lagt mat á atriði, sem varða
sóknaraðila og son hennar C, þ.e.: Forsjárhæfni og skilningur á þörfum og
hagsmunum barns, vilji sóknaraðila til þess að annast uppeldishlutverk sitt,
tengsl milli hennar og drengsins m.t.t. aldurs og þroska, en einnig tengsl
annarra sem standa að drengnum. Þá er í skýrslunni vikið að því atriði hverjir
séu helstu styrkleikar og veikleikar sóknaraðila í uppeldislegu tilliti og enn
fremur að því hvort að hún búi yfir nauðsynlegri og nægilegri hæfni til að
veita drengnum fullnægjandi uppeldi. Í skýrslunni er einnig lagt mat á þroska,
líðan og námslega og félagslega stöðu drengsins í skóla og utan hans. Þá er
tekið til skoðunar hvort velferð eða þroska drengsins sé ógnað í einhverju
tilliti og þá með því að alast upp í umsjá sóknaraðila. Einnig er í skýrslunni
lagt mat á persónulega eiginleika og félagslegar aðstæður sóknaraðila, en
einnig á andlegt ástand hennar og möguleg geðræn einkenni. Loks er lagt mat á
þörfina fyrir meðferð og/eða stuðningsúrræði fyrir sóknaraðila og á hæfni
hennar til þess að nýta sér meðferð og/eða stuðningsmeðferð. Loks er vikið að
öðrum mikilvægum atriðum sem matsmaðurinn telur að skipti máli og þá í þeim
tilgangi að varpa frekara ljósi á stöðu sóknaraðila og sonar hennar, C.
Í aðfaraorðum matsskýrslunnar er gerð grein fyrir þeim
gögnum sem matsmaðurinn hafði undir höndum við gerð hennar. Þá segir frá því í
skýrslunni að matsmaðurinn hafi farið á heimili sóknaraðila og að hann hafi átt
þar viðtal við hana, en einnig lagt fyrir hana sálfræðileg próf, en þá fengið
aðstoð sambýlismanns hennar, enda hafi hann þá verið staddur á heimilinu. Í
matsskýrslunni er gerð grein fyrir því að nefndur sálfræðingur hafi við gerð
skýrslunnar átt samræður við drenginn C, en einnig við vistforeldra hans,
stuðningsaðila og […] grunnskólans [...].
Í aðfaraorðum ofannefndrar sálfræðiskýrslu er m.a.
fjallað um bakgrunn sóknaraðila svo og um atvik máls eftir að hún fluttist
ásamt sonum sínum tveimur til [...]. Þá er fjallað um samskipti og síðar
afskipti félags- og barnaverndaryfirvalda, en einnig er lýst aðstæðum á heimili
sóknaraðila og gerð grein fyrir fyrrnefndum viðtölum, en einnig félagslegum
aðstæðum, heilsufari og veittum stuðningi. Loks er gerð grein fyrir niðurstöðum
sálfræðiprófa og vikið að upplýsingum frá skóla.
Í samantektar- og niðurstöðukafla umræddrar
matsskýrslu er gerð grein fyrir öllum áðurgreindum álitaefnum. Segir m.a. um
forsjárhæfni sóknaraðila, þar sem einkum er fjallað um drenginn C,
eftirfarandi:
Þegar farið er yfir þau gögn sem liggja fyrir, viðtöl
við móður og drenginn, skoðun á samskiptum, sálfræðileg próf og upplýsingum frá
aðilum sem hafa tengst fjölskyldunni, má sjá að þetta mál er alvarlegt og lýsir
lengri tíma vanda.
Vanræksla móður á drengjunum tekur til flestra þátta í
þeirra daglegu lífi. Hún hefur ekki styrkt drengina félagslega, hefur ekki
sinnt þeirra skólanámi og hefur einangrað þá markvisst á heimilinu. Mikill
stuðningur hefur verið reyndur til að laga stöðu fjölskyldunnar og bæta hæfni
móður til að sinna nauðsynlegum þáttum í þeirra uppeldi en það hefur ekki
gengið eftir. Þeir sem komið hafa að málinu eru sammála að um óverulegar
breytingar séu á hæfni móður með stuðningi, ef þá einhverjar. Móðir […] og […]
varðandi uppeldi barna. Hins vegar er þetta mál alvarlegra en svo að hægt sé að
skýra allt út frá […]. Matsmaður lagði fyrir móður […]. Matsmaður hefur því
áhyggjur af hennar […] almennt og skilningi hennar í þarfir drengjanna og getu
til að taka við leiðbeiningum og læra nýjar aðferðir við uppeldi þeirra. Auk
þess er ekki vitað nákvæmlega hvort móðir hafi lent í áföllum en tengslaleysi
hennar almennt er mjög alvarlegt. Slíkt getur komið vegna vanrækslu í æsku eða
áföllum en hún vildi ekki ræða slíkt við matsmann. Á geðgreiningarviðtali komu
ekki fram alvarleg geðræn einkenni og hún neitaði slíkum einkennum í sögu fyrir
utan tvö depurðartímabil og að hún hafi áhyggjur af máli B. Í gögnum og í
viðtölum við aðila komu ekki fram vísbendingar um alvarleg geðræn veikindi en
klár merki persónuleikaröskunar en það var ekki hægt að meta það sérstaklega nú
með sálfræðiprófum. Móðir virðist hafa afar takmarkað innsæi í þarfir drengjanna
eða eigin getu og takmarkanir. Útskýringar á málinu eru mjög einfaldar, hún
virðist gagnrýnislaus og með fastmótaðar hugmyndir um hvernig hlutirnir eigi að
vera sem gerir það að verkum að hún fer ekki eftir ráðum annarra. Hún virðist
ekki hafa nein ráð til að takast á við hegðunar- og tilfinningavanda C og
hennar skýringar eru óljósar og einfaldar. Ekki er því talið að móðir hafi
nauðsynlega eða nægjanlega hæfni til að fara með forsjá barna sinna og vill
matsmaður sérstaklega taka fram að hennar vanræksla er alvarleg og hennar
vanskilningur á þörfum þeirra alvarlegur.
Í matsskýrslunni segir m.a. um sóknaraðila að hún hafi
vilja til þess að annast uppeldi drengsins C, en þá þannig að hann komi á ný á
heimili hennar. Um þetta segir og að sóknaraðili […]
Í skýrslunni er staðhæft að sóknaraðili hafi
greinilegan og alvarlegan tengslavanda, en um þetta atriði segir nánar: Við
skoðun og í upplýsingum frá aðilum er áberandi tengslaleysi og ástleysi móður í
þeirra garð. C hefur lýst þessu sjálfur í viðtali við matsmann, talsmann og í
raun við alla sem komið hafa að málinu.
Í skýrslunni segir að yngri bróðirinn virðist vera
afskiptur á heimili sóknaraðila, og er ályktað að hann fái hvorki hlýju,
athygli eða tengsl frá sóknaraðila.
Um styrkleika sóknaraðila segir í skýrslunni að hún sé
reglusöm og með húsnæði og virðist sinna daglegum hlutum á heimilinu og eldi
mat fyrir drengina. Að auki hafi hún að hluta til verið til samvinnu og sýnt
greinilega vilja til að halda drengjunum á heimilinu og óski þess að fjölskyldulífið
gangi vel fyrir sig og að fjölskyldan sé sameinuð og í friði.
Um veikleika sóknaraðila segir að hún sé haldin
almennu innsæisleysi og skilningsleysi í þarfir drengjanna, en þar við bætist
skert tengslahæfni, vangeta til að styrkja drengina félagslega og námslega svo
og vangeta til þess að nýta sér ráðgjöf og stuðning. Er það niðurstaðan að
þessu sögðu að sóknaraðili hafi ekki hæfni til að sinna foreldrahlutverkinu með
nægjanlegum hætti og að hún geti því ekki veitt sonum sínum fullnægjandi
uppeldisskilyrði til framtíðar.
Að því er varðar þroska, líðan og námslega og
félagslega stöðu sona sóknaraðila segir almennt í skýrslunni:
[…]
Í
skýrslunni segir nánar um persónulega eiginleika, andlegt atgervi og
félagslegar aðstæður svo og ástand sóknaraðila og um möguleg geðræn einkenni
hennar og þörf fyrir stuðningsúrræði og hæfni til þess að nýta sér slíka
aðstoð:
[…]
Lokaorðin í skýrslu matsmannsins eru svohljóðandi:
Ljóst er að ofan að matsmaður telur móður ekki vera
með næga hæfni til að sinna drengjunum. Hennar veikleikar sem uppalandi eru
alvarlegir og talið er að stuðningur til að bæta hennar forsjárhæfni sé full
reyndur. Áhyggjur barnaverndar hafa mikið snúist um eldri drenginn enda hefur
hann tjáð sig í orðum og hegðun. Hann hefur mikla áfallasögu og þarf
nauðsynlega að komast í langtíma fóstur þar sem hann fær ást og umhyggju og
stuðning til að þroskast. Tilfinningavandi drengsins orsakast af hans
áfallasögu og tengslarofi og kemur fram í hegðunarvanda og
kvíðaeinkennum/áfallaeinkennum. Í viðtali við matsmann virðist móðir gera lítið
úr áföllum drengsins og sagði að hann hafi ekki verið sendur í skóla en minnist
ekkert á það ofbeldi sem hann varð fyrir. Sjálfur hefur hann marg lýst því að
hann vilji ekki búa á heimili móður. Yngri drengurinn á ekkert tungumál að því
er virðist og hefur lítið tjáð sig. Hann er yngri og hefur ekki farið að sýna
hegðunarvandamál sem þó er hætta á þegar hann verður eldri og vill fá meira
sjálfræði. Matsmaður vill því sérstaklega nefna áhyggjur sínar af stöðu
drengsins á heimilinu.
IV.
Sóknaraðili byggir á því að skilyrði vistunar sonar
hennar, C, utan heimilis séu ekki uppfyllt samkvæmt ákvæði b-liðar 1. mgr. 27.
gr. barnaverndarlaganna og þá til þess að tryggja öryggi hans eða veita honum
nauðsynlega meðferð og aðhlynningu, sbr. ákvæði 26. gr., sbr. 24. gr. og 25.
gr., sömu laga. Vísar hún til þess að ekki sé í raun útséð með að þau úrræði
sem þegar hafi verið gripið til hafi ekki skilað árangri, en að auki megi grípa
til frekari úrræða og koma þannig til móts við þarfir sonar hennar, C.
Sóknaraðili bendir á að á meðal gagna máls þessa séu
tilkynningar og bakvaktarskýrslur starfsmanna barnaverndarnefndar, auk þess sem
gerðar hafa verið áætlanir um meðferð máls samkvæmt 24. gr., sbr. 23. gr.,
barnaverndarlaga og þá í samvinnu við hana. Sóknaraðili byggir á því að
stuðningur við hana og soninn C á heimili hennar hafi í raun ekki verið
fullreyndur. Af þeim sökum hafi ekki verið réttlætanlegt að beita svo
íþyngjandi úrræði að vista drenginn utan heimilis hennar í tólf mánuði, sbr.
fyrrnefnda kröfu í greinargerð varnaraðila. Sóknaraðili byggir á því að
hagsmunum drengsins sé best borgið á heimili fjölskyldunnar og þá með enn
frekari stuðningi frá barnaverndarnefnd, enda þjóni það ekki hagsmunum
drengsins best að vera fjarri fjölskyldu sinni.
Sóknaraðili byggir á því og áréttar að
stuðningsaðgerðir hafi ekki verið fullreyndar. Því hafi barnaverndaryfirvöldum
verið skylt að beita vægari úrræðum áður en sonur hennar verði vistaður utan
heimilis í svo langan tíma sem krafist er, enda beri barnaverndarnefnd
varnaraðila að vinna að því sem sé best sé fyrir drenginn og hagsmuni hans.
Sóknaraðili byggir á því að eðli málsins samkvæmt sé svo löng vistun utan
heimilis sem varnaraðili krefjist bæði íþyngjandi fyrir drenginn og valdi óþarfa
róti í lífi hans.
Sóknaraðili áréttar að hún hafi allt fram til þessa
verið samvinnufús við barnavernd og jafnan gert sitt besta til að fylgja
ráðleggingum og samningum sem gerðir hafi verið við hana, líkt og rakið hafi
verið í lýsingu málavaxta hér að framan. Hún byggir á því að drengnum C hafi á
hinn bóginn ekki verið gert nægjanlega ljóst af hálfu varnaraðila hvaða
ráðstafanir og samningar hafi verið gerðir. Af þessu sökum hafi drengurinn ekki
verið upplýstur um að honum bæri að hlýða henni sem móður. Þá hafi drengnum
heldur ekki verið kynnt ákvæði þar sem áhersla hafi verið lögð á að takmarka
símanotkun hans og þá við tímabilið frá kl. 16:00 til 22:00 á kvöldin, en að þá
hafi hann átt að hætta í símanum og taka á sig náðir. Sóknaraðili staðhæfir að
vegna þessa hafi drengurinn brugðist illa orðræðu hennar um nefndan tímaramma
og hafi það leitt til þess að komið hafi upp deilur á milli þeirra mæðgina.
Sóknaraðili segir að það sé og álit hennar að lýstar aðstæður hafi mögulega
haft áhrif á drenginn og þá þannig að hann hafi frekar viljað vera annars
staðar en á heimili þeirra, enda hafi hann þá getað verið miklu meira með
símann heldur en á heimili hennar. Sóknaraðili vísar enn fremur til þess að hún
hafi haft vilja til að hafa tilteknar húsreglur, þ. á m. varðandi frágang og
uppvask á leirtaui og að drengurinn hlýddi að því leyti. Enn fremur hafi
sóknaraðili haft af því áhyggjur að yrði farið að ráðstöfunum og úrskurði
varnaraðila leiddi það til þess að drengurinn missti af reglulegum biblíutímum
á internetinu, þ.e. á föstudögum og mánudögum. Vísar sóknaraðili til þess að
það sé henni mikilvægt að kenna drengnum kristileg gildi, enda sé hún mjög
trúuð kona. Aukinheldur byggir sóknaraðili á því að það sé ekki drengnum C
fyrir bestu, og þá ekki yngri bróður hans, að hann sé vistaður utan heimilis og
gangi þar af leiðandi í annan skóla fjarri heimili fjölskyldunnar.
Sóknaraðili byggir á því og áréttar, að gögn málsins
sýni í raun að stuðningsúrræði hafi ekki verið reynd til hlítar. Þannig hafi
hana fyrst og fremst skort stuðning til þess að skapa syni sínum viðunandi
uppeldisskilyrði og hafi varnaraðili átt að reyna slíkt til hlítar áður en
gripið var til svo viðurhlutamikils úrræðis að vista drenginn utan heimilis
hennar. Hún byggi og á því að það séu hagsmunir drengsins, sbr. fyrrgreint
ákvæði 1. mgr. 27. gr. barnaverndarlaganna, að hann þurfi ekki að upplifa
óþarfa röskun í lífi sínu. Þá sé hagsmunum hans best borgið með því að dvelja
hjá henni og yngri bróður sínum, og á heimili þeirra. Sóknaraðili mótmælir því
að ráðstafanir varnaraðila samkvæmt nefndum úrskurði hafi verið nauðsynlegar
til þess að tryggja öryggi C, enda sé hann öruggur heima hjá sér.
Sóknaraðili byggir á því að allt framangreint sýni að
ógilda beri úrskurð barnaverndar [...] um vistun drengsins C utan heimilis
samkvæmt ákvæði b-liðar 1. mgr. 27. gr. barnaverndarlaga.
Sóknaraðili bendir á að varnaraðili sé bundinn af
meðalhófsreglu 12. gr. stjórnsýslulaga, nr. 37/1993, sbr. 38. gr.
barnaverndarlaga. Hún byggir á því að í því felist að barnaverndarnefnd beri
aðeins að taka íþyngjandi ákvörðun þegar lögmætu markmiði, sem að sé stefnt,
verði ekki náð með öðru og vægara móti. Hún byggir á því að brot á
meðalhófsreglu við töku ákvarðana leiði og til þess að þær séu ógildanlegar.
Sóknaraðili krefst þess í málatilbúnaði sínum og þá
aðallega að úrskurður barnaverndar varnaraaðila um vistun sonar hennar, C, utan
heimilis verði ógiltur, en til vara að hann vari skemur en þar er kveðið á um,
þ.e. upphaflega í tvo mánuði, en samkvæmt greinargerð varnaraðila í allt að
tólf mánuði. Sóknaraðili byggir á því að svo löng vistun valdi syni hennar
röskun og að þannig sé hagsmunum hans ekki best borgið og valdi honum þvert á
móti óþarfa raski. Hún bendir á að úrskurður varnaraðila hafi þegar leitt til
þess að sonur hennar hafi verið látinn skipta um skóla og því búi hann nú
fjarri vinum sínum og heimili ásamt því að þurfa að aðlagast nýjum skóla.
Byggir sóknaraðili á því að með þessum ráðstöfunum hafi varnaraðili ekki gætt
meðalhófs, þ.e. við töku ákvörðunar um vistun drengsins á fósturheimili á vegum
barnaverndarnefndar.
Sóknaraðili vísar til þess að samkvæmt 1. mgr. og 7.
mgr. 4. gr. barnaverndarlaganna eigi hagsmunir barna ávallt að vera í fyrirrúmi
í starfsemi barnaverndaryfirvalda og að enn fremur beri að gæta þess eftir
föngum að hin almennu úrræði og þau vægustu séu reynd til stuðnings barni og
fjölskyldum áður en gripið sé til annarra úrræða. Hún bendir á að samkvæmt 1.
mgr. 3. gr. samnings Sameinuðu þjóðanna um réttindi barnsins, sbr. lög nr.
19/2013, eigi það sem sé barni fyrir bestu ávallt að hafa forgang, m.a. þegar
félagsmálastofnanir og dómstólar geri ráðstafanir sem varða börn, sbr. að því
leyti fyrrgreint ákvæði b-liðar 1. mgr. 27. gr. barnaverndarlaganna. Vegna
þessa alls áréttar sóknaraðili að aðeins skuli gert ráð fyrir íþyngjandi
ráðstöfunum að lögmæltum markmiðum verði ekki náð með öðru og vægara móti.
Sóknaraðili byggir á því að í þessum grundvallarreglum felist m.a. að
stjórnvaldi beri að velja það úrræði sem vægast geti talist standi fleiri en
eitt úrræði til boða, þjóni það því markmiði sem að sé stefnt.
Að öllu framangreindu virtu byggir sóknaraðili á því
að lagaskilyrði hafi ekki verið fyrir hendi þegar hinn kærði úrskurður var
kveðinn upp.
Að
því er lagarök varðar byggir sóknaraðili aðal- og varakröfur sínar á
barnaverndarlögum nr. 80/2002, aðallega 24.-28. gr., 38. gr. og 41. gr., á
stjórnsýslulögum nr. 37/1993, aðallega 11. og 12. gr. Hún vísar einnig til 71.
gr. stjórnarskrárinnar, laga um um samning Sameinuðu þjóðanna um réttindi barnsins
nr. 19/2013, laga um mannréttindasáttmála Evrópu nr. 62/1994, alþjóðasamnings
Sameinuðu þjóðanna um borgaraleg og stjórnmálaleg réttindi og laga um meðferð
einkamála nr. 91/1991. Krafa sóknaraðila um málskostnað styðst aðallega við 60.
og 61. gr. barnaverndarlaga nr. 80/2002.
V.
Varnaraðili hafnar staðhæfingum sóknaraðila um að
úrskurður hans standist ekki að formi til, og að hann stríði gegn reglum um
rannsóknarskyldu stjórnvalds, hlutlægnisskyldu og meðalhóf. Varnaraðili byggir
enn fremur á því að mál drengsins C hafi verið nægjanlega upplýst áður en
úrskurðurinn var kveðinn upp.
Varnaraðili vísar til málavaxtalýsingar hér að framan,
sbr. I. kafla, og byggir á því að uppfyllt séu skilyrði 27. gr., sbr. 26. gr.,
barnaverndarlaga um að brýnir hagsmunir mæli með því að fallist verði á kröfu
hans um töku drengsins af heimili sóknaraðila og vistun utan þess. Varnaraðili
byggir á því að eins og málum var komið hafi honum verið skylt að beita
ráðstöfunum sem í raun var gripið til, enda hafi mátt ætla að þær hafi verið
drengnum C fyrir bestu, en með því móti hafi hagsmunir hans verið hafðir í
fyrirrúmi sbr. ákvæði 1. mgr. 4. gr. barnaverndarlaganna. Önnur og vægari
úrræði hafi verið ófullnægjandi. Varnaraðili byggir á því að málið hafi verið
kannað vel og teljist hafa verið nægjanlega upplýst, sbr. 1. mgr. 41. gr.
nefndra barnaverndarlaga, sbr. og 10. gr. stjórnsýslulaga nr. 37/1993.
Varnaraðili kveðst í máli þessu og þá í ljósi alls
ofangreinds, sbr. áðurnefnd ákvæði barnaverndarlaganna, en einkum 1. mgr. 1.
gr., 2. gr. og 1. mgr. 4. gr., svo og 1. gr. barnalaga nr. 76/2003, krefjast
þess að dómurinn úrskurði að drengurinn C skuli vistaður utan heimilis
sóknaraðila í 12 mánuði frá uppkvaðningu úrskurðar hans, þann 14. janúar sl.,
sbr. ákvæði 28. gr. barnaverndarlaganna.
Varnaraðili vísar til þess og áréttar að starfsmenn
barnaverndar hafi sinnt miklu eftirliti með sóknaraðila og drengjum hennar, en
þá sérstaklega frá því að eldri drengurinn, C, snéri aftur á heimili
fjölskyldunnar á [...] haustið 2018, eftir hinar fyrstu aðgerðir
barnaverndarnefndar. Hafi starfsmaður barnaverndar þannig hitt drenginn
reglulega í skóla, en að auki hafi öll fjölskylda hans verið í
fjölskylduráðgjöf og þá í þeim tilgangi að bæta tengsl þeirra innbyrðis og þá
einnig til þess að efla foreldrahæfni sóknaraðila.
Varnaraðili vísar til gagna málsins ofangreindu til
staðfestu og þá ekki síst til þeirra áætlana sem gerðar hafi verið um málefni C
samkvæmt 23. gr. barnaverndarlaganna. Hann bendir á að auk þessa hafi drengnum
verið skipaður sérstakur talsmaður.
Varnaraðili bendir á og áréttar að drengurinn C hafi
áður verið færður af heimili sóknaraðila, líkt og rakið hafi verið í I. kafla
hér að framan, en það hafi í fyrstu verið gert með neyðarvistun, en síðan
samkvæmt samþykki sóknaraðila. Þá hafi starfsmaður barnaverndar reynt að útvega
drengnum stuðningsfjölskyldu og tilsjón inn á heimili hans, en það hafi ekki
gengið sem skyldi.
Varnaraðili bendir á að auk lýstra aðgerða hafi
starfsmenn barnaverndar ítrekað farið í útköll á heimili fjölskyldu
sóknaraðila, en það hafi verið mat þeirra að hún gerði sér illa grein fyrir
þeirri íhlutun. Að auki hafi starfsmennirnir mikið verið inni á heimili
fjölskyldunnar og sinnt þar bæði boðuðu og óboðuðu eftirliti. Varnaraðili vísar
til þess að heimsóknir þessar hafi varpað ljósi á þær aðstæður sem synir
sóknaraðila hafi búið við, en í því sambandi bendir hann á að oftar en einu
sinni hafi það komið fyrir, og þá um hádegisbilið, að öll fjölskyldan hafi
verið sofandi. Vísar varnaraðili til þess að drengurinn C hafi gefið þær
skýringar að hann og yngri bróðirinn færu seint að sofa og þá eftir miðnættið.
Auk þess hafi starfsmaður barnaverndar orðið vitni að því að drengirnir fengju
ekki fullnægjandi fæði. Loks hafi komið í ljós að áhorf sóknaraðila á messur á
samskiptamiðlum hafi verið mikið, en í samtölum við starfsmenn barnaverndar
hafi það og komið skýrt fram að hún beiti trúnni af mikilli sannfæringu og þá
oft þannig að hún taki ekki tali. Í þessu viðfangi staðhæfir varnaraðili að
starfsmenn barnaverndar telji sig hafa sýnt sóknaraðila mikinn skilning og þá
vegna menningar hennar, en einnig fortíð og uppruna.
Varnaraðili byggir á því að þrátt fyrir að sóknaraðili
hafi fengið umtalsverða uppeldisráðgjöf, bæði í gegnum félagsþjónustu og
barnavernd, hafi hún skilað litlum sem engum árangri. Vegna þess hafi verið
dregið í efa að sóknaraðili hefði færni til þess að tileinka sér það sem er
lagt upp með og þá til þess að efla foreldrahæfni hennar. Af þeim sökum hafi
verið óskað eftir fyrrnefndu og áðurröktu forsjárhæfnismati sálfræðings.
Varnaraðili vísar til og byggir á niðurstöðum
áðurrakins forsjárhæfnismats sóknaraðila. Hann áréttar m.a. efnisatriði
matsins, þar á meðal að drengurinn C hafi sýnt hegðunar- og tilfinningavanda í
skóla og heima fyrir, að hann hafi kunngjört um andlegt og líkamlegt ofbeldi
sem hann hafi sætt af hálfu sóknaraðila, sem og um vanrækslu á ýmsum þáttum í
eigin uppeldi. Varnaraðili bendir á að í matinu komi það m.a. fram að málið sé
alvarlegt og lýsi lengri tíma vanda og að vanræksla sóknaraðila á drengjunum
taki til flestra þátta í daglegu lífi þeirra. Jafnframt vísaði varnaraðili til
áðurrakinnar greinargerðar varnaraðila og þá um hagi drengsins B.
Varnaraðili byggir á því að sóknaraðili hafi ekki
styrkt drengina, ekki sinnt skólanámi þeirra, en einnig einangrað þá markvisst.
Þá hafi sóknaraðili notið mikils stuðnings með það að markmiði að bæta hæfni
hennar, en án þess að það hafi gengið eftir. Óverulegar breytingar hafi orðið,
ef einhverjar, og því sé málið alvarlegra en að hægt sé að skýra það allt út
frá menningarmun. Varnaraðili vísar að öðru leyti á einstök atriði í áðurröktu
forsjárhæfnismati sálfræðings um sóknaraðila og þá einnig um áhrif þeirra á líf
drengsins C, en einnig á líf yngri bróður hans og gerir hann niðurstöður matsins
að sínum. Við flutning vísaði varnaraðili enn fremur á að matsmaðurinn hefði
ekki lagt til að beitt yrði frekari stuðningsúrræðum þar sem það þjónaði ekki
hagsmunum drengsins C að vera lengur á heimili sóknaraðila. Í því viðfangi
vísaði hann jafnframt til þess að drengurinn hefði lýst því yfir að vilji hans
stæði ekki til þess að búa áfram hjá sóknaraðila. Í því samhengi benti
varnaraðili á að drengurinn eigi mikla áfallasögu að baki og þurfi nauðsynlega
að komast í langtímafóstur þar sem hann fái ást og umhyggju og stuðning til að
þroskast.
Varnaraðili byggir enn fremur á því að nefnd gögn sýni
að sóknaraðili hafi ekki verið til fullrar samvinnu og með mati matsmanns sé
sýnt að hún vilji ekki aðstoð, utan þess að koma drengjunum í skóla.
Varnaraðili byggir loks á því að þau úrræði og
stuðningsaðgerðir sem hann hafi gripið til hafi ekki skilað tilætluðum árangri
og að ekki hafi annað verið tækt, miðað við aðstæður, en að grípa til þeirra
aðgerða sem raunin varð á, en ekki til að mynda vægari úrræða. Varnaraðili
staðhæfir að í raun bendi fyrrgreint forsjárhæfnismat frekar til þess að
forsendur séu til þess að krefjast forsjársviptingar drengsins C, en einnig
gagnvart yngri bróður hans, og þar með að beita enn frekari íþyngjandi aðferðum
en vistun drengjanna utan heimilis. Varnaraðili vísar til þess að á nefndum
tímapunkti og með meðalhóf að leiðarljósi hafi hann þó afráðið að ganga ekki
svo langt, enda hafi verið talið að ekki væri fullreynt hvort einhverjar
breytingar verði á stöðu og högum sóknaraðila meðan á tímabundinni vistun
drengsins C og eftir atvikum yngri bróður hans standa yfir. Varnaraðili byggir
á því að þannig megi ljóst vera að hann hafi síst gengið of langt í kröfugerð
sinni í máli þessu. Það sé og mat hans að engin rök standi til þess að marka
vistun C skemmri tíma en tólf mánuði, líkt og hann hafi farið fram á í
greinargerð.
Um lagarök vísar varnaraðili til XI. kafla
barnaverndarlaganna nr. 80/2002, að því er varðar meðferð máls, sbr. einkum 61.
gr., en að því er varðar varnarþing vísar hann til V. kafla laga nr. 91/1991 um
meðferð einkamála, sbr. einkum 1. mgr. 32. gr., og um aðild vísar hann til 2.
mgr. 62. gr. barnaverndarlaga.
Að því er varðar kröfuna um vistun drengsins C utan
heimilis sóknaraðila vísar varnaraðili til 1. mgr. 28. gr. barnaverndarlaga,
sbr. 26. og 27. grein sömu laga, en einnig vísar hann til 1. mgr. og 2. mgr. 1.
gr. og 2. gr. og 1. mgr. 4. gr. laganna svo og 1. gr. barnalaga nr. 76/2003 og
loks til 1. mgr. 3. gr. sáttmála Sameinuðu þjóðanna um réttindi barnsins, sbr.
2. gr. laga nr. 19/2013.
VI.
Með heimild í 2. mgr. 63. gr. a í lögum nr. 80/2002 um
barnavernd ákvað dómari að gefa syni sóknaraðila, C, kost á því að tjá sig um
ákvörðun varnaraðila um nefnda vistunarráðstöfun. Viðtalið fór fram 22. febrúar
sl. en 27. sama mánaðar greindi dómari á dómþingi frá því helsta sem fram hafði
komið hjá drengnum og þá m.a. um það að vilji hans stæði ekki til þess að
dvelja hjá móður sinni, sóknaraðila máls þessa.
VII.
Fyrir flutning málsins staðfesti E sálfræðingur fyrir
dómi áðurrakta matsskýrslu.
Líkt og hér að framan hefur verið rakið varðar mál
þetta gildi úrskurðar varnaraðila um hvort vista eigi son sóknaraðila, C, sem
nú er á […] ári, utan heimilis hennar í tvo mánuði, sbr. b-lið 1. mgr. 27. gr.
barnaverndarlaga nr. 80, 2002, og samkvæmt hinni endanlegu kröfu í greinargerð
varnaraðila hvort fallast beri á kröfu varnaraðila um að drengurinn verði
vistaður utan heimilisins í samtals 12 mánuði frá 14. janúar 2019 að telja,
sbr. 1. mgr. 28. gr. sömu laga.
Samkvæmt framansögðu hafa málefni drengsins C verið
til meðferðar hjá barnaverndarnefnd varnaraðila í fáein misseri, en helst
virðist mega rekja upphafið til þess er tilkynning barst um aðbúnað drengsins
og vansæld, en einnig yngri bróður hans, þann 6. mars 2018. Liggur fyrir að
nokkru áður, eða […], hafði málefni sóknaraðila og nefndra sona hennar komið
til meðferðar hjá félagsþjónustu varnaraðila vegna flutnings þeirra í
sveitarfélagið og þá frá […].
Ráðið verður af gögnum að fljótlega eftir að nefnd
tilkynning barst barnaverndarnefndinni hafi áhyggjur starfsmanna hennar farið
að snúast um almennan aðbúnað drengjanna og þá m.a. varðandi mætingar í
grunnskólum sveitarfélagsins. Á hinn bóginn liggur fyrir að næstu misserin
virðist nær allt […] hafa komið að málefnum sóknaraðila og þá þannig að henni
og sonum hennar var veittur margvíslegur stuðningur, og hafi þá ekki síst verið
um að ræða úrræði sem beindust að því að styrkja sóknaraðila í
foreldrahlutverkinu.
Fyrir liggur að sérfróðir starfsmenn varnaraðila
mæltust til þess haustið 2018, með rökstuddri tillögugerð, að drengurinn C færi
tímabundið í bráðbirgðavistun á fósturheimili og þá vegna óviðunandi aðbúnaðar
hans hjá sóknaraðila. Liggur fyrir að þetta gekk eftir og að nokkru leyti í
samvinnu við sóknaraðila. Óumdeilt er að þegar vistun drengsins lauk var af
hálfu starfsmanna varnaraðila ráðist í frekari stuðningsaðgerðir gagnvart
sóknaraðila og vegna hagsmuna nefnds drengs, C, en einnig vegna yngri sonar
sóknaraðila, og þá m.a. í samræmi við ítrekaðar og undirritaðar áætlanir
samkvæmt 23. gr. barnaverndarlaga nr. 80/2002. Af þessu tilefni var einnig, í
lok árs 2018, lagt fyrir sóknaraðila að gangast undir forsjárhæfnismat, og gekk
það eftir.
Það var niðurstaða sérfróðs matsmanns samkvæmt
staðfestri skýrslu, dagsettri 1. febrúar 2019, að sóknaraðili sé ekki hæf til
þess að axla ábyrgð sem forsjáraðili drengsins C, og að utanaðkomandi og fekari
stuðningsaðgerðir nægi ekki til að breyta því.
Eins og fyrr sagði var úrskurður varnaraðila um
fósturráðstöfun drengsins C kveðinn upp 14. janúar sl. Til grundvallar
úrskurðinum voru allviðamikil gögn um drenginn, en einnig um yngri bróður hans
og um aðstæður þeirra og aðbúnað á heimili sóknaraðila. Að auki lágu þar til
grundvallar nýlegt mat og gögn sérfróðra starfsmanna skólastofnunar drengsins,
greinargerðir sérfróðra starfsmanna varnaraðila, sem m.a. hafa haft samstarf
við aðra sérfræðinga, sem fjallað höfðu um málefni fjölskyldu hans.
Við meðferð málsins hjá varnaraðila var sóknaraðila
m.a. veittur andmælaréttur, sem hún nýtti með aðstoð lögmanns síns.
Það
er niðurstaða dómsins að ofangreindu virtu að við undirbúning ákvörðunar og
síðar úrskurðar varnaraðila, þann 14. janúar sl., hafi verið farið að ákvæðum
stjórnsýslulaga nr. 37/1993 og er málsástæðum sóknaraðila þar um hafnað.
Fram er komið að eftir flutning sóknaraðila til [...].
Hélt hún þar heimili ásamt sonum sínum tveimur, og þar á meðal drengnum B. Eins
og hér að framan var rakið benda gögn málsins, eðli málsins samkvæmt, til að
sóknaraðili hafi strax frá upphafi búsetu sinnar í nefndu sveitarfélagi fengið
víðtækan stuðning hjá félagsmálayfirvöldum. Einnig verður af framlögðum gögnum
ráðið að á vegum skólayfirvalda hafi sérstaklega verið hugað að komu nefnds
drengs í grunnskóla […]. […].
Fyrir liggur að barnaverndarnefnd varnaraðila greip
til ráðstafana vegna aðstæðna drengsins C haustið 2018. Var þar um að ræða
neyðarvistun utan heimilis sóknaraðila í fimm vikur á grundvelli 31. gr.
barnaverndarlaga nr. 80/2002, nánar tiltekið þann 13. september 2018. Til grundvallar
þessari ráðstöfun lágu m.a. tilkynningar frá grunnskóla drengsins, en einnig
skýrslur og dagálar starfsmanna varnaraðila.
Samkvæmt gögnum liggur fyrir að eftir að nefndri
neyðarvist lauk var mjög aukið við eftirlit með heimili og aðstæðum drengsins C
á vegum varnaraðila. Liggja þannig fyrir í málinu fjöldi dagaála, en einnig
greinargerðir fjölskylduráðgjafa og félagsráðgjafa auk greinargerða starfsmanna
varnaraðila, og áætlana, sbr. ákvæði 23. gr. barnaverndarlaga.
Það var niðurstaða nefnds sálfræðings, sem gerði
ítarlegt forsjárhæfnismat á sóknaraðila, að ofangreindar stuðningsaðgerðir, sem
m.a. var beint að henni, en einnig sonum hennar, að þær hafi ekki dugað. Hafi
þar helst komið til vangeta sóknaraðila, ásamt úthalds- og úrræðaleysi hennar. Af
þessum sökum hafi árangur verið óviðunandi. Það er líka niðurstaða
sálfræðingsins, sem staðfest var fyrir dómi, að vegna nefndrar vangetu
sóknaraðila hafi skólastarf drengsins C ekki gengið sem skyldi, en að auki hafi
hann orðið félagslega einangraður og vansæll.
Af gögnum verður ráðið að C sé í mjög viðkvæmri stöðu
og þá m.a. vegna aðstæðna sem hann hefur að líkindum búið við á yngri árum. Þá
er til þess að líta að tengsl hans við sóknaraðila virðast alls ekki vera sem
skyldi. Áðurlýstur vilji drengsins, m.a. í viðtali hans hjá dómara, um að fá að
dvelja utan heimilis sóknaraðila ræður ekki úrslitum eins og hér stendur á, en
þó ber ekki með öllu í ljósi aldurs hans að horfa fram hjá viðhorfum hans og þá
m.a. um búsetu.
Að
öllu framangreindu virtu, og þegar litið er til þeirra ríku hagsmuna sem í húfi
eru og hvað ætla megi að drengnum C sé fyrir bestu, sbr. 1. mgr. 4. gr.
barnaverndarlaga, eru að áliti dómsins skilyrði til, samkvæmt b-lið 27. gr.,
sbr. 1. mgr. 28. gr., sömu laga, að fallast á kröfu varnaraðila um að vista
hann utan heimilis sóknaraðila. Þá er fallist á það mat varnaraðila að vistunin
standi í tólf mánuði, frá 14. janúar 2019 að telja, og þá þannig að tími
vinnist til að veita sóknaraðila nægilegan og viðunandi stuðning þannig að
aðstæður verði fullnægjandi fyrir drenginn.
Samkvæmt ofansögðu, en að öðru leyti með hliðsjón af
röksemdum varnaraðila, er hafnað kröfu sóknaraðila um að felldur verði úr gildi
hinn kærði úrskurður frá 14. janúar sl.
Sóknaraðili
fékk gjafsókn í máli þessu með bréfi dómsmálaráðherra, dagsettu 18. febrúar sl.
Rétt þykir eftir atvikum að málskostnaður falli niður.
Gjafsóknarkostnaður greiðist úr ríkissjóði eins og í
úrskurðarorði greinir, en ekki er þar tekið tillit til virðisaukaskatts.
Samkvæmt 2. mgr. 127. gr. laga nr. 91, 1991 um meðferð
einkamála tekur dómurinn ekki afstöðu til útlagðs kostnaðar.
Ólafur Ólafsson héraðsdómari kveður upp úrskurð
þennan.
Úrskurðarorð:
Hafnað er kröfu sóknaraðila, A, um að úrskurður
varnaraðila, barnaverndarnefndar B, frá 14. janúar 2019, verði felldur úr
gildi.
Fallist er á kröfu varnaraðila um að drengurinn C
verði vistaður utan heimilis sóknaraðila í samtals tólf mánuði frá 14. janúar
2019 að telja.
Gjafsóknarkostnaður A, sem er málflutningsþóknun
lögmanns hennar, Evu Dóru Kolbrúnardóttur, 939.114 krónur, greiðist úr
ríkissjóði.
--------------------------------
[Úrskurður
Landsréttar í máli nr. 235/2019]