- Skilorð
- Skilorðsrof
- Þjófnaður
D Ó M U R
Héraðsdóms Austurlands
þriðjudaginn 20. nóvember 2018 í máli nr. S-36/2018:
Ákæruvaldið
(Helgi Jensson aðstoðarsaksóknari)
gegn
Gauti
Inga Ingimarssyni
(Gísli
M. Auðbergsson lögmaður)
og
Ingva
Ólafi Ingvasyni
(Sjálfur)
Mál þetta, sem dómtekið var 30.
október sl., er höfðað með ákæru lögreglustjórans á Austurlandi, útgefinni 26.
september sl., á hendur Gauti Inga Ingimarssyni, kennitala […], […], […], og
Ingva Ólafi Ingvasyni, kennitala […], […], […];
„fyrir hegningarlagabrot sem framin
voru í félagi, í sumarbústaðabyggð að […] á […], dagana 20. til 22. júní 2018.
I.
Fyrir þjófnað, með því að hafa þann
20. júní, í heimildarleysi, brotist inn í sumarbústaðinn „[…]“, ([…] nr. […]),
með því að brjóta upp læst lyklabox sem fest var á vegg hússins og nota svo
lykil sem var í lyklaboxinu til að opna útidyr hússins og stolið þaðan 50“ LCD
sjónvarpstæki, 40“ LCD sjónvarpstæki, geislaspilara, hljómflutningstækjum,
ýmsum búnaði tengdum sjónvarpstækjum, kaffivél, hraðsuðukatli, hárþurrku, blandara,
handþeytara og samlokujárni.
II.
Fyrir þjófnað, með því að hafa þann
22. júní, í heimildarleysi, brotist inn í sumarbústað nr. […], ([…] nr. […]),
með því að klifra upp í opinn glugga á annari hæð hússins og fara þar inn og
einnig inn í læstan skúr á lóð hússins og stolið þaðan miklu magni af
ýmisskonar trésmíðaverkfærum, samtals að áætluðu verðmæti kr. 600.000.
III.
Fyrir þjófnað, með því að hafa þann
22. júní, í heimildarleysi, brotist inn í sumarbústaðinn „[…]“, ([…] nr. […]),
með því að brjóta upp læst lyklabox sem fest var á vegg hússins og nota svo
lykil sem var í lyklaboxinu til að opna útidyr hússins og stolið þaðan 40“ LED
sjónvarpstæki og router (beinir).
Samtals andvirði þýfis skv. ákærulið
I og III er áætlað kr. 300.000.
Telst þetta varða við 1. mgr. 244. gr. almennra hegningarlaga
nr. 19/1940.
Þess er krafist að ákærðu verði
dæmdir til refsingar, til greiðslu alls sakarkostnaðar.“
Ákærði Ingvi Ólafur krefst vægustu
refsingar sem lög leyfa.
Skipaður verjandi ákærða Gauts Inga
krefst vægustu refsingar honum til handa. Þá krefst verjandinn hæfilegrar
málflutningsþóknunar og útlagðs kostnaðar.
A.
Fyrir dómi hafa ákærðu skýlaust
viðurkennt sakargiftir, líkt og þeim er lýst í ákæru, I., II. og III. kafla.
Játningar ákærðu eru í samræmi við
rannsóknarskýrslur lögreglu, þ. á m. ljósmyndir og munaskýrslur svo og
framburðarskýrslur ákærðu, sem teknar voru með hljóði og mynd. Að auki liggur
fyrir að lögreglan lagði hald á þýfið og kom því til skila til eigenda eftir að
þeir höfðu borið kennsl á einstaka muni.
Með játningu ákærðu og með vísan til
ofangreinds er eigi ástæða til að efa að játningar ákærðu séu sannleikanum
samkvæmar. Er því nægjanlega sannað að ákærðu hafi gerst sekir um þá háttsemi,
sem í ákæru er lýst. Brot ákærðu eru réttilega heimfærð til laga í ákæruskjali.
Verður lagður dómur á málið án
frekari sönnunarfærslu, sbr. heimildarákvæði 164. gr. laga nr. 88/2008.
Að ofangreindu virtu verða ákærðu
sakfelldir fyrir þá háttsemi sem þeim er gefin að sök í ákæruskjali.
B.
Ákærði Gautur Ingi, sem er 33 ára,
hefur samkvæmt sakavottorði sakaskrár ríkisins ekki áður hlotið refsingar sem
áhrif hafa í máli þessu.
Í máli þessu hefur ákærði Gautur
Ingi gerst sekur um þau þjófnaðarbrot, sem lýst er í ákæru, en brotin framdi
hann í félagi við meðákærða. Ber að ákvarða refsingu hans með hliðsjón af 2.
mgr. 70. gr. og 77. gr. almennra hegningarlaganna. Til refsimildunar þykir mega
líta til þess að hann játaði skýlaust sakargiftir fyrir dómi og lýsti yfir
iðran, sbr. til hliðsjónar 5. tl. 1. mgr. 70. gr. nefndra laga.
Að öllu ofangreindu virtu þykir
refsing ákærða Gauts Inga hæfilega ákvörðuð fimm mánaða fangelsi, en eftir
atvikum þykir fært að frest fullnustu refsingarinnar og skal hún niður falla að
tveimur árum liðnum frá dómsuppsögu, haldi hann almennt skilorð 57. gr.
almennra hegningarlaga nr. 19/1940, sbr. 4. gr. laga nr. 22/1955.
C.
Ákærði Ingvi Ólafur, sem er 25 ára,
hefur samkvæmt sakavottorði áður verið dæmdur til refsinga. Hann var þann 5. mars 2013 dæmdur í 45 daga fangelsi skilorðsbundið
í tvö ár fyrir þjófnað, eignspjöll, nytjastuld og umferðarlagabrot. Þann 30.
september 2013 var hann dæmdur í 30 daga fangelsi skilorðsbundið í tvö ár fyrir
eignaspjöll, nytjastuld og umferðarlagabrot, en þau brot voru talin vera
hegningarauki við fyrrnefndan dóm. Þá var hann dæmdur þann 17. janúar 2014 til
greiðslu sektar og sviptur ökurétti vegna umferðarlagabrota, þ. á m. vegna
ölvunaraksturs. Hann var þann 27. mars 2014 dæmdur til greiðslu sektar vegna
brots gegn lögum um ávana- og fíkniefni nr. 65/1974 og þann 6. maí 2015 var
hann dæmdur í þriggja mánaða fangelsi skilorðsbundið í tvö ár vegna brota gegn
231. gr. almennra hegningarlaga og lögum um ávana- og fíkniefni. Var ákærði með
þessum síðastgreindu brotum talinn hafa rofið skilorð fyrrnefndra dóma frá 30.
september og 5. mars 2013. Þann 26. febrúar 2016 var hann dæmdur í sex mánaða
fangelsi, sem var skilorðsbundið til þriggja ára, fyrir brot á lögum um ávana-
og fíkniefni, nánar tiltekið fyrir vörslur, framleiðslu og sölu í hagnaðarskyni
á fíkniefnum, en fyrrnefndur dómur frá 6. maí 2015 var þá tekinn upp og dæmdur
með, sbr. ákvæði 78. gr. og 60. gr. hegningarlaganna. Loks var hann þann 28.
maí sl. dæmdur til að greiða sekt til ríkissjóðs fyrir minni háttar
eignaspjöll.
Í máli þessu hefur ákærði Ingvi
Ólafur gerst sekur um þau þjófnaðarbrot, sem lýst er í ákæru. Brotin framdi
hann í félagi við meðákærða og ber því að ákvarða refsing hans m.a. með
hliðsjón af 2. mgr. 70. gr. almennra hegningarlaga. Þá ber með vísan til 60.
gr. hegningarlaganna, þar sem um skilorðsrof er að ræða, að taka fyrrnefndan
dóm frá 26. febrúar 2016 upp og dæma refsingu í einu lagi fyrir öll brotin eftir reglum 77. gr. sömu laga. Til
refsimildunar þykir mega líta til þess að ákærði Ingvi Ólafur játaði skýlaust
sakargiftir fyrir dómi og lýsti yfir iðran, sbr. til hliðsjónar 5. tl. 1. mgr.
70. gr. hegningarlaganna.
Að öllu ofangreindu virtu þykir
refsing ákærða Ingva Ólafs hæfilega ákvörðuð tíu mánaða fangelsi, sem ekki
þykir fært að skilorðsbinda.
Að kröfu ákæruvalds og með vísan til
1. mgr. 235. gr. laga nr. 88/2008 ber að dæma ákærða Gaut Inga til að greiða
málflutningsþóknun skipaðs verjanda síns, hjá lögreglu og fyrir dómi, svo og
ferðakostnað, eins og segir í dómsorði. Annar sakarkostnaður féll ekki til við
málarekstur þennan samkvæmt yfirlýsingu sækjanda.
Af hálfu lögreglustjóra fór með
málið Helgi Jensson aðstoðarsaksóknari.
Ólafur Ólafsson héraðsdómari kveður
upp dóm þennan.
Dómsorð:
Ákærði Ingvi Ólafur Ingvason sæti
fangelsi í tíu mánuði.
Ákærði Gautur Ingi Ingimarsson sæti
fangelsi í fimm mánuði, en fresta skal fullnustu refsingarinnar og falli hún
niður að tveimur árum liðnum frá dómsuppsögu að telja, haldi hann almennt
skilorð 57. gr. almennra hegningarlaga nr. 19/1940, sbr. 4. gr. laga nr.
22/1955.
Ákærði Gautur Ingi greiði skipuðum
verjanda sínum, Gísla M. Auðbergssyni lögmanni, málflutningsþóknun, 316.200
krónur, að meðtöldum virðisaukaskatti, en einnig ferðakostnað að fjárhæð 16.830
krónur.