- Ákæra
- Líkamsárás
- Sönnunarbyrði
D Ó M U R
Héraðsdóms Reykjaness
fimmtudaginn 9. maí 2019 í máli nr. S-8/2019:
Ákæruvaldið
(Súsanna Björg Fróðadóttir
aðstoðarsaksóknari)
gegn
X
(Guðmundur St. Ragnarsson
lögmaður)
Mál þetta, sem dómtekið
var 15. apríl 2019, höfðaði lögreglustjórinn á Suðurnesjum með ákæru 7. janúar
2018 á hendur ákærða, X, kt. 000000-0000, [...], „fyrir eftirgreind hegningarlagabrot gagnvart sambýliskonu sinni, A, kt. 000000-0000,
framin á árinu 2018, sem hér greinir:
1.
Fyrir líkamsárás, gagnvart A með því að hafa, þann 7. mars 2018, á
þáverandi heimili þeirra [...], tekið í hægri hendi hennar og snúið uppá hana með þeim afleiðingum að A
hlaut mörg sár á hægri framhandlegg.
Telst þetta varða við 217. gr.almennra hegningarlaga nr.
19/1940.
2.
Fyrir líkamsárás gagnvart A með því að hafa, í byrjun júní 2018 á þáverandi
heimili þeirra að [...], tekið í vinstri hendi hana (sic) harkalega og hrint
henni harkalega í gólfið aleiðingarnar (sic) urðu þær að A hlaut brot á vinstri
olboga (sic).
Telst þetta varða við 1. mgr. 218. gr. b.almennra
hegningarlaga nr. 19/1940.
3.
Fyrir líkamsárás gagnvart A með því að hafa, 27. júní 2018 á þáverandi heimili þeirra að [...], tekið í hendi hennar og tuskað hana til, afleiðingarnar
urðu þær að A hlaut bólgur á augnbrúnir
(sic) og mar í andlit.
Telst þetta varða við 217. gr.almennra hegningarlaga nr.
19/1940.
4.
Fyrir stórfelldar ærumeiðingar, með því að hafa með þeirri háttsemi sem
lýst er í ákæruliðum 1-3, ítrekað móðgað og smánað A.
Telst þetta varða við 233. gr. b. almennra hegningarlaga nr 19/1940.
Einkaréttarkröfur:
Af hálfu A, er þess krafist að ákærði verði dæmdur til að greiða henni bætur að fjárhæð kr. 1.000.000 með vöxtum skv. 1. mgr. 8. gr. laga nr. 38/2001 um vexti og verðtryggingu frá 27. júni 2018 til þess dags er mánuður er liðinn frá birtingu bótakröfu þessarar en með dráttarvöxtum skv. 1. mgr. 6. gr., sbr. 9. gr. laga nr. 38/2001 um vexti og verðtryggingu frá þeim degi til greiðsludags. Verði brotaþola ekki skipaður réttargæslumaður gerir hann auk þess kröfu um að ákærði verði dæmdur til greiðslu málskostnaðar vegna lögmannsaðstoðar brotaþola að skaðlausu að meðtöldum virðisaukaskatti, samkvæmt málskostnaðarreikningi sem lagður verður fram á síðari stigum málsins eða samkvæmt mati dómsins.
Þess er krafist að ákærði verði dæmdur til refsingar og til greiðslu alls sakarkostnaðar.“
Ákærði neitar sök og krefst aðallega sýknu, en til
vara vægustu refsingar sem lög leyfa. Þá er þess krafist að sakarkostnaður
verði felldur á ríkissjóð.
Málsatvik
Helstu atvik eru þau að
7. mars 2018 óskaði A, brotaþoli í máli þessu, aðstoðar lögreglu við að koma
óboðnum gesti af heimili hennar að [...]. Í ljós kom að hinn óboðni gestur var
fyrrverandi sambýlismaður A, X, ákærði í máli þessu. Sagði A að ákærði hefði
sýnt af sér ógnandi hegðun og væri hún hrædd við hann. Virtist lögreglumönnum
hún skelkuð og sáu þeir marbletti og sár á hægri hendi hennar. Ákærði hafði
hins vegar yfirgefið heimilið og fannst ekki.
A greindi lögreglumönnum frá því að
hún og ákærði væru fyrrverandi hjón, en hefðu nú búið saman í um fjóra mánuði.
Hefðu þau rifist lítillega fyrr um daginn og ákærði ekki komið heim með henni.
Um kvöldið hefði hann komið í íbúðina og heimtað af henni kveikjara, en hún
hafi ekki viljað láta hann fá hann. Ákærði hafi þá snúið upp á hönd hennar,
tekið kveikjarann og farið. Hafi hann verið ölvaður og sagðist hún óttast hann
í því ástandi. Hún kvaðst aum í hendinni og vildi kæra X, en afþakkaði aðstoð
læknis.
Ákærði var yfirheyrður af lögreglu
28. júní 2018 og sagðist þá ekkert kannast við lýsingar brotaþola á ofangreindu
atviki. Í fyrstu neitaði hann því að hafa verið á heimili brotaþola umrætt
sinn, en sagðist síðar muna eftir því að hafa tekið kveikjara af brotaþola, en
neitaði því alfarið að hafa snúið upp á hönd hennar. Spurður um þá áverka sem
lögreglan sá á brotaþola sagði hann að þeir hefðu komið þegar hún datt á skáp
18. maí 2018.
Í sömu yfirheyrslu var ákærði spurður
um atvik á heimili brotaþola að kvöldi 27. júní 2018, en þá hafði lögreglu
borist tilkynning um mögulegt heimilisofbeldi. Samkvæmt skýrslu lögreglunnar af
því atviki töldu sjúkraflutningamenn sem komnir voru á staðinn að brotaþoli
væri handleggsbrotin. Hafi hún verið í miklu uppnámi, grátið og sagt að hún
skildi ekki af hverju ákærði væri alltaf að koma heim til hennar, en ákærði
hafi þá setið í sófa og virst rólegur. Tekið er fram í skýrslunni að sést hafi
marblettir og sár á vinstri kinn brotaþola, auk þess sem hún var marin undir
vinstri auga og vinstri hendi aflöguð. Var hún flutt til skoðunar á [...] og
kom þar í ljós að hún var illa brotin á vinstri olnboga. Ákærði var hins vegar
handtekinn og vistaður í fangaklefa. Neitaði hann því að hann og brotaþoli
hefðu átt í einhverjum erjum, en sagði þau hafa verið að neyta áfengis.
Brotaþoli hefði dottið á rassinn og hefði hann hjálpað henni að setjast upp. Við
það hefði brotaþoli óvart ýtt á öryggishnapp sem hún bæri á handleggnum og því
hefðu sjúkraflutningamenn og lögreglan komið á staðinn. Sagðist ákærði ekki
hafa séð neina áverka á brotaþola eftir fall hennar.
Brotaþoli var yfirheyrð af lögreglu 27. og 28.
júní 2018. Í síðari yfirheyrslunni sagði hún að handleggsbrotið hefði ekki átt
sér stað kvöldið áður, heldur væri það eldra brot, sem líklega hefði gerst
fyrir einni til tveimur vikum. Hefði hún þá dottið á gólfið og hélt hún að
ákærði hefði ýtt sér.
Samkvæmt læknabréfi læknis sem
skoðaði brotaþola að kvöldi 27. júní 2018 kemur fram að brotaþoli hafi sagt að
hún hafi fallið á vinstri handlegg fyrir tveimur vikum, en að ákærði hafi togað
kröftuglega í handlegginn og hrint henni fyrr um kvöldið 27. júní 2018. Í
læknabréfinu segir einnig að bæklunarskurðlæknir, sem framkvæmdi aðgerð á
olnboga brotaþola 29. júní, telji að áverkinn sé sirka þriggja vikna gamall.
Framburður fyrir
dómi
Fyrir dómi
sagðist ákærði aldrei hafa lagt hendur á brotaþola og kannaðist ekki við neitt
þeirra tilvika sem lýst er í ákæru. Sagði hann að þau brotaþoli hafi verið í
sambandi á þeim tíma sem hér um ræðir og hafi þau nú flutt saman á ný. Sagðist
hann aðstoða brotaþola við heimilishaldið og ýmsar daglegar athafnir, svo sem
að klæða hana og baða, en brotaþoli sé með gigt og notist við göngugrind til að
komast á milli staða. Í staðinn fái hann að gista á heimili hennar.
Spurður um atvik
samkvæmt ákæru sagðist ákærði ekki muna eftir að hafa verið á heimili brotaþola
7. mars 2018. Hafi hann verið á veitingastaðnum [...] og
þar spilað í spilakössum. Að því er varðar meint atvik í byrjun júní 2018
sagðist ákærði hafa vitað að brotaþoli væri með mar og sár á handleggnum, en
taldi líklegt að hún hefði fengið þá áverka er hún datt í svefnherberginu. Hins
vegar neitaði hann því að hafa tekið harkalega í vinstri hönd brotaþola eða
hrint henni þannig að hún hafi hlotið brot á olnboga. Spurður um atvik 27. júní
sagðist ákærði í umrætt sinn hafa verið að horfa sjónvarp á heimili brotaþola
og hafi hann verið búinn að drekka þrjá bjóra. Brotaþoli hafi ætlað út á
svalir, en dottið um svalaþrepið. Hann hafi aðstoðað hana á fætur, sett hana í
stól og haldið áfram að horfa á sjónvarpið. Líklega hafa brotaþoli þá rekið sig
í öryggishnapp sem hún beri og taldi það ástæðu þess að lögreglan og
sjúkraflutningamenn komu á staðinn.
Ákærði sagðist
ekki vita af hverju brotaþoli væri að bera á hann þær sakir sem í ákæru
greinir, en allar væru þær uppspuni. Þá sagði hann að brotaþoli væri mjög oft
undir áhrifum áfengis og tæki einnig mikið af sterkum lyfjum sem gætu valdið
því að hún væri völt á fótum.
Brotaþoli kvaðst
í fyrstu vilja skorast undan því að gefa skýrslu fyrir dómi samkvæmt heimild í
a-lið 1. mgr. 117. gr. laga nr. 88/2008, en skipti um skoðun þegar ákærði hafði
sjálfviljugur fallist á að víkja úr dómsal á meðan. Í fyrstu var hún spurð um
samband hennar og ákærða og sagði hún að þau hefðu á sínum tíma verið hjón, en
væru nú í sambúð. Hafi hún séð aumur á honum þegar hún vissi að hann var
húsnæðislaus og leyfi honum því að búa hjá sér. Sagðist hún eiga erfitt með að
muna einstök atvik eða greina þau í sundur, en tók fram að í öll skiptin hafi
komið til átaka milli þeirra og hafi það oftast gerst við drykkju og eftir
rifrildi þeirra. Hafi hún oft þurft að kalla á lögregluna þegar ákærði hafi
ekki sjálfviljugur viljað fara út af heimilinu. Kannaðist hún við að hafa
kallað á lögregluna 7. mars 2018 og sagði að þá hefði ákærði tekið í höndina á
henni og snúið upp á hana. Ekki mundi hún tilefni rifrildis þeirra í það
skiptið.
Þessu næst var
brotaþoli spurð út í atvik samkvæmt 2. ákærulið. Sagði hún að ákærði hefði þá
komið aftan að sér og hrint henni þannig að hún féll á sófaborð og brotnaði á
olnboga. Vinur ákærða hefði þá einnig verið í íbúðinni og séð atvikið.
Sérstaklega aðspurð kvaðst brotaþoli þess fullviss að ákærði hefði ýtt henni í
umrætt sinn. Við það hefði hún dottið um göngugrindina og síðan fallið á
sófaborðið. Ekki kvaðst hún vita hvort það hafi verið ætlun ákærða að slasa
hana. Þegar brotaþola var bent á að hún hefði ekki hringt á lögreglu í það
sinn, sagðist hún hafa gert það og hefði sjúkrabíll þá einnig komið á staðinn.
Við skoðun hafi komið í ljós að hún var illa brotin og hafi þurft að gangast
undir aðgerð.
Fram kom einnig
í máli brotaþola að ákærði hefði ítrekað beitt hana ofbeldi, bæði líkamlegu og
andlegu, og sagðist hún oft óttast um líf sitt, sérstaklega þegar þau sætu að
drykkju. Hefði hún þá oft hlotið ýmsa áverka, sem hún taldi af hans völdum.
Vitnið B, vinur
ákærða, sagðist ekki hafa orðið vitni að átökum milli ákærða og brotaþola og
kvaðst ekki kannast við nein átök þeirra í milli í byrjun júní 2018. Vitnið
sagðist bæði þekkja ákærða og brotaþola og færu þau stundum saman á
veitingastaðinn [...]. Sérstaklega spurður hvort þeir ákærði væru
drykkjufélagar sagði vitnið að hann fengi stundum bjór hjá ákærða á heimili
brotaþola.
Fyrir dómi gáfu
einnig skýrslu lögreglumennirnir C, D og E, og staðfestu þau skýrslur sínar sem
ritaðar voru í kjölfar þeirra atvika sem lýst er í ákæru. Enn fremur komu fyrir
dóminn til skýrslugjafar félagsráðgjafarnir F og G. Loks gaf skýrslu í gegnum
síma vitnið H læknir, og staðfesti hann vottorð sem liggur fyrir í málinu.
Niðurstaða
Fram er komið að
ákærði neitar sök samkvæmt öllum ákæruliðum og kvaðst fyrir dómi ekki kannast
við neitt þeirra atvika sem þar greinir.
Samkvæmt 1.
tölulið ákærunnar er ákærði sakaður um
líkamsárás gegn brotaþola 7. mars 2018 með því að hafa tekið í hönd hennar og
snúið upp á hana með þeim afleiðingum að hún hlaut mörg sár á hægri handlegg.
Fyrir dómi
sagðist brotaþoli muna eftir þessu atviki, þótt hún myndi ekki tilefnið, og
bætti því við að hún ætti erfitt með að muna einstök atvik eða greina á milli
þeirra. Í lögregluskýrslu er hins vegar haft eftir henni að tilefnið hafi verið
að ákærði hafi heimtað af henni kveikjara, en þegar hún vildi ekki láta hann af
hendi hafi hann snúið upp á hönd hennar. Ákærði hafði yfirgefið íbúðina þegar
lögreglan kom og tók brotaþoli fram að hann hafi verið mjög ölvaður. Sagðist
hún finna mjög til í hendinni, en kvaðst ekki vilja leita læknis. Fram kemur í
lögregluskýrslunni að sjá hafi mátt marbletti og sár á hægri hendi brotaþola og
ljósmyndaði lögreglan áverkana. Af ljósmyndunum að dæma virðast áverkar þessir
hins vegar ekki vera ferskir, að undanskildu minniháttar sári ofan við miðjan
framhandlegg. Þar sem brotaþoli leitaði ekki læknis í kjölfar þessa atviks, og
ákærði var ekki yfirheyrður vegna þess fyrr en 28. júní 2018, þykir slíkur vafi
leika á um sekt ákærða samkvæmt þessum ákærulið að óhjákvæmilegt er að sýkna
hann af þeirri háttsemi sem hann er þar sakaður um.
Samkvæmt 2. og
3. tölulið ákærunnar er ákærði einnig sakaður um líkamsárás gagnvart brotaþola,
annars vegar með því að hafa í byrjun júní 2018 tekið í vinstri hönd hennar og
hrint henni harkalega á gólfið með þeim afleiðingum að hún hlaut brot á vinstri
olnboga, en hins vegar með því að hafa 27. júní sama ár tekið í hönd hennar og
tuskað hana til með þeim afleiðingum að hún hlaut bólgur á augabrúnum og mar í
andliti.
Í frumskýrslu
lögreglu vegna þess atviks sem lýst er í 3. ákærulið kemur fram að lögreglunni
hafi verið tilkynnt um mögulegt heimilisofbeldi að kvöldi 27. júní 2018 á
heimili brotaþola að [...]. Þegar þangað kom sat brotaþoli á gólfinu og voru
sjúkraflutningamenn að hlúa að henni. Töldu þeir hana handleggsbrotna, auk þess
sem sjá mátti marbletti og sár á vinstri kinn og mar undir vinstra auga. Ákærði
sat í sófa og virtist rólegur, en var handtekinn og færður í fangageymslu.
Brotaþoli var hins vegar flutt með sjúkraflutningabifreið á Heilbrigðisstofnun [...] til aðhlynningar. Kom þar í ljós að hún var illa
brotin á vinstri olnboga.
Við komu á
sjúkrahúsið tók lögreglan skýrslu af brotaþola. Sagði hún að þau ákærði hefðu
setið saman í sófa og verið að horfa á sjónvarpið þegar ákærði hefði snögglega
reiðst og tekið í höndina á henni og tuskað hana til. Sagðist hún halda að í
þessum átökum hafi hún endað í gólfinu, en sennilega hefði ákærði hent henni í
gólfið, þótt hún gerði sér ekki alveg grein fyrir atburðarásinni. Tekið er fram
í skýrslunni að greina hafi mátt áfengisþef af brotaþola, en þó hafi hún ekki
verið áberandi ölvuð og vel viðræðuhæf. Sagðist hún hafa verið að drekka um
daginn og kvöldið. Þá segir þar einnig að brotaþoli hafi tjáð lögreglunni að
hún væri hrædd við ákærða og að hann drykki mikið, hann væri í raun alltaf
drukkinn. Kvaðst hún ítrekað hafa reynt að losna við hann úr íbúðinni, en tæki
þó alltaf við honum aftur, án þess geta útskýrt hvers vegna.
Daginn eftir,
28. júní 2018, var aftur tekin skýrsla af brotaþola. Tók hún þá strax fram að
olnbogabrotið hefði ekki átt sér stað kvöldið áður, heldur væri lengra síðan. Í
fyrstu taldi hún að það væri örugglega vika síðan hún brotnaði, en þá hefði hún
verið ein heima og verið að koma inn af svölunum og hrasað um svalaþröskuldinn
með þeim afleiðingum að hún datt á sófaborð. Síðar í yfirheyrslunni sagði hún
aftur að lengra væri um liðið frá því að hún brotnaði, og ræddi þá um þrjú brot
sem hún gæti ekki greint í sundur, þetta væri allt svo ruglingslegt í minni
hennar. Hélt hún að olnbogabrotið hefði komið þegar hún var heima sér, ásamt
ákærða og vini hans, og hafi þau verið að drekka. Allt í einu hefði hún henst
til á gólfið og á eitthvað þannig að hún brotnaði og fékk bólgur á augabrúnina
og mar í andlitið. Hefði höndin þá orðið kúpt og svört, en bólgan hjaðnað smám
saman. Kvaðst hún halda að ákærði hafi ýtt sér, en bæði hann og vinur hans hafi
verið orðnir mjög drukknir. Sagðist hún ekki hafa getað notað handlegginn eftir
þetta atvik. Sérstaklega spurð um atvik kvöldið áður sagði brotaþoli að ákærði
hefði þá snúið upp á vinstri handlegg sinn. Þau hafi eitthvað verið að þrasa og
þjarka, hann væri alltaf svo illur við hana og ætti það til að slá í hana og
slá hana niður. Ekki sagðist hún þó minnast þess að slíkt hefði gerst í gær.
Hins vegar sagðist hún þá óvart hafa ýtt á öryggishnappinn og hafi þeir hjá
Securitas haft samband við hana og spurt hvort allt væri í lagi hjá henni. Hafi
hún sagt að hún fyndi til í hendinni og því hafi sjúkrabifreið verið send að
heimili hennar.
Eins og áður er
rakið sagði brotaþoli fyrir dómi, þegar hún var spurð út í atvik að baki 2.
ákærulið, að ákærði hefði þá komið aftan að henni og hrint eða ýtt henni þannig
að hún datt um göngugrindina og féll á sófaborð og brotnaði á olnboganum. Þegar
henni var bent á að hún hefði ekki hringt í lögreglu í það sinn, sagðist hún
hafa gert það og hefði sjúkrabíll einnig komið á staðinn og flutt hana á
sjúkrahús. Frásögn hennar samrýmist þó ekki gögnum málsins, en eins og fram er
komið komu sjúkraflutningamenn og lögregla á staðinn 27. júní 2018, og kom þá
fyrst í ljós að brotaþoli var illa brotin á olnboga.
Í læknabréfi H
læknis, en hann skoðaði brotaþola við komu á Heilbrigðisstofnun [...] 27. júní 2018, segir m.a. eftirfarandi: „A var við heimili sitt
27.06.18 og segir að sambýlismaður sinn hafi gengið í skrokk á sér. Hún virðist
sjálf undir áhrifum og erfitt er að fá skýra sögu af atburðum. Hún segist fyrst
hafa fallið á vinstri handlegg 2 vikum fyrir komu á bráðamóttöku en aðspurð
hvort eitthvað hafi skeð það kvöld játar hún að sambýlismaður hafi togað
kröftuglega í vinstri handlegginn á sér og hrynnt (sic) henni svo í gólfið. Við
skoðun getur hún ekki rétt úr handlegg meira en sirka 120 gráður. Það er
þreyfanleg (sic) aflögun við olecranon process (olnboga) og sterkur grunur um
brot. Röntgen sýnir illa tilfært brot á olecranon process (olnboga) og annað
skábrot meira distalt (framar) á ulnu (framhandleggsbeini).“ Fram kemur einnig
í læknabréfinu að bæklunarlæknir sem framkvæmdi aðgerð á brotaþola hafi talið áverkann
sirka þriggja vikna gamlan.
Af framburði
brotaþola og gögnum málsins þykir ljóst að brotaþoli hefur um langt skeið búið
við mikið ofbeldi af hálfu ákærða. Þá bera gögn málsins með sér að bæði eru þau
dagdrykkjufólk og hefur brotaþoli ítrekað kallað til lögreglu til að fjarlægja
ákærða af heimili hennar, en kveðst þó ætíð taka við honum aftur, án þess að
geta útskýrt ástæðu þess. Þrátt fyrir þetta og um margt ótrúverðugar skýringar
ákærða á áverkum brotaþola er ekki unnt að líta fram hjá því að atvik að baki
þeirri háttsemi sem ákærði er sakaður um samkvæmt 2. og 3. lið ákærunnar eru
mjög óljós, auk þess sem verknaðarlýsingin samrýmist hvorki að öllu leyti
framburði brotaþola né gögnum málsins. Þannig hefur frásögn brotaþola af
áverkum hennar og hvenær hún hlaut þá ekki verið á einn veg, en í fyrstu kvaðst
hún hafa dottið um svalaþröskuldinn og á sófaborð, en síðan sagðist hún halda
að ákærði hefði ýtt sér og hún henst í gólfið og á eitthvað sem hefði valdið
því að hún brotnaði. Fyrir dómi kvaðst hún hins vegar þess fullviss að ákærði
hefði hrint eða ýtt henni þannig að hún féll á sófaborðið. Vitnið B, vinur
ákærða, kvaðst á hinn bóginn ekkert kannast við þetta atvik, en brotaþoli bar
að hann hefði verið viðstaddur er ákærði hrinti henni. Þá samrýmist verknaðarlýsing
2. ákæruliðar ekki frásögn brotaþola af atvikum, en þar er ákærði sakaður um að
hafa „tekið í vinstri hendi“ brotaþola og hrint henni harkalega í gólfið í
byrjun júní 2018, með þeim afleiðingum að hún hlaut brot á vinstri olnboga.
Ekki verður heldur séð að verknaðarlýsing samkvæmt 3. ákærulið eigi við rök að
styðjast, en eins og fram er komið sagði brotaþoli hjá lögreglu að hún hefði
ekki hlotið bólgur á augabrún og mar í andliti 27. júní 2018, heldur hefði það
gerst þegar hún hentist í gólfið og á sófaborðið í byrjun þess mánaðar.
Samkvæmt 1. mgr.
180. gr. laga nr. 88/2008 um meðferð sakamála má hvorki dæma ákærða fyrir aðra
hegðun en þá sem í ákæru greinir né heldur dæma aðrar kröfur á hendur honum. Í
108. gr. sömu laga segir jafnframt að sönnunarbyrði um sekt ákærða og atvik sem
telja megi honum í óhag hvíli á ákæruvaldinu. Í ljósi alls ofanritaðs og með
hliðsjón af 109. gr. áðurnefndra laga er það mat dómsins að ákæruvaldið hafi
ekki axlað sönnunarbyrði um sekt ákærða samkvæmt 2. og 3. ákærulið. Fyrir vikið
verður ákærði sýknaður af öllum sakargiftum í máli þessu og einkaréttarkröfu
brotaþola vísað frá dómi, sbr. 2. mgr. 176. gr. laga nr. 88/2008.
Í samræmi við
úrslit málsins og með vísan til 2. mgr. 235. gr. laga nr. 88/2008 greiðist allur
sakarkostnaður málsins úr ríkissjóði, þar með talin málsvarnarlaun skipaðs
verjanda ákærða, Guðmundar St. Ragnarssonar lögmanns, 337.280 krónur, og þóknun
skipaðs réttargæslumanns brotaþola, Úlfars Guðmundssonar lögmanns, 421.600
krónur. Við ákvörðun lögmannsþóknunar hefur verið tekið tillit til
virðisaukaskatts.
Ingimundur
Einarsson héraðsdómari kvað upp dóminn.
D ó m s o r ð:
Ákærði, X, er sýkn af kröfum ákæruvaldsins í máli þessu.
Einkaréttarkröfu A er vísað frá dómi.
Allur sakarkostnaður greiðist úr ríkissjóði, þar með
talin málsvarnarlaun skipaðs verjanda ákærða, Guðmundar St. Ragnarssonar
lögmanns, 337.280 krónur, og þóknun skipaðs réttargæslumanns brotaþola, Úlfars
Guðmundssonar lögmanns, 421.600 krónur.
Ingimundur Einarsson