- Játningarmál
- Svipting ökuréttar
- Umferðarlagabrot
D Ó M U R
Héraðsdóms Reykjaness mánudaginn 10. september
2018 í máli nr. S-93/2018:
Ákæruvaldið
(Súsanna Björg Fróðadóttir
aðstoðarsaksóknari)
gegn
Jóhanni Salómon Gústafssyni
(Stefán Karl Kristjánsson lögmaður)
Mál
þetta, sem var tekið til dóms 13. ágúst 2018, höfðaði lögreglustjórinn á
Suðurnesjum með ákæru 19. febrúar 2018 á hendur Jóhanni Salómon Gústafssyni,
kt. 000000-0000, [...], Reykjanesbæ: ,,fyrir
umferðarlagabrot, með því að hafa föstudaginn 11. ágúst 2017, ekið bifreiðinni [...],
norður Njarðarbraut við Borgarveg í Reykjanesbæ, sviptur ökuréttindum og undir
áhrifum ávana- og fíkniefna (í þvagi fannst tetrahýdrókannabínól) og því verið
óhæfur til að stjórna ökutækinu örugglega í umrætt sinn. Telst háttsemi þessi varða við 1. mgr. sbr. 2.
mgr. 45. gr. a. og 1. mgr. 48. gr. , sbr. 5. gr. laga nr. 66/2006, sbr. 1. mgr.
100. gr. umferðarlaga nr. 50/1987.
Þess er krafist að ákærði verði dæmdur til refsingar og
til greiðslu alls sakarkostnaðar. Þess er einnig krafist að ákærði verður
dæmdur til sviptingar ökuréttar, skv. 101. gr. og 102. gr. umferðarlaga nr.
50/1987, sbr. 25. gr. laga nr. 44/1993 og 18. gr. laga nr. 66/2006.“
Af
hálfu ákærða er krafist vægustu refsingar sem lög leyfa. Þá gerir skipaður
verjandi kröfu um þóknun vegna starfa sinna.
Ákærði hefur fyrir dómi skýlaust játað að hafa framið það
brot sem honum eru gefið að sök og var farið með mál þetta samkvæmt 164. gr.
laga nr. 88/2008 um meðferð sakamála og var það tekið til dóms án frekari
sönnunarfærslu eftir að sækjanda og verjanda ákærða hafði verið gefinn kostur á
að tjá sig í stuttu máli um lagaatriði og ákvörðun viðurlaga.
Sannað er með skýlausri játningu ákærða, sem er í samræmi
við framlögð sakargögn, að hann hafi gerst sekur um þau brot sem honum eru
gefin að sök og eru þau réttilega heimfærð til refsiákvæða í ákærum. Ákærði
hefur því unnið sér til refsingar.
Ákærði er fæddur árið 1981 og á samkvæmt framlögðu
sakavottorði að baki sakaferil sem nær aftur til ársins 1999. Við úrlausn þessa
máls hefur eftirfarandi áhrif: Með sektargerð lögreglustjóra 26. nóvember 2005
samþykkti ákærði greiðslu sektar og var gert að sæta tímabundinni sviptingu
ökuréttar vegna ölvunar- og hraðaksturs. Með dómi Héraðsdóms Reykjavíkur 11. janúar
2008 var ákærði sakfelldur fyrir akstur undir áhrifum ávana- og fíkniefna og fíkniefnalagabrot
og var gert að greiða sekt og sæta tímabundinni sviptingu ökuréttar. Ákærði var
dæmdur í þrjátíu daga fangelsi og var gert að sæta ævilangri sviptingu
ökuréttar með dómi Héraðsdóms Reykjavíkur 10. maí 2012 fyrir að aka bifreið án
gildra ökuréttinda og undir áhrifum áfengis og ávana- og fíkniefna. Ákærði lauk
afplánun síðastnefnda dómsins með samfélagsþjónustu 15. nóvember 2013.
Að framangreindum sakaferli og broti ákærða virtu þykir
refsing hans samkvæmt dómvenju réttilega ákveðin fangelsi í 60 daga.
Með vísan til framangreinds ber, í samræmi við kröfugerð
ákæruvalds og með vísan til 3. mgr. 101. gr. laga nr. 50/1987, að árétta
ævilanga ökuréttarsviptingu ákærða.
Við fyrirtöku málsins lýsti sækjandi því yfir að
sakarkostnaður takmarkist við 6.830 krónur. Að því gættu, með hliðsjón af
framlögðum gögnum um slíkan kostnað, og með vísan til 1. mgr. 235. gr. laga nr.
88/2008 um meðferð sakamála, er ákærði dæmdur til að greiða sakarkostnað að fjárhæð
6.830 krónur. Þá greiði ákærði þóknun skipaðs verjanda síns, Stefáns Karls Kristjánssonar
lögmanns, sem þykir, með hliðsjón af vöxtum málsins, hæfilega ákveðin 126.480
krónur að meðtöldum virðisaukaskatti. Þinghöld urðu fleiri en efni stóðu til af
ástæðum sem ákærða verður ekki um kennt. Að því gættu verður 1/3 hluti þóknunar
skipaðs verjanda ákærða felldur á ríkissjóð.
Margrét Halldóra Hallgrímsdóttir, aðstoðarmaður dómara,
kveður upp dóm þennan.
DÓMSORÐ:
Ákærði, Jóhann Salómon Gústafsson,
sæti fangelsi í 60 daga.
Ákærði sæti sviptingu ökuréttar
ævilangt.
Ákærði greiði 91.150 krónur í
sakarkostnað, þar með talda 2/3 hluta af þóknun skipaðs verjanda síns, Stefáns
Karls Kristjánssonar lögmanns, sem í heild ákveðst 126.480 krónur.
Margrét Halldóra Hallgrímsdóttir