- Játningarmál
- Þjófnaður
D Ó M U R
Héraðsdóms Reykjaness föstudaginn 31. ágúst 2018 í máli nr. S-206/2018:
Ákæruvaldið
(Sigrún Inga Guðnadóttir fulltrúi)
gegn
Józef Jan Damrath
Mál þetta, sem var dómtekið 15. ágúst 2018, höfðaði lögreglustjórinn á höfuðborgarsvæðinu með ákæru 30. apríl 2018, á hendur Józef Jan Damrath, kt. 000000-0000, [...], Hafnarfirði:
,,fyrir þjófnað með því að hafa sunnudaginn 12. nóvember 2017 í verslun N1, Ártúnshöfða, Reykjavík, stolið vegahandbókinni að verðmæti 4.990 [krónur].
Telst þetta varða við 244. gr. almennra hegningarlaga nr. 19/1940.
Þess er krafist að ákærði verði
dæmdur til refsingar [og] til greiðslu alls sakarkostnaðar.“
Við
fyrirtöku málsins 15. ágúst 2018 kom ákærði fyrir dóm og játaði sök. Í ljósi
játningar ákærða var farið með málið samkvæmt 164. gr. laga nr. 88/2008 um
meðferð sakamála. Var málið því tekið til dóms án frekari sönnunarfærslu eftir
að sækjanda og ákærða hafði verið gefinn kostur á að tjá sig um lagaatriði máls
og ákvörðun viðurlaga.
Ákærði
hefur skýlaust játað sök í málinu. Að mati dómsins samrýmist játning hans
framkomnum gögnum. Brot ákærða telst því sannað og er réttilega heimfært til
refsiákvæða í ákæru.
Ákærði er fæddur árið 1956 og á samkvæmt
framlögðu sakavottorði að baki sakaferil sem nær aftur til ársins 2006. Ákærði
hefur þrívegis áður gerst sekur um brot gegn 244. gr. almennra hegningarlaga.
Síðast var honum gerð refsing fyrir brot gegn því ákvæði með dómi Héraðsdóms
Reykjaness 15. febrúar 2017 en ákærði var þá dæmdur í 30 daga fangelsi,
skilorðsbundið í tvö ár. Með
broti sínu rauf ákærði skilorð samkvæmt framangreindum dómi. Ber að taka þann
dóm upp og gera ákærða refsingu í einu lagi, sbr. 60. og 77. gr. almennra
hegningarlaga nr. 19/1940. Við ákvörðun refsingar ákærða þykir mega líta til
þess að ekki var um að tefla mikil verðmæti. Þá horfir skýlaus játning ákærða
honum til málsbóta. Samkvæmt þessu og með hliðsjón af því sem áður var rakið um
sakaferil ákærða þykir refsing hans hæfilega ákveðin 60 daga fangelsi. Eftir
atvikum þykir mega binda fullnustu refsingarinnar skilorði svo sem nánar
greinir í dómsorði.
Engan
sakarkostnað leiddi af meðferð málsins.
Margrét
Halldóra Hallgrímsdóttir, aðstoðarmaður dómara, kveður upp dóm þennan.
DÓMSORÐ:
Ákærði, Józef Jan Damrath, sæti fangelsi í sextíu daga,
en fresta skal fullnustu refsingarinnar og hún falla niður að liðnum þremur
árum frá uppkvaðningu dóms þessa, haldi ákærði almennt skilorð 57. gr. almennra
hegningarlaga nr. 19/1940.
Margrét Halldóra Hallgrímsdóttir