- Miskabætur
- Svipting ökuréttar
- Umferðarlagabrot
- Upptaka
D Ó M U R
Héraðsdóms Reykjaness föstudaginn 2. febrúar 2018 í máli nr. S-50/2017:
Ákæruvaldið
(Óli Ingi Ólason aðstoðarsaksóknari)
gegn
Magnús Ólafur Garðarssyni
(Haukur Örn Birgisson hrl.)
Mál þetta, sem tekið var til dóms
8. desember síðastliðinn, höfðaði lögreglustjórinn á Suðurnesjum með ákæru,
útgefinni 6. febrúar 2017, á hendur Magnúsi Ólafi Garðarssyni, kt. [...],
Islandsvej 15b, Lyngby, Danmörku, en með dvalarstað að Huldubraut 28, Kópavogi,
„fyrir umferðarlagabrot, með því að hafa
fimmtudaginn 25. ágúst 2016, ekið bifreiðinni NO-CO2, austur Reykjanesbraut,
við Vogastapa vestan Grindavíkurafleggjara, Reykjanesbæ, með 153 km hraða á
klukkustund (148 kílómetra hraða á klukkustund, að teknu tilliti til vikmarka),
þar sem leyfður hámarkshraði var 90 kílómetrar á klukkustund og fyrir að hafa
skömmu síðar ekið bifreiðinni austur Reykjanesbraut, Vogum, með 145 km hraða á klukkustund (140 km hraða
á klukkustund, að teknu tilliti til vikmarka), þar sem leyfður hámarkshraði var
90 kílómetrar á klukkustund, uns aksturinn var stöðvaður við gatnamótin við
Vogaveg.“
Í
ákæru er háttsemi þessi talin varða við 2. mgr. 37. gr., sbr. 1. mgr. 100. gr.,
umferðarlaga nr. 50/1987. Er þess krafist að ákærði verði dæmdur til refsingar,
til greiðslu alls sakarkostnaðar og til sviptingar ökuréttinda, sbr. 1. mgr.
101. gr. nefndra umferðarlaga og jafnframt skv. 2. mgr. 101. gr. umferðarlaga, sbr.
4. gr. laga nr. 57/1997 og 8. gr., sbr. 7.
gr. og 10. gr. reglugerðar um ökuferilsskrá og punktakerfi vegna
umferðarlagabrota nr. 929/2006.
Mál númer S-169/2017 var þann 4. maí 2017 sameinað þessu máli, sbr. heimild í 1. mgr. 169. gr. laga nr. 88/2008 um meðferð sakamála. Málið höfðaði héraðssaksóknari á hendur ákærða með ákæru, útgefinni 28. apríl 2017, „fyrir hegningar- og umferðarlagabrot, með því að hafa að morgni þriðjudagsins 20. desember 2016 ekið bifreiðinni DL-G15 (NOCO2) of hratt miðað við aðstæður og langt yfir leyfilegum hámarkshraða vestur Reykjanesbraut í Hafnarfirði, á móts við álverið í Straumsvík tekið fram úr fjölda bifreiða án þess að sinna aðgæsluskyldu sinni við framúrakstur þannig að minnstu munaði að árekstur yrði við bifreiðar sem komu úr gagnstæðri átt og þannig raskað umferðaröryggi á alfaraleið. Áfram vestur Reykjanesbraut á allt að 182,74 km hraða á klukkustund, þar sem hámarkshraði var 90 km hraði á klukkustund, skömmu áður en ákærði ók hægra framhorni bifreiðarinnar á miklum hraða aftan á vinstra afturhorn bifreiðarinnar [...], sem ekið var í sömu akstursstefnu á Reykjanesbraut við Hvassahraun, með þeim afleiðingum að síðarnefnda bifreiðin hafnaði utan vegar og varð fyrir skemmdum. Ökumaður bifreiðarinnar, A, skall með höfuðið í stýri bifreiðarinnar og missti meðvitund um stund og hlaut 2,5 sm langan skurð á efra augnloki hægra megin, bólgu á nefi og glerungssprungur á hægri miðframtönn og hægri hliðarframtönn efri góms. Með akstri sínum raskaði ákærði umferðaröryggi á alfaraleið og á ófyrirleitinn hátt stofnað lífi og heilsu A auk annarra vegfarenda, sem leið áttu um Reykjanesbraut á sama tíma, í augljósan háska en akbrautin var blaut og hál og slæmt skyggni var vegna veðurs og myrkurs.
Telst þetta varða við 1. mgr. 168. gr., 219. gr. og 4. mgr.
220. gr. almennra hegningarlaga nr. 19/1940 og 1. mgr. 5. gr., 2., 3. og 4.
mgr. 20. gr., 1. mgr. 36. gr. b. og h. lið 2. mgr. 36. gr., 2. mgr. 37. gr.,
sbr. 1. mgr. 100. gr. umferðarlaga nr. 50/1987.
Þess er krafist að ákærði verði dæmdur til refsingar, til
greiðslu alls sakarkostnaðar og til sviptingar ökuréttar skv. 101. gr.
umferðarlaga. Þess er einnig krafist að bifreiðin DL-G15 (NOCO2) verði gerð
upptæk til ríkissjóðs, samkvæmt 1. mgr. 107. gr. a. umferðarlaga nr. 50/1987,
sbr. 9. gr. laga nr. 69/2007.“
Einkaréttarkrafa;
Í málinu gerir A, kt. [...], þá kröfu að ákærða verði
gert að greiða skaðabætur að fjárhæð 1.000.000 króna með vöxtum samkvæmt 8. gr.
laga nr. 38/2001 um vexti og verðtryggingu frá 20. desember 2016 til
birtingardags ákæru en frá þeim degi með dráttarvöxtum samkvæmt 1. mgr. 6. gr.
sömu laga til greiðsludags. Þá er krafist þóknunar að teknu tilliti til
virðisaukaskatts.
Kröfur
ákærða:
Ákærði
krefst sýknu af fyrri ákærulið ákæru útgefinni 6. febrúar 2017. Hvað varðar
ákæruskjal, útgefið 28. apríl 2017, krefst ákærði aðallega sýknu af öllum
kröfum ákæruvaldsins og að einkaréttarkröfu A verði vísað frá dómi. Til vara er
krafist lækkunar á einkaréttarkröfunni. Þá krefst ákærði þess til vara, verði
hann sakfelldur, að honum verði ekki gerð refsing eða honum ákvörðuð vægustu
viðurlög sem lög heimila. Þá er þess krafist að kröfu ákæruvalds um upptöku á
ökutækinu DL-G15 (NOCO2) verði hafnað. Loks er þess krafist að allur
sakarkostnaður, þar með talin þóknun verjenda ákærða, verði greidd úr
ríkissjóði.
A
Ákæra
útgefin 6. febrúar 2017:
I
Samkvæmt
frumskýrslu lögreglu voru tveir lögreglumenn við hraðamælingar með ratsjá á
Reykjanesbraut vestan megin við Vogaveg á lögreglubifreiðinni 236 þegar aðrir
lögreglumenn í áhöfn lögreglubifreiðarinnar 250 höfðu samband í gegnum
fjarskipti og óskuðu aðstoðar við að stöðva för ökumanns á bifreiðinni NO CO2
og tilkynntu að þeir hefðu mælt hraða bifreiðarinnar með ratsjá, sem hefði sýnt
að bifreiðinni hefði verið ekið á 153 km hraða á klukkustund. Þetta hefði átt
sér stað á Reykjanesbraut á Vogastapa, vestan við gatnamótin við
Grindavíkurveg. Óskað hafi verið aðstoðar þar sem lögreglubifreiðin gat ekki
hafið eftirför vegna vegriðs sem skilur að akstursstefnurnar. Skömmu síðar hafi
sést hvar bifreiðinni NO CO2 hafi verið ekið austur Reykjanesbraut, en henni
hafi verið ekið fram úr öðrum bifreiðum og hraði hennar greinilega mikill. Sýndi
þá ratsjá lögreglubifreiðarinnar að NO CO2 var ekið á 145 km hraða á
klukkustund. Veitti lögregla bifreiðinni eftirför og gaf ökumanninum merki um
að nema staðar. Hafi hann stöðvað bifreiðina við gatnamótin við Vogaveg. Þá
segir í skýrslunni að ákærði hafi reynst vera ökumaður bifreiðarinnar og hafi
hann verið beðinn um að koma inn í lögreglubifreiðina til viðræðna. Þar hafi
honum verið kynnt sakarefnið og réttarstaða hans. Haft er eftir ákærða að hann
hafi ekkert hugsað út í hraðann, en hann væri vanur því að aka í Danmörku þar
sem leyfilegur hámarkshraði væri 130 km á klukkustund. Var ákærða tilkynnt að
mál hans yrði sent lögreglustjóra til ákvörðunar.
Í
málsgögnum er að finna vettvangsskýrslu á stöðluðu eyðublaði sem lögregla
fyllti út á staðnum og ákærði undirritaði. Þar kemur fram að ákærði hafi verið
stöðvaður af lögreglu 25. ágúst 2016, klukkan 22:23 á rauðri Tesla-bifreið með
númerið NO CO2. Birtuskilyrði eru skráð: Myrkur og götulýsing. Veður: Skýjað og
þurrt. Þá eru skráð númer tveggja ratsjáa, GE 059 og GE 071 og tveggja
lögreglubifreiða númer 236 og 250. Fram kemur að prófun ratsjár fyrir mælinu
hafi verið gerð klukkan 22:05 og klukkan 22:31 eftir mælingu. Hámarkshraði á
vegi sé 90 km, en mældur hraði 153 km á klukkustund en 148 km á klukkustund að
teknu tilliti til vikmarka. Á eyðublaðið er rituð sama afstaða ákærða og áður
er getið um í frumskýrslu lögreglunnar að hann hafi ekki verið að hugsa um
ökuhraða bifreiðarinnar. Loks er í skýrslunni merkt við að ákærði gangist við
brotinu.
II
Skýrsla ákærða
og vitna:
Ákærði neitaði sök samkvæmt fyrri lið ákærunnar og
kvaðst ekki hafa ekið á 153 km hraða á klukkustund, en játaði að hafa ekið
bifreiðinni á 140 km hraða. Ákærði sagðist ekki hafa verið að fylgjast
sérstaklega með ökuhraðanum, en séð á radarnum í lögreglubílnum mældan hraða
140 km og hefði hann treyst því að það væri rétt. Spurður kvaðst ákærði ekki
muna eftir því að önnur lögreglubifreið en sú sem hann sat í hefði komið á
vettvang. Þá sagði ákærði að lögregla hefði sýnt honum mældan hraða á radarnum
í lögreglubifreiðinni og því hefði hann talið að sá hraði hefði verið skráður í
skýrslu lögreglu, en hann hefði ekki lesið skýrsluna nákvæmlega áður en hann
skrifaði undir hana. Neitaði ákærði því aðspurður að hafa viðurkennt á staðnum
að hafa ekið á 153 km hraða á klukkustund.
B lögreglumaður skýrði frá því að hann
hefði verið við hraðamælingar á Reykjanesbraut, skammt frá Vogavegi þegar
kallað hefði verið frá öðrum lögreglubíl sem hefði verið uppi á Vogastapa nær
Keflavík og mælt hraða þeirrar bifreiðar sem um ræðir. Lögreglubifreiðin hefði
ekki náð að snúa við vegna vegriðs sem aðskilur akbrautirnar. Búið hafi verið
að undirbúa að stöðva bifreiðarinnar þegar hún kæmi. Bifreiðin hefði verið mæld
aftur örstuttu síðar og þá á minni hraða en þeim hefði verið gefinn upp.
Ákveðið hefði verið að skrá hærri hraðann í vettvangsskýrsluna sem vitnið
kvaðst hafa ritað. Spurt kvaðst vitnið telja að um tvö aðskilin tilvik hefði
verið að ræða en það væri nokkuð íþyngjandi fyrir ökumanninn á þetta stuttum tíma,
en tvær eða þrjár mínútur hefðu liðið á milli þess að bifreiðin hefði verið
mæld. Fylgt hefði verið hefðbundnum verklagsreglum við hraðamælinguna og allar
prófanir hefðu verið framkvæmdar sem kveðið er á um. Hraðinn á bifreiðinni
hefði verið áberandi mikill. Yfirleitt sést hvaða bifreið er ekið hraðast og
radartækið sýnir mesta hraða á þeim ökutækjum sem koma á móti. Rætt hefði verið
við ökumanninn í lögreglubifreiðinni og teknar niður eftir honum upplýsingar.
Spurt sagði vitnið sig minna það að ökumaðurinn hefði ekki viljað kannast við
brotið og hefði talið sig aka hægar. Einnig að ákærða hefði verið boðið að koma
yfir í „hina lögreglubifreiðina“ og sjá mældan hraða á radarnum í þeirri
bifreið, sem var læst í honum, en hann hefði ekki þegið það. Ein skýrsla hefði
verið gerð vegna brotsins. Þá kom fram hjá vitninu að sú prófun á ratsjá sem
hefði verið skráð í skýrsluna ætti við um ratsjána í bifreiðinni sem mældi
hærri ökuhraðann, en ætti ekki við um ratsjána í bifreiðinni sem vitnið var í.
Tölurnar hefðu verið fengnar frá lögreglumönnunum í þeirri bifreið, en prófun
ratsjárinnar í bifreið þeirri sem vitnið var í hefði ekki verið skráð, þar sem
ökumaðurinn hefði ekki verið „kærður“ fyrir lægri töluna. Loks sagði vitnið að
það hefðu verið mistök hjá vitninu að merkja í þá skýrslu sem vitnið gerði að
ökumaðurinn hefði gengist við brotinu.
C lögreglumaður greindi frá því að hún
hefði verið við radarmælingar ásamt B þegar kallað hefði verið til þeirra frá
öðrum lögreglubíl sem mælt hefði bifreið á 153 km hraða á klukkustund, en hefði
ekki getað snúið við og elt bílinn vegna vegriðs milli akreina. Vitnið kvaðst
hafa séð bifreiðina koma á miklum hraða og hefði hún verið mæld á 145 km hraða
á klukkustund og verið stöðvuð. Rætt hefði verið við ökumanninn og hann kærður
fyrir of hraðan akstur. Hin lögreglubifreiðin, sem mældi hærri töluna, hefði
síðan komið til þeirra. Mælingin hefði farið fram með hefðbundnum hætti og
hefði ratsjáin verið prófuð bæði fyrir og eftir mælinguna. Sést hefði að
bifreiðinni hefði verið ekið mjög hratt miðað við aðra umferð. Spurt hvaða
hraði hefði verið borinn undir ökumanninn svaraði vitnið því til að það hefði
verið 153 km á klukkustund, en ákærða hefði verið boðið að fara inn í „hina
lögreglubifreiðina“ og sjá hraðann á ratsjánni en því hefði ákærði neitað.
Honum hefði einnig verið sýndur á ratsjá sá hraði sem hann hefði verið mældur á
síðar eða 145 km á klukkustund. Loks sagði vitnið að ekki kæmi fram í
skýrslunni hvora ratsjána væri verið að prófa.
D lögreglumaður kvaðst fyrir dómi hafa
verið við hraðamælingar á Reykjanesbraut 25. ágúst 2016 þegar á móti þeim hafi
komið bifreið á töluverðri ferð. Radarinn hafi verið „opnaður“ og sýnt hraðann
153 km á klukkustund. Ekki hefði verið hægt að snúa við, en kallað hefði verið
í aðra lögreglubifreið sem vitað var um á Reykjanesbraut til að stöðva
bifreiðina og það hafi verið gert. Bifreiðinni hefði verið ekið áberandi hraðar
en öðrum bifreiðum. Vitnið hefði fengið upplýsingar um að búið væri að stöðva
bifreiðina á rúmlega 150 km hraða á klukkustund. Þeir hefðu snúið við og náð
bifreiðinni á Strandarheiði nálægt Kúagerði. Ökumanninum hefði verið boðið að
koma yfir í þá lögreglubifreið sem vitnið var í til að sjá hraðann en hann hafi
ekki komið. Sá lögreglumaður sem var í lögreglubifreiðinni sem stöðvaði
ökumanninn ætlaði að afgreiða málið og því kvaðst vitnið hafa farið af staðnum.
Mælingin hefði farið fram með hefðbundnum hætti samkvæmt verklagi og prófanir
framkvæmdar bæði fyrir og eftir mælinguna. Bifreiðin hefði verið sú eina í
þessu tilfelli sem komið hefði til greina, enda hefði henni verið ekið áberandi
hraðar en öðrum bifreiðum. Engin önnur bifreið gat komið til greina, enda mæli
ratsjáin þann bíl sem hraðast ekur. Spurt kvaðst vitnið ekki hafa átt nein
samskipti við ökumanninn. Loks sagði vitnið að í skýrslu lögreglu væri prófunin
á ratsjánni miðuð við það tæki sem mældi bifreiðina á 153 km hraða á
klukkustund.
E lögreglumaður skýrði frá því að hann hefði ásamt öðrum verið í
lögreglubíl á leiðinni til Keflavíkur við eftirlit og hraðamælingar. Bifreið
ákærða hefði verið mæld á 153 km hraða á klukkustund, en vegna víravegriðs
hefði ekki verið hægt að elta bifreiðina. Vitað hefði verið um aðra
lögreglubifreið á Reykjanesbraut nær Reykjavík sem hefði verið látin vita hvaða
bifreið væri um að ræða og á hvaða hraða hún hefði verið mæld. Þeir hefðu síðan
verið látnir vita af því frá hinum lögreglubílnum að bifreið ákærða hefði verið
mæld á 145 km hraða á klukkustund og verið stöðvuð. Ekið hafi verið í áttina að
bifreiðinni og þegar að var komið hafi ökumaðurinn verið kominn inn í
lögreglubifreiðina sem stöðvaði hann og skýrslutaka af honum byrjuð. Vitnið
sagði að ökumaðurinn hefði verið spurður hvort hann vildi koma yfir í bílinn
til að sjá mælinguna hjá þeim, en það hefði hann ekki viljað. Einnig að
mælingin hefði verið hefðbundin og bifreiðin á meiri ferð en aðrar bifreiðar.
Spurt kvaðst vitnið ekki hafa komið að gerð vettvangsskýrslu í málinu. Ákvörðun
hefði verið tekin um það að kæra ökumanninn fyrir hærri hraðann. Þá sagði
vitnið að ekki væri hægt að sjá af vettvangsskýrslunni hvaða ratsjá hefði verið
prófuð á þeim tíma sem skráður væri í skýrsluna.
III
Forsendur
og niðurstaða:
Samkvæmt
ákæru lögreglustjórans á Suðurnesjum 6. febrúar 2017 er ákærða gefið að sök
umferðarlagabrot með því að hafa á tilgreindum degi ekið bifreiðinni NO CO2
austur Reykjanesbraut, við Vogastapa vestan Grindavíkurafleggjara, með 153 km
hraða á klukkustund, eða 148 km hraða að teknu tilliti til vikmarka, og fyrir
að hafa skömmu síðar ekið bifreiðinni á sama vegi með 145 km hraða á
klukkustund, eða 140 km hraða á klukkustund að teknu tilliti til vikmarka, uns
aksturinn var stöðvaður við gatnamótin við Vogaveg. Leyfður hámarkshraði í
báðum tilvikum var 90 km á klukkustund.
Svo
sem fram er komið neitar ákærði því að hafa ekið á 153 km hraða á klukkustund,
en kannast við að hafa ekið á 140 km hraða og vísar til þess að honum hafi
verið sýndur sá hraði á ratsjá í lögreglubíl þar sem hann gaf skýrslu vegna
málsins. Krefst ákærði sýknu af fyrri lið ákærunnar, en þess aðallega að honum
verði ekki gerð refsing af broti sem tilgreint er í síðari lið ákærunnar, eða
gerð vægasta refsing, verði hann sakfelldur.
Samkvæmt
því sem að framan er rakið liggur fyrir að lögreglubifreið númer 250 mældi
bifreið ákærða á 153 km hraða á klukkustund, en lögreglubifreið númer 236 mældi
ákærða á 145 km hraða á klukkustund. Lögreglumennirnir B og C voru á
síðarnefndu bifreiðinni og stöðvuðu ákærða og rita þau bæði undir frumskýrslu
vegna málsins. Þá er í málsgögnum handskrifuð skýrsla sem lögreglumaðurinn B
fyllti út á vettvangi og ákærði undirritaði. Á síðarnefndu skýrsluna eru skráð
tvö „lögreglutæki“ númer 250 og 236 og tvær ratsjár númer GE 059 og GE 071.
Mældur ökuhraði er tilgreindur 153 km á klukkustund, vikmök 5 og niðurstaða 148
km á klukkustund. Þá segir að „ratsjá“ hafi verið prófuð fyrir mælingu klukkan
22:05 og klukkan 22:31.
Í
verklagsreglum ríkislögreglustjóra um hraðamælingar með ratsjá segir í 6. gr.
að við upphaf og lok hraðamælinga skuli ávallt prófa ratsjá samkvæmt fyrirmælum
framleiðanda. Þá segir í 7. gr. reglnanna að við upphaf rannsóknar skuli
ökumanni gerð grein fyrir kæruefninu og kynnt réttarstaða hans. Tryggja skal
eftir föngum sönnur á mældan hraða, meðal annars með því að skrá í
vettvangsskýrslu helstu atriði mælingar og umsögn ökumanns um ætlað brot. Þá
segir orðrétt: „Heppilegt er að læsa niðurstöðu mælingar á skjá mælitækis og
sýna kærða. Það er þó ekki skilyrði fyrir gildi hraðamælingar og rýrir ekki
gildi hennar, verði því ekki við komið.“
Svo
sem ákæran er úr garði gerð eru ákærða gefin að sök tvö aðskilin
umferðarlagabrot. Í málsgögnum er þó ein frumskýrsla lögreglu og ein
vettvangsskýrsla, sem lögreglumenn á bifreið lögreglu númer 236 unnu og var
lögreglumaðurinn B stjórnandi hraðamælingarinnar. Samkvæmt framburði hans fyrir
dómi var ákveðið að skrá „hærri hraðann“ í skýrsluna, annað væri nokkuð
íþyngjandi fyrir ökumanninn „á þetta stuttum tíma.“ Þá kom fram hjá vitninu að
sú prófun á ratsjá sem skráð hefði verið í vettvangsskýrsluna ætti ekki við um
ratsjána í þeirri bifreið sem vitnið var í, en ætti við um þá lögreglubifreið
sem mældi hærri ökuhraðann og væru tölurnar fengnar frá lögreglumönnum í áhöfn
þeirrar bifreiðar. Loks kom fram hjá vitninu að það hefði fyrir mistök skráð í
nefnda vettvangsskýrslu að ökumaðurinn hefði gengist við brotinu. Það hefði
ekki verið svo.
Í
frumskýrslu sem lögreglumaðurinn B ritaði og C lögreglumaður staðfesti segir að
þau hafi séð hvar bifreiðinni NO CO2 var ekið austur Reykjanesbraut og fram úr
öðrum bifreiðum. Sýndi ratsjá lögreglu-bifreiðarinnar að bifreiðinni var ekið á
145 km hraða á klukkustund. Veittu þau bifreiðinni eftirför og gáfu ökumanninum
merki um að stöðva. Haft er eftir ákærða að hann hafi ekkert hugsað út í
hraðann. Við aðalmeðferð málsins játaði ákærði að hafa ekið bifreiðinni í
umrætt sinn á 140 km hraða á klukkustund og hefði lögregla sýnt honum mældan
hraða á ratsjá í lögreglubifreiðinni og hann treyst því að það væri rétt. Þá
kom fram hjá ákærða að hann hefði ekki lesið nákvæmlega þá vettvangsskýrslu sem
hann undirritaði í lögreglubifreiðinni, enda treyst því að þar væri skráður sá
hraði sem honum var sýndur á ratsjánni. Áréttaði ákærði fyrir dómi þá afstöðu
sína að hann hefði ekki viðurkennt á staðnum að hafa ekið á 153 km hraða á
klukkustund. Kemur það heim og saman við þann framburð vitnisins B að hann hafi
fyrir mistök skráð þá afstöðu ákærða í vettvangsskýrsluna að hann viðurkenndi
brotið.
Fyrrnefnd
vettvangsskýrsla í málsgögnum er ranglega fyllt út og samræmist ekki
verklagsreglum ríkislögreglustjóra. Af henni verður ekki ráðið hvor ratsjáin
var prófuð fyrir og eftir hraðamælinguna. Í frumskýrslu lögreglu er þó greint
frá tveimur aðskildum mælingum á ökuhraða bifreiðarinnar NO CO2 á
Reykjanesbraut. Þykir ósannað, eins og á stendur, gegn neitun ákærða, að honum
hafi verið kynntur annar mældur ökuhraði en lögreglubifreið númer 236 sýndi
þegar skýrsla var tekin af ákærða inn í þeirri bifreið. Því verður ákærði
sýknaður af þeim sakargiftum að hafa ekið bifreiðinni NO CO2 á 153 km hraða á
klukkustund, eða 148 km hraða að teknu tilliti til vikmarka. Fyrir liggur
framburður ákærða um að hann hafi, þegar hann var stöðvaður af lögreglu, ekið
bifreiðinni NO CO2 á 140 km hraða á klukkustund. Með því hefur ákærði gengist
að hluta við sakargiftum sem tilgreindar eru í ákæru lögreglustjóra útgefinni
6. febrúar 2017. Þrátt fyrir ágalla á vettvangsskýrslunni, sem áður er getið
um, er brot ákærða tilgreint í fyrrnefndri frumskýrslu lögreglu og hefur hann
gengist við brotinu. Er ákærði sakfelldur fyrir að hafa ekið bifreiðinni DL G15
(NO CO2) á Reykjanesbraut við Vogaveg á 145 km hraða á klukkustund eða 140 km
hraða að teknu tilliti til vikmarka þar sem leyfður hámarkshraði var 90 km á
klukkustund. Er það brot ákærða rétt heimfært til refsiákvæða í ákæru.
B
Ákæra
útgefin 28. apríl 2017:
I
1
Samkvæmt
frumskýrslu lögreglu bárust tilkynningar þann 20. desember 2016 um rauðan
sportbíl á ofsaakstri vestur Reykjanesbraut. Stuttu síðar var tilkynnt um
umferðarslys á Reykjanesbraut við Hvassahraun þar sem sami sportbíll hafði hafnað
á annarri bifreið. Á vettvangi var bifreiðin [...] utan vegar, norðan við Reykjanesbraut og sneri
framendi hennar til vesturs. Var bifreiðin töluvert skemmd á vinstra afturhorni
auk þess sem hjólabúnaður hennar og undirvagn var eitthvað skemmdur. Rauði
sportbílinn, DL G15, með einkanúmerið NO CO2, var nokkru vestar, að hálfu út af
Reykjanesbrautinni sunnan megin og sneri framendi bifreiðarinnar til vesturs.
Var hún skemmd á hægra framhorni.
Ökumaður
bifreiðarinnar [...] var fluttur með
sjúkrabifreið á slysa- og bráðamóttöku Landspítala-Háskólasjúkrahúss í
Fossvogi. Þá segir að á vettvangi hafi verið slæmt veður, hvasst og gengið á
með slydduéljum. Krapi og hálka var á akbrautinni, mikil umferð og léleg
götulýsing. Lögregla ræddi við A á vettvangi sem sagðist hafa ekið á 90 km
hraða á klukkustund vestur Reykjanesbraut þegar hann hafi skyndilega fundið
mikið högg og hafi bifreið hans svo hafnað utan vegar. Kvaðst A ekki hafa áttað
sig á því sem hefði gerst og aldrei hafa séð bifreiðina DL G15.
Lögregla
ræddi við ákærða á vettvangi og kvaðst hann hafa verið að aka vestur
Reykjanesbraut. Þegar hann hafi ætlað að skipta af hægri akrein yfir á vinstri
hefði bifreiðin runnið til í slabbi og hálku og rekist á vinstra afturhorn
bifreiðarinnar [...] sem ekið var á
undan honum vestur Reykjanesbraut. Haft er eftir ákærða að hann hafi ekið
bifreiðinni á 90-95 km hraða á klukkustund. Ákærði gaf skýrslu hjá lögreglu
samdægurs og á ný 31. janúar 2017. Síðarnefnda daginn viðurkenndi ákærði að
hafa ekið of hratt miðað við aðstæður því annars hefði ekki komið til þessa
slyss. Kvaðst ákærði halda að hann hefði ekið á 90-100 km hraða á klukkustund,
en hann hefði ekki verið að fylgjast með hraðamælinum. Þá er haft eftir ákærða
í skýrslunni að rétt áður en áreksturinn varð þá hefði hann hnerrað, en það
gæti hafa orðið til þess að hann steig á inngjöfina á bifreiðinni sem gæti
útskýrt hvers vegna gögn frá framleiðanda Teslu sýni að hann hafi verið á 116
km hraða á klukkustund þegar áreksturinn varð. Hafi ákærði ekki vefengt þann
hraða en á hinn bóginn þvertekið fyrir að hafa verið að aka á 182 km hraða „25
sekúndum“ fyrir áreksturinn, eins og gögn frá framleiðanda bifreiðarinnar
sýndu.
Í
skýrslunni er vísað til þess að samkvæmt vottorði frá Veðurstofu Íslands hafi
hitastig verið 2,5°C, vindátt til suðurs og vindhraði frá 8-8,9 m/sek. og mesta
hviða 14,0 m/sek. Loks segir að lögreglumenn sem ekið hafi með forgangi á
vettvang hafi sagt að það hafi verið erfitt sökum veðurs og færðar. Mikill og
blautur snjór hafi verið á veginum, mikil ofankoma, „sjókoma og rigning“, dimmt
og lélegt skyggni.
Í
skýrslu sem F lögreglumaður ritaði kemur fram að á vettvangi hafi verið slæmt
veður, hvasst og gengið á með slydduéljum. Krapi og hálka hafi verið á
akbrautinni, mikil umferð og léleg götulýsing. Fram kemur að vegalengdin frá
þeim stað sem bifreiðin SD D79 hafi farið út af akbrautinni og að þeim stað þar
sem hún staðnæmdist hafi mælst 101 metri og vegalengdin frá þeim stað þar sem
bifreiðin [...] fór út af akbrautinni
og að þeim stað þar sem bifreiðin DL G15 staðnæmdist hafi mælst 208 metrar.
Voru báðar bifreiðarnar óökufærar eftir óhappið. Í þágu rannsóknar málsins gaf
ákærði öndunarpróf í SD-mæli klukkan 09:18 og sýndi mælirinn 0,0 ‰ og á
lögreglustöð gaf ákærði munnvatnssýni sem gaf neikvæða svörun á undangengna
fíkniefnaneyslu. Ákærði var handtekinn klukkan 10.10 og vistaður í
fangaklefa.
Svo
sem fram er komið gaf ákærði skýrslu hjá lögreglu vegna málsins 20. desember
2016 og 31. janúar 2017.
2
Við
rannsókn málsins óskaði lögreglan eftir upplýsingum frá framleiðanda Tesla sem
bárust 13. janúar 2017. Sýna gögnin ökuhraða bifreiðarinnar GL D15 (NO CO2),
sem mældur er í mílum, þann 20. desember 2016 frá klukkan 08:45:39 til klukkan
08:50:55.5, eða alls í 05:16.5 mínútur. Gögnin sýna að áreksturinn átti sér
stað klukkan 08:50:30.5 og að hraði bifreiðarinnar var þá 72,30 mílur eða 116
km á klukkustund. Einnig segir að síðasti skráði hraði bifreiðarinnar fyrir
áreksturinn hafi verð 77,5 mílur, eða 124,8 km á klukkustund. Voru þær
upplýsingar skráðar um það bil hálfri sekúndu fyrir fyrstu boð um árekstur.
Í
íslenskri þýðingu á upplýsingum sem G sendi lögreglu segir að hraði ökutækis sé
leiddur af skynjun á hjólbarða í tengslum við aðrar heimildir til að vega upp á
móti virkni stöðugleikastýringar og virkjun ABS-hemlakerfis. Gögn um hraða
ökutækis eru send í tengilínu boðskiptatækis ökutækisins og skráð þar
staðbundið. Hraðinn sem er sýndur á hraðamæli er í samræmi við allar kröfur
reglugerða og laga í landinu þar sem bíllinn er keyptur.
3
Í læknisvottorði
H, sérfræðings í heimilis-lækningum, 21. febrúar 2017, segir að A, ökumaður
bifreiðarinnar [...], hafi farið í
sneiðmyndatöku af höfði og andlitsbeinum sem sýni ekki áverka. Hann sé með
skurð á hægra augnloki og bólgu á nefi. Skurðurinn hafi verið saumaður með fimm
sporum. Þá segir að A hafi fengið almennar ráðleggingar varðandi sár og
höfuðhögg og ekki sé fyrirhugað frekara eftirlit á bráðadeild.
A
leitaði til heilsugæslunnar í Hlíðum 28. desember 2016 og 31. janúar 2017. Í
vottorði I heimilislæknis segir að A sé með strengi aftan í hálsi og óþægindi í
mjóbaki, þreytuverki sem komi og fari, hann hreyfi sig óhindrað. Eðlileg
hreyfigeta sé í hálsi í öllum plönum en taki aðeins í þegar hann horfi til
hægri. Þá séu væg eymsli í lendarhrygg. Eðlileg hreyfigeta sé í baki. Hafi A
fengið greininguna „Tognun og ofreynsla á háls- og lendarhrygg.“ Við komu 31.
janúar eru skráð áfram einhver óþægindi í mjóbaki, ekki slæmir verkir, en meira
eins og strengir eða pirringur. Einnig óþægindi yfir tanngarði í efri góm.
Hreyfir sig óhindrað. Væg eymsli ofarlega í lendarhrygg yfir mjúkvefjum
„paravertebralt.“
J
tannlæknir skoðaði A og ritaði vottorð 13. febrúar 2017 um skoðunina að beiðni
lögreglu. Við skoðunina sáust leifar af áverkum í andliti, meðal annars á nefi,
vör og ofan við hægra auga. Í munni voru greinilegar glerungssprungur á hægri
miðframtönn og hægri hliðarframtönn efri góms og voru þær tennur ásamt vinstri
miðframtönn og vinstri hliðarframtönn efri góms allar „ásláttaraumar.“ Þá segir
að þessar tennur hafi allar verið heilar og óviðgerðar fyrir slysið. Ekki sé
útilokað að áverkar á tönnum geti komið fram síðar. Þá gæti komið til þess að
meðhöndla þurfi viðkomandi tennur á einhvern hátt. Algengast sé að taugar
viðkomandi tanna skaddist og þá þurfi rótfyllingarmeðferð á þær tennur. Tíminn
muni leiða það í ljós.
4
Að
beiðni lögreglustjórans á Suðurnesjum vann K bíltæknirannsókn á ökutækinu DL
G15 (NO CO2). Skýrsla um skoðunina er dagsett 8. mars 2017. Beindist rannsóknin
að útsýni ökumanns frá ökumannssæti, ökuljósum á vettvangi, öryggisbúnaði,
hjólbörðum og hemlum og stýris- og hjólabúnaði. Í niðurstöðum rannsóknarinnar
segir að engar vísbendingar hafi fundist um hindrað útsýni ökumanns fram á við,
til hliða, í baksýnisspeglum og í gegnum afturrúðu í aðdraganda slyssins.
Aðalljósið hægra megin að framan hafi verið bilað á slysstað eftir árekstur, en
aðalljósið vinstra megin var í lagi. Þá segir að hjólbarðarnir hafi verið allir
sömu gerðar. Hjólbarðinn hægra megin að framan hafi verið loftlaus vegna skemmda
sem urðu í árekstri, en engar skemmdir í þéttilaginu. Við samanburð á mynstri
hjólbarðanna við mynstur óneglds Nokia-hjólbarða sem fengið hefur hæstu einkunn
fyrir eiginleika í snjó og krapa sést verulegur munur þar á. Helsti munur á
mynstrinu er þéttari míkróskurður á Nokia-hjólbarðanum og nær skurðurinn út úr
hverjum mynsturtappa. Miðað við mynstrið á hjólbarðanum á DL G 15 næst ekki að
losa krapa út úr mynstrinu heldur hleðst það upp í raufum og á samfelldu
mynstri. Verður afleiðingin sú að ökutækið flýtur á krapanum og veggripið
skerðist og hverfur loks með auknum hraða. Þá segir að míkróskurðurinn á
hjólbörðum DL G15 nái ekki út úr töppunum og komi því ekki að fullu gagni til
að mynda stöðugleika. Verulegar líkur séu á að hjólbarðarnir á DL G15 geti ekki
talist vetrarhjólbarðar til notkunar á norðurslóðum heldur hafi mynstur þeirra
verið vatnslosandi og hentugt þar sem vatnsveður eru mikil að vetri til en ekki
snjór og krap. Einnig segir að hjólabúnaðurinn hægra megin að framan hafi
skemmst í árekstri. Engin ummerki hafi fundist um bilun, skyndibilun eða lélegt
ástand búnaðarins í aðdraganda slyssins. Loks segir að bíltæknirannsóknin hafi
leitt í ljós að ekkert hafi hindrað ökumann DL G15 við stjórnun ökutækisins
utan hjólbarðanna sem voru slitnir, dýpt mynsturs allt niður í 4,0 mm í miðjum
slitfleti, og gerð mynsturs þeirra sem hentaði engan veginn til aksturs í snjó
og krapa.
Bíltæknirannsókn
var einnig framkvæmd á bifreiðinni [...]. Leiddi rannsóknin í ljós að engin ummerki bilunar, skyndibilunar eða
um lélegt ástand voru finnanleg. Þá segir að verulegar líkur séu á að orsök
slyssins verði ekki rakin til ástands ökutækisins [...].
II
Skýrsla
ákærða og vitna:
Í
skýrslu ákærða fyrir dómi kom fram að
hann hefði lent í árekstri 20. desember 2016. Ekki hefði verið gott veður á
leið ákærða úr Kópavogi og færðin ekki sérstaklega góð þennan morgun. Ennþá
dimmt og smá slydda, sums staðar snjór og sums staðar rigning. Ákærði kvaðst
hafa vandað sig við aksturinn og flestir óku hægar en venjulega. Umferðin var
nokkuð hæg. Ákærði sagði ný vetrardekk hafa verið undir bifreiðinni sem væri
fjórhjóladrifin og því væri auðveldara að aka í þessu færi en ætti við um aðra
bíla. Lýsti ákærði því að þegar komið var að kaflanum þar sem Reykjanesbrautin
væri tvöföld hafi verið búið að skafa báðar akreinar, en í miðjunni á milli
akreina var slabb eða mjög blautur snjór, sem erfitt var að sjá vegna myrkurs.
Kvaðst ákærði hafa vandað sig við að aka og verið mestallan tímann á hægri
akreininni, en ekki hefði verið mikil umferð. Ákærði kvaðst hafa séð Toyota
Yaris-bifreiðina sem A var á fyrir framan bifreiðina og hefði hann undirbúið
það að skipta um akrein til að taka fram úr honum. Toyotan hefði verið á
lítilli ferð og þegar ákærði ætlaði að skipta um akrein þá hnerraði hann skyndilega
og þegar ákærði leit upp aftur þá var bifreiðin ekki komin frá hægri akrein
yfir á þá vinstri og kvaðst ákærði hafa fundið að annað framdekkið hefði lent í
slabbinu milli akreinanna og hefði bifreiðin skotist aðeins aftur til hægri.
Kvaðst ákærði hafa reynt að ná bifreiðinni yfir á vinstri akreinina en
bifreiðin hafi runnið til og lent með hægra framhornið á vinstra afturhornið á
Toyota-bifreiðinni. Loftpúðinn hefði sprungið í bíl ákærða og hefði hann þurft
að taka hann niður með höndunum til að sjá út. Þá hefði hann verið kominn á
vinstri akreinina og stöðvað bílinn strax. Þegar ákærði sá að Toyotan var komin
út fyrir veginn hefði hann hlaupið að bifreiðinni og opnað hurðina og séð að
ökumaðurinn hafði rekist á stýrið og hefði blætt úr honum fyrir ofan augað.
Hann hefði verið með meðvitund. Þá hefði komið þar að kona sem var
hjúkrunarfræðingur og hefði hún stöðvað blæðinguna frá enninu. Þá kvaðst ákærði
hafa hringt á sjúkrabíl og í konu ökumannsins og sagt henni að hann hefði því
miður ekið á manninn hennar. Þá hefði lögreglan boðað ákærða til skýrslutöku á
lögreglustöð.
Spurður
um það hvort hann hefði ekið of hratt miðað við aðstæður svaraði ákærði því til
að það hefði hann gert og bætti við að annars hefði hann ekki misst bílinn út í
slabbið og misst stjórn á honum í nokkrar sekúndur og þá hefði óhappið ekki
orðið. Ákærði kvaðst ekki hafa verið að fylgjast með hraðanum enda hefði hann
verið að einbeita sér að því að keyra. Kvaðst ákærði hafa verið á „eðlilegum
hraða“ en margir aðrir hafi kannski verið undir löglegum hraða. Þá kvaðst
ákærði ekki hafa skýringu á framburði vitna um að bifreið ákærða hefði verið
ekið á ofsahraða, enda hefði hann talið sig vera á löglegum hraða. Ákærði
kannaðist aðspurður ekki við það að hafa við framúrakstur nálægt Álverinu
næstum því verið lentur framan á öðrum bíl sem kom á móti. Ákærði kvaðst ekki
muna til þess að hafa verið að taka fram úr bílum á leiðinni og sagði það hafa
ef til vill verið einu sinni ef pláss hefði verið til þess. Spurður um
upplýsingar um hraða bifreiðarinnar frá framleiðanda hennar sagði ákærði að
lögreglan hefði borið þær upplýsingar undir hann að bifreiðinni hefði rétt
fyrir áreksturinn verið ekið á 116 km hraða og hefði hann svarað því til að
hann hefði ekki haft neinar forsendur til að draga þær upplýsingar í efa á þeim
tíma, enda hefði hann ekki fylgst með hraðanum. Ákærði tók fram að verðið hefði
verið slæmt og hefði hann vandað sig við að keyra eins vel og hann gat. Ákærði
sagði það ótrúlegt að bifreiðinni hefði verið ekið á tæplega 183 km hraða rétt
fyrir áreksturinn, en hins vegar gæti vel verið að bifreiðin hefði spólað rétt
fyrir áreksturinn þegar hann hnerraði og gæti það verið skýringin en það hefði
ekki verið færð til að aka á þessum hraða, enda gerði hann það ekki heldur.
A skýrði frá því að hann hefði verið á leið til vinnu í Keflavík. Það var
kolniðamyrkur og haglél, en allt í einu var eins og sprenging hefði orðið í
bílnum og hann hefði farið út af veginum. Þá hefði ákærði komið hlaupandi niður
brekkuna og þeir hafi í sameiningu opnað hurðina á bílnum. Vitnið kvaðst hafa
spurt ákærða hvort hann vissi hvað hefði gerst og hann þá sagt að hann hefði
óvart keyrt aftan á bílinn. Ákærði hefði hringt í 112. Spurt kvaðst vitnið
aldrei hafa orðið vart við bílinn sem keyrði aftan á hann. Vitnið kvaðst hafa
ekið nálægt leyfðum hámarkshraða, en hefði nýlega slegið af vegna hagléls af
því að færðin var ekki góð. Bíllinn hefði skotist út af með látum og endað
nokkuð langt frá veginum. Vitnið kvaðst hafa skollið með andlitið í stýrið og
meiðst í andliti en hefði síðar leitað til sjúkraþjálfara og væri enn í
sjúkraþjálfun út af hálsinum og bakinu. Þá kvaðst vitnið hafa leitað til
tannlæknis vegna verkja í tönnunum.
L lögreglumaður gaf skýrslu og greindi frá því að tilkynnt hefði verið um
umferðaróhapp á Reykjanesbraut og hefðu nokkrir lögreglumenn farið á vettvang.
Vitnið kvaðst hafa stjórnað aðgerðum á vettvangi þar sem einn hefði verið
handtekinn og hald lagt á bifreið. Veðrið hefði verið ömurlegt og mikið slabb.
Kalt og hált. Bifreið hefði ekið út af veginum og verið var að flytja
ökumanninn á sjúkrahús. Önnur bifreiðin, Toyota Yaris, hefði endað utan vegar
en vitnið skoðaði ekki ástandið á þeirri bifreið. Tjón hefði verið framan á
Teslunni. Vegfarendur hefðu tilkynnt lögreglu um að Tesla-bifreiðinni hefði
verið ekið á „fáránlega“ miklum hraða miðað við aðstæður. Vitnið kvaðst ekki muna hvort það hefði verið
fyrir eða eftir að tilkynnt var um óhappið. Vitnið kvaðst hafa rætt við ákærða
á vettvangi sem hefði sagt að hann hefði misst vald á bifreið sinni og ekið
aftan á Yarisinn sem var fyrir framan með þeim afleiðingum að bílinn endaði
utan vegar.
M greindi frá því að hún hefði ekið framhjá N1 í Hafnarfirði þegar rauðum
bíl hefði verið ekið rosalega hratt hægra megin fram úr bifreið vitnisins þar
sem ekki má taka fram úr. Eftir það hefði rauða bílnum verið ekið á víxl fram
úr bílum og við Álverið hefði bifreiðin næstum því rekist framan á aðra. Eftir
það hvarf bifreiðin út í myrkrið. Þá kvaðst vitnið hafa sagt móður sinni að
hringja á lögregluna. Þegar lengra var komið mátti sjá að rauða bílnum hafði
verið ekið aftan á aðra bifreið sem komin var út í hraun. Þá hefði verið hringt
öðru sinni. Vitnið kvaðst hafa ekið á 60-70 km hraða þegar ákærði hefði fyrst
ekið fram úr vitninu og eftir það á 80-90 km hraða enda hefði færið ekki verið
gott, slydda og hálka og ekki skilyrði til að aka greitt. Þegar komið var að
slysstaðnum hefðu aðrir verið komnir á vettvang og því kvaðst vitnið ekki hafa
stöðvað bifreið sína.
N skýrði frá því að hann hefði verið á leið í vinnu á Vatnsleysuströnd.
Skyggni hefði verið lítið sem ekkert og slydda og hálka. Vitnið kvaðst hafa
ekið á vinstri akrein og séð ljós í speglinum og vikið á hægri akrein. Þá hafi
rauður bíll skotist fram úr vitninu á dágóðum hraða. Skömmu síðar ók vitnið
fram á rauðan bíl í vegkantinum og sá að allt var í lagi og ók því áfram til
vinnu. Þegar þangað var komið kvaðst vitnið hafa frétt af öðrum bíl sem sá
rauði hefði skotið út í hraun og kvaðst vitnið þá hafa hringt og látið vita af
ferðinni sem rauði bíllinn var á. Vitnið kvaðst ekki vilja ýkja, en teldi að
rauði bíllinn hefði ekki verið á lægri hraða en 140 km/klst. Sjálft kvaðst
vitnið hafa verið á 100 km hraða eða rétt rúmlega það. Vitnið tók fram að það
æki Reykjanesbrautina daglega og bílar tækju fram úr en ekki með slíkum hraða
sem rauði bíllinn var á. Umferð hefði verið „róleg.“
J tannlæknir skýrði frá því að A hefði komið til hans 9. janúar 2017
eftir högg á framtennur. Þrár tennur hefðu verið sérstaklega viðkvæmar og við
skoðun hefði komið í ljós að áberandi brestur var í glerungi á einni framtönn.
Um væri að ræða þversprungur í glerungi eftir högg. Eftir álagið sem tönnin fær
kemur lárétt sprunga í glerunginn sem eingöngu kemur eftir högg. Slíkt væri
skemmd, en ekki brot. Þá væri viðkomandi enn viðkvæmur í tönnunum sitt hvorum
megin við. Eftirköst gætu orðið af því og gæti þurft að rótfylla ef taugin í
tönnunum hefur skaðast.
I læknir skýrði frá því að brotaþoli hefði leitað til hans með óþægindi
aftan á hálsi og í mjóbaki og væri hann með eymsli aftan í hálsi, fyrst og
fremst yfir mjúkvefjum. Í september 2017 hefði brotaþoli verið enn með verki í
hálsi og mjóbaki. Brotaþoli hefði ekki leitað áður til vitnisins. Um væri að
ræða algenga áverka hjá þeim sem lenda í aftanákeyrslu. Vitnið kvað ómögulegt
að segja til um hve langvarandi eymslin væru, það væri einstaklingsbundið.
Brotaþoli væri ekki búinn að jafna sig.
O lögreglumaður greindi frá því að hún hefði tekið við rannsókn málsins,
þegar ákærði var handtekinn á vettvangi, og annast rannsóknina frá upphafi til
enda þar til málið hafi verið sent héraðssaksóknara. Vitnið kvaðst þó ekki hafa
tekið fyrstu skýrslu af ákærða, en tekið skýrslu á síðari stigum málsins.
Aðspurt kvaðst vitnið ekki hafa farið á vettvang, en hefði lesið frumskýrslu þar
sem aðstæðum á vettvangi hefði verið lýst. Strax hefði vaknað grunur um að um
ofsaakstur hefði verið að ræða og átt þátt í að valda slysinu, enda hefðu
margar tilkynningar borist til neyðarlínu þar sem fólk lýsti ofsaakstri. Rætt
hefði verið við tilkynnendur sem hefðu flestir verið sammála því að ákærði
hefði ekið mjög greitt miðað við aðstæður, eins og ákærði hefði sjálfur greint
frá í skýrslu hjá lögreglu, þótt hann hefði ekki sagst hafa ekið yfir
hámarkshraða. Þá var tilkynnt um framúrakstur sem fólk taldi óskynsamlegan
miðað við aðstæður og glæfraakstur. Þá kom fram hjá vitninu að lögregla hefði
fengið upplýsingar frá Teslu yfir hraða bifreiðarinnar, en í henni væri
aksturstölva sem sendir frá sér upplýsingar um hraða bifreiðarinnar á hverri
stund fyrir sig. Samkvæmt þeim gögnum hafði ákærði verið að aka of hratt og
staðfesti það grun lögreglu. Í upplýsingunum frá Tesla segir að um ½ sekúndu
áður en áreksturinn átti sér stað hefði ákærði ekið á 116 km hraða og 25
sekúndum fyrir áreksturinn hefði ákærði ekið á 182 km/klst. hraða. Þá hefði
verið gerð sérstök prófun á áreiðanleika gagnanna og hvernig þeim bæri saman
við hraðamælingar lögreglu með því að fá lánaða sams konar bifreið og framkvæma
radarmælingu með lögreglubifreið sem hefði verið innan eðlilegra skekkjumarka.
Samkvæmt útreikningum lögreglu ættu gögnin frá Teslu að vera rétt. Bifreiðinni
sem notuð var við prófunina hefði verið ekið á Garðvegi á 70 eða 80 km hraða
sem var festur. Lögreglumenn hefðu mælt hraðann og samprófað hvort ekki væri um
sama hraða að ræða og bifreiðin sýndi og svo hafi verið. Þegar síðari skýrslan
var tekin af ákærða lágu tölurnar fyrir og voru þær bornar undir hann. Ákærði
hafði borið því við að hann hefði ekið á 80-90 km hraða, en þegar honum hefðu
verið kynntar upplýsingar frá Tesla um að hann hefði ekið á 116 km hraða hefði
ákærði talið upplýsingarnar réttar ef þær væru frá Tesla og útskýrði þá
hraðamismuninn frá því sem hann hélt að hann hefði ekið á og því sem upplýst
var í gögnum frá Tesla að hann hefði hnerrað rétt áður, sem mögulega hefði
leitt til þess að hann hefði ýtt á bensíngjöfina. Engu að síður hefði ákærði
neitað því hjá lögreglu að hafa ekið skömmu áður á 183 km hraða.
P lögreglumaður gaf skýrslu fyrir dómi og skýrði frá því að gerð hefði
verið samanburðarrannsókn eða prófun á hraða sams konar bifreiðar og ákærði var
á í umrætt sinn. Vitnið sagði prófunina hafa farið þannig fram að bifreiðinni
hefði verið ekið á vegarkafla milli Garðs og Sandgerðis á um það bil 90
km/klst. Hraði bifreiðarinnar hefði verið mældur annars vegar með laser-tæki
lögreglunnar og hins vegar radar í lögreglubíl. Hraðinn sem kom fram á radarnum
og á laser hefði verið sá sami og uppgefinn hraði í bílnum sjálfum.
H læknir skýrði frá því að brotaþoli hefði við komu verið metinn af unglækni
og því hefði vitnið ekki séð brotaþola við komu. Þá hefði annar læknir saumað
brotaþola sem hefði verið blóðugur og með skurð á hægra augnloki þegar hann kom
og aumur hægra megin á nefinu. Ekki hefði verið grunur um brot en brotaþoli
hefði engu að síður farið í myndatöku á andlitinu vegna gruns um högg á andliti
þegar brotaþoli hafi skollið með höfuðið á stýri. Aðspurt kvaðst vitnið halda
að áverkar á andliti brotaþola hefðu komið eftir slíkt högg. Brotaþoli hefði
ekki lýst meðvitundarleysi en sagst vera vankaður eftir höggið.
K skýrði frá því að hann hefði unnið bíltæknirannsókn á Tesla-bifreiðinni
í tengslum við rannsókn málsins. Ekkert hefði fundist athugavert hvað varðaði
það að hindra ökumanninn í því að hafa fulla stjórn á bifreiðinni utan hjólbarðanna
sem voru nokkuð slitnir, þótt þeir væru ekki komnir niður fyrir tilskilin mörk
samkvæmt reglum. Þeir hefðu þó ekki hentað akstursaðstæðum í miklum krapa.
Bíllinn skemmdist töluvert á hægra framhorni og hjólabúnaði. Það var spurning
um ljósabúnaðinn, en ekki væri hægt að fullyrða að hann hefði ekki verið í
lagi. Fyrst og fremst væru gerðar athugasemdir við hjólbarðana sem hefðu ekki
hentað. Þeir hafi verið merktir fyrir notkun í snjó og aur en aðstæður væru
öðruvísi hér á landi en þar sem þeir hentuðu betur, t.d. í Vestur-Evrópu og
Englandi. Vandamál væri með alla hjólbarða í krapa og eftir því sem hraðinn
eykst aukast líkurnar á því að bílarnir byrji að fljóta og verði stjórnlausir
ofan á krapanum. Engin merki hefðu verið um bilun eða skyndibilun í bifreiðinni
eða lélegt ástand og þá hafi útsýnið verið í lagi.
Þann
8. desember gaf á skýrslu vitnið K og
skýrði frá því að stærð dekkja undir bifreiðinni væri ekki sú sama og getið
væri um í skráningarskírteini bifreiðarinnar. Ef stærð hjólbarða er breytt þá
breytist hraðinn ýmist til lækkunar eða hækkunar. Þegar bíllinn var fluttur inn
og nýskráður í ökutækjaskrá þá var bifreiðin á 19 tommu felgum en þegar
bifreiðin var skoðuð af vitninu hefði felgustæðin verið 21 tomma. Ummálið á
hjólbörðunum eins og þeir voru þegar ökutækið var flutt inn voru 2120,5
millimetrar en ummálið á þeim hjólbörðum sem voru undir bifreiðinni þegar
vitnið rannsakaði hana voru 5,4 millimetrum meira en upphaflegu hjólbarðarnir
sem þýðir 0,26% aukningu. Við mat á því hvort þetta hefði áhrif á
hraðaupplýsingarnar sem skynjarinn í hjólunum gefur þá verði að taka tillit til
þess hvort hjólbarðarnir voru óslitnir eða hálfslitnir. Í þessu tilfelli voru
þeir hálfslitnir og dýpt mynsturs 4-5 millimetrar en má ætla að það hafi verið
um 8 millimetrar á nýjum hjólbörðum þannig að sá litli munur, 5,4 millimetrar,
þeir „þurrkast út“ út af slitinu og hefur ekki haft nein áhrif. Aðspurt kvaðst
vitnið ekki hafa skoðað sérstaklega tæknibúnað bifreiðarinnar sem snýr að
hraðamælingu bifreiðarinnar, enda hefði það ekki verið hægt án þess að hafa
bilanagreini sem vitnið kvaðst ekki hafa haft aðgang að en í upplýsingum sem
Tesla hefur yfir að ráða eru þessar upplýsingar. Ef að búnaðurinn hefði ekki
virkað hefði bifreiðin sjálf ekki virkað og stoppað.
Vitnið Q skýrði frá því fyrir dómi að það hefði ekið á Reykjanesbrautinni 20. desember 2016 við gatnamótin hjá Álverinu og verið á 70 km hraða þegar Tesla-bifreiðin hefði komið og brunað fram úr vitninu og rétt komist fram fyrir bíl vitnisins vegna umferðar á móti. Eftir það hefði hann stungið aðrar bifreiðar af. Vitnið sagði Tesla-bifreiðina hafa verið á 90-100 km hraða við gatnamótin. Það hefði verið logn, en nokkur krapi á veginum og alveg kolniðamyrkur. Nokkrum mínútum síðar kom vitnið að slysstaðnum, en áttaði sig ekki á því að keyrt hefði verið aftan á bifreiðina sem var utan vegar.
F lögreglumaður skýrði frá því að hann hefði verið kallaður út vegna
umferðaróhapps og skrifað frumskýrslu málsins. Á vettvangi var leiðinlegt
veður, dimmt og éljagangur. Annað ökutækið var enn á Reykjanesbrautinni úti í
kanti, en hitt var utan vegar. Töluverð vegalengd hefði verið á milli bílanna.
Tilkynnt hafði verið um rauðan bíl í ofsaakstri sem hefði ekið á einn eða tvo
aðra. Síðar var tilkynnt um bíl utan vegar og hefði verið óljóst um tengslin á
milli. Vitnið kvaðst hafa rætt við ökumenn. Annar þeirra var slasaður og var
fluttur með sjúkrabíl af vettvangi.
R lögreglumaður greindi frá því að hún hefði komið að samanburðarrannsókn
vegna Tesla-bifreiðar og stjórnað hraðamælingu á Tesla-bifreið. Vitnið kvaðst
hafa stjórnað hraðaratsjánni í lögreglubifreiðinni og tónkvíslamælt hana áður
en byrjað var að mæla. Farið hefði verið á veginn milli Sandgerðis og Garðs þar
sem bifreiðinni var ekið á 80 km hraða og hún mæld bæði með laser og
hraðaratsjánni í lögreglubifreiðinni. Niðurstaðan hefði verið sú sama á báðum
mælingum sem lögreglan framkvæmdi. Vitnið svaraði því aðspurt að annar hraði en
80 km hefði ekki verið prófaður og vissi ekki hvers vegna.
III
Forsendur
og niðurstaða:
Samkvæmt
ákæru héraðssaksóknara 28. apríl 2017 er ákærða gefið að sök hegningar- og
umferðarlagabrot með því að hafa ekið bifreiðinni DL G15 (NO CO2) of hratt
miðað við aðstæður og langt yfir leyfilegum hámarkshraða vestur Reykjanesbraut
í Hafnarfiðri, á móts við Álverið í Straumsvík, tekið fram úr fjölda bifreiða
án þess að sinna aðgæsluskyldu sinni við framúrakstur, svo sem nánar er lýst í
ákæruskjalinu. Þar segir meðal annars að ákærði hafi ekið á allt að 182,74 km
hraða á klukkustund þar sem hámarkshraði var 90 km hraði á klukkustund skömmu
áður en ákærði ók hægra framhorni bifreiðarinnar DL G15 á miklum hraða aftan á
vinstra afturhorn bifreiðarinnar [...] sem
ekið var sömu akstursstefnu með þeim afleiðingum að síðarnefnda bifreiðin
hafnaði utan vegar og skemmdist og ökumaður bifreiðarinnar slasaðist.
Ákærði
neitar sök. Lýsti hann því fyrir dómi að hann hefði vandað sig við aksturinn í
umrætt sinn. Slæmt veður hefði verið, dimmt og smá slydda og sums staðar snjór
og sums staðar rigning. Búið hefði verið að skafa tvöfalda Reykjanesbrautina en
milli akreina hefði verið slabb eða mjög blautur snjór. Kvaðst ákærði hafa séð
Toyota-bifreiðina fyrir framan sig og undirbúið að skipta um akrein og aka fram
úr bifreiðinni. Hann hefði þá hnerrað skyndilega og þegar hann leit aftur upp
var bifreið hans ekki komin frá hægri akrein yfir á þá vinstri og fann ákærði
þá að annað framdekkið hefði lent í slabbinu milli akreinanna og bifreiðin
skotist aðeins aftur til hægri. Hann hefði reynt að ná bifreiðinni yfir á
vinstri akreinina en bifreiðin hefði runnið til og lent með hægra framhornið á
vinstra afturhornið á Toyota-bifreiðinni. Viðurkenndi ákærði aðspurður að hann
hefði ekið of hratt miðað við aðstæður og bætti því við að annars hefði hann
ekki misst bílinn út í slabbið og misst stjórn á honum í nokkrar sekúndur og þá
hefði óhappið ekki orðið. Þá kom fram hjá ákærða að hann hefði ekki haft neinar
forsendur til að draga í efa upplýsingar frá framleiðanda bifreiðar hans að
hann hefði ekið bifreiðinni á 116 km hraða á klukkustund skömmu fyrir óhappið,
enda hefði hann ekki verið að fylgjast með ökuhraðanum. Loks sagði ákærði það
ótrúlegt að hann hefði ekið bifreiðinni á tæplega 183 km hraða á klukkustund
nokkru fyrir áreksturinn, en hins vegar gæti vel verið að bifreiðin hefði
spólað þegar hann hnerraði og gæti það verið skýringin, enda hefðu ekki verið
aðstæður til að aka á slíkum hraða.
Ákærði
krefst aðallega sýknu af refsikröfu ákæruvaldsins, en til vara að vægustu
refsingar verði hann sakfelldur. Þá krefst ákærði þess að einkaréttarkröfu A
verði vísað frá dómi, en til vara eða lækkunar á kröfunni.
Samkvæmt
málsgögnum og framburði ákærða og vitna er upplýst og óumdeilt að ákærði ók
bifreiðinni DL G15 (NO CO2) aftan á bifreiðina [...] með þeim afleiðingum að síðarnefnda bifreiðin
hafnaði utan vegar og varð fyrir skemmdum. Þá slasaðist ökumaður síðarnefndu
bifreiðarinnar. Staðfest er með bíltæknirannsókn sem gerð var á bifreiðinni DL
G15 að ekkert hindraði ökumann bifreiðarinnar við stjórnun hennar utan hjólbarðarnir
sem voru slitnir og dýpt mynsturs allt niður í 4,0 mm í miðjum slitfleti og
gerð mynsturs sem engan vegin hentaði til aksturs í snjó og krapa. Þá segir í
skýrslu K, sem vann rannsóknina, að engin ummerki hefðu fundist um bilun í
hjólabúnaði hægra megin að framan sem skemmdist í árekstrinum eða lélegt ástand
búnaðarins í aðdraganda slyssins. Einnig var framkvæmd bíltæknirannsókn á
bifreiðinni [...]. Niðurstaða hennar
var að verulegar líkur væru á því að orsök slyssins verði ekki rakin til
ástands bifreiðarinnar. Við rannsóknina fundust ekki merki um bilun,
skyndibilun eða lélegt ástand bifreiðarinnar og var sýnileiki hennar í lagi í
aðdraganda slyssins.
Ákærða
og vitnum ber saman um það að akstursskilyrði í umrætt sinn hafi verið slæm,
myrkur, slydda, rigning og slabb eða krapi á Reykjanesbraut á leið ákærða úr
Kópavogi í Reykjanesbæ. Í málsgögnum er að finna vottorð Veðurstofu Íslands um
veður á sjálfvirkri veðurstöð í Straumsvík þann 20. desember 2016. Þar kemur
fram að klukkan 08:00 var hiti 3,7°C, sunnanvindur, vindhraði 8,3 m/s, mesti
vindhraði 10,2 m/s og mesta hviða 14,3 m/s. Klukkan 09:00 var hiti 2,5°C,
sunnanvindur, vindhraði 8,0 m/s, mesti vindhraði 8,9 m/s og mesta hviða 14,0
m/s.
Ákærði
gekkst við því fyrir dómi að hafa ekið of hratt miðað við aðstæður og valdið
slysinu af þeim sökum. Lýsti hann því að þegar hann var að fara fram úr þeirri
bifreið sem hann ók á hefði hann skyndilega hnerrað og eftir það fundið að annað
framdekkið hafði lent í slabbi sem var á milli akreina og hefði bifreiðin við
það skotist aðeins aftur til hægri. Tilraun hans til að ná bifreiðinni yfir á
vinstri akreinina til framúraksturs leiddi til þess að bifreiðin rann til og
lenti með hægra framhornið á vinstra afturhornið á Toyota-bifreiðinni. Þessi
lýsing ákærða á aðdraganda og örsökum slyssins verður ekki dregin í efa. Þykir
mega slá því föstu að ákærði hafi í umrætt sinn ekið of hratt miðað við
aðstæður og yfir leyfilegum hámarkshraða. Í öllu falli er ljóst að ákærði hafði
ekki vald á því að aka fram úr bifreiðinni á þeim hraða sem bifreið hans var á
og við þær aðstæður sem voru.
Ökumaður
bifreiðarinnar [...] lýsti því fyrir
dómi að hann hefði aldrei séð rauða sportbílinn sem ók á hann. Sagði hann að
það hefði verið eins og sprenging hefði orðið í bifreiðinni sem hefði farið út
af veginum með látum og endað nokkuð langt utan vegar. Kvaðst vitnið hafa ekið
nálægt leyfðum hámarkshraða, en verið nýbúinn að draga úr hraðanum vegna
erfiðrar færðar og hagléls. Vitnið Q var á ferð á Reykjanesbraut við Álverið á
70 km hraða á klukkustund þegar Tesla-bifreið hefði brunað fram úr bifreið
vitnisins og rétt komist fram úr henni vegna umferðar á móti. Taldi vitnið
bifreiðina hafa verið á 90-100 km hraða á klukkustund. M sagði rauðan bíl hafa
verið ekið fram úr bíl vitnisins „hægra megin“ og eftir það hefði rauða bílnum
verið ekið á víxl fram úr öðrum bílum og hefði næstum því rekist framan á aðra
sem kom á móti við Álverið. Vitnið ók á 80-90 km hraða þegar rauði bíllinn ók
framúr. Vitnið N vildi ekki ýkja en sagði rauða bílinn ekki hafa verið á lægri
hraða en 140 km hraða á klukkustund þegar bíllinn skaust framúr bíl vitnisins.
Samkvæmt þessu lýstu vitnin fyrir dómi
ofsafengnum akstri ákærða í umrætt sinn, svo ofsafengnum að ástæða þótti
til að gera lögreglunni viðvart vegna háttseminnar. Þá lýstu lögreglumennirnir O
og F að margar tilkynningar hefðu borist neyðarlínu um rauðan sportbíl í
ofsaakstri á Reykjanesbraut.
Meðal
málsgagna eru upplýsingar úr ökurita bifreiðarinnar DL G15 sem lögregla aflaði
við rannsókn málsins frá framleiðanda hennar. Sýna gögn þessi hraðamælingu á
bifreið ákærða þann 20. desember 2016 frá klukkan 08:45:39.0 til klukkan
08:50:55.5 eða í 05:16.5 mínútur. Staðfestir mælingin að áreksturinn átti sér
stað klukkan 08:50:40.5 og að á þeim tíma var hraði bifreiðarinnar 72.30 mílur
eða 116 km á klukkustund. Þá kemur einnig fram að síðasti skráði hraði
bifreiðarinnar fyrir áreksturinn hafi verið 77.5 mílur eða 124.8 km á
klukkustund. Var hraðinn skráður hálfri sekúndu fyrir fyrstu boð um
áreksturinn. Þá má sjá á sérstöku yfirliti framleiðandans yfir hraða
bifreiðarinnar að mesti mældi hraði var 113.55 mílur eða 182,74 km á
klukkustund um 15 sekúndum fyrir áreksturinn. Einnig að klukkan 08:47.12 var
hraði bifreiðarinnar 162.46 km á klukkustund, 165.52 km klukkan 08:47.13 og
162.94 km á klukkustund klukkan 08:48.32. Í skýrslu sem S sérfræðingur vann úr
gögnum framleiðandans í Exel-snið má sjá að á tímabilinu frá klukkan 08:45:39.5
til klukkan 08:50:50.5 var bifreiðinni ekið yfir leyfilegum hámarkshraða
samfellt frá klukkan 08:47.12 með einni undantekningu.
Vitni
sem áttu leið um Reykjanesbraut á sama tíma og ákærði í umrætt sinn lýstu
ofsafengnum akstri hans og glæfralegum framúrakstri. Þótt ekki verði ráðið af
framburði þeirra vitna á hvaða hraða nákvæmlega ákærði ók bifreiðinni DL G15
sýna framangreindar upplýsingar úr ökurita bifreiðarinnar að ákærði ók yfir
leyfðum hámarkshraða og oft langt yfir leyfðum hámarkshraða á Reykjanesbraut.
Um það vitna gögn sem lögregla vann við rannsókn málsins úr fyrrnefndum upplýsingum
frá framleiðanda bifreiðarinnar. Búið var til graf með kílómetra á X ás og tíma
á Y ás með brotalínu fyrir 90 km hraða leyfðan hámarkshraða. Þá liggur fyrir að
lögregla gerði við rannsókn málsins sérstaka prófun á áreiðanleika
upplýsinganna með því að mæla ökuhraða sams konar bifreiðar og fékk staðfest að
upplýsingarnar væru áreiðanlega. Renna gögn þessi stoðum undir það að akstur
ákærða hafi í umrætt sinn verið ofsafenginn og yfir leyfðum hámarkshraða.
Samkvæmt
því sem nú hefur verið rakið og framburðum vitna telur dómurinn sannað svo ekki
verði vefengt með skynsamlegum rökum að ákærði hafi ekið bifreiðinni DL G15
yfir leyfðum hámarkshraða og á allt að 182,74 km hraða á klukkustund og á 116
km hraða þegar bifreiðin lenti aftan á bifreiðinni SD D79 með þeim afleiðingum
sem lýst er í ákæru. Þá liggur fyrir að ákærði vefengdi ekki mældan ökuhraða
við áreksturinn, 116 km á klukkustund, þótt hann teldi ótrúlegt að hann hefði
ekið á tæplega 183 km hraða á klukkustund.
Háttsemi
ákærða er heimfærð til 1. mgr. 168. gr., 219. gr. og 4. mgr. 220. gr. almennra
hegningarlaga nr. 19/1940 og 1. mgr. 5. gr. , 2., 3. og 4. mgr. 20. gr. , 1.
mgr. 36. gr. b og h. liði 2. mgr. 36. gr., 2. mgr. 37. gr., sbr. 101. gr.
umferðarlaga nr. 50/1987. Í 1. mgr. 168. gr. almennra hegningarlaga segir að ef maður
raskar öryggi járnbrautarvagna, skipa, loftfara, bifreiða eða annarra slíkra
farar- eða flutningatækja, eða umferðaröryggi á alfaraleiðum, án þess að
verknaður hans varði við 165. gr., þá skuli hann sæta fangelsi allt að sex árum.
Í 2. mgr. segir að ef brot sé framið af gáleysi, þá varði það sektum eða
fangelsi allt að einu ári.
Sannað er að með aksturslagi ákærða, sem upplýsingar
bárust fyrst um þegar hann var á leið sinni vestur Reykjanesbraut skammt frá N1
í Hafnarfirði, raskaði hann umferðaröryggi á alfaraleið en fyrir liggur að
nokkur umferð var á leið ákærða, bæði í sömu akstursstefnu og úr gagnstæðri
átt. Staðfestu vitni að bifreið ákærða hefði verið ekið framúr þeim á mjög
miklum hraða þrátt fyrir erfið akstursskilyrði vegna hálku og slæms skyggnis.
Telur dómurinn að háttsemi ákærða sé réttilega heimfærð til 168. gr. almennra
hegningarlaga.
Í 4. mgr. 220. gr. laganna segir að fangelsi allt að
fjórum árum skuli sá sæta, sem í ábataskyni, af gáska eða á annan ófyrirleitinn
hátt stofnar lífi eða heilsu annarra í augljósan háska. Þá segir í 219. gr.
almennra hegningarlaga að ef tjón á líkama eða heilbrigði, slíkt sem í 218. gr.
eða 218. gr. a getur, hlýst af gáleysi annars manns varði það sektum eða
fangelsi allt að fjórum árum.
Afleiðing af akstri ákærða var með þeim hætti að
bifreið hans rakst á bifreiðina [...] sem lenti utan vegar eins og lýst er í ákæru.
Vegfarendur upplifðu sig í hættu vegna aksturs ákærða og létu lögreglu vita af
honum. Ákærða mátti vera ljóst að háttsemi hans stofnaði lífi eða heilsu
annarra í umferðinni í augljósan háska. Er háttsemi ákærða því réttilega
heimfærð til 4. mgr. 220. gr. almennra hegningarlaga en sannað er að um
ofsaakstur var að ræða þar sem umferð bíla var. Þá leiddi akstur ákærða einnig
til tjóns á líkama og heilbrigði ökumanns bifreiðarinnar [...] sem enn glímir við
afleiðingar slyssins. Er háttsemi ákærða einnig réttilega heimfærð til 219. gr.
almennra hegningarlaga. Loks er háttsemi ákærða réttilega heimfærð til
fyrrgreindra ákvæða umferðarlaga.
C
Ákærði er fæddur í júlí 1970. Samkvæmt sakavottorði ákærða gekkst hann 2. apríl 2007 undir sátt hjá lögreglustjóra um greiðslu sektar og sviptingu ökuréttar í einn mánuð fyrir brot gegn 2. mgr. 37. gr. umferðarlaga. Þá gekkst hann undir sátt 2. nóvember 2012 um greiðslu sektar fyrir tollalagabrot. Loks gekkst ákærði undir sátt hjá lögreglustjóra um greiðslu sektar og sviptingu ökuréttar í einn mánuð frá 20. desember 2016 fyrir brot gegn 1., sbr. 3. mgr. 37. gr. umferðarlaga. Með dómi þessum er ákærði sakfelldur fyrir ofsaakstur þar sem leyfður hámarkshraði var 90 km á klukkustund, fyrir að hafa raskað umferðaröryggi á alfararleið og fyrir að hafa á ófyrirleitin hátt stofnað lífi og heilsu annarra í hættu, ökumanns bifreiðarinnar [...], og annarra vegfarenda á Reykjanesbraut í augljósan háska miðað við þær aðstæður sem voru til aksturs í umrætt sinn. Þykir refsing ákærða hæfilega ákveðin fangelsi í fjóra mánuði. Fært þykir að skilorðsbinda refsinguna sem sem nánar greinir í dómsorði.
Með vísan til 101. gr. umferðarlaga nr. 50/1987 verður ákærði sviptur ökurétti í 12 mánuði frá uppsögu dómsins að telja.
D
Ökumaður bifreiðarinnar [...], A, krefst miskabóta að fjárhæð 1.000.000 króna með vöxtum samkvæmt 8. gr. laga nr. 38/2001 um vexti og verðtryggingu frá 20. desember 2016 til birtingardags ákæru, 4. maí 2017, en frá þeim degi með dráttarvöxtum samkvæmt 1. mgr. 6. gr. sömu laga til greiðsludags. Auk þess er krafist málskostnaðar.
Ákærði hefur í málinu verið sakfelldur fyrir hegningar- og umferðarlagabrot og ber hann ábyrgð á því tjóni brotaþola sem er að rekja til refsiverðrar háttsemi hans. Við slysið hlaut brotaþoli áverka á höfði og á tönnum. Er áverkum brotaþola eftirlýst í læknisvottorðum I heimilislæknis og H sérfræðilæknis á bráðamóttöku, svo og í vottorði J tannlæknis, en þar segir að ekki sé útilokað að áverkar á öðrum tönnum en þeim sem lýst er í vottorðinu komi fram síðar og þurfi þá meðhöndlunar við. Það leiði tíminn í ljós. Með því broti sem ákærði er fundinn sekur um hefur hann fellt á sig miskabótaábyrgð. Skilyrðum 1. mgr. 26. gr. skaðabótalaga er fullnægt. Við ákvörðun bóta ber að líta til þess fyrir liggur um afleiðingar af broti ákærða. Í framburði brotaþola fyrir dómi kom fram að hann væri enn að glíma við afleiðingar slyssins. Þykja miskabætur hæfilega ákveðnar 600.000 krónur. Um vexti og málskostnað kröfuhafa fer svo sem í dómsorði greinir. Bótakrafan var birt við þingfestingu á máli númer S-169/2017 þann 4. maí 2017.
E
Í ákæru héraðssaksóknara er gerð sú krafa að bifreiðin DL G15 (NO CO2) verði gerð upptæk til ríkissjóðs samkvæmt heimild í 107. gr. a umferðarlaga nr. 50/1987. Vísar ákæruvaldið til þess að öll skilyrði sem sett séu fram í ákvæðinu eigi við um ákærða, bæði ökuferil hans og það tilvik sem átti sér stað 20. desember 2016. Bendir ákæruvaldið á að ákærði hafi ítrekað gerst sekur um gróf hraðakstursbrot auk þess sem aksturinn 20. desember hafi verið sérlega vítaverður og hafi valdið slysi á fólki og tjóni á munum. Ákærði mótmælir upptökukröfunni og krefst þess að henni verði hafnað.
Samkvæmt greindu ákvæði er heimilt að gera upptækt vélknúið ökutæki sem ökuskírteini þarf til að stjórna og notað er við brot þegar um stórfelldan og ítrekaðan hraðakstur eða akstur sem telst sérlega vítaverður að öðru leyti. Í athugasemdum í frumvarpi því sem varð að lögum nr. 69/2007 um breytingu á umferðarlögum segir að tillaga um upptöku sé byggð á því að það aðhald sem ökumönnum sé veitt með því að beita refsingu og sviptingu ökuréttar vegna brota á umferðarlögum „dugi ekki alls kostar gagnvart tilteknum hópi ökumanna, tiltölulega litlum hópi þó.“ Sýnist meira þurfa að koma til með tilliti til þeirrar viðleitni að koma í veg fyrir ítrekuð brot. Er því gerð tillaga um að ákvæði verði sett í umferðarlög þess efnis að vélknúið ökutæki brotamanns verði gert upptækt, annars vegar með heimild þegar um er að ræða gróf eða ítrekuð brot á umferðarlögum, en hins vegar að skylt sé að beita upptöku þegar um er að ræða ítrekuð ölvunarakstursbrot. Þá segir að aukin heimild til að gera ökutæki upptæk sé til þess fallin að hafa fyrirbyggjandi áhrif, ekki eingöngu vegna fjárhagslegra sjónarmiða heldur einnig þannig að upptakan hafi bein áhrif á möguleika til þess að nota ökutækið, sem notað var þegar brotið var framið, við brot á ný. Sé upptakan liður í að koma í veg fyrir frekari brot.
Við munnlegan flutning málsins kom fram hjá sækjanda að ákærði hefði sjö sinnum verið tekinn fyrir hraðakstur, þar af sex sinnum hér á landi og einu sinni í Danmörku. Á sakavottorði ákærða eru skráð tvö slík hraðakstursbrot sem hann hefur gengist undir lögreglustjórasátt vegna, 2. nóvember 2012 og 20. desember 2016. Var ákærði þá tekinn við akstur bifreiðarinnar NO CO2 22. júlí 2015 á Kringlumýrarbraut á 137 km hraða á klukkustund þar sem leyfður hámarkshraði var 80 km á klukkustund. Í málsgögnum er að finna afrit af sektargerðum vegna hraðaksturs ákærða, sbr. ákvæði reglna nr. 680/2009 um sakaskrá. Um er að ræða sjö tilvik á árinu 2016, eitt frá árinu 2015 og tvö frá árinu 2014, alls 10 tilvik frá júní 2014 til desember 2016.
Heimildarákvæði 1. mgr. 107. gr. umferðarlaga nr. 50/1987, sbr. breytingu með lögum nr. 69/2007, er afar íþyngjandi svo ekki verði fastara að orði kveðið. Slík ákvæði ber að túlka þröngt. Að virtum sakarferli ákærða og upplýsingum sem liggja fyrir í málsgögnum um hraðakstursbrot ákærða á fyrrgreindu tímabili, sem staðfesta ítrekuð hraðakstursbrot ákærða án þess þó að upplýsingar liggi fyrir um það hvort að tilvikin geti talist sérlega vítaverð. Að þessu virtu þykja ekki alveg næg efni til þess að fallast á kröfu ákæruvaldsins um að bifreiðin DL G15 verði gerð upptæk til ríkissjóðs og er kröfunni hafnað.
F
Með vísan til 1. mgr. 235. gr. laga nr. 88/2008 um meðferð sakamála ber að dæma ákærða til að greiða sakarkostnað málsins. Um er að ræða kostnað vegna bíltæknirannsókna, læknisvottorða, vottorðs Veðurstofu Íslands og flutnings bifreiðar, samtals 586.532 krónur. Þá greiði ákærði þóknun skipaðra verjenda ákærða, þeirra Þórhalls Hauks Þorvaldssonar og Hauks Arnar Birgissonar lögmanna, sem er ákveðin eins og í dómsorði greinir að meðtöldum virðisaukaskatti.
Fyrir uppkvaðningu dómsins var gætt fyrirmæla 1. mgr. 184. gr. laga nr. 88/2008 um meðferð sakamála.
Óli Ingi Ólason aðstoðarsaksóknari flutti málið af hálfu ákæruvaldsins.
Dóm þennan kveður upp Jón Höskuldsson héraðsdómari.
D ó m s o r ð:
Ákærði, Magnús Ólafur Garðarsson, sæti fangelsi í fjóra mánuði. Fresta skal fullnustu refsingarinnar og skal hún falla niður að liðnum tveimur árum frá uppsögu dómsins að telja haldi ákærði almennt skilorð 57. gr. almennra hegningarlaga nr. 19/1940.
Ákærði er sviptur ökurétti í 12 mánuði frá uppsögu dómsins að telja.
Kröfu um upptöku á bifreiðinni DL G15 (NO CO2), til ríkissjóðs, er hafnað.
Ákærði greiði A 600.000 krónur með vöxtum samkvæmt 1. mgr. 8. gr. laga nr. 38/2001 um vexti og verðtryggingu frá 20. desember 2016 til 4. júní 2017, en dráttarvöxtum samkvæmt 1. mgr. 6. gr. sömu laga frá þeim degi til greiðsludags og 421.600 krónur í málskostnað.
Ákærði greiði þóknun skipaðra verjenda sinna, Þórhalls Hauks Þorvaldssonar lögmanns og Hauks Arnar Birgissonar lögmanns, 1.517.760 krónur til hvors þeirra og 586.532 krónur í annan sakarkostnað.
Jón Höskuldsson