- Aðild
- Skuldamál
- Tómlæti
D Ó M U R
Héraðsdóms Reykjaness föstudaginn 26. október 2018 í máli
nr. E-154/2018:
Landsbankinn hf.
(Hannes Júlíus Hafstein lögmaður)
gegn
X
(Stefán Reykjalín lögmaður)
Mál þetta, sem dómtekið var 18. september sl., er höfðað 29. janúar 2018.
Stefnandi er Landsbankinn hf., Austurstræti 11, Reykjavík.
Stefndi er X, […], […].
Stefnandi krefst þess að stefndi greiði honum 4.751.999 krónur með dráttarvöxtum samkvæmt 1. mgr. 6. gr. laga nr. 38/2001 um vexti og verðtryggingu frá 21. febrúar 2014 til greiðsludags. Þá er krafist málskostnaðar.
Stefndi krefst aðallega sýknu af kröfum stefnanda, en til vara að kröfur stefnanda verði lækkaðar. Í báðum tilvikum er krafist málskostnaðar.
I
Þann 14. október 1981 stofnaði stefndi tékkareikning númer […] við útibú stefnanda að Hagatorgi í Reykjavík. Í stefnu segir að stefndi hafi fengið yfirdráttarheimild á reikninginn sem hafi runnið út án þess að skuld á reikningnum væri greidd og hafi reikningnum verið lokað í kjölfarið. Skuldin hafi þá numið stefnufjárhæð málsins auk dráttarvaxta og kostnaðar. Í greinargerð stefnda segir að hann hafi hvorki heimilað né óskað eftir yfirdráttarheimild á reikningnum, líkt og ranglega sé haldið fram í stefnu. Lýsir stefndi því að hann hafi frá árinu 2006 átt í viðskiptum með gjaldmiðlaskiptasamninga við forvera stefnanda. Viðskiptin hafi ekki skilað hagnaði.
Á árinu 2007
skrifuðu Landsbanki Íslands hf. og stefndi undir samning um stýringu á
skammtímastöðutöku í gjaldmiðlum. Í 2. gr. samningsins segir að markmið hans
hafi verið að vinna til baka tap sem hafði myndast vegna fyrri afleiðuviðskipta
aðila og skyldu allar færslur í íslenskum krónum fara í gegnum fyrrnefndan
tékkareikning stefnda. Í greinargerð stefnda segir að þegar liðið hafði á árið
2008 hafi lítið gengið með að snúa vörn í sókn en þá hafði stefndi greitt um
11.000.000 króna til stefnanda vegna taps á afleiðusamningum auk þess að hafa
yfirtekið og greitt skuld sonar síns vegna sambærilegra viðskipta að fjárhæð
5.700.000 krónur. Einnig segir að þrátt fyrir að stefndi hafi ítrekað vísað til
markmiða áðurnefnds samnings, það er að fara varlega í allar stöðutökur, þá
hafi umsjónarmenn samningsins tekið nokkuð stóra afleiðustöðu 7. október 2008.
Sama dag hafi forveri stefnanda orðið gjaldþrota. Tap þessara viðskipta hafi
samtals numið 3.490.156 krónum. Stefndi hafi enga vitneskju haft um þessa
stöðutöku fyrr en eftir á.
Þann 2. febrúar
2009 var stefnda tilkynnt um óheimilan yfirdrátt á reikningi númer […] að fjárhæð 3.735.202 krónur, þar af væru 135.202 krónur umfram heimild.
Þá fékk stefndi sent innheimtubréf, dagsett 17. ágúst 2010, sem stefndi svaraði
með tölvupósti 31. ágúst 2010. Mótmælti stefndi kröfunni. Óskaði stefndi
jafnframt eftir fresti til að skila skýringum sínum vegna málsins. Þann 26.
janúar 2011 gaf Nýi Landsbanki Íslands hf. (NBI hf.) út stefnu á hendur
stefnda, sem þingfesta skyldi 9. mars sama ár, þar sem krafist var greiðslu
skuldar að fjárhæð 4.751.999 krónur, eða sömu fjárhæðar og stefnandi krefst
greiðslu á í máli því sem hér er til úrlausnar. Ítrekaði stefndi fyrri mótmæli
varðandi fjárkröfuna og kvaðst ekki hafa stofnað til yfirdráttar á reikningnum.
Mótmæli stefnda koma fram í tölvupósti 24. febrúar 2011 til lögfræðiinnheimtu
bankans og í bréfi 28. febrúar 2011. Í svari stefnanda var stefnda bent á að
mæta við þingfestingu málsins og óska eftir fresti sem aðilar myndu nýta til að
fara yfir málið. Dómsmálið mun hafa verið fellt niður að ósk stefnanda 4. maí
2011 og kveðst stefndi ekki hafa heyrt af því fyrr en hann fékk ítrekun frá
stefnanda með bréfi 13. desember 2017.
Stefna í máli þessu
var birt á heimili stefnda 29. janúar 2018 og var málið þingfest 21. febrúar
sama ár.
II
Svo sem fram er komið krefst stefnandi í máli þessu greiðslu skuldar að fjárhæð 4.751.999 krónur, að viðbættum dráttarvöxtum, sem hann segir vera uppsafnaða skuld á tékkareikningi stefnda sem hafi verið yfirdreginn. Var reikningum lokað 30. júlí 2010. Kveðst stefnandi byggja kröfu sína á reglum samninga- og kröfuréttar um loforð og efndir fjárskuldbindinga. Krefst stefnandi dráttarvaxta af stefnufjárhæðinni frá 21. febrúar 2014 eða fjórum árum fyrir þingfestingardag málsins. Krafa um dráttarvexti er byggð á lögum nr. 38/2001 um vexti og verðtryggingu. Krafa stefnanda um málskostnað er reist á 1. mgr. 130. gr. laga nr. 91/1991 um meðferð einkamála og krafa um virðisaukaskatt á málflutningsþóknun á lögum nr. 50/1988 um virðisaukaskatt.
Um aðild Landsbankans hf. segir stefnandi að Fjármálaeftirlitið hafi með heimild í 100. gr. a í lögum nr. 161/2002 um fjármálafyrirtæki, sbr. 5. gr. laga nr. 125/2008 um heimild til fjárveitinga úr ríkissjóði vegna sérstakra aðstæðna á fjármálamarkaði o.fl., tekið þá ákvörðun að ráðstafa eignum og skuldum Landsbanka Íslands hf. til Nýja Landsbanka Íslands hf. Ákvörðun Fjármálaeftirlitsins um ráðstöfun eigna og skulda Landsbanka Íslands hf., kt. […], til Nýja Landsbanka Íslands hf., kt. […], nú Landsbankinn hf., sé dagsett 9. október 2008.
III
Stefndi
kveður meinta skuld hans við stefnanda til komna vegna afleiðuviðskipta stefnda
við forvera stefnanda, LBI ehf. (áður Landsbanki Íslands hf.), sem jafnan hafi
verið kallaður gamli Landsbankinn. Í kjölfar efnahagshremminganna á síðari
hluta ársins 2008 hafi stjórn LBI ehf. (þá Landsbanki Íslands hf.) verið vikið
frá af Fjármálaeftirlitinu og bankanum skipuð skilanefnd enda hafi bankinn
verið gjaldþrota. Sú ráðstöfun hafi einnig leitt af sér uppskiptingu bankans í
stefnanda, þá Nýi Landsbanki Íslands hf., sem hafi tekið við tilteknum eignum
og skuldum gamla bankans. Skipting þessi hafi verið grundvölluð á ákvörðunum
Fjármálaeftirlitsins, fyrst 9. október 2008, auk nokkurra síðari ákvarðana sem
hafi breytt upphaflegu ákvörðuninni.
Upphafleg
ákvörðun Fjármálaeftirlitsins hafi meðal annars kveðið á um að stefnandi skyldi
yfirtaka réttindi og skyldur forvera síns samkvæmt afleiðusamningum, sbr. 2.
málslið 7. töluliðar ákvörðunarinnar. Ákvörðuninni hafi verið breytt 12.
október 2008 á þann veg að málsliður þessi hafi verið felldur brott. Með síðari
ákvörðuninni hafi stefnandi hvorki yfirtekið réttindi né skyldur samkvæmt
afleiðusamningum. Þann 19. október 2008 hafi endanlega verið tekin af öll
tvímæli um hjá hvorum, gamla eða nýja bankanum, réttindi og skyldur samkvæmt
afleiðusamningum ættu að liggja og hafi þá ekki verið nokkur vafi á að þessi
réttindi og skyldur hafi tilheyrt gamla bankanum. Með síðarnefndu ákvörðuninni
hafi einnig verið gerð sú breyting á ákvörðuninni frá 12. október að hún hefði
afturvirkt gildi frá 9. október. Af þessu leiði að stefnandi hafi aldrei átt
réttindi og skyldur samkvæmt afleiðusamningum.
Þann
21. október 2008 hafi verið skuldfærð krafa á reikning stefnda vegna
afleiðusamninga sem hafi myndað óheimilan yfirdrátt sem sé grundvöllur kröfu
stefnanda í málinu. Stefnandi hafi hvorki þá né hafi hann nokkurn tíma átt
kröfur á grundvelli afleiðusamninga. Þannig sé ljóst að þegar reikningur
stefnda hafi verið yfirdreginn hafi það verið gamli Landsbankinn sem hafi átt
réttindi og skyldur á grundvelli afleiðusamninga sem gerðir hafi verið við hann
fyrir fall bankans. Stefnandi hafi því ekki haft heimild til að skuldfæra kröfu
vegna afleiðusamninga sem ekki hafi tilheyrt stefnanda á reikning stefnda. Af
því leiði jafnframt að stefnandi hafi ekki haft heimild til að búa til
yfirdrátt á reikninginn vegna afleiðuviðskipta sem hafi verið stefnanda
óviðkomandi. Þá hafi gamli Landsbanki Íslands hf. ekki haft heimild til að
mynda skuld á innlánsreikningi stefnda hjá stefnanda.
Af
öllu þessu leiði að óumdeilt sé að stefnandi hafi ekki átt kröfu á grundvelli
afleiðusamninga sem gerðir hafi verið við forvera hans og því hafi stefnandi
ekki getað myndað yfirdrátt á reikningnum til greiðslu á samningsskuldbindingu
sem ekki tilheyrði honum. Af þessum sökum beri að sýkna stefnda á grundvelli
aðildarskorts.
Verði
ekki fallist á kröfu stefnda um sýknu vegna aðildarskorts kveðst stefndi byggja
kröfu sína um sýknu einnig á því að hann hafi ekki veitt heimild fyrir því að
stofnað yrði til yfirdráttar á þeim innlánsreikningi sem um ræðir. Heimildir
þær sem stefnandi hafi haft til að binda stefnda án hans samþykkis séu tæmandi
taldar upp í samningi um stýringu. Líkt og þar komi fram hafi gamla
Landsbankanum verið veitt heimild til að stofna til nýrra afleiðusamninga og
loka þeim og þannig veitt heimild til að taka ákvarðanir um einstaka samninga
og undirrita þá fyrir hönd stefnda. Ekki sé hægt að túlka ákvæði samningsins á
þann veg að gamla Landsbankanum, hvað þá stefnanda, hafi verið heimilt að
stofna til yfirdráttar heldur hefði stefndi alltaf þurft að veita samþykki sitt
fyrir slíkri íþyngjandi aðgerð. Hafi stefndi aldrei veitt heimild fyrir því að
draga mætti á reikninginn eða sótt sérstaklega um yfirdráttarheimild á
reikninginn. Sýni yfirlit fyrir reikninginn stöðu hans frá 1. október 2008 til
24. nóvember sama ár og komi þar fram að yfirdráttarheimild sé 0 krónur. Í
stefnu sé haldið fram að yfirdráttarheimild hafi runnið út en hið rétta sé að
henni hafi aldrei verið til að dreifa þar sem stefndi hafi hvorki óskað eftir
né heimilað yfirdrátt á reikninginn.
Stefndi
kveðst telja ljóst að orðalag fyrrnefnds stýringarsamnings þess efnis að
færslur skuli fara í gegnum reikninginn feli ekki í sér heimild til að mynda
skuld á reikningnum. Í því felist einvörðungu að sé innstæða á reikningnum
skuli skuldfæra af reikningnum og hagnað skuli greiða út á þann reikning.
Stefndi telji tilefni til að árétta að óskýrleika í samningsskilmálum, sem séu
samdir af fjármálafyrirtæki, beri að túlka viðkomandi fjármálafyrirtæki í óhag,
sérstaklega þegar aðstöðumunurinn sé jafn mikill og í máli þessu. Beri að sýkna stefnda
enda hafi hann ekki gefið samþykki sitt fyrir yfirdrætti á reikningnum.
Auk þess sem nú sé
fram komið byggi stefndi á því að forveri stefnanda hafi fellt
afleiðusamningana úr gildi. Þannig hátti til að forveri stefnanda hafi sent
tölvubréf á viðskiptamenn sína 16. október 2008 þar sem tiltekið sé að í
samræmi við ákvörðun Fjármálaeftirlitsins 13. október 2008 liggi réttindi og
skyldur vegna afleiðusamninga áfram hjá Landsbanka Íslands hf. Einnig að
óbreyttu liggi fyrir að umræddum afleiðusamningum verði lokað. Í því felist
meðal annars að sjóðstreymis- og gengisvarnir á lána- og eignasöfnum
viðskiptavina falli niður. Í kjölfarið muni afleiðustöður í hagnaði mynda kröfu
viðskiptavinar á Landsbanka Íslands hf., en tapstöður myndi kröfu Landsbanka
Íslands hf. á viðskiptavini. Leitast verði við að samræma aðgerðir viðskiptabankanna
til að tryggja að allir viðskiptavinir njóti sömu málsmeðferðar. Með bréfi
þessu hafi forveri stefnanda gefið út með skýrum hætti að ekki verði staðið við
skyldur Landsbanka Íslands hf. samkvæmt afleiðusamningum og hafi því verið
óhjákvæmilegt að líta svo á að þeim hafi verið rift, sem hafi haft þau áhrif að
þeir hafi fallið niður án greiðslu. Hafi stefndi haft réttmætar væntingar til
að framvegis myndi stefnandi hvorki efna afleiðusamninga af sinni hálfu né
ætlast til efnda af hálfu þeirra sem hafi verið aðilar að slíkum samningum og
þar með fellt samningana úr gildi hafi stefnandi þaðan af síður haft heimild
til að draga síðar á reikning stefnda og því beri sömuleiðis að sýkna stefnda á
þessum grundvelli.
Verði ekki fallist
á framangreindar málsástæður um sýknu kveðst stefndi byggja á því að krafa
stefnanda sé fyrnd. Óumdeilanlegt sé að stefndi hafi ekki heimilað yfirdrátt á
reikning sinn og hafi stefnandi því ekki haft heimild til að breyta kröfu á
grundvelli afleiðusamnings í yfirdrátt. Verði því að líta til fyrningarfrests
upphaflegrar skuldbindingar. Ítrekað sé að meint krafa stefnanda sé vegna
afleiðusamninga sem stefndi hafi gert við forvera stefnanda. Almennur fyrningar-frestur
krafna sé fjögur ár, sbr. 3. gr. laga nr. 150/2007 um fyrningu kröfuréttinda.
Stefndi telji fyllilega ljóst að afleiðusamningar falli ekki undir neitt ákvæði
framangreindra laga sem kveði á um lengri fyrningarfrest. Krafa stefnanda, hafi
hann nokkurn tímann átt kröfu, fyrndist því ekki seinna en á árinu 2012. Gildi
einu þótt stefnandi hafi höfðað mál á hendur stefnda vegna sama sakarefnis enda
hafi hann fellt málið niður og efnisdómur ekki gengið. Mál þetta sé höfðað
töluvert síðar en sex mánuðum eftir að hið fyrra mál hafi verið fellt niður. Sé
því ljóst að fyrri málshöfðun hafi ekki haft þau réttaráhrif að nýr
fyrningarfrestur hafi hafist.
Verði krafan ekki
talin fyrnd í heild sinni kveðst stefndi byggja á því að hluti hennar, sem nemi
samningsvöxtum, sé fyrndur. Ljóst sé að 10 ára fyrningarfrestur peningalána
gildi ekki um vexti eða verðbætur. Engu breyti þótt þeir hafi verið skuldfærðir
á sama reikning og upphafleg skuld. Geti krafa stefnanda því aldrei verið hærri
en 3.487.732 krónur. Þetta sé sú fjárhæð sem hafi verið yfirdregin á
reikningnum 21. október 2008.
Eins og fram hafi
komið hafi stefnandi höfðað mál vegna sömu kröfu á árinu 2010 en hafi fellt
málið niður í kjölfar samskipta stefnanda og stefnda. Tæpum sjö árum eftir að
fyrra málið hafi verið fellt niður hafi stefnandi ítrekað bréf sem hafi verið
sent 18. ágúst 2010. Það fái ekki staðist. Hefði stefnandi viljað halda meintum
rétti sínum til streitu hefði hann átt að halda áfram með fyrra málið. Þess í
stað hafi stefnandi höfðað mál á ný á hendur stefnda sjö árum eftir að fyrra
málið hafi verið fellt niður. Það sé alveg ljóst að á þessum tíma sem liðið
hafi frá því að fyrra málið var fellt niður hafi stefnandi glatað rétti sínum
vegna tómlætis.
Eftir meginreglum
kröfuréttar geti annar samningsaðili glatað rétti til að bera fyrir sig vanefnd
eða annað réttarbrot viðsemjanda síns ef athugasemdum er ekki hreyft af slíku
tilefni án ástæðulauss dráttar. Stefnandi sé fjármálafyrirtæki og hafi
lánastarfsemi að atvinnu. Stefnanda hafi verið kunnugt um ætlaða kröfu sína á
árinu 2008 og höfðað mál tveimur árum síðar, en felldi það niður, og höfðaði
svo aftur mál sjö árum síðar, rétt tæpum 10 árum eftir að ætluð krafa hafi
stofnast. Þannig sé ljóst að stefnandi hafi ekki haldið fram rétti sínum án
ástæðulauss dráttar. Raunar telji stefndi atvik sýna að stefnandi hafi litið
svo á að mál væru uppgerð og lokið milli aðilanna með niðurfellingu málsins á
árinu 2011, enda hafi samskipti aðila ekki gefið annað til kynna. Stefndi hafi
þannig frá því að fyrra málið hafi verið fellt niður lifað í þeirri trú að mál
þetta heyrði sögunni til. Því hafi „ítrekunarbréf“ stefnanda komið stefnda í
opna skjöldu. Að mati stefnda sé ljóst að stefnandi hafi sýnt af sér stórfellt
tómlæti, einkum með hliðsjón af réttmætum væntingum stefnda, þannig að hann
hafi glatað rétti sínum, hafi sá réttur nokkur tímann verið fyrir hendi.
Verði ekki fallist
á kröfur stefnda um sýknu krefst stefndi þess að kröfur stefnanda verði
lækkaðar. Því til stuðnings vísi stefndi til framangreindrar umfjöllunar um
tómlæti stefnanda og réttmætar væntingar stefnda um að í niðurfellingu fyrra
máls stefnanda hafi falist endanleg málalok. Fyllilega ósanngjarnt sé að
stefndi verði látinn bera hallann af þessu tómlæti einn. Megi af þessu tilefni
vísa til 33. og 36. gr. laga nr. 7/1936 um samningsgerð, umboð og ógilda löggerninga
og byggi stefndi á því að víkja skuli skuldbindingu hans til hliðar að hluta
þar sem það væri bæði ósanngjarnt og andstætt góðri viðskiptavenju að bera
fyrir sig meintan yfirdrátt að öllu leyti eftir þetta mikla tómlæti sem
stefnandi hefur sýnt. Þá bendi stefndi jafnframt á að stefnandi krefjist
dráttarvaxta í fjögur ár. Sé þessi krafa ein birtingarmynd þeirrar ósanngirni
sem felist í kröfugerð stefnanda. Telji stefndi ekki tilefni til annars, verði
á annað borð fallist á kröfur stefnanda, en að upphafsdagur dráttarvaxta miðist
í fyrsta lagi við málshöfðun.
Stefndi geri kröfu
um málskostnað sér að skaðlausu og telji fullt tilefni til að vísa til 1. og 2.
mgr. 131. gr. laga nr. 91/1991 um meðferð einkamála.
Hvað lagarök varðar
vísar stefndi til almennra reglna samninga- og kröfuréttar, laga nr. 150/2007
um fyrningu kröfuréttinda, laga nr. 108/2007 um verðbréfaviðskipti, laga nr.
7/1936 um samningsgerð, umboð og ógilda löggerninga og laga nr. 91/1991 um
meðferð einkamála.
IV
Í
máli þessu krefst stefnandi þess að stefndi greiði sér skuld að fjárhæð
4.751.999 krónur sem stefnandi kveður vera yfirdráttarskuld á tékkareikningi
stefnda númer […] við útibú
stefnanda við Hagatorg í Reykjavík. Reikningnum hafi verið lokað 30. júlí 2010
og þá hafi reikningurinn verið yfirdreginn um stefnufjárhæð málsins. Stefndi
krefst sýknu og byggir einkum á aðildarskorti til sóknar og að stefnandi hafi
ekki haft heimild til að yfirdraga reikninginn. Þá vísar stefndi einnig til
þess að krafa stefnanda, hafi hún verið til, sé fyrnd og enn fremur til þess að
stefnandi hafa glatað rétti sínum til að fá skuldina greidda vegna tómlætis.
Hinn
9. október 2008 tók Fjármálaeftirlitið ákvörðun um ráðstöfun eigna og skulda
Landsbanka Íslands hf. til Nýja Landsbanka Íslands hf. Byggðist ákvörðunin á
100. gr. a í lögum nr. 161/2002 um fjármálafyrirtæki, sbr. 5. gr. laga nr.
125/2008 um heimild til fjárveitingar úr ríkissjóði vegna sérstakra aðstæðna á
fjármálamarkaði o.fl. Í 2. málslið 7. tölulið 1. mgr. ákvörðunarinnar kemur
fram að Nýi Landsbanki Íslands hf. taki yfir réttindi og skyldur Landsbanka
Íslands hf. meðal annars samkvæmt afleiðusamningum. Í lok ákvörðunarinnar kemur
fram að reynist hún byggjast á ófullnægjandi eða röngum upplýsingum um
málsatvik eða aðrar forsendur ákvörðunarinnar brygðust verulega gæti
Fjármálaeftirlitið gert hvers konar breytingar á ákvörðuninni, þar með talið
fellt hana úr gildi í heild eða að hluta.
Hinn
12. október 2008 tók Fjármálaeftirlitið ákvörðun um breytingu á framangreindri
ákvörðun eftirlitsins 9. október 2018. Í forsendum ákvörðunarinnar 12. október
2008 segir að nú liggi fyrir að Nýja Landsbankanum hf. sé af ýmsum veigamiklum
ástæðum ekki mögulegt að taka við réttindum og skyldum samkvæmt þeim
afleiðusamningum sem ráð hafi verið fyrir gert í fyrri ákvörðun. Sé það því mat
Fjármálaeftirlitsins að nauðsyn beri til að taka nýja ákvörðun þess efnis að
Nýi Landsbanki Íslands hf. yfirtaki ekki réttindi og skyldur samkvæmt
afleiðusamningum sem Landsbanki Íslands hf. hafi verið aðili að. Því var
felldur úr gildi fyrrnefndur 2. málsliður 7. töluliðar 1. mgr. ákvörðunarinnar
frá 9. október 2008. Hin breytta ákvörðun tók gildi í lok dags 12. október
2008. Enn var gerð breyting á upphaflegri ákvörðun 19. október 2008. Í þeirri
ákvörðun segir: „Ákvörðunin frá 9. október 2008, ásamt fyrstu
breytingarákvörðun frá 12. október 2008, er nú jafnframt staðfest með áorðnum
breytingum sem gildandi ákvörðun um ráðstöfun eigna og skulda.“
Af
framangreindu má ráða að þegar mál þetta var höfðað var Landsbanki Íslands hf.,
kt. […], eigandi krafna vegna
afleiðusamninga þeirra sem sá banki hafði gert, en ekki stefnandi málsins,
Landsbankinn hf. (áður Nýi Landsbanki Íslands hf.), kt. […].
Hvað sem þessu líður liggur fyrir að málsgrundvöllur stefnanda er ekki byggður
á því að aðilar hafi gert með sér afleiðusamninga og fyrir hendi sé skuld vegna
þeirra, heldur því að stefndi standi í yfirdráttarskuld við stefnanda. Er
yfirdráttarskuldin sögð vegna tékkareiknings númer […].
Samkvæmt þeim ákvörðunum Fjármálaeftirlitsins sem gerð er grein fyrir hér að
framan var bankareikningum, eignum á þeim og skuldum, ráðstafað frá Landsbanka
Íslands hf. til hins nýja Landsbanka. Þegar tékkareikningur stefnda var
yfirdreginn 21. október 2008 var hann því vistaður hjá stefnanda, Nýja
Landsbanka Íslands hf., sem skuldfærði reikninginn um 3.414.000 krónur.
Fyrrgreindar ákvarðanir Fjármálaeftirlitsins frá 9. og 12. október 2008 geta
ekki breytt því að tékkareikningurinn, og þar með hugsanleg skuld á honum, var
kominn á hendi stefnanda við skuldfærsluna. Er samkvæmt þessu ekki unnt að
fallast á það að stefnandi eigi ekki aðild að málinu.
Stefnandi
byggir sem fyrr segir kröfu sína á því að stefndi standi í skuld við sig vegna
yfirdráttar á tékkareikningi númer […]
við útibú stefnanda við Hagatorg í Reykjavík. Er höfuðstóll skuldarinnar sagður
nema 4.751.999 krónum. Segir í stefnu að stefndi hafi fengið yfirdráttarheimild
á reikninginn sem hafi runnið út án þess að skuld á reikningum væri greidd.
Fjármálafyrirtæki
hafa ekki heimild til að stofna til skuldar á hendur reikningseiganda
bankareiknings með því að yfirdraga bankareikninga að vild. Ekki verður þannig
stofnað til fjárkröfu á grundvelli yfirdráttar á bankareikningi nema skuldari
hafi sjálfur fallist á eða óskað eftir að reikningur sé yfirdreginn og skuld
þannig mynduð.
Meðal
málsgagna er samningur um stýringu á skammtímastöðutöku í gjaldmiðlum á milli
forvera stefnanda og stefnda frá byrjun október 2007. Gildir samningurinn í
hálft ár og var markmið hans að vinna til baka tap sem varð vegna skammtímastöðutöku
á tímabilinu frá september 2005 til ágúst 2006, en tapið nam átta milljónum
króna. Skyldi bankinn annast stýringu á gjaldmiðlaskiptasamningnum í samræmi
við tiltekinn ramma sem markaður var í samningnum. Þá segir að
gjaldmiðlaskiptasamningnum verði stýrt með framvirkum samningum, valréttar-samningum
eða öðrum afleiðusamningum og eða samsetningu slíkra samninga. Tekið er fram í
samningnum að allar færslur í íslenskum krónum, tengdar samningnum, muni fara í
gegnum reikning stefnda númer […].
Á yfirliti yfir reikninginn fyrir tímabilið frá 1. október til og með 24.
nóvember 2008 má sjá að yfirdráttarheimild reikningsins er 0 krónur, en eins og
fram er komið var reikningurinn yfirdreginn þann 21. október 2008 um 3.414.000
krónur.
Að
mati dómsins hafa ekki verið lögð fram nein gögn sem rennt geta stoðum undir
það að stefndi hafi óskað eftir eða samþykkt að fyrrnefndur reikningur yrði
yfirdreginn, hvort sem er vegna vanskila á grundvelli afleiðusamninga eða
annarra viðskipta sem hann kann að hafa átt við stefnanda. Skortir þannig á að
fyrir hendi sé lögmætur grundvöllur fyrir þeirri fjárkröfu sem stefndi er
krafinn um í málinu.
Eins
og áður er fram komið liggur fyrir að stefnandi hefur áður krafið stefnda um
greiðslu á sömu kröfu. Hinn 26. janúar 2011 gaf stefnandi út stefnu á
hendur stefnda, sem þingfesta skyldi 9. mars sama ár. Þar var krafist greiðslu yfirdráttar-skuldar
að fjárhæð 4.751.999 krónur. Stefndi mótmælti kröfunni og kvaðst ekki hafa
stofnað til yfirdráttar. Málið mun hafa verið fellt niður 4. maí 2011 og kveðst
stefndi ekki hafa heyrt af málinu fyrr en hann fékk ítrekun frá stefnanda með
bréfi 13. desember 2017 eða sex og hálfu ári síðar. Fallist er á það með
stefnda, að með tilliti til forsögu málsins og
málsatvika, hafi stefndi mátt hafa réttmætar væntingar til þess að stefnandi
myndi ekki innheimta kröfuna eftir að fyrra mál aðila var fellt niður. Verður
með sama rökstuðningi að telja að stefnandi hafi sýnt verulegt tómlæti gagnvart
stefnda og glatað rétti sínum til heimtu kröfunnar.
Samkvæmt
því sem nú er fram komið ber að sýkna stefnda af kröfum stefnanda. Að fenginni
þeirri niðurstöðu þykir óþarft að fjalla um aðrar málsástæður að baki
sýknukröfu stefnda. Sama á við um sjónarmið að baki kröfu hans um lækkun
dómkröfunnar.
Eftir
úrslitum málsins og með vísan til 1. mgr. 130. gr. laga nr. 91/1991 um meðferð
einkamála verður stefnanda gert að greiða stefnda málskostnað sem þykir
hæfilega ákveðinn 1.200.000 króna að meðtöldum virðisaukaskatti. Ekki þykja
vera alveg næg efni til þess að dæma álag á málskostnað.
Jón
Höskuldsson héraðsdómari kveður upp dóm þennan. Fyrir uppkvaðningu dómsins var
gætt fyrirmæla 1. mgr. 115. gr. laga nr. 91/1991 um meðferð einkamála.
D ó m s o r ð:
Stefndi,
X, skal vera sýkn af kröfum stefnanda, Landsbankans hf.
Stefnandi
greiði stefnda 1.200.000 króna í málskostnað.
Jón
Höskuldsson