- Játningarmál
D
Ó M U R
Héraðsdóms Reykjaness þriðjudaginn
30. apríl 2019 í máli nr. S-111/2019:
Ákæruvaldið
(Alda Hrönn Jóhannsdóttir
aðstoðarsaksóknari)
gegn
Maziar Kazemi
(Halldóra Aðalsteinsdóttir lögmaður)
Mál þetta, sem var tekið til dóms 3. apríl 2019, höfðaði
lögreglustjórinn á Suðurnesjum með ákæru 18. febrúar 2019, á hendur Maziar
Kazemi, [...],
írönskum ríkisborgara;
,,fyrir skjalafals og brot á lögum um útlendinga, með því
að hafa, laugardaginn 13. október 2018, framvísað við landamæragæslu í flugstöð
Leifs Eiríkssonar, í blekkingarskyni, er hann kom til landsins frá Madrid,
Spáni, með flugi [...], breytifölsuðu vegabréfi frá Rúmeníu, ánöfnuðu [...], fd. [...], nr. [...] með
gildistíma 11.10.2010 til 11.10.2020 en ákærði hafði jafnframt í vörslum sínum
grunnfalsað rúmenskt kennivottorð, nr. [...], ánafnað sama aðila, með gildistíma frá 31.07.2017
til 30.07.2027.
Telst þessi háttsemi ákærða varða við 1. mgr. 155. gr.
almennra hegningarlaga nr. 19/1940 og h. lið 2. mgr. 116. gr. um útlendinga nr.
80/2016.
Þess er krafist að ákærði verði dæmdur til refsingar og
til greiðslu alls sakarkostnaðar.“
Af hálfu ákærða er krafist vægustu refsingar sem lög
leyfa. Þá gerir verjandi kröfu um hæfilega þóknun sér til handa vegna starfa á
rannsóknarstigi og fyrir dómi.
Við
þingfestingu máls þessa játaði ákærði brot sitt án undandráttar. Játning ákærða
fær stoð í gögnum málsins. Samkvæmt því þykir sannað að ákærði hafi gerst sekur
um þá háttsemi sem honum er gefin að sök í ákæru og þar er réttilega heimfærð
til refsiákvæða. Farið var með mál þetta samkvæmt 164. gr. laga nr. 88/2008 um
meðferð sakamála og var það tekið til dóms án frekari sönnunarfærslu er
sækjanda og verjanda ákærða hafði verið gefinn kostur á að tjá sig um
lagaatriði máls og ákvörðun viðurlaga.
Sakavottorð
ákærða liggur ekki frammi í málinu. Engra gagna nýtur við um að ákærði hafi
áður gerst sekur um refsiverða háttsemi. Verður við ákvörðun refsingar tekið
mið af þeirri staðreynd, sem og skýlausri játningu ákærða.
Af gögnum málsins verður ekki ráðið að
ákærði geti talist hafa stöðu flóttamanns. Eins og málið liggur fyrir þykja því
ekki vera efni til þess að víkja frá fastmótaðri dómvenju í málum sem þessu. Samkvæmt því sem að framan greinir, sbr. 77. gr.
almennra hegningarlaga nr. 19/1940, þykir refsing ákærða réttilega ákveðin
fangelsi í 30 daga.
Samkvæmt
1. mgr. 235. gr. laga nr. 88/2008 um meðferð sakamála verður ákærði dæmdur til
að greiða sakarkostnað málsins, sem er þóknun skipaðs verjanda hans á
rannsóknarstigi og fyrir dómi, Halldóru Aðalsteinsdóttur lögmanns, er hæfilega
þykir ákveðin 147.560 krónur að meðtöldum virðisaukaskatti.
Margrét
Halldóra Hallgrímsdóttir, aðstoðarmaður dómara, kveður upp dóm þennan.
DÓMSORÐ:
Ákærði, Maziar Kazemi, [...], sæti fangelsi í 30 daga.
Ákærði
greiði þóknun skipaðs verjanda síns, Halldóru Aðalsteinsdóttur lögmanns, 147.560
krónur að virðisaukaskatti meðtöldum.
Margrét Halldóra Hallgrímsdóttir