- Ávana- og fíkniefni
- Hraðakstur
- Fangelsi
- Svipting ökuréttar
- Umferðarlagabrot
- Útivist
- Vörslur
- Ökuréttarsvipting
D Ó M U R
Héraðsdóms Reykjavíkur 12.
september 2018 í máli nr. S-95/2018:
Ákæruvaldið
(Margrét
Herdís Jónsdóttir saksóknarfulltrúi)
gegn
Guðmundi
Kristjáni Kristjónssyni
Mál þetta, sem dómtekið var í dag, er höfðað
með ákæru, útgefinni af lögreglustjóranum á höfuðborgarsvæðinu 20. febrúar
2018, á hendur Guðmundi Kristjáni Kristjónssyni, kt. 000000-0000, Sólheimum 23,
Reykjavík,
I.
Fyrir umferðarlagabrot árið 2017 með því að
hafa:
Föstudaginn 15. janúar, ekið bifreiðinni [---],
norður Vesturlandsveg, í Hvalfjarðarsveit, sviptur ökurétti, á 115 km hraða á
klukkustund þar sem leyfður ökuhraði var 90 km á klukkustund.
Telst þetta varða við 2. mgr. 37. gr. og 1.
mgr. 48. gr., sbr. 1. mgr. 100. gr. umferðarlaga nr. 50/1987.
II.
Fyrir umferðarlagabrot og
fíkniefnalagabrot árið 2017 með því að hafa:
Fimmtudaginn 20. júlí ekið bifreiðinni [---],
sviptur ökurétti og óhæfur um að stjórna henni örugglega vegna áhrifa ávana- og
fíkniefna (í blóði mældist amfetamín 640 ng/ml og tetrahýdrókannabínól 11
ng/ml), inn á bifreiðastæði við Engihjalla 1, Kópavogi, þar sem lögregla hafði
afskipti af honum og á sama tíma haft í vörslum sínum 0,64 g marijúana sem
lögregla lagði hald á.
Telst þetta varða 1. mgr., sbr.
2. mgr., 45. gr. a. og 1. mgr. 48. gr., sbr. 1. mgr. 100. gr. umferðarlaga nr.
50/1987 og við 2. gr., sbr. 5. og 6. gr., laga um ávana- og fíkniefni nr.
65/1974, sbr. lög nr. 13/1985 og lög nr. 68/2001, og 2. gr., sbr. 1. mgr. 14.
gr., reglugerðar um ávana- og fíkniefni og önnur eftirlitsskyld efni nr. 233/2001,
sbr. reglugerð nr. 848/2002.
Þess er krafist að
ákærði verði dæmdur til refsingar og til greiðslu alls sakarkostnaðar. Fyrir
dóminum krafðist sækjandi þess einnig að þau efni, sem tilgreind væru í ákæru
og lögregla hefði lagt hald á, yrðu gerð upptæk.
Ákærði sótti ekki þing við þingfestingu málsins og hafði ekki boðað forföll en hafði verið birt ákæra og fyrirkall. Verður málið dæmt samkvæmt heimild í a-lið 1. mgr. 161. gr. laga nr. 88/2008 um meðferð sakamála enda var þess getið í fyrirkallinu að þannig gæti farið um meðferð málsins.
Með vísan til framanritaðs og til rannsóknargagna málsins telst framangreind háttsemi sönnuð og er hún rétt heimfærð til refsiákvæða í ákæru.
Ákærði er fæddur í apríl
1978. Samkvæmt framlögðu sakavottorði, dagsettu 19. febrúar 2018, hefur ákærði
margítrekað verið sakfelldur fyrir umferðarlagabrot. Ákærði var 29. september
2009 dæmdur í 45 daga fangelsi fyrir sviptingarakstur, akstur undir áhrifum
ávana- og fíkniefna og fíkniefnalagabrot. Þá var hann dæmdur í 15 daga fangelsi
fyrir sviptingarakstur og akstur undir áhrifum ávana- og fíkniefna með dómi, 8.
mars 2010. Var sá dómur hegningarauki við fyrrgreindan dóm frá 29. september
2009. Með dómi, 21. febrúar 2012, var ákærði dæmdur í 30 daga fangelsi fyrir
hrað- og sviptingarakstur. Þá var hann dæmdur í 60 daga fangelsi fyrir
sviptingarakstur, 11. október 2013. Nú síðast var ákærði dæmdur til að sæta
fangelsi í fjóra mánuði meðal annars fyrir sviptingarakstur með dómi,
uppkveðnum 17. júlí 2017. Sakaferill ákærða hefur að öðru leyti ekki þýðingu
við ákvörðun refsingar í málinu. Það brot sem ákærði er sakfelldur fyrir í
þessu máli samkvæmt fyrsta kafla ákæru var framið fyrir gerð sáttar sem ákærði
gekkst undir 3. mars 2017 og verður ákærða því dæmdur hegningarauki hvað það brot
varðar í samræmi við ákvæði 78. gr. almennra hegningarlaga nr. 19/1940.
Með hliðsjón af framangreindu,
sakarefni þessa máls sem og ákvæðum 77. gr. almennra hegningarlaga nr. 19/1940
þykir refsing ákærða hæfilega ákveðin fangelsi í fimm og hálfan mánuð (165
daga).
Með vísan til
lagaákvæða í ákæru er ákærði sviptur ökurétti í 12 mánuði frá birtingu dóms
þessa að telja.
Í ákæru er ekki að finna kröfu um upptöku þeirra efna sem tilgreind eru í ákæru. Samkvæmt 1. mgr. 180. gr. laga um meðferð sakamála nr. 88/2008 má hvorki dæma ákærða fyrir aðra hegðun en þá sem í ákæru greinir né heldur dæma aðrar kröfu á hendur honum. Að því virtu verður ákærði ekki dæmdur til þess að sæta upptöku áðurgreindra efna.
Ákærði greiði 29.630
krónur í sakarkostnað.
Lilja Rún
Sigurðardóttir, aðstoðarmaður dómara, kveður upp dóminn.
D Ó M S O
R Ð:
Ákærði, Guðmundur
Kristján Kristjónsson, sæti fangelsi í fimm og hálfan mánuð (165 daga).
Ákærði er sviptur
ökurétti í 12 mánuði frá birtingu dómsins að telja.
Ákærði greiði 29.630
krónur í sakarkostnað.
Lilja Rún Sigurðardóttir