Ákærði var sakfelldur fyrir skjalabrot og umferðarlagabrot. Með brotunum rauf ákærði skilorðsdóm og var sá dómur tekinn upp og refsing dæmd í einu lagi. Refsing ákærða var ákveðin fangelsi í 60 daga en fullnustu refsingarinnar frestað skilorðsbundið í þrjú ár. Þá var ákærði sviptur ökurétti í sjö mánuði, þar af þrjá vegna uppsafnaðra punkta.

Ákærði var sakfelldur fyrir umferðarlagabrot með því að hafa ekið bifreið sviptur ökurétti og óhæfur til að stjórna henni örugglega vegna áhrifa ávana- og fíkniefna, auk þess sem að hann var sakfelldur fyrir vörslur fíkniefna. Að virtum sakarferli ákærða og í samræmi við dómvenju var refsing hans ákveðin fangelsi í 45 daga. Þá var hann sviptur ökurétti ævilangt.

X var í tveimur ákæruliðum gefinn að sök fjárdráttur, en til vara umboðssvik, fyrir að hafa með nánar tilgreindum hætti dregið sér fjármuni einkahlutafélaganna B og A. Að því er fyrri ákærulið málsins varðaði þóttu rök ekki standa til þess að líta svo á að X hafi ætlað að auðgast með ólögmætum hætti á kostnað B ehf. með millifærslu af bankareikningi félagsins inn á sinn eigin og var hann því sýknaður af sakargiftum að því leyti, hvort heldur sem var að hafa brotið gegn 247. eða 249. gr. almennra hegningarlaga nr. 19/1940. Að því er síðari ákæruliðinn varðaði var X á hinn bóginn fundinn sekur um brot gegn 247. gr. þeirra laga með því að hafa í 18 skipti á nánar tilgreinda vegu dregið sér fé af bankareikningi A ehf. Var refsing X ákveðin fangelsi í tvo mánuði, en fullnustu hennar var frestað skilorðsbundið í tvö ár.

A höfðaði mál gegn B til heimtu skaðabóta vegna ætlaðrar ólögmætrar uppsagnar A úr starfi hjá B. Ekki var fallist á það með A að uppsögnin hefði komið til vegna atriða af því tagi að B hefði á grundvelli kjarasamnings borið að áminna A áður en til uppsagnarinnar hefði komið eða að ólögmæti uppsagnarinnar hefði falist í brotum B, sem er sveitarfélag, gegn málsmeðferðarreglum stjórnsýslulaga eða meginreglum stjórnsýsluréttar. Því var B sýknað af kröfum A.